ရန်ကုန်မြို့သည် မြန်မာနိုင်ငံ၏ စီးပွားရေး မြို့တော်ဖြစ်သည်။ ဘ၀၀မ်းရေး အတွက်နဲ့ ဘ၀ရည်မှန်းချက် တိုးတက်မြင့်မားရေး အတွက် ရွှေ့ပြောင်း လုပ်ကိုင်သူများ အများဆုံး ဖြစ်သည်။ ရန်ကုန်မြို့သို့ ရွှေ့ပြောင်း လုပ်ကိုင်သူ အများစုမှာ လှိုင်သာယာတွင် နေထိုင်ကြသည်။
လှိုင်သာယာတွင် စက်မှုဇုန် အများအပြား ရှိသည်။ လူဦးရေ ခုနစ်သိန်းကျော် နေထိုင်ကြသည်။ လူဦးရေ များပြားသလို ရာဇ၀တ်မှုတွေကလည်း များပြားလှသည်။ လူဆိုး၊ လူမိုက်များ ပေါသည့် မြို့နယ် အဖြစ် ထင်ရှားသည်။
ည (၈) နာရီကျော်ရင် TAXI သမားများမှာ မလိုက်ချင်ကြပေ။ လုယက်မှုများပြားလှသည်။ လူမိုက်များ မွေးထားသော ကျောင်းသား (လူမိုက်များ၏ တပည့်များ) တွေက ဆက်ကြေး တောင်းကြသည်။ သမီးရည်းစား အတွဲတွေဆိုလျှင် ပစ္စည်းလု မိန်းကလေးများကို မုဒိမ်းကျင့်မှုများလည်း ကြားနေရသည်။ ရန်ကုန်လို တခြား မြို့နယ်များမှ ပြစ်မှုကျူးလွန်သူများသည် လှိုင်သာယာသို့ ထွက်ပြေး တိမ်းရှောင်မှုများ ရှိသည်။ အကြွေးတောင်းတာက အစ လူမိုက်ကို တောင်းခိုင်းသည်။ လှိုင်သာယာသည် လူမိုက်များ ကြီးစိုးနေသည်။ ဒေသခံ ပြည်သူများလည်း လုံခြုံမှုမရှိ။ လူမိုက်များ၏ ရန်ကိုကြောက်လန့် နေကြသည်။ စိုးရိမ်နေကြသည်။
''ကျူးကျော်နေတဲ့ သူတွေဆီကလည်း ဆက်ကြေးကောက်တယ်။ သူတို့လိုရင် တစ်မျိုး ၊ မလိုရင်တစ်မျိုး ဆက်ဆံတယ်။ ဒီလိုပဲ သည်းခံနေရတာပဲ'' ဟု လှိုင်သာယာမြို့နယ်၊ ရွှေလင်ပန်းချောင်း အနီးတွင် နေထိုင်သူ အမျိုးသမီး တစ်ဦးက ဆိုသည်။
ဖမ်းဆီး အရေးမယူမီ တစ်ပတ်အလိုတွင် လူမှုကွန်ရက် စာမျက်နှာပေါ်သို့ လူမိုက်ဟု ဆိုသူများကို ဓာတ်ပုံနှင့်တကွ ဖော်ပြခဲ့ကြသည်။
ပြီးခဲ့သည့် သီတင်းပတ်ကလည်း လှိုင်သာယာ၊ အင်းစိန်နှင့် ရွှေပြည်သာ မြို့နယ်များတွင် နာမည်ကြီးနေသော လူမိုက်အဖွဲ့များကို စီမံချက်ဖြင့် ဖမ်းဆီး အရေးယူခဲ့သည်။
ယင်းသို့ ဖမ်းဆီးရာတွင် နှစ်ရက်အတွင်း လူမိုက် ခေါင်းဆောင်ဟု ယူဆရသည့် အမျိုးသမီး တစ်ဦးအပါ အ၀င် စုစုပေါင်း ကိုးဦးကို ဖမ်းဆီးထားကြောင်း ရဲတပ်ဖွဲ့ထံမှ သိရသည်။
