တရားမျှတမှု

ဘဝ

 

☑ တရားမျှတမှု ☑

🌳🌳🌳
တရားမျှတမှုဆိုတာ လူတိုင်းရထိုက်တဲ့ အရာဖြစ်တယ်။ ငါ တောင်းဆိုတာ တရားမျှတမှုပါပဲ။

🌳🌳🌳
လူများစုဟာ အတုအရောင်ဂုဏ်သိက္ခာနဲ့ နေကြတယ်။ ပစ္စည်းဥစ္စာချမ်းသာတာကို ဂုဏ်သိက္ခာလို့ ပြောကြတယ်။ ရာထူးကြီးတာကို ဂုဏ်သိက္ခာလို့ ပြောကြတယ်။ အဲဒါတွေဟာ အတုအရောင် ဂုဏ်သိက္ခာ တွေပါ။ လွတ်လပ်မှု ရိုးသားမှု တရားမျှတမှုမရှိပဲ စစ်မှန်တဲ့ဂုဏ်သိက္ခာဆိုတာ မရှိပါဘူး။

🌳🌳🌳
မတရားတာ မမျှတတာတွေကို လုပ်တဲ့သူတွေများနေရင် တရားမျှတမှုမရှိတဲ့ အသိုင်းအဝိုင်း ဖြစ်နေမယ်။ တရားမျှတမှုမရှိတဲ့ အသိုင်းအဝိုင်းဟာ လွတ်လပ်မှုရှိတဲ့ အသိုင်းအဝိုင်းဖြစ်တယ်လို့ ဘယ်လို ပြောနိုင်မလဲ။ မတရားတာလုပ်တဲ့သူရှိရင် ခံရတဲ့သူရှိတယ်။ ခံရတဲ့သူဟာ လုပ်တဲ့သူကို လေးစားမှာမဟုတ်ဘူး။ တဦးကိုတဦးမလေးစားနိုင်တဲ့ အသိုင်းအဝိုင်းဟာ ဂုဏ်သိက္ခာရှိတဲ့ အသိုင်းအဝိုင်း မဖြစ်နိုင်တော့ဘူး၊၊ တရားမျှတမှုမရှိ ၊ ဂုဏ်သိက္ခာလည်းမရှိတဲ့ အသိုင်းအဝိုင်းမှာ နေရတဲ့သူဟာ စိတ်အေးချမ်းမှု ဘယ်လိုလုပ်ရနိုင်တော့မလဲ။ လူတချို့ မတရားတာကို လွတ်လွတ်လပ်လပ်လုပ်ခွင့်ရှိတဲ့ အသိုင်းအဝိုင်းဟာ လွတ်လပ်တဲ့အသိုင်းအဝိုင်း မဖြစ်နိုင်ဘူး။ မလွတ်လပ်တဲ့အသိုင်းအဝိုင်းဟာ ဂုဏ်သိက္ခာရှိတဲ့အသိုင်းအဝိုင်း မဖြစ်နိုင်ဘူး။ တရားမျှတမှု၊ လွတ်လပ်မှုနဲ့ လူ့ဂုဏ်သိက္ခာ ဒီသုံးပါးဟာ ဆက်စပ်နေပါတယ်။ တန်ဖိုးထားစရာကောင်းတဲ့ ဒီ (human values) သုံးပါး မရှိရင် အဆင့်မြင့်တဲ့လူ့အသိုင်းအဝိုင်း မဖြစ်သေးဘူး။

🌳🌳🌳
မတရားတာ မမျှတတာကို လက်မခံသင့်ဘူး။ မတရားတာ မမျှတတာကို လက်ခံရင် အားပေးရာရောက်ပါတယ်။ မတရားတာကို မြင်ရကြားရရင် “ မတရားဘူး ”လို့ ကိုယ့်ကိုယ်ကို အရင် ပြတ်ပြတ်သားသား ပြောပါ။ နောက် ကိ်ုယ့်မိတ်ဆွေတယောက်ယောက်ကို ပြောပါ။ မတရားတာကို တွေ့ရကြားရပါလျှက် ဘာမှမပြောပဲနေရင် ကိုယ့်ကိုယ်ကို ကိုယ် လေးစားမှု လျှော့သွားမယ်။ ကိုယ့်ကိုယ်ကို ကိုယ် အလိုတူအလိုပါလို့ ခံစားရမယ်။ ဒါကြောင့် မတရားတာကို မြင်ရကြားရတဲ့အခါ မသိဟန် ဆောင်မနေပါနဲ့။

