ပျူဒင်္ဂါးတွေ ဘယ်မှာ လုပ်သလဲ

 

နည်းစနစ်ကျကျအတွေးအခေါ်

 

ပျူဒင်္ဂါးတွေ ဘယ်မှာ လုပ်သလဲ
******************
တကယ်တော့ ဒီမေးခွန်းဟာ မေးစရာကို မလိုတဲ့ မေးခွန်းဖြစ်ပါတယ်။
ပျူ ဒင်္ဂါး ဆိုမှတော့ ပျူဒေသမှာ သွန်းလုပ်ခဲ့တာပါ။
သို့သော်
ပျူဒင်္ဂါးများကို အောက်အဲအိုမှာပဲ သွန်းသလို၊ ယူနန်မှာပဲ သွန်းသလို၊ ဘယ်မှာသွန်းမှန်း မသိသလို ပြောဆိုမှုတွေ ရှိခဲ့ပါတယ်။

အချို့က တကယ်မသိလို့ လေ့လာမှု မပြည့်စုံလို့ ဖြစ်ပြီး အချို့ကတော့ သိလျက်နဲ့ ရှိတဲ့အထောက်အထား များကို ထိန်ချန်ဖျောက်ပြီး ပျူအခန်းကဏ္ဍ မှေးမှိန်အောင် သို့လော သို့လော ရောထွေးအောင် တမင်ပြောဆို ရေးသားတာမျိုး ရှိနေပါတယ်။

အရင်က ပျူဒင်္ဂါး အချို့မှာ လည်ပင်းမှာ ကြိုးသီဆွဲဖို့ အပေါက်ငယ်ပါတာမို့ ငွေကြေးအဖြစ် သုံးစွဲတာ မဟုတ်ပဲ အလှဆင်ဖို့ ဆွဲတဲ့အပြား ဆို အတော်လေး မှားမှားယွင်းယွင်း ကောက်ချက်တွေ ရှိခဲ့ပါတယ်။
(ကျွန်တော်တို့ ငယ်ငယ်ကအထိ ငွေကြေးအဖြစ် သုံးစွဲတဲ့ အကြွေစေ့ကို လည်မှာဆွဲဖို့ အပေါက်ဖောက်ကာ ခမဲပေးတယ် ဆိုတာ ရှိခဲ့ပါတယ်။)

သို့သော် ပျူဒင်္ဂါးတွေကို မူးစေ့ မတ်စေ့ကစလို့ ကျပ်စေ့ အထိတွေ့လို့ ငွေကြေးအဖြစ်သုံးစွဲကြောင်း ထင်ရှားပါတယ်။

ပျူဒင်္ဂါးတွေကို ဘယ်ဒေသအထိ တွေ့သလဲ
************************
ပျူဒင်္ဂါး တွေကို မြန်မာနိုင်ငံ အထက်အောက် အနှံ့အပြားအပြင် တောင်ဘက် ယနေ့ထိုင်းနိုင်ငံနဲ့ ကမ္ဘောဒီးယား နိုင်ငံနယ်စပ်၊ မြောက်ဘက်မှာ ယနေ့ တရုတ်နိုင်ငံ ယူနယ်နယ်ထဲအထိ တွေ့ရပါတယ်။

အောက်အဲအိုမှာ ပျူဒင်္ဂါး အများအပြား တွေ့တုန်းက ပျူဒင်္ဂါး တွေဟာ ဒွါယာဝတီ (ယနေ့ထိုင်းနိုင်ငံ) မှာ လုပ်တာ ဖြစ်မယ်လို့ ပြောဆိုခဲ့ကြပါတယ်။

ယူနန်မှာ ပျူဒင်္ဂါး အိုးလိုက်သာမက ရွှေပြား၊ ငွေပြားတွေကို ပုံသွင်းညှပ်တဲ့ ညှပ်ပုံပါတွေ့လို့ ပျူဒင်္ဂါး တွေကို ယူနန်ထဲမှာ လုပ်တာဖြစ်မယ်လို့ ပြောင်းလဲ ပြောဆိုသူများလည်း ရှိပါတယ်။

သို့သော်
ဆရာကြီးတော်စိန်ခိုက သရေခေတ္တရာ ဘောဘောကြီး စေတီအနီး အုတ်ကုန်းပျက် တစ်ခု တူးဖေါ်မှုမှ တစ်ဖက်မှာ သီရိဝစ္ဆ နှင့် ဘဒ္ဒပီဒ ပုံပါ ဒင်္ဂါး၊ ညှပ်ပုံများ သွန်းရန် အသုံးပြုတဲ့ ရွှံ့စေး မီးဖုတ်မို (mold) ကို ၁၉၁၀-၁၁ ခုနှစ် တူးဖေါ်မှုမှ ရရှိခဲ့ပါတယ်။

၁၉၇၅ ငလျင်နောက်ပိုင်း ပုဂံမြို့ ဆန်းစက်စားတော်ရှေ့မှာမြေတူးရင်း အိုးတစ်လုံးအတွင်းမှာ ဘာတံဆိပ် အမဇတ်အသားမှ မပါတဲ့ တစ်ကျပ်သားခန့် ပြောင်ဒင်္ဂါး အပြားသုံးဆယ်ခန့်နှင့်အတူ ညှပ်ပုံတစ်ခုကို မြေတူးရင်း တွေ့ရှိခဲ့ကြောင်း ဆရာကြီးမင်းဘူးဦးအောင်ကြိုင် ပြောပြမှုဖြင့် သိရပါတယ်။

နောက်ထပ် ပျူဒင်္ဂါး သွန်းလုပ်ရန် ဘဒ္ဒပီဒ ပုံပါ ရွှံ့စေး မြေမီးဖုတ် မို (mold) တစ်ခုကို သရေခေတ္တရာ မှော်ဇာမှ ရရှိကြောင်း သိရပါတယ်။
။

ယနေ့ခေတ် ထိုင်းနိုင်ငံ နှင့် ကမ္ဘောဒီးယား နိုင်ငံ နယ်စပ် အောက်အဲအိုဒေသတွင် ပျူဒင်္ဂါးများ၊ ယူနန်တွင် ပျူဒင်္ဂါး များနှင့် ညှပ်ပုံ တွေ့ရှိမှု ကတော့ ယင်းဒေသများဟာ ပျူဩဇာခံ ဖြစ်ခဲ့၍ ပျူဒင်္ဂါး များကိုလည်း သုံးစွဲခဲ့ကြသည် ဆိုတဲ့ သမိုင်းအဓိပ္ပါယ် ပဲ ရှိပါတယ်။

ဒါကြောင့် ဒင်္ဂါး/ညှပ်ပုံတွေ ပြုလုပ်တဲ့ မို (mold) ကို သရေခေတ္တရာ မှာတွေ့ရှိတာကြောင့် ပျူဒင်္ဂါးတွေ သွန်းလုပ်တဲ့ ဒေသဟာ မြန်မာနိုင်ငံတွင်း သရေခေတ္တရာ သာဖြစ်ကြောင်း တင်ပြလိုက်ရပါတယ်။

ကျမ်းကိုး။ ။ နှစ်ပေါင်းနှစ်ထောင် ကျော်ပြီဖြစ်သော မြန်မာ့သမိုင်း ၂ - ဘုန်းတင့်ကျော်

Credit to ကိုသာဝ
K.K(ကနောင်)