မလေးရှားက စားသောက်ဆိုင် တစ်ဆိုင်မှာပါ..။
ဆိုင်ထဲရောက်လို့ ထိုင်စရာနေရာကြည့်နေတုန်းမှာ Waiter တစ်ယောက်ရောက်လာတယ်..။
“ဒီနားမှာ ထိုင်ရင် အပြင်မြင်ကွင်းတွေကို မြင်ရပါမယ်..။ ဒါပေမယ့် နဲနဲ ပူပါမယ်..။ ဟိုဖက်နားကတော့ လေအေးစက်နဲ့ နီးပြီး အေးအေးဆေးဆေး ထိုင်နိုင်ပါလိမ့်မယ်..။”
လေအေးစက်နဲ့ နီးတဲ့ နေရာကို ရွေးလိုက်ပါတယ်..။
“လူကြီးမင်း.. ဒီဆိုင်ကို ပထမဆုံး အကြိမ်ရောက်တာဆိုရင် ကျွန်တော်တို့ ဆိုင်ရဲ့ စားသောက်ဖွယ်ရာတွေ အကြောင်း ရှင်းပြပါရစေ..”
သိပ်ကို မွန်ရည်စွာနဲ့ ဒီနေ့ အတွက် အထူးဟင်းလျာ.. ပုံမှန် နေ့စဉ် ရနေကျ အစားအစာ.. မနက်ပိုင်း နေ့လည်ပိုင်းနဲ့ ညနေပိုင်းတွေမှာ စားလေ့ရှိကြတဲ့ စားဖွယ်ရာတွေ.. ပြီးတော့ သူတို့ ဆိုင်မှာ ရနိုင်တဲ့ သောက်ဖွယ်ရာတွေဟာ အယ်လ်ကိုဟော မပါဝင်ကြောင်း သေသေချာချာ သွက်သွက်လက်လက် ရှင်းပြပါတယ်..။ မှာသမျှကို လဲ သေသေချာချာ မှတ်သားပြီး ပြန်ရွတ်ပြပါသေးတယ်..။ သေချာပြီ ဆိုတော့မှ မိနစ်နှစ်ဆယ် စောင့်ရပါမယ် ဆိုပြီး .. သူတို့ ဆိုင်ရဲ့ အထူးစီမံထားတဲ့ ဖျော်ရည် တစ်ခွက် လာချပေးပါတယ်..။
ဧည့်သည်ရှေ့မှာ ရှိနေတဲ့ သောက်ရေခွက်ဟာလဲ လုံးဝ ကုန်သွားတဲ့ အထိမစောင့်ပဲ တောက်လျှောက်လာဖြည့်ပေး နေတာပါ..။ နောက်ဆုံး စားပြီးချိန်အထိ ဖြည့်နေတုန်းပါပဲ.။ တော်ပါပြီလို့ မပြောမချင်း ဖြည့်နေတာပါ..။ ဟင်းပွဲထွက်လာတော့လဲ အင်္ကျီ အဖြူကို မတော်တဆ စွန်းသွားရင် ချွတ်ရခက်တယ် ဆိုပြီး အင်္ကျီပေါ်မှာ အပေခံ လည်စီးပုဝါ တစ်ထည် စည်းပေးသေးတယ်..။
အားလုံး ပြီးစီးသွားတော့ ကျသင့်ငွေရှင်းတဲ့ အခါ ၂၅ ဒေါ်လာလောက်နဲ့ ညီမျှတဲ့ ပိုက်ဆံကို ပေးရပါတယ်..။ အဲဒီပမာဏဟာ များပေမယ့် နောက်တစ်ခါ လာဦးမယ် ဆိုတဲ့ စိတ်ကို ဖြစ်စေပါတယ်..။ ကျေနပ်မှုကို ရစေပါတယ်..။ ဆိုင်ရဲ့ သန့်ရှင်းသပ်ယပ်မှု.. လူဝင်လူထွက်များပေမယ့် ဝန်ထမ်းတွေရဲ့ ကျွမ်းကျင်မှု ဖေါ်ရွေမှု တွေက နိုင်နိုင်နင်းနင်း ရှိလှပါတယ်..။ တစ်ယောက်ကို တစ်ယောက် တိုးဝှေ့တွန်းတိုက်ပြီး သွားနေတာမဟုတ်ပဲ သွက်သွက်လက်လက် ရွေ့လျားနေကြတာကို တွေ့ရပါတယ်..။ Waiter တစ်ယောက်ကို စားပွဲလေးဝိုင်းအထိ တာဝန်ယူနိုင်တာ ဧည့်သည်ကို ထိန်းနိုင်တာ.. ဧည့်သည်လိုအပ်ချက်ကို မျက်ခြေမပြတ်ကြည့်နေပြီး လွယ်လင့်တကူဖြည့်ဆည်း နိုင်တာတွေဟာ သေသေချာချာ လေ့ကျင့်ထားမှန်း သိသာလှပါတယ်..။ အားလုံးဟာ လူငယ်လေးတွေပါပဲ..