🌳🌳🌳
တရားမျှတတယ်ဆိုတာ လူတိုင်းရဲ့ဝတ္တရား ဖြစ်ပါတယ်။ မတရားတာကို လုပ်နေတဲ့သူဟာ လူ့ကျင့်ဝတ်၊ လူ့ဝတ္တရား ပျက်ကွက်နေတဲ့သူ ဖြစ်တယ်။ သူဟာ ဂုဏ်သိက္ခာမရှိတဲ့သူ ဖြစ်နေတယ်။

🌳🌳🌳
လွတ်လပ်ပြီးတရားမျှတတဲ့ လူ့အသိုင်းအဝိုင်းမှာနေချင်ရင်၊ စိတ်ချမ်းသာချင်ရင်၊ ဂုဏ်သိက္ခာရှိရှိ နေချင်ရင် လွတ်လပ်မှုနဲ့တရားမျှတမှုကို ကာကွယ်ရမယ်။

🌳🌳🌳
ဘာသာရေး အယူအဆပဲဖြစ်ဖြစ်၊ နိုင်ငံရေး အယူအဆပဲဖြစ်ဖြစ်၊ အယူအဆတခုကိုမှီပြီး အာဏာ သို့မဟုတ် ပစ္စည်း ငွေ ရနေတဲ့သူဟာ အဲဒီအယူအဆကို လက်မလွှတ်နိုင်ဘူး။ ဒီအယူအဆကိုမှီပြီး ကိုယ်ကျိုးရှိအောင်လုပ်နိုင်ရင် ဒီအယူအဆကို လက်မလွှတ်နိုင်ဘူး။ တကယ်တော့ ကိုယ်ကျိုးကို အဓိကထားတာပါ။ အမှန်တရားကို အဓိကထားတာမဟုတ်လို့ပဲ။ အမှန်တရားကိုသာ အဓိကထားရင် ကိုယ့်အယူအဆနဲ့ မတူတာကိုကြားရရင် သူမှန်သလားကိုယ်မှန်သလားဆိုတာကို ဘက်မလိုက်ပဲ အချိန်ယူပြီး စုံစမ်းရမယ်။ တဖက်သတ်ဆုံးဖြတ်ချက် မချဘူး။ အမှန်တရားနဲ့တရားမျှတမှုကို တကယ်လိုလားတဲ့သူဟာ တဖက်သတ်သဘောထားကို လက်မခံဘူး။ လက်ကိုင်မထားဘူး။ သဘောထားမတူတာ အမြင်မတူတာကို ပွင့်ပွင့်လင်းလင်းဆွေးနွေးပြီး အမျှတဆုံးအဖြေ အကောင်းဆုံးအဖြေကို မရမချင်း ရှာနေမယ်။

🌳🌳🌳
ကိုယ့်ကိုယ်ကိုကိုယ် တကယ်လေးစားတဲ့သူ တန်ဖိုးထားတဲ့သူ ယုံကြည်တဲ့သူဟာ အလကား မလိုချင်ဘူး။ တန်ရာတန်ကြေးပေးပြီးမှ လိုချင်တယ်။ ခိုင်းပြီး တန်အောင်မပေးတဲ့သူနဲ့ တန်အောင်မလုပ်ပဲ များများလိုချင်တဲ့သူတွေဟာ လူ့အသိုင်းအဝိုင်းကို ဖျက်ဆီးတဲ့သူတွေပဲ။ နည်းနည်းပေးပြီး များများလိုချင်တဲ့စိတ်ဟာ တရားမျှတမှုကို တန်ဖိုးမထားတဲ့စိတ် ဖြစ်တယ်။ တရားမျှတမှုကို တန်ဖိုးမထားတဲ့သူဟာ လွတ်လပ်တဲ့သူ မဖြစ်နိုင်ဘူး။ အဲဒီတော့ တန်အောင်မလုပ်ပဲနဲ့ များများလိုချင်တဲ့သူဟာ အောင်မြင်တဲ့သူ လွတ်လပ်တဲ့သူ မဖြစ်နိုင်ဘူး။ တန်အောင်မလုပ်ပဲ များများလိုချင်တာ ကိုယ့်ကိ်ုယ်ကိုကိုယ် မယုံကြည်တဲ့လူရဲ့သဘောထား ဖြစ်တယ်။ ကိုယ့်ကိုယ်ကိုကိုယ် မယုံကြည်တဲ့သူဟာ အောင်မြင်ကြီးပွားတဲ့သူ မဖြစ်နိုင်ဘူး။

