# ကြီးပွားအောင်မြင်ဖို့ တက်လှမ်းရမယ့် လှေကားထစ် ၅၂ ခု #

 ဗန်းမော်သိန်းဖေရဲ့မျှဝေလိုသောအတွေးများ

 

# ကြီးပွားအောင်မြင်ဖို့ တက်လှမ်းရမယ့် လှေကားထစ် ၅၂ ခု #

လှေကားထစ်နံပါတ် (၁)။ တိကျတဲ့ ဘဝရည်မှန်းချက်။

လူတယောက်ရဲ့ အနာဂါတ်ကို အတတ်ဟောဖို့ သင်ဟာ ဗေဒင်ဆရာ လက္ခဏာဆရာ တစ်ယောက်ဖြစ်နေစရာ မလိုပါဘူး။ သူ့ကို မေးခွန်းတိုလေး ၂ ခုပဲ မေးကြည့်ဖို့ လိုပါတယ်။ အဲဒီမေးခွန်းက
"ခင်ဗျားဘဝရဲ့ တိကျတဲ့ရည်မှန်းချက် (definite purpose) ဟာ ဘာလဲ။ အဲဒီ ရည်မှန်းချက်ရောက်ဖို့ ဘာအစီအစဉ်တွေ ချမှတ်ထားသလဲ"

တကယ်လို့ လူ ၁၀၀ ကို မေးလိုက်ရင် လူ ၉၈ ယောက်လောက်က အခုလိုမျိုး ဖြေကြပါလိမ့်မယ်။
"ကျနော့်ဘဝမှာ အဆင်ပြေပြေနေရပြီး အောင်မြင်သင့်သလောက် အောင်မြင်ဖို့ပါ"

အဲဒီအဖြေဟာ အပေါ်ယံ ကြည့်ရင်တော့ ဟုတ်သလို မှန်သလိုပါပဲ။ ဒါပေမဲ့ အတွင်းကျကျ အလေးအနက် စဉ်းစားလိုက်ရင် အဲဒီဖြေသူဟာ ဘဝရေစီးကြောင်းမှာ အလိုက်သင့် မျောပါနေသူတယောက်၊ အောင်မြင်ကြီးပွားမယ့်သူ မဟုတ်ဘူးဆိုတာ သိသာပါတယ်။ ဘာကြောင့် ခုလို ပြောနိုင်ရတာလဲ။ သူ့မှာ တိကျတဲ့ ဘဝရည်မှန်းချက်မရှိဘူး။ ရည်မှန်းချက်ကို အကောင်အထည်ဖေါ်မယ့် အစီအစဉ် မရှိလို့ပါ။

လွန်ခဲ့တဲ့ နှစ်အတော်ကြာကြာတုန်းက ကျနော်ဟာ ဒါးလတ်စ်မြို့မှာ Steward Austin Wier နဲ့ အသိမိတ်ဆွေ ဖြစ်ခဲ့ဖူးတယ်။ သူက ကျနော်လုပ်နေတဲ့ သတင်းစာတိုက်ကို ဆောင်းပါးလေးတွေ မှန်မှန်ရေးပြီး ပို့နေသူပါ။ ဆောင်းပါးရေးခ ရတဲ့ပိုက်ဆံလေးနဲ့ စားနေရတာပါ။

သူဟာ တနေ့မှာ အောင်မြင်နေတဲ့ တီထွင်သူတစ်ယောက်ကို အင်တာဗျူးလုပ် မေးမြန်းပြီး သူ့အကြောင်း ဆောင်းပါးတပုဒ် ရေးပါတယ်။ Steward ဟာ သူ့အကြောင်းကို ရေးရင်းနဲ့ သူ့လို အောင်မြင်ချင်စိတ်ပေါ်လာတယ်။ သူဟာ ဆောင်းပါးရေးတဲ့ အလုပ်ကနေ နားပြီး ရှေ့နေတစ်ယောက် ဖြစ်လာဖို့ ကျောင်းပြန်တက်မယ်လို့ သူ့သူငယ်ချင်းတွေကို ပြောပြတယ်။ သူက အမေရိကန်တနိုင်ငံလုံးမှာ အတော်ဆုံး ရှေ့နေတစ်ယောက် ဖြစ်လာရမယ်လို့ ပြောလိုက်တယ်။ သူ့သူငယ်ချင်းတွေက မယုံကြဘူး။ ဒါပေမဲ့ သူဖြစ်ချင်တဲ့ ရှေ့နေတစ်ယောက် တကယ်ပဲ ဖြစ်လာခဲ့ပါတယ်။

ရှေ့နေဖြစ်ပြီးတာနဲ့ သူဟာ အခက်ခဲဆုံးအမှုတွေကို လိုက်ပါဆောင်ရွက်ပေးတယ်။ အမှုကြီးတွေ အတော်များများမှာ အနိုင်ရလို့ သူဟာ နာမည်ရလာတယ်။ အမှုသယ်တွေ အများကြီး သူ့ဆီ အမှုလာအပ်ကြတယ်။ သူ့ဝင်ငွေ အရမ်းကောင်းလာတယ်။ အလုပ် မနိုင်တော့လို့ လာအပ်တဲ့ အမှုတချို့ကို ငြင်းပယ်လိုက်ရတယ်။

