ဘင်လာဒင်၏ နောက်ဆုံးညများ ( ၁-၂-၃-၄)

 

Zaw Win

 

ဘင်လာဒင်၏ နောက်ဆုံးညများ ( ၁ )

၂ဝ၁၁ ခုနှစ် မေလ ၁ ရက် တနင်္ဂနွေနေ့ ညသန်းခေါင်။ တနင်္လာနေ့သို့အကူး။ ထိုနေ့သည် အိုစမာဘင်လာဒင် လူ့ဘဝတွင် အသက်ရှင် နေထိုင်ခဲ့သော နောက်ဆုံးနေ့ ဖြစ်သည်။ အာဖဂန်နစ္စတန် စံတော်ချိန် ည ၁၂နာရီ ။ အာဖဂန်ရှိ ဂျလာလာဘတ် အမေရိကန် စစ်စခန်းမှ ဘလက်ဟော့ခ် MH-60 အမျိုးအစား ရဟတ်ယာဉ် နှစ်စင်း။ ချင်းနွတ် Chinook ရဟတ်ယာဉ် သုံးစင်းတို့ ပျံတက်လာကြသည်။

ဘလက်ဟော့ရဟတ်ယာဉ် နှစ်စင်းပေါ်တွင် ရေတပ် အထူးတပ်ဖွဲ့ဝင် Navy SEAL ၂၄ ဦး၊ စကားပြန်တစ်ဦးနှင့် စစ်ခွေးတစ်ကောင်တို့ လိုက်ပါလာသည်။ ရဟတ်ယာဉ်လေထဲသို့ ရောက်လာသည်အခါတွင်မှ ဦးတည်သွားရမည့် ပစ်မှတ် တည်နေရာ အညွှန်း GPS ကို လက်ခံရရှိသည်။ ရန်သူ့ရေဒါပေါ်တွင် မမြင်နိုင်စေရန် ပြုပြင်တည်ဆောက်ထားသည့် ကိုယ်ပျောက် ရဟတ်ယာဉ်များ ဖြစ်သော်လည်း ရေဒါလှိုင်းကို တတ်နိုင်သမျှ ကွင်းရှောင်သောအားဖြင့် ငါးစင်းစလုံး သစ်ပင်ထိပ်ဖျား အမြင့်ခန့်သာ ခိုင်ဘာ- Khyber တောင်ကြားအတိုင်း ပျံသန်းလာကြသည်။ ချင်းနွတ်ရဟတ်ယာဉ် သုံးစင်းသည် ခရီးသုံးချိုးနှစ်ချိုး အရောက်၌ မြေပြင်တွင် ဆင်းသက်ကာ တောင်ကြားတစ်ခုတွင် အရန်အဖြစ် ခိုနေခဲ့သည်။ ထိုစစ်ဆင်ရေးကို ဂျရောနီမိုဟု အမည်ပေးထားသည်။

လိုက်ပါလာသော စစ်ခွေး၏ အမည်မှာ ကိုင်ရို ဖြစ်သည်။ ဂျာမန် ရှက်ပတ် ခွေးမျိုးဖြစ်သည်။ သူ့အား ကျည်ကာအင်္ကျီ ဝတ်ပေးထားပြီး၊ ဒေါ်လာသုံးသောင်းတန် ညမြင်ဗီဒီယို ကင်မရာ Infrared Video Camera တစ်လုံးလည်း တပ်ပေးထားသည်။ ထို့ကြောင့် ညအမှောင်ထဲတွင် ခွေးမြင်နေသမျှကို ခွေးထိန်းကလည်း မြင်နိုင်သည်။ ဝင်ရောက်စီးနင်းသည့် အခါ ထွက်ပြေးသူ ရှိပါက ခွေးဖြင့် လိုက်ဖမ်းနိုင်ရန် ဖြစ်သည်။ လေ့ကျင့်ထားသော စစ်ခွေးတစ်ကောင်သည် ဒေါ်လာ ငါးသောင်း ခန့်တန်သည်ဟု ဆိုသည်။

ခရီးဆက်လာသော ဘလက်ဟော့ နှစ်စင်းသည် ပက်ရှဝါ မြို့၏ မီးရောင်များကို နောက်တွင် ချန်ထားခဲ့ပြီး ဆိတ်ငြိမ် နေသော အဘော့တာဘတ်မြို့ပေါ်သို့ ရောက်လာသည်။ ည ၁၂ နာရီ ၃ဝ မိနစ်တွင် ဖြစ်သည်။ မြို့သည် ဆိတ်ငြိမ်အိပ်မော ကျလျက်။

အဘော့တဘတ်မြို့သည် လူဦးရေ တစ်သိန်းနှစ်သောင်း ရှိသော တောင်စခန်း တပ်မြို့လေး ဖြစ်သည်။ စိမ်းစိုသော တောင်ကုန်းများ နွေရာသီတွင် အရာရှိကြီးများ လာရောက် အပန်းဖြေလေ့ရှိသည်။ ဝိုင်းရံထားသည့် သာယာလှပသော မြို့လေးဖြစ်သည်။ တိုက်ဖော်တိုက်ဘက် မိတ်ဆွေများနှင့် နီးနီးနားနားနေလိုသော အငြိမ်းစား တပ်မတော်အရာရှိများ နေထိုင်ရာမြို့လည်း ဖြစ်သည်။ ၁၈၅၃ ခုနှစ်တွင် မြို့ကို တည်ထောင်ခဲ့သူ ဗြိတိသျှ စစ်တပ်မှ ဗိုလ်မှူး ဂျိမ်းအဘိုး -Major James Abbo ကို အစွဲပြုလျက် မြို့အမည်ကို ပေးထားခြင်း ဖြစ်သည်။ ဂုဏ်သတင်းကြီးလှသည့် ပါကစ္စတန် စစ်တက္ကသိုလ် တည်ရှိရာနှင့် ပါကစ္စတန် အမှတ်-၂ တပ်မဟာ စခန်းချရာလည်း ဖြစ်သည်။

ရဟတ်ယာဉ်များ ပါကစ္စတန်ပိုင်နက်အတွင်း ကျူးကျော် ဝင်ရောက်လာသည့် အချိန်သည် ညဉ့်နက်သန်းခေါင်ကျော် ဖြစ်သဖြင့် မြို့သူမြို့သား အများစုမှာ အိပ်မောကျလျက်။ ရှေ့နေ၊ ဆရာဝန်နှင့် အငြိမ်းစားတပ်မတော် အရာရှိများလည်း အိပ်စက်နေကြပေမည်။ အဓိက ပစ်မှတ်ဖြစ်သော အိုစမာ ဘင်လာဒင် တစ်ယောက် အိပ်ရာဝင်ခါနီးဆဲဆဲ။

ထိုနေရာမှ ကမ္ဘာတစ်ဝက် ခရီးအကွာအဝေး၌ရှိ အမေရိကန် သမ္မတ အိမ်ဖြူတော်တွင် တနင်္ဂနွေနေ့ နေ့လယ်ပိုင်း ဖြစ်သည်။ အိမ်ဖြူတော် အရေးပေါ်ခန်းမ - Situation Room တွင် ထိပ်တန်းအရာရှိကြီးများဖြင့် ပြည့်ကြပ်နေသည်။ အချို့အတွက် ထိုင်စရာပင် မရှိသဖြင့် မိုးတိုးမတ်တတ်ရပ် နေကြရသည်။ နံရံတွင် ချိတ်ဆွဲထားသော ရုပ်မြင်ဖန်သားပြင်ပေါ်၌ လှုပ်ရှားနေသည့် ရေတပ်အထူး တပ်ဖွဲ့ဝင်များပေါ်တွင် အားလုံး၏ မျက်လုံးအစုံတို့က စူးစိုက်လျက်သား။ ထိုနေ့က အိမ်ဖြူတော် အနောက်ဘက်ဆောင်သို့ ကမ္ဘာလှည့် ခရီးသွားများ ဝင်ရောက်ကြည့်ရှုခွင့်ကို ပိတ်ထားသည်။ အိုဘားမား၏ ထိပ်တန်းအရာရှိကြီးများ ပျားပန်းခပ်နေသည်ကို မမြင်စေလို၍ ဖြစ်မည်။

နံရံတွင် ကပ်လျက်သားရှိနေသည့် ခုံပုလေးပေါ်တွင် သမ္မတ အိုဘားမားက ထိုင်နေသည်။ သူ၏ မျက်လုံးအစုံသည်လည်း ဖန်သားမျက်နှာပြင်၌ပေါ်သာ ရှိနေသည်။

စိုးရိမ်သောက စိတ်ကြောင့် သူ့မျက်စိုးရိမ်သောက စိတ်ကြောင့် သူ့မျက်နှာက တင်းမာနေသယောင်။ အခြား နိုင်ငံတစ်နိုင်ငံ၏ ပိုင်နက်နယ်မြေ အတွင်း အမေရိကန် တပ်ဖွဲ့ဝင်များ ကျူးကျော်ဝင်ရောက်ခြင်းကို ခွင့်ပြုပေးနိုင်သည့် အဆုံးအစွန်သော အာဏာကို ကိုင်စွဲထားသူ ဖြစ်သည်။ သို့သော် ယခု ဖန်သားပြင်ပေါ်တွင် မြင်နေရသည့် ဖြစ်စဉ်များကိုမူ သူ၏ အာဏာဖြင့် ထိန်းချုပ်နိုင်စွမ်း မရှိတော့။ ဘုရားတပြီး ထိုင်ကြည့် နေရုံမျှသာ။

ဘင်လာဒင်အား မည်သို့ အရေးယူ ဆောင်ရွက်သင့်သည်ကို သူတို့ အကြိမ်ကြိမ် ဆွေးနွေးခဲ့ပြီး ဖြစ်သည်။ လွန်ခဲ့သော သုံးရက်က ပြုလုပ်ခဲ့သည့် အမျိုးသား လုံခြုံရေးကောင်စီ အစည်းအဝေးတွင် ဆွေးနွေးချက်များအရ အိုဘားမား အနေဖြင့် ဘင်လာဒင်နှင့် ပတ်သက်၍ လုပ်ဆောင်နိုင်သည်များကို ပိုမိုပီပီပြင်ပြင် သိခဲ့ရသည်။ အဘော့တာဘတ်မြို့ရှိ ခြံဝင်းကို ထောက်လှမ်းရေး ဂြိုလ်တုများဖြင့် စောင့်ကြည့်ပြီး ဘင်လာဒင်ထွက် အလာကိုစောင့်ရန်။ ဘီ-၂ ဗုံးကြဲ လေယာဉ်ဖြင့် ခြံဝင်းကို မြေလှန်ပစ်ရန်။ အထူးတပ်ဖွဲ့ စေလွှတ်ပြီး ဘင်လာဒင်ကို ဖမ်းဆီးရန်ဟူသည့် ရွေးချယ်ရမည့် နည်းလမ်းသုံးသွယ် ပေါ်ထွက်လာသည်။ အဖြေမရှိသော မေးခွန်းတွေကလည်း အများအပြား။

ဆိုမာလီယာနှင့် ဆူဒန်တို့တွင် အယ်လ်ကိုင်ဒါများကို ဒုံးဖြင့် တိုက်ခိုက်ခဲ့သည့် ယခင်အစဉ်အလာများ ရှိခဲ့သည်ဟု ဆိုသည်။ တိုက်ခိုက်ပြီး ပြီးချင်း ပစ်မှတ်တို့၏ ဒီအင်န်အေ အစအနများကို အပျက်အစီးများ ကြားမှ ရဟတ်ယာဉ်ဖြင့် ဝင်ကောက်ရသည့် အဖြစ်မျိုး ရှိခဲ့သည်ဟု ဆိုသည်။ သို့သော် ထိုနည်းသည် အတော်ပင် စွန့်စားရသော အလုပ်ဖြစ်သည်။ တိုက်ခိုက်ခံလိုက်ရသဖြင့် နောက်ထပ် တိုက်ခိုက်လာမည်ကို ရန်သူက မြေပြင်မှ အသင့်ပြင် စောင့်ဆိုင်းနေခိုက် ဝင်ကောက်ရသည်ဖြစ်ရာ အတော်ပင် အန္တရာယ်များလှသည်။