''အခုလောလောဆယ်တော့ ခေါင်းဆောင်လို့ ယူဆရတဲ့ သူကိုးဦးကို ဖမ်းဆီးထားတယ်။ လွတ်မြောက် နေသေးတဲ့သူ ခြောက်ဦး ရှိသေးတယ်။ အဲဒီလူတွေ ဖမ်းဆီးနိုင်ဖို့ ဆက်လက် စုံစမ်းနေတယ်'' ဟု ရန်ကုန်တိုင်း ဒေသကြီး ရဲတပ်ဖွဲ့မူးရုံးမှ ရဲမူးတစ်ဦးက ပြောသည်။
လူဆိုး လူမိုက်များကြောင့် ပြည်သူများမှာ ထိတ်လန့်နေကြရသည့် အပြင် တရားဥပဒေ စိုးမိုးရေးကို ထိခိုက်လာသည့် အတွက် စီမံချက်ဖြင့် ဖမ်းဆီးနေခြင်း ဖြစ်ကြောင်း သိရသည်။
ဆက်ကြေး တောင်းခြင်း၊ အုပ်စုဖွဲ့ ရမ်းကားခြင်း၊ အခကြေးငွေ ရယူပြီး ဥပဒေနှင့် မညီညွတ်သည့် လုပ်ရပ်များ အပြင် မူးယစ်ဆေးဝါး ရောင်းချမှုများကိုပါ လူဆိုး လူမိုက်များက လုပ်ဆောင်နေခြင်း ဖြစ်ကြောင်း လှိုင်သာယာမြို့နယ်တွင် နေထိုင်သူများက ပြောဆိုကြသည်။
လက်ရှိ ဖမ်းဆီးထားသည့် လူမိုက် ကိုးဦးအား ပြစ်မှုပုဒ်မ ၅(ခ) (စ)(ဆ) ဖြင့် အမှုဖွင့်ကာ သက်ဆိုင်ရာ ရဲစခန်းများတွင် အရေးယူ စစ်ဆေးနေပြီး၊ ကျန်ရှိသည့် ခြောက်ဦးကိုလည်း အမြန်ဆုံး ဖမ်းဆီးနိုင်ရေး အတွက် စုံစမ်းနေကြောင်း သက်ဆိုင်ရာ ရဲစခန်းများထံမှ သိရသည်။
''လူဆိုးတွေ ဂိုဏ်းဖွဲ့ပြီး ပြစ်မှု ကျူးလွန်တာတော့ မရှိပါဘူး။ အခု ဖမ်းထားတဲ့ သူတွေကို ဂိုဏ်းဖွဲ့ထားတာတွေရှိ မရှိသေချာ စစ်ဆေးနေတယ်။ သူတို့ပြစ်မှုကျူးလွန်တယ် ဆိုရင်တော့ အရေးယူရမှာပေါ့'' ဟု လှိုင်သာယာ မြို့မရဲစခန်းမှ စခန်းမူး ဒုရဲမူးသန်းမြင့်ဦးက ပြောသည်။
အဆိုပါ လူဆိုးဂိုဏ်းများနှင့် ပတ်သက်၍ သိရှိပါကလည်း မြို့မ ရဲစခန်းသို့ အမြန်ဆုံး အကြောင်းကြားပါက စစ်ဆေး ဖော်ထုတ် ဖမ်းဆီးသွားမည် ဖြစ်ကြောင်း ၎င်းကပြောသည်။
ယင်းအပြင် မြို့နယ်အတွင်း နေထိုင်ကြသည့် ပြည်သူများ၊ သက်ကြီး ရွယ်အိုများ၊ အမျိုးသမီးများမှာလည်း နေ့စဉ်စိုးရိမ် ထိတ်လန့်နေရသည်ဖြစ်၍ သက်ဆိုင်ရာ တာဝန်ရှိ အဖွဲ့အစည်းများ အနေဖြင့် လူဆိုးလူမိုက်များအား သေချာ ရှင်းလင်းဖယ်ရှားရန် လိုအပ်သည်။
