ချမ်းသာချင်ရင် ချမ်းသာနည်းသိအောင် လုပ်ပါ

 

ဗန်းမော်သိန်းဖေရဲ့မျှဝေလိုသောအတွေးများ

 

#ချမ်းသာချင်ရင် ချမ်းသာနည်းသိအောင် လုပ်ပါ

အဖြစ်အပျက် (၁)

အမေရိကန်နိုင်ငံက ပင်လယ်ကူးသင်္ဘောကြီး ၃ စင်းကို ပိုင်တဲ့ သူဌေးကြီးတစ်ယောက်ရှိတယ်။ တစ်ရက်မှာ ကုန်ပစ္စည်းအပြည့်တင်ထားတဲ့ သူ့သင်္ဘော ၃ စင်းစလုံး ပစိဖိတ်သမုဒ္ဒရာထဲမှာ မုန်တိုင်းမိပြီး ရေအောက်နစ်မြုပ်သွားကြတယ်။ သင်္ဘောတွေရော ကုန်ပစ္စည်းတွေပါ ဘာမှပြန်ဆယ်ယူလို့ မရတော့ဘူး။ ကုန်ပစ္စည်းပိုင်ရှင်တွေကို ပစ္စည်းတန်ဖိုး လျော်ပေးလိုက်ရလို့ သူ့ရှိသမျှ စည်းစိမ်တွေ ပြုတ်သွားတယ်။ သူ့လုပ်ဖေါ်ကိုင်ဖက် စီးပွားရေးသမားတွေက သူ့ကို စိတ်ဓာတ်မကျအောင် အားပေးနှစ်သိမ့်ကြတယ်။ သူဌေးကြီးက သူတို့ကို ပြန်ပြောတယ်။ "ငါ့အတွက် မပူကြပါနဲ့။ ငါဆုံးရှုံးသွားတာတွေကို ၅ နှစ်အတွင်း ပြန်ရအောင် လုပ်မယ်" တဲ့။ သူ တကယ်ပဲ ၅ နှစ်အကြာမှာ ပင်လယ်ကူးသင်္ဘောကြီး ၃ စင်းကို ပိုင်ပြီး အရင်အတိုင်း ချမ်းသာလာခဲ့ပါတယ်။

အဖြစ်အပျက် (၂)

၁၉၈၀ ပြည့်နှစ် ကျော်လောက်က ထင်ပါတယ်။ မန္တလေးမြို့မှာ မီးအကြီးအကျယ်လောင်ပြီး တမြို့လုံးနီးပါး အိမ်တွေ စက်မှုလုပ်ငန်းတွေ ပြာကျသွားခဲ့တယ်။ မန္တလေးမြို့မှာ အချမ်းသာဆုံး သူဌေးကြီးတစ်ယောက်ရဲ့ နေအိမ် ကား သူ့စက်မှုလုပ်ငန်းအားလုံး မီးထဲပါသွားတယ်။ နောက်တနေ့မနက်မှာ သူ့ကို စွပ်ကျယ်လက်ပြတ်လေးဝတ်ပြီး စက်ဘီးလေးတစ်စီး စီးရင်း စိန်ပန်းရပ်ကွက်မှာ စက်ပစ္စည်းလေးတွေ ဈေးစုံစမ်းနေတာကို ကျွန်တော် တွေ့မိတယ်။ နောက် ၅ နှစ်အကြာမှာ သူဟာ အရင်အတိုင်း ပြန်ချမ်းသာသွားခဲ့တယ်။

ဒီအဖြစ်အပျက် ၂ ခုဟာ ကျွန်တော့်ကို စဉ်းစားစရာ အတွေးတွေ ဖြစ်ပေါ်လာစေပါတယ်။ သူတို့ ဘာကြောင့် နှစ်အနည်းငယ်အကြာမှာ အရင်လို ပြန်ချမ်းသာသွားရတာလဲ။ မိဘအမွေရလို့ မဟုတ်ပါ။ ထီပေါက်လို့ မဟုတ်ပါ။ ဓါးပြတိုက်လိုလည့်း မဟုတ်ပါ။ ကျွန်တော် အဖြေကို စဉ်းစားမိတယ်။ အဖြေက သူတို့ဟာ ချမ်းသာနည်းကို သိနေကြလို့ အဲဒီနည်းနဲ့ ချမ်းသာအောင် ပြန်လုပ်ယူလိုက်တာပါ။