ယခုကိစ္စ၌ ထောက်လှမ်းရေး သတင်းသည် မည်မျှတိကျမှု ရှိသနည်း။ ငါးဆယ်မှ ရှစ်ဆယ်ရာနှုန်းသာ။ မည်မျှ လွဲချော်မှားယွင်း နိုင်သနည်း။ ခွက်ခွက်လန် မှားကုန်၊ ယွင်းကုန်နိုင်သည်။ အထူးတပ်ဖွဲ့ဝင်များ ဓားစာခံအဖြစ် အဖမ်းခံရနိုင်သည်။ ဝန်ချတောင်းပန်ရသည့် အရှက်တကွဲ အခြေအနေမျိုးနှင့်လည်း ကြုံနိုင်သည်။ ၁၉၈ဝ ပြည့်နှစ်တွင် တဟီရန်၌ ဓားစာခံအဖြစ် အဖမ်းခံထားရသော အမေရိကန် သံဝန်ထမ်းများကို ကယ်ဆယ်ရန် အမေရိကန် အထူးတပ်ဖွဲ့များ စေလွှတ်ခဲ့စဉ်က အလွဲလွဲ အချော်ချော်ဖြစ်ကာ အရှက်ကွဲ ခဲ့ရသည်။ ထို့ကြောင့် သမ္မတ ဂျင်မီကာတာသည် ဒုတိယ သက်တမ်းအတွက် ပြန်အရွေး မခံရတော့။ ထိုအဖြစ်အပျက်ကို အိမ်ဖြူတော် အကြံပေးအရာရှိများ မမေ့နိုင်ကြသေးပေ။ ဘင်လာဒင် ကိစ္စကို မဆုံးဖြတ်နိုင်ဘဲ ကြာရှည်မျောနေ၍လည်း မဖြစ်။ သတင်းပေါက်ကြားကာ အုတ်အော်သောင်းတင်း ဖြစ်ကုန်မည်။ ဝင်ရောက်စီးနင်းရေး အစီအစဉ်ကို သိရှိထားသူပေါင်း တစ်ရာကျော်နေပြီ ဖြစ်သည်။ ပါးစပ်ပေါက် တစ်ရာကျော်ကို ကြာကြာပိတ်ထား၍ မရနိုင်။ ဗုံးကြဲလျှင် အားလုံးအမှုန့် ဖြစ်သွားမည်။ ထိုအထဲတွင် ဘင်လာဒင် ပါ-မပါ မသိနိုင်။ ဒီအင်အေ စစ်ဆေးနိုင်သည် ဆိုသော်လည်း လူအများက ယုံကြမည် မဟုတ်။ မည်မည်ရရ သက်သေအထောက်အထား ကျန်မည်မဟုတ်။ ဒီအင်အေ သက်သေဆိုသည်မှာလည်း မြင်သာထင်သာ မရှိလှသဖြင့် အများက လွယ်လွယ်ကူကူ လက်ခံလိမ့်မည်မဟုတ်။ အထူးတပ်ဖွဲ့ဖြင့် ကျူးကျော်စီးနင်းတိုက် ခိုက်မည်ဆိုလျှင် နဂိုတည်းက လှုပ်လီလှုပ်လဲ့ ဖြစ်နေသော ပါကစ္စတန်-အမေရိကန် ဆက်ဆံရေးသည် စုန်း စုန်းမြုပ်သွားနိုင်သည်။

အထူးတပ်ဖွဲ့ဝင်များ၏ ဖိုင်ဘာ ခမောက်တွင် တပ်ဆင်ထားသော ရုပ်မြင်ကင်မရာက ဂြိုလ်တုသို့ လွှင့်တင်ပေးနေသည်။ ဂြိုလ်တုမှတစ်ဆင့် ရောက်လာသော ရုပ်မြင်ဖန်သားပေါ်တွင် မြင်နေရသည့် မြင်ကွင်းမှာ အသည်းထိတ်စရာ။ အမေရိကန်၏ ဂုဏ်သိက္ခာနှင့် သံတမန်ဆက် ဆံရေးကို လောင်းကြေးထပ်ထားရသော စွန့်စားမှု ဖြစ်သည်။

ရဟတ်ယာဉ်တစ်စင်း ချို့ယွင်းသွားသည်။ ရဟတ်ယာဉ်ပေါ်မှ ခုန်ဆင်းလာသော အထူးတပ်ဖွဲ့ဝင်များသည် နှစ်ဖွဲ့ခွဲလိုက်သည်။ သူတို့သည် ပုံစံတူ အဆောက်အအုံ တစ်ခုတွင် လပေါင်းများစွာ လေ့ကျင့်ခဲ့ပြီးသူများ ဖြစ်သည်။ မည်သည့်နေရာတွင် မည်သူက တာဝန်ယူရမည်။ အတွင်းသို့ မည်သို့ဝင်ရောက်ရမည် စသည်များကို ချိန်ကိုက်လေ့ကျင့် ထားသူများ ဖြစ်သည်။ တစ်ဖွဲ့က အိမ်နံရံကို ဖောက်ခွဲလိုက်သည်။ ကျန်တစ်ဖွဲ့က ဝင်းခြံထဲရှိ အိမ်ငယ်လေးများဆီသို့ ချဉ်းကပ်သွားသည်။ သေနတ်သံများ ကြားနေရသည်။ တစ်ထပ်ချင်းကို ရှင်းလင်းပြီး အပေါ်သို့တက်လာသည်။ ပစ်မှတ်ရှိရာ တတိယအထပ်သို့ ရောက်လာသည်။ သေနတ်သံ သုံးလေးချက် ထွက်လာပြီး ညသည် ပကတိ ပြန်လည်တိတ်ဆိတ်သွား သည်။

အယ်လ်ကိုင်ဒါ အကြမ်းဖက် ကွန်ရက်၏ အဓိပတိ။ စက်တင်ဘာ ၁၁ ရက်နေ့ တိုက်ခိုက်မှုကို စီစဉ်ခဲ့သူ ဥာဏ်ကြီးရှင်။ တိုက်ကြီး လေးတိုက်တွင် လူထောင်ပေါင်းများစွာကို သေ တွင်းပို့ခဲ့သူ။ အိုစမာဘင်လာဒင်သည် သွေးအိုင်ထဲတွင် သေဆုံးနေသည်။

ဘင်လာဒင်သည် ထိုအချိန်က တတိယထပ်တွင် ရှိနေခဲ့သည်။ အမေရိကန် တပ်ဖွဲ့ဝင်နှင့် ရင်ဆိုင်တွေ့သည့်အခါ ဘင်လာဒင်က လက်နက်ကိုင် ဆောင်ထားခြင်းမရှိ။ နောက်ဆုံး လက်ထပ်ထားသည့် ဇနီး အသက် ၂၄ နှစ်ရှိ အယ်လ်ဆာဒါးက ခင်ပွန်းသည်ကို အကာအကွယ်ပေးရန် တပ်ဖွဲ့ဝင်များထံ ပြေးဝင်လာသဖြင့် ခြေသလုံးကို ပစ်လိုက်သည်။ ဘင်လာဒင်သည် ဝဲမျက်လုံး အထက်နှင့် ရင်ဘတ်တွင် တစ်ချက်စီဖြင့် အသက်ပျောက်သွားသည်။ သေဆုံးချိန်တွင် သူသည် အသက် ၅၄ နှစ် ရှိပြီ။ ခြံဝင်းအတွင်း နေထိုင်လျက်ရှိသူ အမျိုးသား သုံးဦးနှင့် အမျိုးသမီးတစ်ဦးလည်း သေဆုံးသည်။ ယင်းတို့အနက်တစ်ဦးမှာ ဘင်လာဒင်၏သားဟု ဆိုသည်။ သေဆုံးသည့် အမျိုးသား သုံးဦးအနက် တစ်ဦးသာလျှင် လက်နက်ကိုင်ဆောင် ထားသည်ဟု ဆိုသည်။

အိမ်အတွင်း အခြေအနေများ ငြိမ်သက်သွားသောအခါ ဘင်လာဒင်၏ ရုပ်အလောင်းကို ကြမ်းပြင်ပေါ်တွင် ဆန့်ဆန့်ချထားပြီး အရပ်ခြောက်ပေရှိ အထူးတပ်ဖွဲ့ဝင် တစ်ဦးအား အလောင်းဘေးတွင် လှဲအိပ် ခိုင်းလိုက်သည်။ ဘင်လာဒင်သည် အရပ် ခြောက်ပေရှိ တပ်ဖွဲ့ဝင်ထက် အနည်းငယ် ပိုမြင့်နေကြောင်း တွေ့ရ သည်။

ထိုသို့ အရပ်တိုင်းနေကြပုံကို ရုပ်မြင်ဖန်သားပေါ်တွင် ကြည့်နေသည့် သမ္မတအိုဘားမားက အကြံပေး အရာရှိများ ဘက်သို့ လှည့်ကာ ''ဒေါ်လာ သန်းခြောက်ဆယ်တန် ရဟတ်ယာဉ်တောင် အဆုံးရှုံးခံပြီး လုပ်ရတာ။ ခင်ဗျားတို့က ပေကြိုးလေး တစ်ချောင်းတောင် မဝယ်နိုင်ကြ တော့ဘူးလား''ဟု ပြောသည်။

ဆက်လက်ဖော်ပြပါမည်။

Ref: Killing Bin Laden: How the U.S. Finally Got Its Man.

Photo Description: ဘင်ကြီး နောက်ဆုံးနေသွားတဲ့ အိမ်ဝင်း

 

ဘင်လာဒင်၏နောက်ဆုံးညများ (၂)

နှုတ်ပိတ်ရေငုံ

တိုက်ခိုက်မှု အစအဆုံး မိနစ် သုံးဆယ်ခန့်သာ ကြာခဲ့သည်။ ဘင်လာဒင် မသေဆုံးမီက သူမည်သည့် နေရာတွင် ရှိနေသနည်း ဆိုသည့် မေးခွန်းကိုသာ မေးကြသည်။ သူသေဆုံး သွားသည့်အခါတွင် မေးခွန်းများ မြောက်မြားစွာ ပေါ်ထွက်လာသည်။ ထိုမေးခွန်းများ အတွက် အဖြေသည် ရေရေရာရာမရှိ။ အိမ်ဖြူတော် အရာရှိကြီးများသည် ဘင်လာဒင်၏ ဘဝခရီးဆုံးနှင့် ပတ်သက်၍ စေ့စေ့စုံစုံ ထုတ်ဖော်မပြောဘဲ ထားသည်။ ရုပ်မြင်သံကြားမှ ပြည်သူသို့ သမ္မတအိုဘားမား အစီရင်ခံသည့် မိန့်ခွန်းတွင်လည်း အချက်အလက် မည်မည်ရရ မပါရှိ။

ဝင်ရောက်စီးနင်းသည့် အစီ အစဉ်နှင့် အဖြစ်အပျက်များကို အထူးတပ်ဖွဲ့ဝင်များသည် မည်သည့် အခါတွင်မှထုတ်ဖော်ပြောကြားခြင်း မပြုပါဟူသည့် ခံဝန်ချက်ကို လက် မှတ်ရေးထိုးထားကြရသည်။

အမေရိကန်အစိုးရက ထုတ်ပြန် သည့် သတင်းများသည် ရှေ့နောက်မညီ ဖြစ်နေသည်မှာလည်း ထောက် ပြစရာဖြစ်ခဲ့သည်။ မေလ ၂ ရက် တနင်္လာနေ့တွင် ထုတ်ပြန်သော သတင်း၌ ဘင်လာဒင်နှင့် အပြန် အလှန်ပစ်ခတ်မှု ဖြစ်ပွားကြောင်း။ ဘင်လာဒင်က သူ့ဇနီး တစ်ဦးအား ရှေ့တွင်ထားကာ အကာအကွယ် ယူခဲ့ကြောင်း ထုတ်ပြန်ခဲ့သည်။ သို့သော် နောက်တစ်နေ့ ထုတ်ပြန်သည့်အခါ ရင်ဆိုင်တွေ့သည့် သတင်းတွင် အချိန်၌ ဘင်လာဒင်သည် လက်နက်မဲ့ ဖြစ်ကြောင်း။ ဇနီးသည်အား အကာအကွယ်ယူခြင်း မဟုတ်ဘဲ ဇနီးသည် ကသာ အထူးတပ်ဖွဲ့ဝင်များထံသို့ ပြေးဝင်လာခြင်းဖြစ်ကြောင်း ဆိုပြန် သည်။

သတင်းမုဆိုးများက သတင်းရနိုင်မည့် နေရာမှန်သမျှကို တူးဆွနှိုက်ထုတ်ကြသည်။ ရသမျှ သတင်းအပေါ် အခြေတည်ကာ စိတ်ကူးဖြင့် ပေါင်းစပ်ရေးသား ထားသမျှကို မီဒီယာများတွင် တင်ကြသဖြင့် ပြည်သူများက သတင်းမှား၊ သတင်းမှန် မဝေခွဲနိုင်ဖြစ်ရသည်။ နဝေတိမ်တောင် ဖြစ်ကုန်ရသည်။

အယ်လ်ကိုင်ဒါ အင်တာနက် စာမျက်နှာတွင် ဘင်လာဒင် သေဆုံးပြီ ဖြစ်ကြောင်း အတည်ပြုကြေညာသော်လည်း သတင်းပဟေဠိများကို အဖြေ ညှိရန်ကျန်နေဆဲ ဖြစ်သည်။ ဘင်လာဒင့် ရုပ်အလောင်းသည် ပုံပျက်ပန်းပျက် ဖြစ်နေသဖြင့် အများပြည်သူများအား စိတ်အနှောင့်အယှက် ဖြစ်စေနိုင်သည်ဟု အကြောင်းပြကာ မထုတ်ပြန်ဘဲ ထားခြင်းကလည်း မယုံသင်္ကာမှုကို တိုးပွားစေသည်။ ဓာတ်ပုံကိုမမြင်ရသဖြင့် သတင်းမီဒီ ယာများ၏ထုံးစံအတိုင်း မှန်းသန်း ရေးသားချက်များ ပေါ်ထွက်လာ သည်။

ဆဒမ်ဟူစိန်၏ သားများဖြစ်သော အူဒေးနှင့် ကူဆေးတို့၏ ကျည်ဆန်ရာ ဗလပွဖြင့် ရုပ်အလောင်းပုံများကိုပင် ထုတ်ပြန်ပေးခဲ့နိုင်သဖြင့် ဘင်လာဒင်၏ပုံကို မထုတ်ပြန်နိုင်စရာ အကြောင်း မရှိဟု အရှေ့အလယ်ပိုင်း ထုတ်သတင်းစာများက ဝေဖန်ရေးသားကြသည်။ ဘင်လာဒင် သေဆုံးပြီး နောက်ပေါ်ထွက်လာသော မေးခွန်းများအနက် ဘင်လာဒင်အား မည်သည့်အတွက် အရှင်မဖမ်းခဲ့သနည်း ဆိုသည့် မေးခွန်းသည် သတင်းလောကတွင် ပေါ်ထွက်လာသည်။ မည်သည့်အတွက် အရှင်မဖမ်းခဲ့သနည်း။