သူ ဘာလို့ အောင်မြင်သွားရတာလဲ။ တိကျတဲ့ ရည်မှန်းချက်ရှိပြီး အဲဒီရည်မှန်းချက်ရောက်ဖို့ အစီအစဉ်တွေ ချမှတ်လုပ်ဆောင်ခဲ့လို့ပါ။

သင့်မှာ ရည်မှန်းချက် တိတိကျကျ မရှိရင် ဘဝမှာ ဘယ်လိုအောင်မြင်မှာလဲ။ သင်ကိုယ်တိုင် ဘာဖြစ်ချင်မှန်း မသိရင် သင့်အပေါင်းအသင်းတွေက သင့်ကို ဘယ်လို ကူညီနိုင်မှာလဲ။ တိကျတဲ့ ဘဝရည်မှန်းချက်ရှိမှသာ အကောင်အထည်ဖေါ်တဲ့အခါ တွေ့ကြုံလာမယ့် အခက်အခဲတွေကို ရင်ဆိုင်ဖြေရှင်းကျော်လွှားနိုင်မှာပါ။

နောက်တယောက် ရှိသေးတယ်။ သူ့နာမည်က Lee Maranz ပါ။ စက်မှုအင်ဂျင်နီယာတစ်ယောက်ပါ။ အိုက်စကရင်းမုံ့ကို အအေးခံတဲ့ စက်တစ်လုံးကို တီထွင်လိုက်တယ်။ ဒါပေမဲ့ သူက အမေရိကန်နိုင်ငံတခွင်မှာ အိုက်စကရင်းမုံ့ရောင်းတဲ့ ဆိုင်တွေ အများကြီးပေါ်လာတာကို မြင်ချင်နေတယ်။ သူဖြစ်ချင်တာကို လုပ်ဖို့ အစီအစဉ်တွေ ချမှတ်လုပ်ဆောင်တယ်။

သူက အိုက်စကရင်ဆိုင် ဖွင့်ချင်သူတွေကို ဆိုင်ခန်းပုံစံတွေ ဆွဲပေးတယ်။ သူ့ အိုက်စကရင် အအေးခံစက်တွေကို အကြွေးနဲ့ ရောင်းပေးတယ်။ မကြာခင် သူ့ရဲ့အအေးခံစက်တွေ အများကြီး ရောင်းရသလို သူမြင်ချင်တဲ့ အိုက်စကရင်းဆိုင်တွေ အမေရိကန်နိုင်ငံမှာ အများအပြား ပေါ်ပေါက်လာခဲ့တယ်။

သင့်မှာ သင်ဖြစ်ချင်တာ ဖြစ်ကိုဖြစ်ရမယ်ဆိုတဲ့ ယုံကြည်ချက်ရှိနေရင် ဘယ်လိုအခက်အခဲကိုဖြစ်ဖြစ် ဖြေရှင်းကျော်လွှားနိုင်မှာပါ။

သင်ဘဝမှာ အောင်မြင်မှုရချင်ရင် အိပ်ပျော်မနေပါနဲ့တော့။ အိပ်ယာက နိူးထပြီး တိကျတဲ့ ရည်မှန်းချက်တစ်ခုကို ခုချက်ချင်း ချမှတ်လိုက်ပါ။ အဲဒါကို စာရွက်ပေါ်မှာ ချရေးလိုက်ပါ။ မမေ့အောင် နေ့စဉ်ဖတ်ပါ။ မနက်အိပ်ယာထ တစ်ကြိမ်နဲ့ ညမအိပ်ခင် တစ်ကြိမ် အသံထွက်ဖတ်ပါ။ နောက်ပြီး အဲဒီရည်မှန်းချက်ဆီ ရောက်စေဖို့ ဘာတွေလုပ်ရမယ်ဆိုတဲ့ အစီအစဉ်တွေ ချရေးလိုက်ပါ။ ပြီးတာနဲ့ အကောင်အထည် စဖေါ်ပါ။ ဘယ်တော့ လုပ်ရမှာလဲ။ အခု လုပ်ရမှာပါ။ မြန်မြန်ချမ်းသာချင်ရင် အချိန် ဆွဲမနေပါနဲ့။

သင် အနာဂါတ်မှာ အောင်မြင်ကြီးပွားသူ တစ်ယောက်ဖြစ်လာဖို့ ဘယ်သူ့ကိုမှ အားကိုးလို့ မရပါဘူး။ ကိုယ်အားကိုယ် ကိုးရမှာပဲဆိုတာ စွဲစွဲမြဲမြဲ မှတ်သားထားပါ။

"Napolean Hill Foundation" က ရေးသားထုတ်ဝေတဲ့ "52 Steps to Achieving Life's Rewards" စာအုပ်ပါ ဆောင်းပါးကို မှီးထားတာပါ။

ဗန်းမော်သိန်းဖေ
၃၁-၀၇-၂၀၁၆