ဦးခေါင်း နှစ်လုံးနဲ့ ငှက်

 

ဖြိုး သုတ

 

ဦးခေါင်း နှစ်လုံးနဲ့ ငှက်
===============

တစ်ခါက.. ဦးခေါင်းနှစ်လုံးပါရှိတဲ့ ထူးဆန်းတဲ့ ငှက်တစ်ကောင်ရှိပါသတဲ့..။ ငှက်ရဲ့ ဦးခေါင်းနှစ်လုံးဟာ ဆန့်ကျင်ဘက်အရပ်တွေကို မျက်နှာမူထားတာကြောင့် ဦးခေါင်းတစ်လုံးမြင်တဲ့အရာကို နောက်ဦးခေါင်းတစ်လုံးက မမြင်တွေ့ရပဲ ရှိပါသတဲ့။ အဲဒါကြောင့်လည်း ငှက်ရဲ့ ဦးခေါင်းနှစ်လုံးက အမြဲတမ်းပဲ ရန်ဖြစ်နေလေ့ရှိတယ်။ အကြောင်းပြချက်ရယ်လို့ မယ်မယ်ရရ မရှိပေမယ့်လည်း ဦးခေါင်းတစ်လုံးနဲ့တစ်လုံးဟာ အချင်းချင်း မကောင်းပြော ရန်စောင်နေလေ့ရှိပြန်တယ်။ တစ်ခါတစ်ရံမှာ ကိုယ်ခန္ဓာ တစ်ခုတည်းကို အတူတူ ပိုင်ဆိုင်ကြတာကိုတောင် မေ့လျော့သွားပြီး အချင်းချင်း ထိုးဆိတ်ကြပြန်တယ်။
အဲဒီလို ထူးဆန်းတဲ့ငှက်ဟာ မြစ်ကမ်းနားဘေးက ညောင်မုတ်ဆိတ်ပင်ကြီး တစ်ပင် အပေါ်မှာ နေထိုင်ခဲ့တယ်။

တစ်နေ့မှာတော့ ထူးဆန်းတဲ့ငှက်ဟာ မြစ်ပြင်ပေါ်မှာ ဖြတ်ပြီးပျံသန်းခဲ့တယ်။ အဲဒီလို ပျံသန်းနေစဉ်မှာပဲ ငှက်ရဲ့ ဦးခေါင်းတစ်လုံးက နီရဲမှည့်ဝင်းနေတဲ့ သစ်သီးတစ်လုံးကို တွေ့မြင်သွားခဲ့တယ်။ သူက အသီးကိုစားချင်တာကြောင့် အသီးရှိတဲ့အပင်ကို ပျံသန်းသွားတယ်။ ကျန်တဲ့ဦးခေါင်းတစ်လုံးက သစ်သီးကို မမြင်တွေ့ရပေမယ့်လေည်း.. လိုက်ပါသွားခဲ့ရပြန်တယ်။ အသီးကို မြင်တွေ့တဲ့ဦးခေါင်းဟာ မှည့်ဝင်းမွှေးကြိုင်လှတဲ့ သစ်သီးကို ခူးဆွတ်ပြီး မြစ်ကမ်းဘေးကို ယူဆောင်ကာ တစ်ယောက်တည်းပဲစားသုံး ခဲ့တယ်။ ကျန်တဲ့ဦးခေါင်းတစ်လုံးကို မျှဝေပေးခြင်းမရှိဘူး။

"မင်းဒီလိုတော့မလုပ်သင့်ဘူး..၊ ငါ့ကိုလည်း နည်းနည်းပေးကျွေးသင့်တယ်" လို့ ကျန်တဲ့ဦးခေါင်းတစ်လုံးက ပြောခဲ့တယ်။

"ငါစားတယ်ဆိုပေမယ်၊ ဗိုက်ပြည့်တော့ အတူတူပြည့်မှာပဲ၊ မင်းပါးစပ်ပိတ်ထား" လို့ အခြား ဦးခေါင်းတစ်လုံးက ပြန်ပြောလိုက်တယ်။ အဲဒီအခါ ဒုတိယဦးခေါင်းက

"ဒါပေမယ့် အသီးရဲ့ အရသာကို ငါလည်း ခံစားချင်တာပေါ့ကွာ" လို့ တောင်းပန်ခဲ့ပြန်တယ်။ အဲဒီအခါ ပထမ ဦးခေါင်းက

"ဒီသစ်သီးကို ငါအရင်တွေ့တာလေ၊ မင်းနဲ့ဘာဆိုင်လဲ၊ မင်းမပြောနဲ့ ဘယ်သူ့ကိုမှ ငါခွဲဝေကျွေးနေမှာမဟုတ်ဘူး"
လို့ပြောလိုက်တယ်။