ဘင်လာဒင်သည် လက်နက်မဲ့ ဖြစ်ပါလျက် မည်သည့်အတွက် အရှင် မဖမ်းဆီးရ သနည်းဆိုသော အမေးက အိမ်ဖြူတော်ကို အဖြေခက်စေသည်။ အထူးတပ်ဖွဲ့ဝင်များသည် ဘင်လာဒင်အား အသေဖမ်းမိ လိမ့်မည်ဟု စစ်ဆင်ရေး မစမီကပင် အိုဘားမား၏ လုံခြုံရေး ကောင်စီဝင်များက တွက်ဆထားပြီး ဖြစ်သည်။ စီအိုင်အေ ညွှန်ကြားရေးမှူး လီယွန်ပင်နက်တာ- Leon Penetta က စီဘီအက်စ် ရုပ်မြင်သံကြားနှင့် တွေ့ဆုံ မေးမြန်းခန်းတွင် '' ဘင်လာဒင်ကို အသေဖမ်းရလိမ့်မယ်လို့ ကျွန်တော် တို့ အားလုံးက တွက်ထားခဲ့ကြ တယ်''ဟု ပြောသည်။

ဘင်လာဒင်အား အရှင်ဖမ်း ထားမည်ဆိုပါက သွေးထွက်သံယိုမှုများ အတောမသတ်ဖြစ်ပွားလိမ့်မည် ကို အားလုံးသိကြသည်။ ဘင်လာဒင် အား ပြန်လွှတ်ပေးရန် အကြမ်းဖက် တိုက်ခိုက်မှုများဖြင့်လည်းကောင်း၊ အရေးကြီးပုဂ္ဂိုလ်နှင့် ကလေးများကို ဓားစာခံအဖြစ် ဖမ်းဆီးခြင်းဖြင့်လည်း ကောင်း အယ်လ်ကိုင်ဒါက အကြပ် ကိုင်ကြမည်မှာ မလွဲဧကန်ဖြစ်သည်။

အရှင်ဖမ်းမိပါက မည်သည့်နိုင်ငံ တရားရုံးတွင် တရားစီရင်ရမည်ကိုလည်း ဆုံးဖြတ်နိုင်ကြမည်မဟုတ်။ ဖမ်းမိသောနေရာဖြစ်သည့် ပါကစ္စတန် တွင်လည်း စီရင်ရန် မဖြစ်နိုင်။ ဘင်လာဒင်ကို ဖမ်းမိခဲ့ပါက ပါကစ္စတန် တရားရုံးတွင် တရားမစီရင်ပါဟူသော ကတိကို ပါကစ္စတန်က အမေရိကန်ထံမှ လွန်ခဲ့သော ဆယ်နှစ်တာကာ လကတည်းက တောင်းထားပြီး ဖြစ်သည်။ ဘင်လာဒင်၏ နိုင်ငံရင်း ဖြစ်သော ဆော်ဒီအာရေဗျက ပို၍ပင် လက်ခံမည် မဟုတ်။ ဘင်လာဒင်၏ ရုပ်အလောင်းကို ဆော်ဒီအာရေဗျက လက်ခံရန် ငြင်းဆန်ခဲ့သည်ဟု စီဘီ အက်စ်သတင်းဌာနက ဖော်ပြခဲ့သည်။

အထူးတပ်ဖွဲ့ဝင်များအား ကိုယ် ပိုင်ဆုံးဖြတ်ချက်ဖြင့် ဆောင်ရွက်ခွင့် ပြုထားခြင်းကြောင့် ဘင်လာဒင်အား အသေဖမ်းရလိမ့်မည်ဟု စီအိုင်အေ ညွန်ကြားရေးမှူးက ပြောခြင်းဖြစ် သည်။

ဘင်လာဒင်က တုံ့ပြန်ရန်မပြုဟု လုံးဝသေချာမှ သာလျင် အရှင် ဖမ်းရန်။ တုံ့ပြန်ရန်ပြုမည်၊ မပြုမည် ဆိုသည်မှာ အထူးတပ်ဖွဲ့ဝင်၏ ဆုံးဖြတ်ချက်သာလျင် ဖြစ်သည်။ ရင်ဆိုင်တွေ့သည့်အချိန်တွင် ဘင်လာဒင်သည် အဝတ်အစား ဝတ်ထားမည်မှာ သေချာသလောက် ဖြစ်သည်။ အဝတ်အစားများ အောက်တွင် ဗုံးခါးပတ် ရှိနေ မနေကို မည်သူမျှ မသိနိုင်။

ဘင်လာဒင်သည် အဝတ်မပါ ဗလာကိုယ်လုံးတီးဖြင့် လက်နက်ချ အဖမ်းခံမှသာ အရှင်ဖမ်းနိုင်မည့် အနေအထားဖြစ်သည်။ ပေးထားသည့် အမိန့်သည် အသေဖမ်းရမည်ဟု မဆိုရုံတမယ်သာရှိသည်။ ထိုစဉ်က အိမ်တွင် ရှိနေခဲ့သည့် ဘင်လာဒင်၏သမီး ထွက်ဆိုချက်တွင်မူ ဘင်လာဒင်အား အရှင်ဖမ်းမိပြီးမှ ပစ်သတ်ခြင်းဖြစ်သည်ဟု ဆိုပြန်သည်။

ပါကစ္စတန်သည် မည်မျှသိ ထားသနည်း။ နောက်မေးခွန်းတစ်ခုမှာ ပါကစ္စတန်ထောက်လှမ်းရေးသည် ဘင်လာဒင် ရှိနေသည်ကို သိ-မသိ ဆိုသည့်မေးခွန်း ဖြစ်သည်။ ဘင်လာဒင်၏ အိမ်မှသိမ်းဆည်းရမိသည့် ပစ္စည်းများကို စိစစ်နေခိုက် ပါကစ္စတန် ထောက်လှမ်းရေး ထိပ်တန်းအရာရှိ များ၏အမည်များကို ဖော်ထုတ်အသိပေးရန် အမေရိကန်က တောင်းဆိုလာသည်။ ဖော်ထုတ်သိရှိရသည့် အချက်များ အနက်မှ အချို့တို့သည် ဘင်လာဒင်အား ပါကစ္စတန်က အကာအကွယ် ပေးထားသည်ဟု သင်္ကာမကင်းဖွယ်ရာ အချက်များကို တွေ့ထားရသည်ဟု ဆိုသည်။ ပါကစ္စတန် ထောက်လှမ်းရေးအတွင်း အယ်လ်ကိုင်ဒါ လိုလားသူများ ရှိနေသည် ဆိုသော စွပ်စွဲချက်များကို စက်တင်ဘာ ၁၁ ရက် တိုက်ခိုက်မှု နောက်ပိုင်းမှ စပြီးကြားလာရသည်။ အကြမ်းဖက် နှိမ်နင်းရေးတွင် ပါကစ္စတန် မပါဘဲ မလုပ်နိုင်သဖြင့် အမေရိကန်သည် ခြောက်တစ်ခါ ချော့တစ်လှည့်ဖြင့် အခြေအနေ ကြည့်ကစားခဲ့ရသည်။

ဆိုဗီယက်တို့ အာဖဂန်ကို သိမ်းပိုက် ထားစဉ်ကာလတွင် ပါကစ္စတန်သည် တာလီဘန်များကို ထောက်ပံ့ အားပေးနေခဲ့သည်။ တာလီဘန် အစိုးရသည် အယ်လ်ကိုင်ဒါကို လက်ခံထားခဲ့သဖြင့် တာလီဘန်နှင့် နီးစပ်သော ပါကစ္စတန်နှင့် အယ်လ်ကိုင်ဒါတို့ သဘာဝ မဟာမိတ် ဖြစ်ခဲ့ရသည်။ ပါကစ္စတန်သည် အမေရိကန်က ထောက်ပံ့သည့် ဘီလီယံပေါင်း များစွာကိုရယူကာ အယ်လ်ကိုင်ဒါ သတင်းပေးလုပ်နေသည်ဆိုသော စွပ်စွဲချက်များလည်း အတောမသတ် ပေါ်ထွက်ခဲ့သည်။ အယ်လ်ကိုင်ဒါနှင့် နီးစပ်သော အမျိုးသမီးတစ်ဦးက ''ပါကစ္စတန် စစ်တပ်နဲ့ ကျွန်မတို့ နားလည်မှုယူထားတယ်။ ကျွန်မတို့ ပုန်းနေတဲ့နေရာကို ပါကစ္စတန် စစ်တပ်က ဝင်စီးတော့မယ်ဆိုရင် ကျွန်မတို့ကို ကြိုသတင်းပေးတယ်။ နောက်ပြီး ကျွန်မတို့ အယ်လ်ကိုင်ဒါနဲ့ ပတ်သက်တဲ့ အထောက်အထား သဲလွန်စတွေ အဲဒီအိမ်မှာ ချန်ထားခဲ့ဖို့ ပြောထားတယ်။ သူတို့ ဝင်စီးပေမယ့် ကျွန်မတို့ကို မမိဘူး။ ကျန်ခဲ့တဲ့ သဲလွန်စတွေကို အမေရိကန်တွေကို ခေါ်ပြပြီး၊ ကျွန်မတို့ ပုန်းခိုနေတဲ့ နေရာပေါ့။ ဝင်စီးပေမယ့် လက်မတင်လေး လွတ်သွားတယ်ပေါ့''ဟု ပြောသည်။ အမည်မဖော်လိုသော အိမ် ဖြူတော် ထိပ်တန်းအရာရှိ တစ်ဦးက ''ကယာနီ (ပါကစ္စတန် ကာကွယ်ရေး ဦးစီးချုပ် ဗိုလ်ချုပ်ကြီး) Gen. Ashfaq Parvez Kayani နဲ့ ပါရှာ (ပါကစ္စတန် ထောက်လှမ်းရေး ညွှန်ကြားရေးမှူး ဒုတိယ ဗိုလ်ချုပ်ကြီး) Lt. Gen. Ahmad Shuja Pasha တို့ဟာ ဘင်လာဒင် ဘယ်မှာရှိတယ် ဆိုတာသိနေတယ်လို့ မဆိုလိုပေမယ့် သူတို့နဲ့ နီးနီးကပ်ကပ် တာဝန်ထမ်း ဆောင်ရတဲ့ အရာရှိကြီး တစ်ယောက် မကတော့ သိနေနိုင်တယ်''ဟု ပြောသည်။ စီအိုင်အေညွှန်ကြားရေးမှူး လီယွန်ပင်နက်တာက ''ပါကစ္စတန်တွေဟာ အရည်အချင်းညံ့ဖျင်းတာ၊ ဒါမှမဟုတ်သူတို့ ကိုယ်တိုင်က အယ်လ်ကိုင်ဒါကို အားပေးနေတာ ဖြစ်နိုင်တယ်''ဟုဆိုသည်။

ပါကစ္စတန် အဖို့လည်း ဘေးကျပ်နံကျပ် အနေအထား ဖြစ်သည်။ ဘင်လာဒင် ရှိနေသည်ဟု အမေရိကန်အား သတင်းပေး လိုက်မည်ဆိုပါက မွတ်ဆလင် ကမ္ဘာတစ်ခုလုံးက ပါကစ္စတန်အား ခွင့်လွှတ်လိမ့်မည် မဟုတ်။ အယ်လ်ကိုင်ဒါကလည်း ပါကစ္စတန်အား ပြင်းထန်သော တိုက်ခိုက်မှုများ လုပ်လာမည်။

အကယ်၍ အယ်လ်ကိုင်ဒါကို ပြောင်ပြောင်တင်းတင်း အားပေးမည် ဆိုပါကလည်း တာလီဘန်တို့၏ အာဖဂန်ကဲ့သို့ အမေရိကန်၏ မြေလှန် ဗုံးကြဲခြင်းကို ခံရမည်မှာ မလွဲဧကန် ဖြစ်သည်။ အယ်လ်ကိုင်ဒါအား တိုက်ခိုက်နေသော အမေရိကန်တပ်များ အတွက် ထောက်ပို့ လမ်းကြောင်းကို ပါကစ္စတန်က ခွင့်ပြုထားရသည်။ ပါကစ္စတန်က ခွင့်မပြုဆိုပါက သူ၏ မဟာရန်သူတော် အိန္ဒိယက အမေရိ ကန် ထောက်ပို့လမ်းကြောင်းကို ခွင့်ပြုပေးမည် ဖြစ်သည်။ ပါကစ္စတန် အဖို့ ရွေးချယ်စရာလမ်း မရှိဖြစ်ရသည်။ ဗိုလ်ချုပ်ကြီး ကယာနီက ပါကစ္စတန် ထောက်လှမ်းရေးတွင် အားနည်းချက်ရှိကြောင်း ဝန်ခံပြောကြားသည်။ အမေရိကန်က နောက်တစ်ကြိမ် အလားတူ ကျူးကျော်မှုမျိုး လုပ်လာပါက နှစ်နိုင်ငံဆက်ဆံရေးကို ပြန်လည်သုံးသပ် ရလိမ့်မည် ဖြစ်ကြောင်းလည်း ပြောကြားသည်။ ပါကစ္စတန်သို့ နှစ်စဉ် ဒေါ်လာ ဘီလီယံချီကာ အထောက်အပံ့ပေး နေခြင်းကို ပိုမိုတင်းကြပ်စွာ စိစစ် ရန်အမေရိကန် လွှတ်တော်အမတ် များက ပြောဆိုလျက် ရှိသည်။

