Alex နဲ့ Alter

 

ဂီတအကြောင်း သောင်းပြောင်းထွေလာ

 

Alex နဲ့ Alter

"စိတ်ကူးသက်သက်များ".....တဲ့။
အဲလက်စ်ရဲ့ Alternative Rock သီချင်းတွေ ထွက်လာတယ်။ မြို့အနှံ့မှာလည်း ပိုးဇာရဲ့ လက်ရာ အဲလက်စ်နဲ့ Lazy Club တို့ရဲ့ပုံ Caricature wall sheet တွေ နေရာတကာ။ အခွေထွက်လာတော့ အခွေကာဗာမှာလည်း Caricature နဲ့ Cartoon ပုံတွေအပြည့်။
အဲလက်စ်ရဲ့ ထူးထူးခြားခြား အစီအစဉ်လေးမို့ နားထောင်ကြည့်လိုက်တော့ အဲလက်စ်မဟုတ်တဲ့ အဲလက်စ်ကို လေထုအကြားမှာ အသံနဲ့ မြင်လိုက်ရတယ်။
အဲဒါကြောင့် (၁၂) ရက်နေ့ လူချင်းတွေ့ကြတော့ စကားတွေ အပြန်အလှန် ပြောဖြစ်ကြတယ်။

"Alex က Alter ကို ဘယ်တုန်းက စိတ်ဝင်စားသွားတာလဲ" လို့ ကျွန်တော်က မေးမိလိုက်တယ်။
"Alter က ကျွန်တော်တို့ဆီကို ရောက်တာ 95 လောက်ကပေါ့။ ကျွန်တော် ပထမဆုံးစီးရီး စဆို စထွက်ကတည်းက ပေါ်တာ။ Alter ရယ်လို့ မဟုတ်ပါဘူး။ Music Style အသစ်အသစ်တွေကို ကျွန်တော်ချစ်ပါတယ်။ ကျွန်တော်တို့ဆီ Alter ရောက်ကတည်းက ကျွန်တော် စိတ်ဝင်စားတာ။ ကျွန်တော့်စီးရီးတွေမှာလည်း တစ်ပုဒ်တလေ ထည့်ဆိုဖြစ်ပါတယ်။ 'စားမှာပဲ' တို့ ဘာတို့ပေါ့"

"အခုလို သီးသန့် လုပ်ဖြစ်သွားတာက..."
"ကျွန်တော်က Alter ကို စကတည်းက ကြိုက်တော့ စာသားကောင်းကောင်းလေးတွေ တွေ့ရင်၊ ရရင်၊ စုမိရင်လုပ်မယ်။ Alter သီးသန့်တစ်ခွေ လုပ်မယ်ဆိုပြီး အရင်ကတည်းက ရည်ရွယ်ထားတာ ရှိပါတယ်။
အဲ....ဒါနဲ့ ကျွန်တော့်သူငယ်ချင်း ELDE တို့၊ မျိုးမျိုးတို့၊ အရိုးတို့ဆီမှာ ကျွန်တော်တွေ့ချင်တဲ့၊ လိုချင်တဲ့ စာသားတွေ သွားတွေ့တယ်။ ကျွန်တော်ကိုယ်တိုင်လည်း အပျော်လေးတွေ ရေးရေးထားတယ်။ အဲဒီလိုနဲ့ ကိုညီညီသွင်တို့၊ ကိုဆောင်းဦးတို့ဆီမှာ ရှိနေကြတဲ့ ပျော်စရာ စာသားလေးတွေ စုမိဆောင်းမိပြီး "စိတ်ကူးသက်သက်များ" ဆိုတဲ့ ဒီ Alternative Rock သီချင်းတွေ သီးသန့်ခွေလေးကို လုပ်ဖြစ်သွားတာပဲ။
တေးရေးအသီးသီးမှာ ရှိပြီးသား စာသားတွေရယ်၊ ကျွန်တော့်ရင်ထဲမှာ တည်ပြီးသား ဆုံးဖြတ်ချက်ရယ်တို့ ပေါင်းစည်းမိပြီး လုပ်ထားတာပါ"

"ကိုယ်ပိုင်သံစဉ်တွေချည်းပဲလား..."
"ပထမဆုံးအပုဒ် ကျေနပ်လိုက်၊ စိတ်ဆိုးလိုက် သီချင်းနဲ့ ငါမဟုတ်ဘူး....အဲဒီ (၂) ပုဒ်က Copy လို့ ဆိုရမှာပေါ့။ GREENDAY နဲ့ BLOODHOUND GANG တို့ရဲ့ သီချင်း၊သံစဉ်တွေကို မှီငြမ်းထားတာပါ။ ကျန်တာတွေကတော့ ကိုယ်ပိုင်သံစဉ်တွေပေါ့။