အဲဒီအခါမှာ ကျန်တဲ့ဦးခေါင်းတစ်လုံးက ၀မ်းနည်းစွာနဲ့ ငြိမ်နေခဲ့ရတယ်။

အဲဒီလိုနဲ့ နေ့ရက်တော်တော်များများ ကုန်လွန်လာခဲ့တယ်။ တစ်နေ့မှာတော့ ဦးခေါင်းနှစ်လုံးငှက်ဟာ မြစ်ပြင်ပေါ်မှာ ဖြန်ပြီးပျံသန်းပြန်တယ်။ ဒီတစ်ခါမှာတော့ ငှက်ရဲ့ ဒုတိယဦးခေါင်း ဟာ လှပမွှေးကြိုင်တဲ့ အသီးတစ်ခုကို တွေ့ရှိခဲ့တယ်။ ငှက်ရဲ့ ဒုတိယမြောက်ဦးခေါင်း ဟာ အသီးရှိတဲ့နေရာကို ပျံသန်းပြီး အသီးကို စတင်စားသုံးတယ်။ အဲဒီအခါ ပထမငှက်က

"မစားနဲ့၊ မစားနဲ့၊ အဲဒါအဆိပ်သီးကွ၊ မင်းသေလိမ့်မယ်"
လို့ ပြောတယ်။ အဲဒီအခါ ဒုတိယဦးခေါင်းက

"မနာလို မဖြစ်နဲ့လေ၊ မင်းတုန်းက ငါ့ကို ခွဲကျွေးလို့လား၊ ငါစားတယ်ဆိုပေမယ့်၊ ဗိုက်ပြည့်တော့ အတူတူပါပဲကွာ"
လို့ ပြောပြီး ရယ်မောခါ ဆက်လက်ပြီး စားမြဲစားနေပြန်တယ်။

"မစားပါနဲ့၊ မင်းတင်မဟုတ်ဘူး၊ ငါတို့အကုန်သေကြရလိမ့်မယ်"
လို့ ပထမ ဦးခေါင်းက အော်ဟစ်သတိပေးပြန်တယ်။ အဲဒီအခါ ဒုတိယငှက်က

"ငါအရင်တွေ့တော့၊ ငါစားမှာပဲ "
လို့ ပြောဆိုပြီး စားမြဲစားနေခဲ့ပြန်တယ်။

ခဏအကြာမှာတော့ ဦးခေါင်းနှစ်လုံးနဲ့ငှက်ဟာ အဆိပ်တက်ပြီး သေဆုံးသွားခဲ့ရတယ်။

===================
တကယ်တော့ မိသားစုတစ်စုဟာ ဦးခေါင်း နှစ်လုံးနဲ့ငှက်တွေဖြစ်တယ်။ ဦးခေါင်းနှစ်လုံးနဲ့ငှက်ဟာ ကိုယ်ခန္ဓာတစ်ခုကို မျှဝေသုံးစွဲရသလို မိသားစုဝင်တွေဟာလည်း တစ်မိုးအောက်မှာ မျှဝေနေထိုင်နေကြသူများ ဖြစ်တယ်။ မိမိရဲ့ ကောင်းကျိုးချမ်းသာဟာ၊ အခြားမိသားစုဝင်တွေရဲ့ ကောင်းကျိုးချမ်းသာလည်းဖြစ်တယ်။ မိမိရဲ့ ဆင်းရဲခြင်းဟာလည်း၊ အခြားမိသားစုဝင်တွေရဲ့ ဆင်းရဲခြင်းပဲဖြစ်တယ်။ မိသားစုဝင်တွေဟာ တူညီတဲ့ကံကြမ္မာကို မျှဝေခံစားသူများဖြစ်ကြတယ်။

တစ်ကယ်လို့ ကျနော်တို့ဟာ တစ်မိသားစုတည်းနေထိုင်နေပါလျက် မိမိတစ်ဘို့တည်းကိုသာကွက်ပြီးစဉ်းစားမယ်၊ အခြားသူတွေရဲ့ မျက်နှာကိုမထောက်ဘဲ၊ အဆိပ်သီးနဲ့တူတဲ့ အတ္တစိတ်ကို စားသုံးမယ်ဆိုရင်တော့ ဦးခေါင်းနှစ်လုံးငှက်လိုပဲ၊ ကိုယ့်ရဲမိသားစုရဲ့ ဂုဏ်သတင်းကိုပါ ဆုံးရှုံးရမှာပဲဖြစ်တယ်။ အခန့်မသင့်ရင်တော့ အဆိပ်သင့်တဲ့ငှက်လို မိသားစုတစ်ခုလုံးရဲ့ ဘ၀ပါ ရေစုန်မြောရမယ်လို့ ဆိုတယ်။

မိသားစုကို တန်ဖိုးထားတတ်ကြပါစေ
(ဖြိုးသုတ)
http://facebook.com/ko.phyo.3363/u

—