ဘင်လာဒင်ကို ပါကစ္စတန် နယ်မြေအတွင်း တွေ့ရှိရသည့်အတွက် ထောက်လှမ်းရေး အကြီးအကဲ ဒုတိယ ဗိုလ်ချုပ်ကြီး အာမက် ဆူဂျပါရှာ ရာထူးမှ အနားယူရလိမ့် မည်ဆိုသော သတင်းစကားများလည်း ပေါ်ထွက်ခဲ့သည်။ သို့သော် ပါရှာသည် ပါကစ္စတန် လွှတ်တော်တွင် အစစ်ဆေးခံပြီးနောက် သူ၏အခြေ အနေမှာ ပိုမိုကောင်းမွန်လာသည်ဟု အကဲခတ်သမားများကဆိုသည်။ ဂလိုဘယ်ပို့စ် သတင်းစာကမူ အမေရိကန် အထူးတပ်ဖွဲ့ဝင်များ တိုက်ခိုက်မည်ကို ပါကစ္စတန်စစ်တပ်က ကြိုသိနေခဲ့သည်ဟု ဆိုပြန်သည်။ အဆိုပါ ဖော်ပြချက်သည် ပါကစ္စတန် အစိုးရ၏ လူသိရှင်ကြား ရပ်တည်ချက် နှင့်လည်းကောင်း၊ အမေရိကန်၏ ပါကစ္စတန်အပေါ် စွပ်စွဲချက်နှင့် လည်းကောင်း ဖီလာဆန့်ကျင် ဖြစ်နေသည်။ ဝင်ရောက်စီးနင်းသည့် မေလ ၁ ရက်နေ့မတိုင်မီ အမေရိကန်နှင့် ပါကစ္စတန် ထိပ်တန်းအရာရှိကြီးများ တွေ့ဆုံခဲ့ကြသည်ကို တွေ့ရသည်။ ပါကစ္စတန် ထောက်လှမ်းရေး ညွှန်ကြားရေးမှူး ဒုတိယ ဗိုလ်ချုပ်ကြီး ပါရှာသည် ဧပြီ လ ၁၁ ရက်နေ့ တွင် ဝါရှင်တန်၌ စီအိုင်အေ ညွှန်ကြားရေးမှူး ပင်နက်တာနှင့် တွေ့ဆုံ ခဲ့သည်။ ဘင်လာဒင် နေအိမ်အား ဝင်ရောက်မစီးနင်းမီ ခြောက်ရက် အလို ဧပြီလ ၂၅ ရက်နေ့တွင် အမေရိကန် ဗိုလ်ချုပ်ကြီး ဒေးဗစ် ပက်ထ ရီယပ်စ် -Gen. David Petraeus သည် ပါကစ္စတန်သို့ ရုတ်တရက် ရောက်ရှိလာပြီး ပါကစ္စတန် ကာကွယ်ရေးဦးစီးချုပ် ဗိုလ်ချုပ်ကြီး ကယာနီနှင့် နှစ်ဦးတည်း သီးသန့် တွေ့ဆုံခဲ့သည်။ ယင်းသို့ တွေ့ဆုံစဉ် ဘင်လာဒင်နေအိမ်ကို ဝင်ရောက်စီး နင်းမည့် အသေးစိတ် အစီအစဉ်များ ကို ဆွေးနွေးခဲ့သည်ဟု သတင်းစာ ကဆိုသည်။ နောက်တစ်နေ့ ဧပြီလ ၂၆ ရက်တွင် ပါကစ္စတန် စစ်ဦးစီး ကော်မတီ၏ ပုံမှန်လေးလပတ်အစည်း အဝေးကျင်းပသည်။ ထိုကော်မတီ၏ အဖွဲ့ဝင်မဟုတ်သော ထောက်လှမ်း ရေးညွှန်ကြားရေးမှူး ဒုတိယဗိုလ် ချုပ်ကြီး ပါရှာတက်ရောက်ခဲ့သည်ကို တွေ့ရသည်။ ဘင်လာဒင်အား ဖမ်းဆီးရာတွင် ပါကစ္စတန်၏အခန်းကဏ္ဍ ကိုနှစ်ဘက်စလုံးက တတ်နိုင်သမျှဖုံး ကွယ်ထားလိုကြသည်။ ပါကစ္စတန် လူထုသည် အမေရိကန်အပေါ် သည်းမခံနိုင် ဖြစ်နေသည်မှာ ကြာပြီဖြစ်သည်။ ဝင်ရောက်စီးနင်းမှုမတိုင်မီ နှစ်နာရီအလိုတွင် ပါကစ္စတန် တပ်ဖွဲ့ဝင်များက အိမ်နီးနားချင်းများကို မီးမှိတ်ထားရန်နှင့် အိမ်အတွင်း၌သာ နေကြရန် လိုက်လံဆော်သြခဲ့သည်ဟု ဘီဘီစီသတင်းက ဖော်ပြသည်။ ဘင်လာဒင်၏ ဇနီးတစ်ဦးဖြစ်သော ယီမင်သူ အယ်လ် ဆာဒါး၏ ထွက်ချက်အရ ယခုနေအိမ်သို့ ၂ဝဝ၅ ခု တွင် သူတို့မိသားစု ပြောင်းလာ ကြောင်း၊ ယင်းသို့ ပြောင်းမလာမီ ချက်ရှာမိုဟာမက် အမည်ရှိ ရွာလေး တွင် နှစ်နှစ်ခွဲခန့် နေထိုင်ခဲ့ကြောင်း သိရသည်။ ဘင်လာဒင်သည် နေ့အခါတွင် အိပ်ခန်းတွင်းမှ အပြင်သို့ ထွက်ခဲပြီး၊ သူ့ထံသို့ ဧည့်သည်လာ ခဲလှကြောင်း။ အကယ်၍ ဧည့်သည် လာလျှင်လည်း ညအခါတွင်မှ လာလေ့ရှိကြောင်း သူမက ထွက်ဆိုသည်။ ဘင်လာဒင်သည် တစ်ချိန် လုံးလိုလိုစာဖတ်နေသည်။ သူ့အိပ်ခန်း တွင်း၌ နာမည်ကျော် အမေရိကန် စာရေးဆရာများ၏ စာအုပ်များကို တွေ့ရသည်ဟု ရဲကဆိုသည်။ ဇနီး သုံးဦးလုံးသည် ကလေး ၁၃ ယောက်ကို စာသင်ကြားပေးကြသည်။ ဇနီးသုံးဦးအနက် တစ်ဦးမှာ ကလေးစိတ် ပညာရှင်ဖြစ်ပြီး၊ နောက်တစ်ဦးမှာ အာရဗီဘာသာ ဆရာမ ဖြစ်သည်။ တစ်နေ့တာ နောက်ဆုံးဝတ်ပြု ဆုတောင်းခြင်းကို ဘင်လာဒင်က ဦးဆောင်ရွတ် ဆိုပေးသည်။ အချို့ကလေးများသည် ပထန်စကားပြောပြီး၊ အချို့ကလေးများသည် အာရဗီဘာသာကို ပြောဆိုသည်။ သူ၏ ၁၂ အရွယ် သမီးသည် အင်္ဂလိပ်စကားကို လိပ်ပတ်စွာ ပြောဆို နိုင်သည်။ အယ်လ်ဆာဒါးသည် အခင်းမဖြစ်ပွားမီညက ဘင်လာဒင် နှင့်အတူ ရှိနေခဲ့ပြီး၊ ဖြစ်ပွားသော ညတွင် နှစ်ဦးသား အိပ်ရာဝင်ခါနီး မီးမှိတ်လိုက်သည့်အခါတွင် သေနတ်သံများကို စကြားရသည်ဟုဆိုသည်။ ဘင်လာဒင်က သူ၏ အေကေ ၄၇ မောင်းပြန်သေနတ်ကို လှမ်းယူလိုက် သည့်အချိန်တွင် အထူးတပ်ဖွဲ့ဝင်များ ရောက်လာကာ ပစ်ခတ်ခြင်း ဖြစ်သည်ဟု အယ်လ်ဆာဒါးက ထွက်ဆိုသည်။ စစ်တပ်၊ ရဲစခန်း စသည့်ပစ်မှတ်များ ကို အကြမ်းဖက်သမားများ ဦးတည် တိုက်ခိုက်လျက်ရှိသဖြင့် အဘော့တာ ဘတ်တပ်မြို့တွင် လုံခြုံရေး တင်း တင်းကြပ်ကြပ်ချထားသည်။ အခြား မြို့များထက် လူဝင်လူထွက်ကို ပိုမို ဂရုစိုက်သည်။ စစ်ဆေးရေးဂိတ်များ လည်းချထားသည်။ ယင်းသို့ဖြစ်ပါ လျက် အခြားခြံဝင်းများနှင့် မတူဘဲ ၁၈ ပေ အုတ်တံတိုင်း ကာထားသည့် ထူးထူးဆန်းဆန်း အိမ်ကြီးတစ်လုံးရှိ နေသည်ကို လုံခြုံရေး တာဝန်ရှိသူများက သတိမထားမိသည့်အပြင် ထိုအိမ်တွင် ဘင်လာဒင် ငါးနှစ်ကျော်ကြာ နေထိုင်နေသည်ကိုလည်း မသိဟု ဆိုသည်မှာ ယုံတမ်းပုံပြင် ဖြစ်နေသည်။ အလှမ်းဝေးသည့် ပိုမိုစိတ်ချရသည့် ပါကစ္စတန် အတွင်းပိုင်းကျသော အခြားမြို့များတွင် ပုန်းအောင်းနေနိုင် ပါလျက် မည်သည့်အတွက် လုံခြုံရေး တပ်ဖွဲ့များ ခြေချင်းလိမ်နေသည့် အဘော့တာဘတ်မြို့ကို ဘင်လာဒင် ရွေးချယ်ခဲ့သနည်းဟု မေးစရာဖြစ်နေသည်။ ထိုမြို့တွင် သူ့အား အကာအကွယ် ပေးမည့်သူ ရှိနေသည့် အတွက်သာ ရွေးချယ်ခဲ့ခြင်း ဖြစ်မည်ဟု ကောက်ချက်ဆွဲနိုင်သည်။ ပါကစ္စတန် ထောက်လှမ်းရေးသည် ဘင်လာဒင်အား မမြင်ဟန် ဆောင်နေခဲ့သည်ဟု ဆိုသူကဆိုသည်။ အမေရိကန် လိုချင်နေသည့် သတင်းအချက်အလက်များသည် ပါကစ္စတန်က ထိန်းထားသော ဘင်လာဒင်၏ အိမ်သားများထံမှ ရနိုင်သည်။ သို့သော် အမျိုးသမီးတစ် ဦး နိုင်ငံခြားသားများနှင့် သီးသန့် တွေ့ခွင့်ပြုရန် ဆိုသည်မှာ လက်ခံ ထားသော ယဉ်ကျေးမှု ထုံးစံနှင့် ဖီလာကန့်လန့်ဖြစ်နေသည်။ ထိုဇနီးသည်များကို အမေရိကန် အရာရှိများအား မေးမြန်းခွင့် ပြုခဲ့သော် လည်း၊ သီးသန့်တွေ့ဆုံမေးမြန်းခွင့် မပြုဘဲ ပါကစ္စတန် ထောက်လှမ်းရေး အရာရှိများ၏ ရှေ့မှောက်တွင်သာ မေးမြန်းခွင့်ပြုခဲ့သည်။ ဘင် လာဒင်၏ အိမ်သားများက အမေရိ ကန်အရာရှိများကို မုန်းတီးရွံရှာသော အမူအယာများဖြင့် ဆက်ဆံအစစ်ခံခဲ့ သည်။ ခြေသလုံးတွင် သေနတ်ထိ မှန်ထားသူ ယီမင်သူ ဇနီးအား အမေရိကန်တို့က အထူးစိတ်ဝင်စားနေ သည်။ ၂ဝဝ၃ ခုနှစ်တွင် ဘင်လာဒင် ပျောက်သွားပြီးကတည်းက သူ့မိသားစု ဝင်များလည်း ပျောက်ကွယ် သွားခဲ့သည်။ ထိုစဉ်က ဇနီးသားသမီး များကို သက်ဆိုင်ရာ နိုင်ငံအသီးသီး သို့ ပါကစ္စတန် အစိုးရ အကူအညီ ဖြင့် ပြန်ပို့ပေးခဲ့သည်ဟု ဆိုသည်။ ထိုအထဲမှ ပဉ္စမြောက် ဇနီး ယီမင်သူ အယ်လ်ဆာဒါးသည် အဘော့တာ ဘတ်မြို့သို့ မည်သို့ပြန်ရောက်လာ သနည်းဆိုသောအဖြေကို အမေရိကန်တို့က သိပ်သိချင်နေသည်။ ပါကစ္စတန် နိုင်ငံသို့ တရားဝင်လမ်းကြောင်းမှ ဝင်ရောက်ခဲ့သည်ဆိုလျှင် ပါကစ္စတန် အစိုးရသည် ဘင်လာဒင် အဘော တာဘတ်တွင်ရှိနေသည်ကို သေချာ ပေါက်သိမည်ဖြစ်သည်။ စက်တင်ဘာ ၁၁ ရက် တိုက်ခိုက်မှုအပြီး အယ်လ်ဆာဒါးသည် ပါကစ္စတန် အစိုးရ၏ အကူအညီဖြင့် အာဖဂန်မှ ယီမင်သို့ ပြန်သွားနိုင်ခဲ့သည်ဟု ဆော် ဒီအာရေးဗျား အမျိုးသမီး မဂ္ဂဇင်း Al Majalla နှင့် အင်တာဗျူးတွင် သူမက ပြောပြခဲ့သည်ဟု ဆိုသည်။ ဆာဒါးက အင်တာဗျူးတွင် ''အာဖဂန်ကို အမေရိကန်က စပြီးဗုံးကြဲတာနဲ့ ကျွန်မတို့ ကလေးတွေနဲ့အတူ ဂူတွေထဲမှာ နှစ်လလောက် ပုန်းနေခဲ့ရတယ်။ တစ်နေ့တော့ ဘင်လာဒင်ရဲ့ သားတစ်ယောက်နဲ့အတူ အာဖဂန်လူမျိုး အုပ်တစ်စု ရောက်လာပြီး ကျွန်မတို့ကို ခေါ်သွားတယ်။ ပါကစ္စတန်ကို ခေါ်သွားတာ ကျွန်မတို့မသိဘူး။ ကျွန်မတို့ကို ပါကစ္စတန်အာဏာပိုင်တွေဆီ လွှဲပေးလိုက်တယ်ဟု ဆိုသည်။ ဆာဒါးနှင့် သမီးငယ်တို့ကို ပါကစ္စတန် ကလွှတ်ပေးလိုက်သည်။ ယီမင်သို့ ပြန်ခွင့်ပြုလိုက်သည်။