။ ဒါပေမယ့် သူတို့ဟာ ကျွမ်းကျင်လွန်း လှပါတယ်..။ သူတို့ အလုပ်ကို သူတို့ အကောင်းဆုံး လုပ်နိုင်ကြပါတယ်..။ ဒါကြောင့်လဲ မလေးရှားဟာ အရှေ့တောင် အာရှ မှာ ကမ္ဘာလှည့် ခရီးသွား အများဆုံး ရတဲ့ နိုင်ငံဖြစ်နေတာပါ..။ အဲဒီ အဆင့်ကို သူတို့ လွယ်လွယ် ရခဲ့တာတော့ မဟုတ်ပါဘူး..။ ကြော်ငြာကောင်းရုံနဲ့လဲ မရ နိုင်ပါဘူး..။
၂၀၁၆ မတ်လ က ထုတ်ပြန်ခဲ့တဲ့ စာရင်းအရ ၂၀၁၅ ခုနှစ် ဇန္နဝါရီကနေ ဒီဇင်ဘာအထိ မလေးရှားကို လာလည်တဲ့ ဧည့်သည်ပေါင်း ၂၅.၇သန်း (၂၅,၇၂၁,၂၅၁) ယောက် လာရောက်ကြောင်း သိရပါတယ်..။ အဲဒီက ရတဲ့ ဝင်ငွေဟာ မလေးရှားသုံးငွေ ၆၉.၁ ဘီလီယံ ရင်းဂစ် ရခဲ့ပါတယ်..။ ဒါတောင်မှ မလေးရှားရဲ့ ခရီးသွားနှစ် ဖြစ်တဲ့ ၂၀၁၄ ထက်စာရင် ၆ရာခိုင်နှုန်းလောက် လျော့တယ်လို့ ဆိုပါတယ်..။ ခရီးသွားလုပ်ငန်း ဖွံ့ဖြိုးဖို့.. ဟိုတယ်လုပ်ငန်း ဖွံ့ဖြိုးဖို့.. စားသောက်ဆိုင်လုပ်ငန်း ဖွံ့ဖြိုးဖို့.. သယ်ယူပို့ဆောင်ရေးလုပ်ငန်းတွေ ဖွံ့ဖြိုးဖို့ ဆိုတာတွေဟာ ခွဲခြားလို့ မရတဲ့ ဆက်စပ် ကဏ္ဍတွေ ဖြစ်ပါတယ်..။ အဲဒီလို ဆက်စပ်ဖွံ့ဖြိုးချင်ရင် သင်ယူရပါမယ်.. လေ့ကျင့်ရပါမယ်..စိတ်ဓါတ်တွေ ပြင်ဆင်ရပါမယ်..။ ဝန်ဆောင်မှု လုပ်ငန်းထဲမှာ စိတ်ရောကိုယ်ပါ နှစ်မြှုပ်ထားနိုင်ရပါမယ်..။ စိတ်ထား နူးညံ့ သိမ်မွေ့ဖို့လိုပါတယ်..။
ဒါတွေဟာ ဝန်ဆောင်မှု နယ်ပယ်ရဲ့ အခြေခံတွေဖြစ်ပါတယ်..။ ဝန်ဆောင်မှုနယ်ပယ်ထဲကို စမ်းလုပ်ကြည့်ရုံ .. သစ်မရခင် စပ်ကြား ဝါးပေါင်းကွပ်ရုံ လောက်နဲ့ မဝင်သင့်ပါဘူး..။ တကယ်ကို စိတ်ရောကိုယ်ပါ ပြောင်းလဲ နိုင်ဖို့ လိုသလို လိုအပ်တဲ့ ပံ့ပိုးမှု အပိုင်း ကိုလည်း ပံ့ပိုးနိုင်သူ ပံ့ပိုးခွင့်ရှိသူများက ပြည့်ပြည့်ဝဝ ပံ့ပိုးပေးရမှာ ဖြစ်ပါတယ်..။ ဝန်ဆောင်မှုနယ်ပယ်ရဲ့ လေ့ကျင့်ရေးအပိုင်းဟာ သိပ်ကို အရေးပါပါတယ်..။ ပြည့်ပြည့်ဝဝ ပြင်းပြင်းထန်ထန် လေ့ကျင့်ထားမှသာ အသားကျတဲ့ အရည်အသွေးကို ရမှာပါ..။
ဒါကြောင့် ကိုယ့်တိုင်းပြည်ရဲ့ ခရီးသွားလုပ်ငန်း ဖွံ့ဖြိုး တိုးတက်ချင်တယ် ဆိုရင် ကန့်သတ်ချက်တွေ အမျိုးမျိုးနဲ့ အသာစီး ယူမယ့်အစား ရဲရဲဝံ့ဝံ့ ဖွင့်ပေးပြီး.. လွတ်လွတ်လပ်လပ် ပြိုင်ဆိုင်စေခြင်း ကသာ ပိုပြီး အဓိပ္ပါယ်ရှိစေမှာ ဖြစ်ပါတယ်..။
ချစ်ခင်စွာဖြင့်
ကောင်းလွန်း ( ၂၃.၉.၂၀၁၆)
No comments:
Post a Comment
မိတ်ဆွေ...အချိန်လေးရရင် blogg မှာစာလာဖတ်ပါနော်
ဗဟုသုတ ရနိုင်တယ်။