"ဒါဆိုရင် နောက်ကိုရော ဒီလိုပဲ ဂီတအမျိုးအစား တစ်ခုတည်းတွေနဲ့ သီးသန့်စီးရီးတွေ လုပ်ဖို့ရှိသေးလား"
"ဂီတပုံစံ အားလုံးကို ကျွန်တော်ကြိုက်တယ်လေ။ ပုံစံသစ်တွေ လာသမျှလည်း နားထောင်တယ်၊ ကြိုက်တယ်။ ကျွန်တော်ပိုပြီး စိတ်ဝင်စားတဲ့ ဂီတပုံစံတစ်ခုခု ရင်ထဲမှာ ကိန်းအောင်းလာရင်တော့ အခုလိုပဲ ပုံစံတစ်မျိုးတည်းနဲ့ သီးသန့်စီးရီးတွေ လုပ်ဖြစ်မှာပါ"

"ဒီနေ့ခေတ် ဂီတရေစီးကြောင်းမှာ လူငယ်တွေကို ဘာပြောချင်လဲ ကိုအဲလက်စ်"
"လူငယ်တွေကို....အင်း ကျွန်တော်လည်း လူငယ်ပါပဲ။ ကျွန်တော်နဲ့တကွ ဘဝတူ၊ အရွယ်တူ လူငယ်တွေကို ကျွန်တော်တို့ရဲ့ ကိုယ်ပိုင်သံစဉ် သီချင်းတွေ ကိုယ်တိုင် ရေးစေချင်တယ်။ ကိုယ်ပိုင်သံစဉ် မဟုတ်လည်း Copy Song ဖြစ်ဖြစ်၊ ကိုယ့်ရင်ထဲက ခံစားချက်ကို ကိုယ်တိုင်ရေးချ၊ သံစဉ်သွင်း၊ သံစဉ်ရှာ၊ ပြီးရင် ကိုယ်တိုင်ဆို။ ဖြစ်နိုင်ရင် ကိုယ်ပိုင်တီးဝိုင်းတွေထောင်၊ Music Arrangement တွေ ကိုယ်တိုင်လုပ်၊ ကိုယ်တိုင်တီးကြ၊ လုပ်စေချင်တယ်။
နိုင်ငံခြားမှာ တီးဝိုင်းငှါးတီးပြီး အသံသွင်းတာမျိုး၊ Stage Show လုပ်တာမျိုးတွေ သိပ်မရှိဘူးလေ။ ကိုယ့်ဝိုင်းနဲ့ကိုယ် ကိုယ်တိုင်ချကြတာပဲ။ အများစုပေါ့။ ရေးတာလည်း ကိုယ်တိုင် ရေးကြတာများတယ်။
အဲဒီလိုပဲ ကျွန်တော်တို့ဆီမှာလည်း လူငယ်တွေ ရေး ဆို တီး အစကနေအဆုံး ကိုယ်တိုင် လုပ်ကြည့်ကြစေချင်တယ်"

အဲလက်စ်တစ်ယောက် သူ့ရင်ထဲက စကားတွေကို အားပါးတရပြောပြီး သူ့စကားတွေရဲ့ အနာဂတ်ကို လူငယ်ထုထဲ မှန်းဆ တွေးတော ကြည့်နေပုံရရဲ့။ စကားစပြတ်ပြီး အတွေးတွေနဲ့ သူနဲ့ ကျွန်တော်နဲ့ မျောပါနေကြတယ်။ HEART ရဲ့ SOUNDBOX တွေထဲကနေ သူ့သီချင်းသံ ထွက်လာတော့မှ.....

"စိတ်ကူးသက်သက်များ" ရဲ့ Result က ဘယ်လို ထွက်လာမယ်ထင်လဲ"....
"ကျွန်တော်လည်း မမှန်းတတ်ဘူး။ Result ကို ကျွန်တော် သိပ်ဂရုမစိုက်ချင်ဘူး။ ကျွန်တော့်ရင်ထဲက လုပ်ချင်တာကို ပရိသတ်ကို ကျွန်တော်လုပ်ပြလိုက်တာပဲ။ အရင်အဲလက်စ် မဟုတ်ဘူးပေါ့။ ဒါ အဲလက်စ် အသစ်တစ်ယောက်။ ကျွန်တော် မွေးဖွားကြည့်လိုက်တာ။ ကျွန်တော့်ရဲ့အသံတွေ ပြီးရင်တော့ ပရိသတ်ရဲ့အသံတွေ ကျွန်တော်တို့ ပြန်ကြားရမှာပဲ။"

ကျွန်တော်တို့နှစ်ယောက် နှုတ်ဆက်လမ်းခွဲခဲ့ကြတယ်။ အဲလက်စ်ရဲ့ နောက်ထပ်စိတ်ကူးတွေ....ဘာတွေ ပေါ်လာဦးမလဲ.....ကျွန်တော်လည်း စိတ်ကူးကြည့်နေဆဲ....။

ကိုဦးမောင်

Beauty magazine
Jan,2002

စာစီကျေးဇူးရှင် Ko Ka Lee

ဒေါင်း၍ယူငင် နားသောတဆင်ကြပါ။
https://www.dropbox.com/s/qsfo8sopc7htj57/အဲလက်-စိတ်ကူးသက်သက်များ.zip?dl=0

https://www.mediafire.com/folder/qk2xizfmhzdd4/အဲလက်စ်_-_စိတ်ကူးသက်သက်များ

စာအုပ်လင့်ခ်
https://m.facebook.com/groups/193432337508706?view=permalink&id=378215272363744

—