ပါကစ္စတန် သတင်းရပ်ကွက် များ၏ အဆိုအရ ဘင်လာဒင်၏ အခြားသော ဇနီးများသည် ဆီးရီးယား၊ ဆော်ဒီအာရေးဗျနှင့် အီရန် တို့တွင်ရှိနေပြီး၊ ၄င်းတို့သည် နေအိမ် အကျယ်ချုပ် ချခံထားရသည်ဟု သိရသည်။ ဘင်လာဒင်၏ အိမ်သားများ ထံမှအိမ်တွင်း နေ့စဉ် လုပ်ကိုင်လှုပ်ရှားမှုနှင့် အဝင်အထွက်ကို အဓိက ထားမေးမြန်းသည်ဟု ဂါးဒီးယန်း သတင်းစာက ဖော်ပြသည်။ ပါကစ္စတန် အစိုးရပိုင်းက ဘင်လာဒင်အား အကာအကွယ် ပေးထားခြင်း ရှိ-မရှိ။ မည်သူတွေက ဘင်လာဒင်အား ငွေကြေးထောက်ပံ့နေသည် ဆိုသည့် အချက်များလည်း ပေါ်ထွက်လာနိုင်သည်။

ဆက်လက်ဖော်ပြပါမည်။

Ref: Killing Bin Laden: How the U.S. Finally Got Its Man.

Photo Description: ဘင်ကြီးနောက်ဆုံးရုပ်အလောင်း

 

 

ဘင်လာဒင်၏နောက်ဆုံးညများ ( ၃ )

ဘင်လာဒင်အိမ်မှ သိမ်းယူသွားသော ကွန်ပျူတာ ငါးလုံး၊ ဒီဗီဒီနှင့် စီဒီအချပ်များ၊ ယူအက်စ်ဘီ သိုမှီးကိရိယာ Thumb Drives အချောင်းတစ်ရာကျော်၊ ကွန်ပျူတာ ဟာဒ်ဒစ် ငါးလုံး၊ လက်ကိုင်ဖုန်း အများအပြားထဲတွင် မည်သည့်အတွက် အဘော့တာဘတ်မြို့တွင် ပုန်းရှောင်နေရသည် ဆိုသည့်အဖြေကို ရှာတွေ့နိုင်ကောင်း တွေ့နိုင်သည်။ ထိုဒီဗီဒီအချို့တွင် အမေရိကန် ညစ်ညမ်းအခွေများကို တွေ့ရသည်ဟု သတင်းရပ်ကွက်က ဆိုသည်။ လက်ကိုင်ဖုန်းများထဲမှ အဆက်အသွယ် တယ်လီဖုန်း နံပါတ်များကို ရရှိထားပြီ ဖြစ်သည်။ ထိုအဆက်အသွယ် နံပါတ်များ အနက်မှ အမေရိကန်ရှိ နံပါတ်များ သီးခြားဖယ်ထုတ် ခြေရာခံလျက် ရှိသည်။ အမေရိကန်တွင် အကြမ်းဖက် တိုက်ခိုက်မှုများ ပြုလုပ်ရန် အစီအစဉ်များ ရှိနေပါက ထိုနံပါတ်များနှင့် ဆက်စပ်နေနိုင်သည်။

သိမ်းဆည်းရမိသော ကွန်ပျူတာ မှတ်တမ်းမှတ်ရာများသည် အာရဗီဘာသာဖြင့် ရေးသားထားခြင်း ဖြစ်သည်။ အာရဗီ ဘာသာ တတ်ကျွမ်းသူများနှင့် ကွန်ပျူတာ ကျွမ်းကျင်သူ ရာပေါင်းများစွာသည် ယခုအခါ မှတ်တမ်းမှတ်ရာများကို နေ့မအား ညမအား စိစစ်ဖော်ထုတ်လျက် ရှိသည်။ အဆိုပါ အဖွဲ့တွင် ပါဝင်နေသည့် အမည်မဖော်လိုသော အရာရှိ တစ်ဦးက ''မှတ်စု၊ အပြန်အလှန် ပေးစာ၊ အီးလ်မေးလ်တွေကို စိစစ်နေတယ်။ အီးမေးလ်လိပ်စာရှင်ဟာ ဘယ်သူလဲ၊ ဘင်လာဒင်နဲ့ ဘယ်လိုပတ်သက်သလဲ စတာတွေကို ဖော်ထုတ်နေတယ်''ဟု ပြောသည်။

ဘင်လာဒင်သည် ပုန်းအောင်းနေရသော်လည်း အမေရိကန်အား တိုက်ခိုက်ရေး အစီအစဉ်များကို ရေးဆွဲလျက် ရှိကြောင်း တွေ့ရသည်။ ခရစ်စမတ်နှင့် နှစ်သစ်ကူး အချိန်များတွင် ရထားလမ်း ဖျက်ဆီးထားရန်၊ ရထားများကို လမ်းချော်စေရန် လုပ်ကြံမှုများ၊ ရေနံတင် သင်္ဘောကြီးများကို တိုက်ခိုက်ခြင်း စသည့် အကြံအစည်များကို ဘင်လာဒင်၏ မှတ်စု စာအုပ်တွင် တွေ့ရသည်ဟု ဆိုသည်။

ဘင်လာဒင် သေဆုံးသွားပြီဖြစ်ကြောင်း အယ်လ်ကိုင်ဒါ အင်တာနက် စာမျက်နှာတွင် ထုတ်ဖော်ဝန်ခံသည်ဟု ဆိုသည်။ အဆိုပါ ကြေညာချက်တွင် အကြမ်းဖက် တိုက်ခိုက်မှုများ လုပ်ကြရန်၊ အမေရိကန်နှင့် ဆက်ဆံရေးကို ဖြတ်တောက်ရန် အစိုးရများအား ဆန္ဒပြဖိအားပေးရန် လှုံ့ဆော်ထားသည်။ ဘင်လာဒင် သေဆုံးသွားသည့်အတွက် အယ်လ်ကိုင်ဒါ၏ ဂျီဟာဒ် စစ်ပွဲသည် အဆုံးသတ်သွားမည် မဟုတ်ကြောင်း ဖော်ပြသည်။

၂ဝဝ၁ ခုနှစ်တွင် ဘင်လာဒင်အား တိုရာဘိုရာ တောင်တန်းတွင် နောက်ဆုံးတွေ့မြင်လိုက်ရပြီး ပျောက်ကွယ်သွားသည်။ ထိုအချိန်မှစလျက် ခြေရာလည်းပျောက် ရေလည်းနောက် ကျန်ခဲ့သည်။ အစအနရှာမရ။ ထိုစဉ်မှစ၍ ဘင်လာဒင်သည် ဝါယာလက်နှင့် လက်ကိုင်ဖုန်း စသည့် အီလက် ထရွန်းနစ် ဆက်သွယ်ရေး ကိရိယာတို့ကို အသုံးမပြုတော့။ အနီးအနားတွင်လည်း မထားတော့။ အီလက်ထရွန်းနစ်နည်းဖြင့် သူ့အား ခြေရာမခံ နိုင်စေရန် ဖြစ်သည်။ သူ၏ လက်အောက်ငယ်သားများနှင့် ဆက်သွယ်ရာတွင် ဆက်သားကိုသာ အသုံးပြုတော့သည်။ ထိုဆက်သားကြောင့်ပင် အမေရိကန်တို့သည် ဘင်လာဒင်ရှိရာသို့ ဆိုက်ဆိုက်မြိုက်မြိုက် ရောက်သွားကြသည်။ အဆင့်မြင့် စစ်ဆေးခြင်း နည်းစနစ်ဖြင့် ဘင်လာဒင်၏ စိတ်အချဆုံး ဆက်သားအမည်ကို အမေရိကန်တို့ ၂ဝဝ၇ ခုနှစ် စောစောပိုင်းတွင် သိလာရသည်။ ထိုသူ၏ အမည်မှာ အာရှတ်ခန်-Ashad Khan ဖြစ်သည်။ အယ်လ်ကိုင်ဒါ အသိုင်းအဝိုင်းတွင် သူ့ကို အယ်လ်ကူဝိတ်တီဗူ Al Kuwaiti ဟု သိကြသည်။ အယ်လ်ကိုင်ဒါ ဆက်သား ဟတ်ဆန် ဂူးလ်ကို နှိပ်စက်စစ်ဆေးရာမှ သိလာရခြင်း ဖြစ်သည်။ ဂွမ်တာနာမို အကျဉ်းစခန်းတွင် ညှဉ်းပန်းနှိပ်စက်မှုများ၊ လူမဆန်စွာ ရက်စက်မှုများကို သမ္မတဘုရှ် လက်ထက်ကတည်းက ကွန်ဂရက်တွင် ဝေဖန် ပြစ်တင်မှုများ ရှိခဲ့သည်။ အစိုးရပိုင်းကလည်း နိုင်ငံတော် လုံခြုံရေးနှင့် ပတ်သက်သဖြင့် မလွှဲမရှောင်သာဘဲ ပြုလုပ်ရခြင်း ဖြစ်သည်ဟု စောဒက တက်သည်။ ယင်းသို့ စစ်ဆေးခြင်းကို အဆင့်မြင့် စစ်ဆေးခြင်း နည်းစနစ်-Enhanced Investigation Technique ဟု အမည်ပေးထားသည်။ အကျဉ်းသား တစ်ဦးကို ယင်းနည်းဖြင့် စစ်ဆေးမည်ဆိုပါက တရားရေး ဌာန၏ ခွင့်ပြုချက်ရှိဖို့ လိုအပ်သည်။ နှိပ်စက်ညှဉ်းပန်း စစ်ဆေး နိုင်ရန် အယ်လ်ကိုင်ဒါများအား ဂွမ်တာနာမိုနှင့် အမေရိကန် ပြင်ပနိုင်ငံခြား ကျဉ်းစခန်းများ (ကျူးဘား၊ ပိုလန်၊ ထိုင်း စသည်တို့တွင် ရှိသည်) တွင်ထားခြင်း ဖြစ်သည်။ ယင်းတို့အား အမေရိကန် ပြည်တွင်းတွင် ချုပ်နှောင်ထားမည် ဆိုပါက အမေရိကရှိ အခြားသော အကျဉ်းထောင်များမှ အကျဉ်းသားများ နည်းတူ အခွင့်အရေး ခံစားခွင့် ရရှိပြီး၊ နှိပ်စက်ညှဉ်းပန်း စစ်ဆေးခြင်းလည်း ပြုလုပ်ခွင့် မရှိပေ။

၂ဝဝ၄ ခုနှစ် ဇန်နဝါရီလ။ ကာ့ဒ်စစ်တပ်သည် အီရတ် မြောက်ပိုင်းတွင် အယ်လ်ကိုင်ဒါ ဆက်သား ဟတ်ဆန်ဂူးလ် Has-san Ghul ကိုဖမ်းဆီးရမိသည်။
Has-san Ghul ကို ဖမ်းဆီးရမိသည်။ ဂူးလ်လက်ထဲတွင် စာတစ်စောင် တွေ့ရသည်။ ထိုစာမှာ အီရတ်အကြမ်း ဖက်ခေါင်းဆောင် အဘူမူဆတ်ဇာ ကာဝီ- Abu Musab Zarqawi ထံမှ ဘင်လာဒင်ထံသို့ ပေးပို့သောစာဖြစ်သည်။ ဂူးလ်အား အဆင့်မြင့် စစ်ဆေးနည်းဖြင့် စစ်ဆေးခွင့်ပြုရန် တရားရေးဌာနသို့ စီအိုင်အေက တောင်းခံလိုက်သည်။ သို့သော် ဂူးလ်သည် စိတ်ဓာတ်ကြံ့ခိုင်သူ ဖြစ်သည်။ အဆင့်မြင့် စစ်ဆေးနည်းသည် သူ့ထံမှ သတင်းကို ညှစ်မထုတ်နိုင်ခဲ့။ ထိုအခါ စီအိုင်အေသည် နည်းလမ်းပြောင်းရသည်။ ဂူးလ်သည် အစားအသောက် မက်သည့်အပြင် ရှက်ကြောက်တတ်သူ ဖြစ်သည်ကို စီအိုင်အေ စိတ်ပညာရှင်များက သတိထားမိသည်။ ထိုအချက်ကို စီအိုင်အေက ပျော့ကွက်အဖြစ် အသုံးချလိုက်သည်။ အစာလျှော့ကျွေးခြင်း။ အငတ်ထားခြင်း။ နည်းတို့ကို အသုံးပြုပြန်သည်။ ယင်းသို့ စစ်ဆေးနေစဉ် တစ်လျှောက်လုံး စီအိုင်အေသည် ခွင့်ပြုထားသည့် နည်းလမ်းများထက် ပိုမိုသုံးစွဲခြင်း ရှိ-မရှိ တရားရုံးချုပ် ဥပဒေ အကျိုးဆောင် တစ်ဦးက စောင့်ကြည့်စစ်ဆေးသည်။ ထိုနည်းဖြင့် သတင်းအချက်အလက် အချို့ကို ရလာသည်။ ထိုအချက်များ အနက် ဘင်လာဒင်၏ လူယုံဆက်သား တစ်ဦးမှာ အာရှတ်ခန် ဖြစ်ကြောင်း သိလာရသည်။ သို့သော် အာရှတ်ခန် မည်သည့်နေရာတွင် ရောက်နေသည်ကို မသိရ။ လျှို့ဝှက်သည်းဖို ဝတ္ထုဆန်သော ဇာတ်လမ်း အစဖြစ်သည်။ ၂ဝ၁ဝ ပြည့်နှစ် သြဂုတ်လ ၁ ရက်နေ့တွင် အာရှတ်ခန်ထံသို့ မိတ်ဆွေတစ်ယောက်ထံမှ တယ်လီဖုန်း ဝင်လာသည်။

