Tinea Versicolor ညှင်း

 Tint Swe

 

Tinea Versicolor ညှင်း

မင်္ဂလာပါဆရာ ကျွန်မအမျိုးသားအသက်က ၃ဝ နှစ်ပါ။ ရန်ကုန်မှာနေပါတယ်။ ကျွန်မတို့အိမ်ထောင်ပြုတာ ငါးလကျော်ရှိပါပြီ။ မျက်နှာမှာညှင်းပေါက်နေတာပါဆရာ။ အရင်က နားရွက်နောက်နားမှာပဲရှိပြီးနဲပါတယ် ညှင်းဖြစ်နေတာတနှစ်ကျော်လောက်ရှိပါပြီ အခု မျက်နှာပါးပြင်ဘက်ပါ ကူးနေလို့ပါ။ နှစ်လလောက်ရှိပြီထင်တယ်။ တခါတလေအနားလေးတွေက ထူနေတာတွေ့ရပါတယ်ဆရာ။ ဘယ်လိုဆေးမျိုး သုံးသင့်တယ်ဆိုတာ ညွှန်ကြားပေးပါအုံးဆရာ။ နေထိုင်မှုပုံစံနဲ့ဆိုင်ပါသလား။ ပျောက်ကင်းအောင်လုပ်နိုင်ပါသလား။ ဖြေပေးပါအုံးနော်ဆရာ။ မေးခွန်းမှာ အမှားများပါသွားခဲ့ရင် ဆရာ့ကိုကြိုတင်ပြီးတောင်းပန်ပါတယ်နော်။ ဆရာကျန်းမာပါစေ။

မေးခွန်းထဲမှာ ယရစ်မပါတဲ့စာလုံး (၅) လုံးတွေ့ပါတယ်။ အဲလိုရေးကြတာကို ပါပီခေတ်လို့ခေါင်းစဉ်တပ်ပါတယ်။ ဆောရီး။
1. ငါးလကျော်ရှိပါပီ
2. နားရွက်နောက်နားမှာပဲ ရှိပီးနဲပါတယ်
3. တနှစ်ကျော်လောက်ရှိပါပီ
4. နှစ်လလောက်ရှိပီထင်တယ်
5. ကြိုတင်ပီးတောင်းပန်ပါတယ်နော်

Pityriasis Versicolor ညှင်းဆိုတာ Malassezia furfur ကြောင့်ဖြစ်ပြီး၊ အဖြူ-ပန်းရောင် ကတ္တီပါလို နူးညံ့တယ်။ ခန္ဓာကိုယ်အပေါ်ပိုင်းမှာ ဖြစ်တယ်။ ကူးစက်ရောဂါမဟုတ်ပါ။

မြန်မာပြည်မှာ အစစအရာရာအလွန်ရှားပါးတဲ့ (မဆလ) ခေတ်မှာ ဆေးရှာရတာ အတော်ခက်ခဲခဲ့တယ်။ ညှင်းပေါက်နေသူတွေကို အခုရေးမဲ့ဆေးတွေ မပေးနိုင်ဘူး။ နည်းပညာခေတ်ကလဲ ဖလင်နဲ့ရိုက်တဲ့ ကင်မရာခေတ်မို့၊ ဖလင်ဆေးတဲ့ (ဟိုက်ပို) ဆေးရည်အကျကို ဓါတ်ပုံဆိုင်ကတောင်းပြီး အလိမ်းခိုင်းခဲ့ရဘူးတယ်။ နောက်ပြီး Sodium thiosulfate ဆေးရည်လိုက်ရှာပြီး ပေးခဲ့ရသေးတယ်။ ဒီဆေးရည်က ဆေးပညာမှာလဲအတော်အသုံးကျတယ်။ Cyanide poisoning (စိုင်းယာနိုက်) အဆိပ်သင့်တာ၊ Sulfur mustard poisoning မုံညင်းငွေ့အဆိပ်သင့်တာတွေမှာလဲ သုံးတယ်။ Calciphylaxis ကျောက်ကပ်ဆေးနေရသူတွေ အခြေအနေဆိုရင်လဲပေးတတ်တယ်။ Ringworm ပွေး၊ Tineaversicolor ညှင်းအတွက်လဲပေးတယ်။

