ဂီတငြိမ်းချမ်းရေးဆီသို့

Scorpion Soup For Soul

ဂီတငြိမ်းချမ်းရေးဆီသို့
---------

“တကျောင်းတဂါထာ၊ တရွာတပုဒ်ဆန်း“ ဆိုတဲ့စကားရှိပါတယ်။ ကိုယ့်ရပ်နဲ့ကိုယ့်ဇာတ်။ ကိုယ့်ပြသနာနဲ့ကိုယ်ကိုး။ ကျွန်တော်တို့ရွာ...အဲ..ဟုတ်ပေါင်။ ကျွန်တော်တို့တိုင်းပြည်မှာ ဟစ်ပ်ဟော့ပ်နဲ့ ရော့ခ်ကာတွေနဲ့ ဘာညာကွိကွဖြစ်ကြပါတယ်။ ဖြစ်တာကလဲနှစ်တွေတောင် အတော်ကြာနေပါပြီ။

(ကို)လေးဖြူပြောတဲ့ရေပွက်ကလေးဆိုတဲ့စကားကို ရက်ပ်ပါတွေ အရမ်းအသည်းနာခဲ့တယ်။ အမယ်..ရက်ပ်ပါများကလဲ ဘောင်းဘီတမမနဲ့သီချင်းဆိုရင်း ပြန်ကစ်တာတွေ အတော်များများရှိခဲ့တယ်။

အဲဒီနောက်မှာ ခပ်ကြမ်းကြမ်းနဲ့ (ကျွန်တော်လုံးဝသဘောမတူတဲ့) စကားတခွန်းကို ရော့ခ်ကာလေးတဦးဖြစ်တဲ့ ဖေါ်ကာက စင်ပေါ်ကနေပြီးပြောတော့ ပွက်လောရိုက်ပြီး ထသတ်ကြပြန်တယ်။ ရုတ်တရက်ကြည့်လိုက်ရင် ရည်းစားလုဖက်လိုလို (မရိုးနိုင်မဆန်းနိုင်) ကိုရီးယားကားထဲက (၃) ပွင့်ဆိုင်အချစ်ဇာတ်လမ်းလိုလို။ ပွင့်ပွင့်လင်းလင်းနဲ့ အားပါးတရအဆဲပြိုင်ကြတဲ့ အွန်လိုင်းလောကကြီးမှာ တဖက်နဲ့တဖက် အဆဲပြိုင်ကြပါတယ်။ အောင်လ ကတော့ ခပ်တည်တည်နဲ့ တောင်းပန်လို့မရရင် အပြင်မှာ ချိန်းရိုက်ဖို့ပြောသံကြားဖူးတယ်။ (တကယ်ရိုက်ဖြစ်၊ မဖြစ်တော့မသိပါ)။

အမေရိကန်နိုင်ငံမှာတော့ ရက်ပ်ပါအချင်းချင်းတော့ တည့်ချင်မှတည့်မယ် ရော့ခ်ကာတွေနဲ့ ရက်ပ်ပါတွေက တအားတည့်ပါတယ်။ ဥပမာ - မက်ဂါစတားရက်ပ်ပါတွေဖြစ်တဲ့ Eminem, 50 Cents, Jay Z တို့ဟာ သွားလေသူ Kurt Cobain ကို တအားချစ်ကြပါတယ်။ တအားလေးစားကြပါတယ်။ သီချင်းစာသားတွေထဲမှာ ထည့်ထည့်ပြီးဆိုကြပါတယ်။

ဥပမာ - Eminem ရဲ့ သီချင်းဖြစ်တဲ့ Cum on Everybody သီချင်းထဲမှာ ဟောဒီလို ထည့်ဆိုဖူးတယ်။ My favorite color is red, like the blood shed
In Curt Cobain's head when he shot himself dead

အဲဒီလိုပဲ 50 cent ကလဲ ကာ့ဒ်ကိုဘိန်းနဲ့ အော်ဇီနာမည်တွေကို ဟောဒီလို ထည့်ဆိုဖူးတယ်။ "Kurt Cobain even good friends, Ozzy Ozbourne too I be with rock stars, see you lucky I'm fuckin' with you"

မက်ဂါစတား ဂျေဇီရဲ့ Holy Grail သီချင်းမှာ ဟောဒီလို ကာ့ဒ်ကိုဘိန်းအကြောင်းကို တလေးတစားနဲ့ သီဆိုခဲ့တယ်။
Enough to make me wanna murder
Momma please just get my bail
I know nobody to blame
Kurt Cobain, I did it to myself