တချို့က ပြောကြမယ်။ ချမ်းသာနည်း မလိုပါဘူးကွာ။ ကြိုးစားရင် ချမ်းသာပါတယ်လို့။ ကြိုးစားတိုင်းသာ ချမ်းသာကြေးဆိုရင် သဘောင်္ဆိပ်မှာ နဖူးချွေး ခြေမကျအောင် ကုန်ထမ်းနေသူတွေ၊ တနေကုန် နေပူကြဲကြဲအောက်မှာ မရပ်မနား သေလုအောင် ဆိုက်ကားနင်းသူတွေ ချမ်းသာနေပြီပေါ့။ သူတို့ကို နှိမ်တာ မဟုတ်ပါဘူး။ ချမ်းသာနည်း မသိရင် ဘယ်လောက်ပဲ ကြိုးစားကြိုးစား မချမ်းသာနိုင်ဘူးဆိုတဲ့ အချက်ကို သိစေချင်တာပါ။

ဒါဆိုရင် ကျွန်တော်တို့ နိုင်ငံမှာ ချမ်းသာနည်းတွေ သင်ပြပေးတဲ့ ကျောင်းတွေ သင်တန်းတွေ မရှိဘူးလား။ မရှိပါ။ မရှိပါဘူး။ဒါပေမဲ့ စိတ်ဓာတ်မကျပါနဲ့။ ချမ်းသာနည်းကို သိအောင် လုပ်လို့ရပါတယ်။ အဲဒါက ငွေအများကြီးမကုန်တဲ့ ကြီးပွားအောင်မြင်ရေးအကြောင်း ရေးထားတဲ့ စာအုပ်တွေ ဖတ်ခြင်းပါ။ အဲဒီစာအုပ်တွေမှာ ချမ်းသာနည်းတွေ ရေးပြထားပါတယ်။

အကောင်းဆုံးနည်းက အောင်မြင်ကြီးပွားသူတွေအကြောင်းရေးထားတဲ့ အတ္ထုပ္ပတ္တိစာအုပ်တွေကို ဖတ်ခြင်းပါ။ အဲဒီစာအုပ်တွေထဲမှာ သူတို့ ဘယ်လိုနည်းနဲ့ အောင်မြင်ကြီးပွားလာတယ်။ သူတို့ ဘယ်လိုအမှားတွေ လုပ်ခဲ့တယ်။ ဘာအခက်အခဲတွေနဲ့ တွေ့ခဲ့တယ်။ အဲဒီအခက်အခဲတွေကို ဘယ်လို အောင်မြင်ကျော်လွှားခဲ့တယ်ဆိုတာတွေကို အသေးစိပ်ရေးပြထားပါတယ်။

တကယ်လို့ သင်ဟာ သူတို့အကြောင်း သူတို့အတ္ထုပ္ပတိစာအုပ်တွေကို သေချာ ဖတ်ထားရင် သူတို့ထက် ပိုပြီးတောင် မြန်မြန်ဆန်ဆန် ကြီးပွားနိုင်ပါတယ်။ ကျွန်တော် နောက်တာ မဟုတ်ဘဲ တကယ်ပြောတာပါ။ ဘာကြောင့်လဲဆိုတော့ သင်ဟာ စာအုပ်ထဲမှာ ဖတ်ထားလို့ သူတို့အမှားတွေကို ကြိုတင်သိပြီးနေတာကြောင့် သူတို့အမှားမျိုး လုပ်မိမှာ မဟုတ်ဘူး။ နောက်ပြီး အခက်အခဲကို ကျော်လွှားဖို့ နည်းလမ်းတွေကို ကြိုတင်ဖတ်ထားလို့ အခက်အခဲကိုဘယ်လိုဖြေရှင်းရမယ်ဆိုတာကိုလည်း သိပြီးနေပြီလေ။

ဒီစကားလေးကို မှတ်ထားပါ။
"ခေါင်းဆောင်ဖြစ်ချင်ရင် ခေါင်းဆောင်တွေအကြောင်း ရေးထားတဲ့ စာအုပ်တွေကို ဖတ်ပါ။ ကြီးပွားချမ်းသာချင်ရင် ကြီးပွားချမ်းသာသူတွေအကြောင်း ရေးထားတဲ့ စာအုပ်တွေကို ဖတ်ပါ။ တရားရချင်ရင် တရားစာအုပ်တွေကို ဖတ်ပါ"

ဗန်းမော်သိန်းဖေ
၂၄-၁၀-၂၀၁၇