''သူငယ်ချင်း မတွေ့တာ ကြာလှပြီ။ သတိရတယ်ကွာ။ ဘာတွေ လုပ်နေသလဲ။ အခြေအနေ ကောင်းရဲ့လား''

''အရင်က မိတ်ဟောင်းဆွေ ဟောင်းတွေဆီ ရောက်နေတယ်ကွာ'' အာရှတ်က ခပ်တိုတို ခပ်ဝါးဝါး ပြန်ပြောလိုက်သည်။

ထို ခပ်ဝါးဝါး အဖြေသည် အမေရိကန်တို့အဖို့ လုံလောက်သော သဲလွန်စ ဖြစ်သွားသည်ကို အာရှတ် မသိလိုက်။ မိတ်ဟောင်းဆွေဟောင်း ဆိုသည်မှာ အယ်လ်ကိုင်ဒါ အသိုင်းအဝိုင်းကို ဆိုလိုမှန်း စီအိုင်အေက ကောင်းကောင်းသိလိုက်သည်။ ထိုသဲလွန်စ နောက်သို့ လိုက်ရင်း အဘော့တာဘတ်မြို့ရှိ ၁၈ ပေ အုတ်တံတိုင်း ကာရံထားသော ခြံဝင်းကို ခြေရာခံမိလာသည်။ အနီးအနားရှိ ခြံများထက် ရှစ်ဆကျယ်သော ခြံဝင်းဖြစ်သည်။ ခြံဝင်းအတွင်းရှိ အိမ်မကြီးတွင် တယ်လီဖုန်းမရှိ။ အင်တာနက်မရှိ။ ထိုအိမ်အတွင်းမှ အမှိုက်သရိုက်များကို ပြင်ပသို့ မစွန့်ပစ်။ ခြံဝင်းအတွင်း၌ မီးရှို့ ဖျက်ဆီးသည်။ အမှိုက်များနှင့်အတူ ဒီအင်အေ အစအနများ ပါသွားမည်ကို စိုးရိမ်ဟန် တူသည်။ ထိုအချက်များက စီအိုင်အေကို ပို၍ သင်္ကာမကင်း ဖြစ်စေသည်။ အာရှတ် သို့မဟုတ် အိမ်သားတစ်ဦးသည် လက်ကိုင်ဖုန်း သုံးချင်လျှင် အိမ်မှအနည်းဆုံး မိုင်ကိုးဆယ် အကွာသို့ ကားမောင်းသွားပြီးမှ တယ်လီဖုန်း ဆက်သည်ကို စီအိုင်အေ အေးဂျင့်များက တွေ့ရသည်။ မိုင်ကိုးဆယ်အကွာ ရောက်မှသာ တယ်လီဖုန်းတွင် ဓာတ်ခဲတပ်ဆင်သည်။ စကားပြောဆိုပြီးသည်နှင့် ဓာတ်ခဲကို ပြန်ဖြုတ်လိုက်သည်။ ဘင်လာဒင်ထံမှ စာများကို USB Stick တွင်ထည့်ကာ မိုင်ပေါင်းများစွာ ဝေးသောနေရာရှိ အင်တာနက်ဆိုင်သို့ ယူသွားသည်။ ထိုအင်တာနက်မှ စာကို ပေးပို့သည်။ လက်ခံရရှိသော အီးမေးလ်များကိုလည်း သိုမှီးကိရိယာ အတွင်းထည့်သွင်းလျက် ပြန်ယူလာသည်။ ထိုနည်းဖြင့် ဘင်လာဒင် လှုပ်ရှားခဲ့သည်။ ခြံဝင်းထဲတွင် လူတစ်ယောက် ခေါက်တုံ့ခေါက်ပြန် လမ်းလျှောက်နေသည်ကို တွေ့ရတတ်သည်။ မောင်းသူမဲ့ လေယာဉ်နှင့် ဂြိုဟ်တုမှ ရိုက်ယူ ထားသော ဓာတ်ပုံများတွင် မျက်နှာ သွင်ပြင်မှာ ကွဲကွဲပြားပြား မရှိ။ သို့သော် ထိုသူ၏ အရိပ်နှင့် လမ်းလျှောက်ပုံ တစ်ကွက်ချင်းကို ထောက်လှမ်းရေး အဖွဲ့တစ်ဖွဲ့ ဖြစ်သည့် National Geo-spatial-Intelligence Agency က တိုင်းတာတွက်ချက်ကြည့်ရာ အရပ် ၅ ပေ ၈ လက်မမှ ၆ပေ ၈ လက်မ အတွင်းရှိမည်ဟုဆိုသည်။ ဘင်လာဒင်သည် အရပ် ခြောက်ပေ လေးလက်မ ရှိသည်။ ပထန် အများအပြားသည် အရပ် ခြောက်ပေကျော်သူများ ဖြစ်သဖြင့် အရပ် အတိုင်းအတာ တစ်ခုတည်းဖြင့် ဘင်လာဒင် ဖြစ်သည်ဟု တပ်အပ်သေချာ မပြောနိုင်သေးပေ။ သူသည် မည်သည့်အခါမျှ ခြံဝင်းမှ ထွက်ခွာသွားသည်ကို မတွေ့ရသဖြင့် အကျဉ်းသား တစ်ယောက်ပမာ ဖြစ်နေသည်ကိုလည်း ထောက်လှမ်းနေသူများက သတိထားမိသည်။ ရိပ်မိသွားနိုင်သဖြင့် အနီးကပ် လေ့လာမှုကိုလည်း စီအိုင်အေက မလုပ်ရဲ။ မလှမ်းမကမ်းရှိ အိမ်တစ်အိမ်တွင် စခန်းချကာ ထောက်လှမ်းမှုကို ဆက်လက်ဆောင်ရွက်သည်မှာ ဘင်လာဒင်၏ အိမ်ကို ဝင်စီးသည့် အချိန်အထိ ဖြစ်သည်။

ဘင်လာဒင်၏ နေအိမ်ကို ဝင်ရောက်စီးနင်းရန် ရေတပ် ဒုတိယ ဗိုလ်ချုပ်ကြီး ဝီလီယံ မက်ရေဗင်အား စီအိုင်အေ ညွန်ကြားရေးမှူးက တာဝန်ပေးလိုက်သည်။ မက်ရေဗင်က ရေတပ်အထူးတပ်ဖွဲ့ Navy SEALS ကို တာဝန်ပေးသည်။ အထူးတပ်ဖွဲ့ ဝင်များသည် အရေးကြီး ပစ်မှတ်များကို လျှပ်တစ်ပြက် ဝင်ရောက်စီးနင်းခြင်း အတွေ့အကြုံများစွာ ရှိထားသူများ ဖြစ်သည်။ ရှေ့တန်းစစ် မျက်နှာတွင် အထူးတာဝန်များကို ကြိမ်ဖန်များစွာ ထမ်းဆောင်ဖူးသူများ ဖြစ်သည်။ ခြံဝင်းအတွင်း နေထိုင်သူ အမျိုးသမီးနှင့် ကလေးအရေအတွက်စာရင်းကို စီအိုင်အေက ပြုစုပေးသည်။ အမျိုးသမီးနှင့် ကလေးများက အန္တရာယ်ပြု မလာသရွေ့ ယင်းတို့အား ပစ်ခတ်ခြင်း မပြုရန် အထူးတပ်ဖွဲ့ဝင်များအား ညွှန်ကြားထားသည်။ ပုန်းခိုနေထိုင်သူသည် ဘင်လာဒင် ဖြစ်သည်ဆိုသော ခိုင်လုံသည့် အထောက်အထားများကို ၂ဝ၁ဝ ပြည့်နှစ် စက်တင်ဘာလ ၁ ရက်နေ့တွင် စီအိုင်အေက ရရှိသည်။ ၂ဝ၁၁ ခုနှစ် မတ်လ ၁၄ ရက်မှ ၂၈ ရက်အတွင်း အမျိုးသား လုံခြုံရေးကောင်စီ အစည်းအဝေးကို အကြိမ်ကြိမ် ကျင်းပလျက် ဘင်လာဒင်အား ဖမ်းဆီးနိုင်ရေးကို ဆွေးနွေးခဲ့ကြသည်။ ၂ဝ၁၁ ခုနှစ် ဧပြီလ ၂၉ ရက် သောကြာနေ့တွင် အိုဘားမားသည် အယ်လာဘားမား ပြည်နယ်တွင် မုန်တိုင်းကြောင့် ပျက်စီးမှုများကို သွားရောက်ကြည့်ရှုရန် ရှိနေသည်။ အယ်လာဘားမားသို့ မထွက်ခွာမီ ဘင်လာဒင် စစ်ဆင်ရေးကို ဆောင်ရွက်ရန် အမိန့်ကို အိုဘားမားက လက်မှတ်ရေးထိုး ပေးလိုက်သည်။ ဧပြီလ ၃ဝ ရက်နေ့တွင် စစ်ဆင်ရေးကို ဆောင်ရွက်ရန် ဖြစ်သော်လည်း၊ ရာသီဥတု အခြေအနေကြောင့် နောက်တစ်နေ့ ဖြစ်သော မေလ တစ်ရက်နေ့သို့ ရွှေ့လိုက်ရသည်။

ဆက်လက်ဖော်ပြပါမည်။

Ref: Killing Bin Laden: How the U.S. Finally Got Its Man.

Photo Description: ဘင်ကြီး

ဘင်လာဒင်၏နောက်ဆုံးညများ (၄)

ကိုယ်ပျောက်ရဟတ်ယာဉ်

ဝင်ရောက်စီးနင်းရာတွင် အသုံးပြုသော ရဟတ်ယာဉ်သည် စစ်ရေး လေ့လာသူများအဖို့ အထူးစိတ်ဝင်စားစရာ ဖြစ်ခဲ့သည်။ ဘင်လာဒင်၏ ခြံဝင်းအတွင်း ဆင်းသက်သော ရဟတ်ယာဉ် နှစ်စင်းအနက် တစ်စင်းသည် အဆင်းတွင် ချို့ယွင်းသွားခဲ့သည်။

ထိပ်တန်းလျှို့ဝှက် ရဟတ်ယာဉ် ဖြစ်သဖြင့် အလုံးအတိုင်း မထားရစ်နိုင်ဘဲ ဖောက်ခွဲဖျက်ဆီး လိုက်ရသည်။ ရဟတ်ယာဉ်အဆင်းတွင် လေးဘက် လေးတန်မှ မြင့်မားသော အုတ်နံရံများက လေကိုကာထားသဖြင့် ပန်ကာများက လိုအပ်သော လေထုကို စုပ်မယူနိုင်ဘဲ အမြီးပိုင်းက နံရံနှင့် ဆောင့်မိသွားဟန် တူသည်။ ရဟတ်ယာဉ်ကို အသံလုံစေရန် ပြုပြင်ထားသဖြင့် သာမန်အလေးချိန်ထက် ပိုနေသဖြင့် မထိန်းနိုင် ဖြစ်ရသည်ဟု ဆိုသည်။

တစ်စင်းက ခေါင်မိုးပေါ်တွင် အထူးတပ်ဖွဲ့ဝင်များကို ချပေးလျက် ကျန်တစ်စင်းက ခြံဝင်းအတွင်း ဆင်းသက်ကာ အပေါ် အောက်နှစ်ဘက် ညှပ်တိုက်ခိုက်မည့် မူလအစီအစဉ်ကို စွန့်လွှတ်လိုက်ပြီး၊ တပ်ဖွဲ့ဝင်အားလုံး မြေညီထပ်မှ စတင် ရှင်းလင်းကြရသည်။

ရဟတ်ယာဉ်သည် ရိုးရိုးလေယာဉ်များနှင့် မတူဘဲ မောင်းနှင်ထိန်း သိမ်းရာတွင် ခက်ခဲသည်။ ရဟတ်ယာဉ်တစ်စင်း လေထဲတွင် ရှိနေစဉ် အထက်၊ အောက်၊ ဝဲယာ စသည့် လားရာများအကြား ရွေ့လျားတိမ်းစောင်းမှု မရှိစေဘဲ ထိန်းကြောင်း မောင်းနှင်ရသည်။ ရဟတ်ယာဉ်များသည် အနိမ့်ပျံ လေယာဉ်ဖြစ်ပြီး အဆောက်အအုံ၊ သစ်ပင်၊ ဓာတ်တိုင် စသည်တို့ကို ရှောင်ကွင်း မောင်းနှင်ရသဖြင့် ပိုမိုခက်ခဲသည်။