ဒါတင်မကဘူး ကာ့ဒ်ကိုဘိန်းရဲ့ နာမည်ကြီးသီချင်းဖြစ်တဲ့ Smells like teen spirit သီချင်းတပိုင်းတစကို (အဲဒီသီချင်းထဲမှာ) တရားဝင်သီဆိုခဲ့တယ်။

တကယ်တော့ အမေရိကန်နိုင်ငံမှာ ရက်ပ်ပါတွေနဲ့ ရော့ခ်ကာတွေပူးပေါင်းပြီး အနုပညာဖန်တီးကြတာ နှစ်ပေါင်းများစွာကြာလှပါပြီ။ ရော့ခ်အင်ရိုး ဘိုးအေကြီးတွေဖြစ်တဲ့ Aerosmith တို့ဟာ Walk this way သီချင်းကို ရက်ပ်ပါတွေဖြစ်တဲ့ Run DMC နဲ့ တွဲဖက်ဖန်တီးပြီး ရော့ခ်နဲ့ဟစ်ပ်ဟော့ကို အရသာရှိရှိပေါင်းစပ်ဖန်တီးခဲ့ကြတာ အားလုံးအသိပါပဲ။ အဲဒီသီချင်းဖန်တီးခဲ့တာ (အမယ်) ၁၉၇၇ ခုနှစ်ကတည်းက အခုထိနာမည်ကြီးတုန်းပဲ။ အဲဒီနောက်မှာလဲ ရက်ပ်နဲ့ရော့ခ်ပူးပေါင်းတင်ဆက်မှုတွေ မရေတွက်နိုင်အောင် များပြားလှပါတယ်။

ကာ့ဒ်ကိုဘိန်းအကြောင်းပြန်ဆက်ရရင် သူက ရော့ခ်ကာဆိုပေမယ့် ရက်ပ်ဂီတကို တလေးတစားနဲ့အသိအမှတ်ပြုခဲ့သူဖြစ်ပါတယ်။ ၁၉၉၁ ခုနှစ်မှာ ပြုလုပ်ခဲ့တဲ့ အင်တာဗျူးတခုမှာ ဟောဒီလိုတရားဝင်ပြောခဲ့တယ်။

“ဂီတသမိုင်းမှာ ပန့်ခ်ရော့ခ်ဂီတစတင်ဖန်တီးမှုပြီးရင် ရက်ပ်ဂီတဟာ အရမ်းအရေးပါတဲ့ အမိုက်စားဂီတအမျိုးအစားဖြစ်ပါတယ်“

ပြောလက်စ စကားပြန်ကောက်ရရင် “တကျောင်းတဂါထာ၊ တရွာတပုဒ်ဆန်း“ ဖြစ်ပါတယ်။ အမေရိကန်နိုင်ငံမှာ သူတို့အချင်းချင်း မသတ်ကြပေမယ့် ကျွန်တော်တို့တိုင်းပြည်မှာ သတ်ပါတယ်။ မီဒီယာကလဲ (ထုံးစံအတိုင်း) ထိရောက်စွာနဲ့ ဖျန်ဖြေမပေးနိုင်ကြပါဘူး။ (ကြောက်တာကိုး)။ တဖက်နဲ့တဖက် ဆက်လက်ပြီး ဆဲကြဆိုကြဖြစ်နေတုန်းပဲ။ ဘယ်သူ့အတွက်မှ အကျိုးမရှိတဲ့ ရန်ပွဲကို ဆက်လက်ဆင်နွှဲနေကြတုန်းပဲ။ ကိုယ်တောင်သူတပါးကို မလေးစားနိုင်တာ ကိုယ့်ဂီတကို သူများလေးစားဖို့ တဖက်သတ်မျှော်လင့်နေကြသေးတယ်။

သူများနိုင်ငံမှာ ဖြစ်ပျက်နေတဲ့အလေ့အထအကောင်းစားတွေကို အတုယူဖို့ အကြံမပေးချင်ပါဘူး။ သဘောရှိတဲ့အတိုင်း ယုံကြည်တဲ့အတိုင်းလုပ်ကြပါ။ တခုပဲ အပြတ်ပြောချင်ပါတယ်။ အဆဲသန်လွန်းလို့ ရက်ပ်ပါကလဲ ရော့ခ်ကာဖြစ်မလာနိုင်သလို ရော့ခ်ကာကလဲ ရက်ပ်ပါမဖြစ်နိုင်ပါဘူး။ ဘယ်သူ့အတွက်မှ အကျိုးမရှိတဲ့ရန်ပွဲကြီးကို အမြန်ဆုံးရပ်ဆိုင်းဖို့ (ကြောက်ကြောက်နဲ့) အကြံပြုအပ်ပါတယ်။

ခင်တဲ့
ကိုဝီ