ခေတ်ပေါ်လိမ်းဆေးတွေ -
• Clotrimazole 1% solution တနေ့တခါ၊ တပါတ်ကြာလိမ်းပါ။ Clotrimazole (1%) + Selenium sulfide (2.5%) (Candid-TV) တွေကိုရောသုံးနိုင်တယ်။ Clotrimazole (Lotrimin, Mycelex) and Miconazole (Lotrimin) လိမ်းဆေးကိုတနေ့ ၂ ကြိမ်၊ ၁ဝ-၁၄ ရက်ကြာလိမ်းပါ။ Clotrimazole, Miconazole or Terbinafine လိမ်းဆေးတွေက ခံစားရတာကိုသက်သာစေတယ်။
• Fluconazole 150-300-400 mg ကို ၂ ပါတ်ခြားပြီး ၂ ခါပေးတာနဲ့ ထိရောက်တယ်။
• Hydrogen peroxide ကလဲအတူတူဘဲ။ ဒါပေမဲ့ အမာရွတ်ဖြစ်မှာစိုးရတယ်။
• Ketoconazole (Nizoral ointment and shampoo) လိမ်းဆေးဆိုရင် ၁ဝ မိနစ်ကြာ၊ နေ့စဉ် ၂ ပါတ်လိမ်းပါ။ Ketoconazole shampoo 1% or 2% လဲထပ်မဖြစ်အောင် ၃ပါတ်ကြာအောင် လိမ်းပါ။
• Selenium sulfide 2.5% lotion or Shampoo လိမ်းဆေး ၇-၁၄ ရက် လိမ်းပါ။ Selenium sulfide shampoo 1% (Selsun Blue) or 1% Ketoconazole shampoo (Nizoral) လိမ်းဆေးကို ၁၅ မိနစ်ကြာ၊ တပါတ်မှာ ၂ ကြိမ်၊ ၂-၄ ပါတ်ကြာလိမ်းပါ။ Selsun Blue ထဲမှာ 1% Selenium sulfide သာပါလို့ တချို့ကိုသာ ပျောက်စေတယ်။
• Terbinafine 1% solution တနေ့နှစ်ခါ တပါတ်ကြာလိမ်းပါ။

ခေတ်ပေါ်သောက်ဆေးတွေ -
• Fluconazole 400 mg (၁) ကြိမ်တည်းသောက်ပါ၊
• Itraconazole (Sporanox) ၅ ရက်သောက်ပါ။ Itraconazole 200-400 mg တရက်ခြား ၇ ရက် သောက်ပါ။Itraconazole 400 mg တနေ့ ၁ ကြိမ်၊ ၃-၇ ရက်သောက်ပါ။ သတိထားဘို့က Atorvastatin (Lipitor) ခေါ်တဲ့ (ကိုလက်စထော) ကျဆေးနဲ့ တွဲမပေးသင့်ပါ။
• Ketoconazole 200 mg တနေ့ ၁ ကြိမ်၊ ၇ ရက်သောက်ပါ။ Ketoconazole 400 mg (၁) ကြိမ်တည်းသောက်ပါ၊ (၁) ကြိမ်တည်းသောက်ဆေးသောက်ပြီးနောက် ၁-၂ နာရီအကြာမှာ လေ့ကျင့်ခန်းလုပ်လို့ ချွေးထွက်ရင် ပိုကောင်းတယ်။
• Ciclopirox (Ciclopiroxolamine) ဆေးကိုလဲအစားထိုးသုံးနိုင်တယ်။

ဒေါက်တာတင့်ဆွေ