ရန်သူ၏ နောက်တန်းသို့ ခြေရာဖျောက် ဝင်လျှိုဝင်သွားနိုင်သည့် ရေဒါက မမြင်နိုင်သော အသံလုံကိုယ်ပျောက် ရဟတ်ယာဉ်ကို နိုင်ငံကြီးများက တီထွင်ရန် ကြိုးစားနေသည်မှာ ဆယ်စုနှစ် ပေါင်းကြာခဲ့ပြီ ဖြစ်သည်။ သို့သော် ယင်းကဲ့သို့သော ရဟတ်ယာဉ်မျိုး တည်ရှိနေသည်ကို ယခုအခါတွင်မှ သိကြရသည်။

ကျန်ရစ်နေသည့် အမြီးပိုင်း ပန်ကာသည် သမားရိုးကျ ရဟတ်ယာဉ် များရှိ ပန်ကာတည်ဆောက်ပုံမျိုး မဟုတ်ဘဲ အသံလုံစေရန် သတ္ထု အဝိုင်းပြားဖြင့် ဖုံးအုပ်ထားသည်ကို တွေ့ရသည်။ ပင်ဆဲလ်ဗေးနီးယား တက္ကသိုလ်၊ လေကြောင်း အင်ဂျင်နီယာ ပါမောက္ခ ဖါဟင် ဂန္ဒီ-Farham Gandhi က''ရဟတ်ယာဉ်ကို အသံလုံးဝ မထွက်အောင်တော့ လုပ်လို့မရဘူး။ အခုလက်ရှိ အနေအထားလောက် အသံမထွက်အောင်တော့ လုပ်လို့ရနိုင်တယ်''ဟု ပြောသည်။

အသံငြိမ်စေရန် ပန်ကာဒလက်၏ လည်ပတ်နှုန်းကို လျှော့ချရပြီး၊ ဒလက်ပုံစံကို ပြုပြင်ပြောင်းလဲ ပေးရသည်။

ကာလီဖိုးနီးယား တက္ကသိုလ် လေကြောင်းအင်ဂျင်နီယာ ပါမောက္ခ ဂျက်ဖ် အဲလ်ဒရက်ခ်ျ Jeff Eldredge က ''ရဟတ်ယာဉ် တစ်စင်းက အသံထွက်ပုံ ထွက်နည်းဟာ သိပ်ကို ရှုပ်ထွေးတယ်။ အဲဒီအသံကို ထိန်းချုပ်ဖို့ နည်းလမ်းပေါင်းများစွာကို အသုံးပြုရ လိမ့်မယ်''ဟု ဆိုသည်။

ရဟတ်ယာဉ် အစိတ်အပိုင်းများကို ပါကစ္စတန် စစ်တပ်က သယ်ထုတ်သွားသည်။ ထိုအစိတ်အပိုင်းများကို အခြားနိုင်ငံများ လက်သို့လွှဲပေးနိုင်သည်။ ပါကစ္စတန်နှင့် အထူးတလည် ရင်းနှီးသော တရုတ်လက်သို့ ရောက်သွားမည်ကို အမေရိကန်က စိုးရိမ်လျက်ရှိသည်။

ဘင်လာဒင်၏စံအိမ်
ဘင်လာဒင် ငါးနှစ်ကျော်ကြာမျှ အဘော့တာဘတ်တွင် ပုန်းအောင်းနေနိုင်ရန် ကူညီခဲ့သူ အာရှတ်ခန်သည် ဘင်လာဒင်က စိတ်အချဆုံး လျှို့ဝှက် ဆက်သား ဖြစ်သည်။ သူ့ကြောင့်ပင်လျှင် ဘင်လာဒင်ကို အမေရိကန်တို့ ဖော်ထုတ်နိုင်ခဲ့ခြင်း ဖြစ်သည်။

အဘော့တာဘတ်မြို့တွင် အာရှတ်သည် အများနှင့် ရောရောနှော နှောမနေ။ သူသည် လူကောင်ထွားထွား ပထန်လူမျိုး ဖြစ်သည်။ သူက မြေကွက်ဝယ်ပြီး သုံးထပ်တိုက် ဆောက်သည်။ ထိုတိုက်ထဲတွင် ဘင်လာဒင်ကို ဝှက်ထားသည်။

အာရှတ်၏ မိသားစုသည် ဘင်လာဒင်နှင့် အတူနေသည်။ နောက်မိသားစု တစ်စု ရှိသေးသည်။ သူ၏ ညီအစ်ကိုတော်ဟု အိမ်နီးချင်းများက သိထားသည့် တာရစ်၏ မိသားစု ဖြစ်သည်။ တိုက်ခိုက်မှုကြောင့် ဘင်လာဒင်၊ အာရှတ်၊ တာရစ် ၊ ဘင်လာဒင် ၏သားတို့အပြင် အာရှတ်၏ ဇနီးတို့ သေဆုံးကြရသည်။

သူတို့ နေပုံထိုင်ပုံမှာ ထူးဆန်းနေသည်ကို အိမ်နီးချင်းများက သတိပြုမိကြသည်။ အုတ်တံတိုင်းကို ၁၈ ပေမြှင့်ထားပြီး၊ လုံခြုံရေး ကင်မရာများ အဘယ်ကြောင့် တပ်ဆင်ထားရသနည်းဟု အိမ်နီးချင်းများက မေးမြန်းသောအခါ၊ အာရှတ်က သူ့တွင် ဆွေမျိုးအတွင်း အချင်းများမှု ပြင်းပြင်းထန် ရှိနေသဖြင့် မိသားစု လုံခြုံရေးအတွက် လုပ်ထားရခြင်းဖြစ်ကြောင်း ဖြေသည်။ ပါကစ္စတန် ကျေးလက်တွင် မိသားစု အတွင်း အချင်းများသည့်အခါ လုပ်ကြံသတ်ဖြတ်မှုများ မကြာခဏ ဖြစ်လေ့ရှိသည်။

အာရှတ်သည် ဘင်လာဒင်နှင့် ပြင်ပကမ္ဘာအကြား တစ်ခုတည်းသော ဆက်သွယ်ရေး လမ်းကြောင်း ဖြစ်သည်။ လိုအပ်သော အစားအစာ၊ ဆေးဝါးနှင့် သတင်းအပို့အယူကို အာရှတ်ကပင် ဆောင်ရွက်ပေးနေခဲ့သည်။ အာရှတ်၏ စူဇူကီး အပေါ့စား ကုန်တင်ယာဉ်ပေါ်တွင် ဂျုံအိတ်၊ အသီးအနှံနှင့် ဟင်းချက်စရာများ တင်လျက် အိမ်တွင်းသို့မောင်းဝင်သွားသည်ကို မကြာခဏ တွေ့ရသည်။ နွားနို့ပို့သူက တစ်နေ့လျှင် နွားနို့ဆယ်လီတာ ပို့ပေးရသည်။ နှစ်ပတ်တစ်ကြိမ် ဆိတ်တစ်ကောင်ကို ကားပေါ်တင်ကာ ခြံဝင်း အတွင်း မောင်းဝင်သွားသည်ကို အနီးအနား ရှိလူများက သတိထားမိသည်။

သူတို့ အိမ်သားများသည် လူမှုရေး၊ ဘာသာရေး ပွဲလမ်းများကို လာလေ့မရှိ။ လမ်းတွေ့၍ 'ဆလမ်မာလေးကွန်း'ဟု နှုတ်ဆက်သည်ကိုပင် ခေါင်းညိတ်ပြရုံလောက်သာ တုံ့ပြန်လေ့ ရှိသည်။

အိမ်အနီးတွင် ကလေးများ ကရစ်ကက်ကစားနေစဉ် ဘောလုံးခြံဝင်းထဲသို့ ဝင်သွားလျင် ချက်ချင်း ပြန်ပေးလေ့မရှိ။ သုံးလေးရက်ကြာမှ ပြန်ရတတ်သည်။

အထူးတပ်ဖွဲ့ဝင်များ၏ စစ်ဆင်ရေးသည် အသုံးပြုသည့် နည်းဗျူဟာ၊ လက်နက်ပစ္စည်း၊ သတင်းအချက်အလက် စုဆောင်းခြင်းတို့သည် အမေရိကန်၏ ထိပ်တန်းလျှို့ဝှက် အဖြစ် တင်းကျပ်စွာ သိုသိပ်ထားသည်။ ထိုကဲ့သို့ မည်မျှကြာကြာ ထိန်းထားနိုင်မည် ဆိုသည်မှာ မေးစရာ ဖြစ်သည်။

သတင်းအချက်အလက်တို့ အလင်းအလျင်ဖြင့် ရွေ့လျားပျံ့နှံ့နေသည့် ယနေ့ခေတ်တွင် လျှို့ဝှက်ချက် ဆိုသည်မှာ မရှိနိုင်တော့။ အချိန်ပိုင်း အတွင်း၌သာ လျှို့ဝှက်ထားနိုင်သည်။ အနှေးနှင့်အမြန် ပေါက်ကြားကြသည်သာ ဖြစ်သည်။ ထို့ကြောင့် လျှို့ဝှက်ချက် မပေါက်ကြားမီ လုပ်ငန်းအစီအစဉ်များ ပြီးမြောက်ရန် အမြန်ဆုံး ဆောင်ရွက်ကြရသည်။ ဤသည်မှာ ယနေ့ခေတ်၏ လုပ်နည်းလုပ်ဟန် ဖြစ်နေသည်။

အမေရိကန်ဘက်က လျှို့ဝှက် သိုသိပ်ထားသော်လည်း ပါကစ္စတန်ဘက်က သတင်းများ စိမ့်ထွက်လာ သည်။ အထူးတပ်ဖွဲ့ဝင်များ သတ်ဖြတ်ခဲ့သည့် အာရှတ်ခန် ညီအစ်ကို နှစ်ယောက်နှင့် ဘင်လာဒင်၏သားတို့ သွေးအိုင်ထဲတွင် သေဆုံးနေသည့် ပုံများကို ရိုက်တာ သတင်းဌာနက ရရှိလာသည်။ ထိုဓာတ်ပုံများမှာ ပါကစ္စတန် လုံခြုံရေး တပ်ဖွဲ့ဝင်များထံမှ ဝယ်ယူခဲ့ခြင်း ဖြစ်သည်။

အဏ္ဏဝါသချိုင်းသို့
ဘင်လာဒင်၏ ရုပ်အလောင်းကို ဒီအင်အေ စစ်ဆေးမှု ပြုလုပ်သည်။ သေဆုံးသူသည် ဘင်လာဒင်ဖြစ်ကြောင်း သေချာသည့် အခါတွင်မှ သဂြုင်္ိဟ်သည်။ သေဆုံးပြီး ၁၂ နာရီ အကြာ ဂရင်းနစ်စံတော်ချိန် ဝ၆းဝဝ နာရီတွင် ဘင်လာဒင်၏ ရုပ်အလောင်းကို အမေရိကန် ညူကလီးယား စွမ်းအင်သုံး လေယာဉ်တင် သင်္ဘောကားလ်ဗင် စင်ပေါ်၌ မွတ်ဆလင် ထုံးတမ်းနှင့် အညီ ပြင်ဆင်ရွတ်ဖတ်မှု ပြုလုပ်ပြီး မြောက်အာရေဗျ ပင်လယ်ပြင်တွင် ရေချသဂြုင်္ိဟ်လိုက်သည်။ ယင်းသို့ သဂြုင်္ိဟ်ခဲ့ခြင်းအပေါ် ဝေဖန်မှု အများအပြား ပေါ်ထွက်လာသည်။

အမေရိကန်က ရည်ရွယ်ချက် ရှိရှိဖြင့် ယင်းသို့ သဂြုင်္ိဟ်လိုက်ခြင်း ဖြစ်သည်။ ဘင်လာဒင်သည် အဘော့တာဘတ်မြို့တွင် ရှိနေသည်ကို အမေရိကန်တို့ သိကတည်းက ဖြစ်နိုင်ခြေ အမျိုးမျိုးအတွက် အိမ်ဖြူတော် အရာရှိ ကြီးများသည် ဘာသာရေး ပညာရှင်၊ ပါမောက္ခများနှင့် တိုင်ပင် ဆွေးနွေးခဲ့ပြီး ဖြစ်သည်။

အမေရိကန်သည် တစ်ချိန်၌ ဘင်လာဒင် အာဇာနည် ဗိမာန်ဟု မပေါ်ပေါက်လာစေရန် တားဆီးလိုက်ခြင်း ဖြစ်သည်။ သို့သော် အာရေဗျ ပင်လယ်ပြင် တစ်ခုလုံးသည် ဘင်လာဒင်၏ ဂူဗိမာန် ဖြစ်လာလိမ့်မည်ဟု လန်ဒန်ထုတ် ဒေးလီးမေသတင်းစာက ရေးသည်။

