မက်တယ်ဂီတ တံခါးတွေကို ခပ်ကြမ်းကြမ်းဖွင့်လိုက်တဲ့Unlocking the Truth

Scorpion Soup For Soul

 

မက်တယ်ဂီတ တံခါးတွေကို ခပ်ကြမ်းကြမ်းဖွင့်လိုက်တဲ့Unlocking the Truth
------------

ပြီးခဲ့တဲ့ နှစ်တုန်းက ခင်များသာ နယူးယောက်မြို့လယ်ခေါင်က Times Square ဆိုတဲ့နေရာမှာ ဖြတ်သွားဖြတ်လာလုပ်ခဲ့မိရင်ဒီကလေး (၃) ယောက်ကို သတိထားမိကောင်းထားမိနိုင်တယ်။ ရှုပ်ပါတယ်ဗျာ။ ရှင်းရှင်းပြောပြမယ်။ ခင်များသာ မက်တယ်ဂီတအသစ်တွေကို ယူကျူ့လိုနေရာမျိုးမှာ အာသာတငမ်းငမ်းနဲ့ ရှာလေ့ရှိရင် Unlocking the Truth ဆိုတဲ့ ချာတိတ် (၃) ယောက်ပါဝင်တဲ့ မက်တယ်ဝိုင်းကို တွေ့ဖူးကောင်းတွေ့ဖူးနိုင်တယ်။

ဒီချာတိတ် (၃) ယောက်စလုံးက ဘရွတ်ကလင်မြို့က Flatbush ရပ်ကွက် လူမည်းကလေးတွေဖြစ်ပါတယ်။ ဂစ်တာတီးတဲ့ မက်ကွန်နဲ့ ဘေ့စ်တီးတဲ့ အဲလ်လက်ခ် တို့က အသက် (၁၂) ပဲရှိသေးပြီး ဒရမ်တီးတဲ့ ဂျရတ်က (၁၁) နှစ်ပဲရှိသေးတာ။

သူတို့တီးတဲ့ မက်တယ်က အတော်လေးကြမ်းတဲ့ Brutal Metal လို့လူတွေသမုတ်ကြပါတယ်။ အသက် (၇) နှစ်သားအရွယ်ကတည်းက ဂစ်တာကိုစိုက်လိုက်မတ်တတ်တီးခဲ့တဲ့ မက်ကွန်ကို မက်တယ်ပိုးသွင်းပေးတာကတော့ Disturbed တို့ဖြစ်ပါတယ်။

ယူကျူ့မှာ ဝက်ဝက်ကွဲအောင်မြင်တဲ့သူတို့ဝိုင်းဟာ ဂီတလောကကြီးထဲကို ထိုးဖောက်ဖို့ထက် အပျော်သက်သက်တီးဖို့စိတ်အားထက်သန်တယ်။ ခက်တာက ယူကျူ့မှာ သူတို့က တအားကြီးအောင်မြင်သွားတော့ ဆိုနီဓါတ်ပြားတိုက်က အထောက်တော်လွှတ်ပြီး သူတို့ဖျော်ဖြေနေတဲ့ လမ်းဘေးတီးဝိုင်းကို သွားကြည့်ခိုင်းပါတယ်။ ရိုးရှင်းစွာနဲ့ ဖျော်ဖြေတတ်ပြီး မက်တယ်ပရိတ်သတ်မဟုတ်တဲ့သူတွေတောင် အံ့သြတကြီးနဲ့ ကြည့်ရှူ့အားပေးနေတာကို မမြင်ချင်မှအဆုံး။ ဒီလိုနဲ့ ဆိုနီဓါတ်ပြားတိုက်ကြီးက သူတို့မိဘတွေသက်သေထားပြီး အယ်လ်ဘန်ထုတ်ပေးဖို့ဖြစ်လာတယ်။ အခွေသွင်းဖို့အတွက် ဒေါ်လာ (၆) သောင်းကြိုတင်ငွေထုတ်ပေးပြီး စတူဒီယိုထဲကို ဝင်ဖို့ဖြစ်လာတယ်။

သီချင်းအရေးကောင်းပြီး ဂစ်တာကိုပိုင်ပိုင်နိုင်နိုင်တီးတဲ့ မက်ကွန်းတို့ဟာ အခုဆိုရင် မက်တယ်ဆရာကြီးတွေဖြစ်တဲ့ Motorhead၊ ရော့ခ်အပြင်းစားတွေဆိုလေ့ရှိတဲ့ Guns n' Roses, Queens of the Stone Age အစရှိတဲ့နာမည်ကြီးဝိုင်းတွေနဲ့အတူ အတူဖျော်ဖြေခွင့်ရရှိနေပြီဖြစ်ပါတယ်။ အဲဒီလိုပဲ ရော့ခ်ကာများစုစည်းရာ ဂီတပွဲတော်တွေဖြစ်တဲ့ Coachella တို့ the Vans Warped Tour တို့မှာ ပါဝင်ဖျော်ဖြေခွင့်ရရှိနေပြီဖြစ်ပါတယ်။

အနာဂတ်ဆိုတာ ဘယ်သူသိနိုင်မှာလဲ။ သေချာတာကတော့ (၇) တန်းကျောင်းသားလေးတွေဖြစ်တဲ့ Unlocking the Truth တို့ဟာ မက်တယ်ဂီတမြေပုံထဲမှာ အခြေတကျနဲ့ ဂီတအသစ်တွေဖန်တီးနေဦးမယ်ဆိုတာကတော့ သေချာလှတယ်။ မက်တယ်ဂီတအသစ်ကြိုက်သူတွေ ဝမ်းသာအားရနဲ့ကြိုဆိုကြမယ်ဆိုတာ ယုံမှားဖွယ်ရာမရှိဘူး

ခင်တဲ့
ကိုဝီ