''ဒီလို လူဆိုးလူမိုက်တွေ များနေတာ တရားဥပဒေ မစိုးမိုးလို့ပေါ့။ အုပ်ချုပ်ရေးပိုင်းက အားနည်းချက်တွေ ရှိနေလို့ပေါ့။ ဒါကြောင့် ထိရောက်တဲ့ ဥပဒေတွေကို အကောင်အထည်ဖော်ရမယ်'' ဟု လှိုင်သာယာမြို့နယ် ရန်ကုန်တိုင်း ဒေသကြီး လွှတ်တော် ကိုယ်စားလှယ် ဦးနေလင်းက ပြောသည်။
လှိုင်သာယာ မြို့နယ်အတွင်း တရားဥပဒေ စိုးမိုးရေးနှင့် ပြည်သူများ အေးချမ်းစွာ နေထိုင်နိုင်ရေး အတွက် လာမည့် အစိုးရသစ် လက်ထက်တွင် ထိရောက် ခိုင်မာသည့် ဥပဒေများကို အကောင်အထည်ဖော်ရန် လိုအပ်ကြောင်း ဦးနေလင်းက သုံးသပ်ပြောသည်။
လှိုင်သာယာ မြို့နယ်အတွင်း ပြီးခဲ့သည့် နှစ်အတွင်းက ရဲတပ်ဖွဲ့ဝင် အင်အားမှာ အရာရှိ (၂၄) ဦးနှင့် အခြား အဆင့် (၁၆၃) ဦးသာ ရှိသဖြင့် တရားဥပဒေ စိုးမိုးရေး လုပ်ငန်းများကို ဆောင်ရွက်ရာတွင် ရဲတပ်ဖွဲ့ဝင် အချိုးအစား မညီမျှသဖြင့် အခက်အခဲ ရှိကြောင်း ရန်ကုန်တိုင်း ဒေသကြီး လွှတ်တော်တွင် လုံခြုံရေး ၀န်ကြီးက ပြောကြားထားသည်။
သို့ဖြစ်၍ တရားဥပဒေ စိုးမိုးရေး လုပ်ငန်းများ ဆောင်ရွက်နိုင်ရန် နယ်မြေ ရဲစခန်းကို ထပ်မံတည် ဆောက်သွားမည့် အပြင် ရဲတပ်ဖွဲ့ဝင် အင်အားကိုလည်း တိုးမြှင့်ချထားမည် ဖြစ်ကြောင်း ပြောကြားခဲ့သည်။
လုံခြုံရေးဝန်ကြီးက ပြီးခဲ့သည့်နှစ် အတွင်း အထက်ပါ အတိုင်း ပြောကြားခဲ့သော်လည်း ယခုလက်ရှိ လှိုင်သာယာ မြို့နယ်သည် မှုခင်းဖြစ်ပွားမှု အများဆုံး ဖြစ်သည့် မြို့နယ် တစ်ခုဖြစ်သည့် အပြင် လူဆိုးလူမိုက်များ ကျင်လည် ကျက်စားနေသည့် နေရာ ဖြစ်နေခဲ့သည်။
ထို့ကြောင့် လှိုင်သာယာ မြို့နယ်အနေဖြင့် တရားဥပဒေ စိုးမိုးမှု မရှိသည့် မြို့နယ်တစ်ခု ဖြစ်နေပြီး၊ လူဆိုးလူမိုက်များ အတွက် ငွေကြေးမြောက်မြားစွာ ရရှိနေသည့် ပျော်ရွှင်စရာ မြို့တော် ဖြစ်နေသည်။
ဖိုးသူတော် (www.phothutaw.com)
Credit:Messenger
No comments:
Post a Comment
မိတ်ဆွေ...အချိန်လေးရရင် blogg မှာစာလာဖတ်ပါနော်
ဗဟုသုတ ရနိုင်တယ်။