ရေမြှုပ်သဂြုင်္ိလ်ခြင်းကို ထူးခြားသည့် အခြေအနေအရ ပြုလုပ်နိုင်ကြောင်း။ သို့သော် ယခုအခြေအနေသည် ထူးခြားသည့် အခြေအနေ မဟုတ်ကြောင်း ဒူဘိုင်းမှ ဘာသာရေး ခေါင်းဆောင် မိုဟာမက် အယ်လ် ကူဘေစီ Mohammed al-Qubaisi က ပြောသည်။
''မွတ်ဆလင် ထုံးတမ်းအရ သဂြုင်္ိဟ်ပေးမယ့် လူမရှိဘူး ဆိုရင်တော့ ရေချသဂြုင်္ိဟ်လို့ ရပါတယ်။ ဒါပေမယ့် ဘင်လာဒင်ရဲ့ ရုပ်အလောင်းကို ဘယ်သူမှ လက်မခံဘူး ဆိုတာတော့ မဖြစ်နိုင်ဘူး။ သူ့ရဲ့ဘက်သားတွေ၊ ဇနီး သားသမီးတွေက လက်ခံဖို့ အသင့်ရှိတာပဲ'' ဂျော်ဒန်တက္ကသိုလ်မှ အစ္စလာမ် ဥပဒေ ပါမောက္ခ မိုဟာမက် ကူးဒါးက ဆိုသည်။

ဘင်လာဒင်သည် မွတ်ဆလင် မဟုတ်။ ဘာသာမရွေး ထောင်ပေါင်း များစွာသော အပြစ်မဲ့သူများကို သတ်ဖြတ်နေသူသည် မွတ်ဆလင် မဟုတ်။ အစ္စလာမ်ဆိုသည့် အဓိပ္ပာယ်မှာ ငြိမ်းချမ်းရေးဟု ဆိုလိုသည်။ ထို့ကြောင့် ဘင်လာဒင်အား မွတ်ဆလင် ထုံးတမ်းနှင့်အညီ သဂြုင်္ိဟ်ရန် မလိုဟု မြောက်မြားစွာသော မွတ်ဆလင်များက ပြောကြပြန်သည်။

ကုန်သွယ်ရေး တိုက်ညီနောင် ပြိုကျပျက်စီးသည့် အထဲတွင် ပါသွားသော လူပေါင်း ၂၆ဝ၆ ဦးအား ယင်းတို့၏ ဘာသာရေး ဓလေ့ထုံးစံနှင့် အညီ မသဂြုင်္ိဟ်ခဲ့ရဟု ပြန်လှန်ချေပ ပြောဆိုသည် လည်းရှိသည်။

ဘာကြောင့်ကျဆုံးရသလဲ
လူအင်အား လက်နက်အင်အား မမျှသည့်အတွက် ဘင်လာဒင်သေဆုံး ရသည်။ မှားယွင်း အကြမ်းဖက်သည့် လုပ်ရပ်ကြောင့် ကျဆုံးရသည်။

ယနေ့ကမ္ဘာတွင် အယူအဆနှင့် တန်ဖိုးထားမှုတို့ ပြောင်းလဲကုန်သည်။ လူသတ်ခြင်းကို လက်မခံတော့။ သေမိန့်ကျထားသူများအား အစိုးရက ကြိုးစင်တင်သည်ကို မေးခွန်းထုတ် လာကြသည်။ နိုင်ငံအများအပြားသည် သေဒဏ်စီရင်ခြင်းကို ပယ်ဖျက်နေကြသည်။ အစိုးရသည်ပင်လျှင် စစ်မြေပြင် ရင်ဆိုင်တိုက်ပွဲမှလွဲ၍ အခြား နေရာများတွင် သတ်ဖြတ်သည်ကို လက်မခံကြတော့။ အယူအဆ၊ အတွေးအမြင်တွေ ပြောင်းကုန်ကြပြီ။

စစ်မြေပြင် မဟုတ်ဘဲ မြို့ပြတွင် အပြစ်မဲ့ လူအများအပြားကို သတ်ဖြတ်ခြင်းကို လက်သင့်မခံကြတော့။ ဤအချက်သည် ဘင်လာဒင် ကျဆုံးရခြင်း၏ အဓိက အကြောင်းရင်း ဖြစ်သည်ဟု ဆိုကြသည်။

ခုနစ်ရာစုတွင် ထွန်းပြောင် တောက်ပခဲ့သော မွတ်ဆလင် အင်ပါရာကို ပြန်လည်တည်ထောင်ရန် ဘင်လာဒင် စိတ်ကူးယဉ်အိပ်မက် မက်ခဲ့သည်။

ကုန်သွယ်ရေး တိုက်ညီနောင် တိုက်ခိုက်ဖျက်ဆီးခြင်း ခံရပြီးနောက် ဘင်လာဒင်အား သေမင်းတမန် အကြမ်းဖက် ခေါင်းဆောင်အဖြစ် ကမ္ဘာက အသိအမှတ် ပြုလာကြသည်။ နောက်လိုက်နောက်ပါ အများအပြား သူ့ထံသို့ ဝင်ရောက်လာသည့်အတွက် သူသည် အကြမ်းဖက် အင်အားစုကြီး တစ်ရပ် ဖြစ်လာမည်ကို စိုးရိမ်ခဲ့ကြသည်။

ဘာရိန်းနိုင်ငံသား တစ်ဦးက အင်တာနက်ပေါ်တွင် ရေးသားရာ၌ ''အယ်လ်ကိုင်ဒါနဲ့ ကျွန်တော်တို့ သဘောမတူ နိုင်တာတွေ အများကြီး ရှိပါတယ်။ ဒါပေမယ့် အမေရိကန်တွေ လုပ်သမျှ အာရပ်နိုင်ငံတွေက ခေါင်းတညိတ်ညိတ် လုပ်နေပေမယ့် ဘင်လာဒင်ကတော့ ခေါင်းခါပြနိုင်တဲ့လူ။ အမေရိကန် လုပ်နေတာတွေကို ပြတ်ပြတ်သားသား နိုးလို့ ပြောတဲ့လူ''

သို့သော် ထို နိုးသည် ဝါဒတစ်ရပ် မဟုတ်။ ဘုန်းမီးနေလ တောက်ပနေသည့် မွတ်ဆလင် အင်ပါရာ ထူထောင်ရန် ဆိုသည့် ရည်မှန်းချက်တော့ ရှိသည်။ ယင်းသို့ဆိုလျှင် သူယှဉ်ပြိုင် တိုက်ခိုက်နေသော အမေရိကန်၏ ရည်မှန်းချက်ကို ကြည့်ဖို့လိုသည်။ အမေရိကန်၏ လွတ်လပ်ရေး ကြေညာစာတမ်းတွင် မည်သည့် နိုင်ငံကြီး၊ အင်ပါရာကြီး ဖြစ်လာရန် မျှော်မှန်းပါသည်ဟု ဖော်ပြမထား။ နိုင်ငံတော်အတွင်း မှီတင်းနေထိုင်ကြသော အမေရိကန် ပြည်သူ ပြည်သား များသည် လုံခြုံဘေးကင်းစွာ၊ လွတ်လပ်စွာ ပျော်ရွှင်စွာ နေထိုင်ကြနိုင်စေရန် ဟုသာပါရှိသည်။ ထိုလွတ်လပ်မှုကို စည်းကမ်းဘောင် ကလနား သတ်ထားသည်။ စည်းချပေးထားသည်။ သို့သော် ထိုစည်းကမ်းများသည် အခြားနိုင်ငံအများနှင့် စာလျှင် အတော်ပင် ဘောင်ကျယ်သည်။ လွတ်လပ်သည်။ ငွေကြေး တတ်နိုင် သည်မို့ စနစ်ကျသည်။ ခေတ်နှင့် အညီ ပြေးနိုင်သော စည်းကမ်းများ ဖြစ်သည်။

အရှေ့အလယ်ပိုင်း ဒေသသည် ရေနံကြောင့် အမေရိကန်အဖို့ လွန်စွာမှ အရေးကြီးသည်။ အရှေ့အလယ်ပိုင်း သားများ၏ ထင်မြင်ချက်၊ အယူအဆ တို့ကို အမြဲသိနေရန်လိုအပ်သည်။ ထို့ကြောင့် အမေရိကန် သုတေသန အဖွဲ့အစည်းများစွာ အမြဲလိုလိုစစ်တမ်း ကောက်ယူလျက်ရှိသည်။ ကောက်ယူခဲ့သော စစ်တမ်းများအရ ၂ဝဝ၃ ခုနှစ်မှစ၍ အမေရိကန်အပေါ် လိုလိုလားလား မရှိကြသည်ကို တွေ့ရသည်။ ဆီးရီးယား၊ လက်ဘနွန်၊ အီဂျစ်၊ ပါလစ္စတိုင်း နယ်မြေရှိ လူအများစုသည် အမေရိကန် အမှူးပြုသည့် အနောက်နိုင်ငံများအပေါ် မကြိုက်ကြဟု သိရသည်။

မည်သည့်ကြောင့် မကြိုက်ကြသည်ကို နှိုက်နှိုက်ချွတ်ချွတ် စစ်တမ်းကောက်ယူသည့်အခါ တွေ့လာရသည်မှာ၊ အမှန်စင်စစ် အရှေ့အလယ် ပိုင်းသားများသည် အမေရိကန်တွင် သွားရောက်ပညာ သင်လိုသည်။ အလုပ်အကိုင် လုပ်လိုသည်။ အခြေချ နေထိုင်လိုကြသည်။ အမေရိကန်ကို မကြိုက်ကြခြင်း မဟုတ်။ အမေရိကန်၏ လွတ်လပ်သော လူနေမှုပုံစံကို သဘောကျကြသည်။ ကိုကာကိုလာ၊ ပက်စီကိုလာ၊ နက်စ်လေနို့၊ အကောင်းစား ခေါင်းလျှော်ရည်တို့ကို အဘော့တာဘတ်ရှိ ဘင်လာဒင်နေ အိမ်က နေ့စဉ်ဝယ်သည်ဟု ဘလွန်းဘာ့ဂ် သတင်းဌာနက ဖော်ပြသည်။ ဘင်လာဒင်၏ မိသားစုသည်ပင်လျှင် အမေရိကန်တွင် ထုတ်လုပ်သော ပစ္စည်း၊ အမေရိကန် နည်းစနစ်ဖြင့် ထုတ်သော ပစ္စည်းများကို နှစ်ခြိုက် သဘောကျသည်မှာ ထင်ရှားသည်။ အမေရိကန်က အစ္စရေးကို ထောက်ခံနေသည့် လုပ်ရပ်ကို မကြိုက်ကြခြင်း ဖြစ်သည်ကို တွေ့ရသည်။ ထို့ကြောင့် အိုဘားမား အစိုးရသည် အစ္စရေး ပေါ်လစီ အပြောင်းအလဲ လုပ်ရန်ပြင်ဆင်လာသည်ကို တွေ့ရသည်။

ဘင်လာဒင်နှင့် ပတ်သက်သော စစ်တမ်းကောက်ယူရာတွင်လည်း အယ်လ်ကိုင်ဒါက အကြမ်းဖက်ဗုံးခွဲမှု ကျူးလွန်သည့် အခါတိုင်း ဘင်လာဒင်အား ထောက်ခံမှု လျော့ကျသွားသည်ကို တွေ့ရသည်။ ၂ဝ၁၁ ခုနှစ်တွင် ပါကစ္စတန်၌ ဘင်လာဒင်အား ထောက်ခံမှု ၄၆ ရာနှုန်းမှ ၂ဝ ရာနှုန်း သို့လည်းကောင်း၊ ပါလစ္စတိုင်းတွင် ၇၂ ရာနှုန်းမှ ၃၄ ရာနှုန်းသို့လည်းကောင်း ကျဆင်းသွားသည်ကို တွေ့ရသည်။

ဘင်လာဒင်သည် အမေရိကန်၏ အစ္စရေးအပေါ် ထောက်ခံသော လုပ်ရပ်ကို တားဆီးပေးနိုင်မည်ဟု မွတ်ဆလင် ကမ္ဘာက မျှော်လင့်ခဲ့ဖူးသည်။ သို့သော် သူ့ဆီမှ ထွက်လာသည်မှာ အေကေ-၄၇ လွယ်ကာ မိန့်ခွန်းခြွေနေသည့် ဗီဒီယိုအခွေများနှင့် သွေးထွက်သံယိုမှုများသာ ဖြစ်နေခဲ့သည်။

အရှေ့အလယ်ပိုင်းတွင် လက်တွေ့ရင်ဆိုင်နေရသော အခက်အခဲများကို ဘင်လာဒင်သည် ဖြေရှင်းပေးနိုင်စွမ်းမရှိ။ မည်သည့် အရှေ့အလယ်ပိုင်းသားမျှ ဂူအတွင်း၌ မနေလိုကြ။ ဘင်လာဒင်သည်ပင် မနေလို။

အီဂျစ်၊ ဂျော်ဒန်၊ ဆီးရီးယား၊ လက်ဘနွန်၊ မော်ရိုကိုတို့၏ အလုပ်လက်မဲ့နှုန်းသည် ကမ္ဘာ့ပျမ်းမျှထက် များစွာပိုနေသည်။ ထိုနိုင်ငံများရှိ ပညာရေး စနစ်သည် အလုပ်ခွင်သို့ အသင့် ဝင်ရောက်နိုင်သော ပညာရေးများ မဟုတ်ဘဲ ဘာသာရေး အလေးကဲနေသည်။ ထိုပြဿနာများအတွက် ဘင်လာဒင်တွင် အဖြေမရှိ။

အာရပ်-အစ္စရေး ပြဿနာကို ငြိမ်းချမ်းသည့် နည်းလမ်းဖြင့် ဖြေရှင်းရန်သာ ရှိသည်။ ဘင်လာဒင်က အကြမ်းဖက်သည့်နည်းဖြင့် ကြိုးစားကြည့်ခဲ့ခြင်းသာ ဖြစ်သည်။

နိဂုံးပိုင်း

Ref: Killing Bin Laden: How the U.S. Finally Got Its Man.

Photo Description: ဘင်ကြီး နောက်ဆုံးနေသွားတဲ့ အိမ်ဝင်း