🌳🌳🌳
အကြောင်းအကျိုးသဘာဝကျအောင် စဉ်းစားတတ် လုပ်တတ်တဲ့သူမှာ အနစ်နာခံရတဲ့သူ၊ အနိုင်ယူတာခံရတဲ့သူ မရှိဘူး။ ငါ့အကျိုးရှိရင် သူ့အကျိုးထိခိုက်တယ်ဆိုတာလည်း မရှိဘူး။ အကြောင်းအကျိုးသဘာဝကျအောင် စဉ်းစားတတ်၊ လုပ်တတ်တဲ့သူဟာ ထိုက်တန်အောင်မလုပ်ရပဲ ရတာကို မလိုချင်ဘူး။

🌳🌳🌳
ငါလိုချင်တာရဖို့ တန်ရာတန်ကြေးကိုပေးမယ်ဆိုတဲ့ စိတ်ကို ပီပီပြင်ပြင် ပြတ်ပြတ်သားသား ဆုံးဖြတ်လိုက်ပါ။ အဲဒီလိုဆုံးဖြတ်လိုက်တာနဲ့ စိတ်မှာ သတ္တိတမျိုး ဖြစ်လာမယ်။ စွမ်းအားတမျိုး ဖြစ်လာမယ်။ “တန်ရာတန်ကြေးမပေးပဲ ဘယ်သောအခါမှာမှ ရအောင်မလုပ်ပါဘူး။ ဂုဏ်သိက္ခာရှိရှိ ရတာကလွဲလို့ တခြားနည်းနဲ့ရတာကို ဘယ်တော့မှ မလိုချင်ပါဘူး။ ကိုယ့်ဂုဏ်သိက္ခာကို ဘယ်တော့မှ ရောင်းမစားပါဘူး” လို့ ဆုံးဖြတ်လိုက်ပါ။ အဲဒီလိုဆုံးဖြတ်လိုက်ရင် အဲဒီစိတ်ဓာတ်က ကိုယ်လိုချင်တာရအောင် ကောင်းတဲ့လုပ်နည်းကို ပေးပါလိမ့်မယ်။ ကိုယ်လိုချင်တာရအောင် ကိုယ့်ကို လုပ်ပေးနိုင်တာ ကိုယ့်စိတ်ဓာတ်နဲ့ကိုယ့်အရည်အချင်း ပါပဲ။ ဒီစိတ်ဓာတ်ဟာ လွတ်လပ်တဲ့သူရဲ့ စိတ်ဓာတ်ပဲ။

🌳🌳🌳
စီးပွားရေး၊ လူမှုရေး၊ ဘာသာရေး၊ ပညာရေး၊ နိင်ငံရေး၊ အိမ်ထောင်ရေး၊ နောက် တခြားအရေးတွေပါ ထည့်လိုက်အုံး၊ ဒါတွေကို တစ်ကဏ္ဍစီထားပြီးတော့လုပ်လို့ မဖြစ်နိုင်ဘူး။ ဒါတွေအားလုံးဟာ တခုတည်းသော ခိုင်မာတဲ့၊ လေးနက်တဲ့၊ ရင့်ကျက်တဲ့ ရိုးသားမှု၊ မျှတမှုဆိုတဲ့ သဘောထားပေါ်မှာ အခြေခံရမယ်။ အေက်ခြေ foundation အုတ်မြစ်ဟာ တခုတည်းပဲ။ ရိုးသားမှု မျှတမှု foundation ပဲ။ ဘဝတစ်ခုလုံးရဲ့foundation ဟာ spiritual foundation ပဲ ဖြစ်ရမယ်။ “ငါတန်ဖိုးထားတာ မရေရာရင် ငါဟာ မရေရာတဲ့သူ ဖြစ်နေပြီ။ ငါ့ဘဝဟာလည်း မရေရာဘူး။ ငါ့ဆက်ဆံရေးတွေဟာလည်း မရေရာဘူး၊ ငါ့ဘာသာရေးဟာလည်း မရေရာဘူး။” ဒါကို လေးလေးနက်နက် သဘောပေါက်ဖို့ လိုတယ်။ ဒါ အရေးကြီးတယ်။ ငါ ဘာကိုတန်ဖိုးထားနေသလဲ ဆိုတာ သေသေချာချာ ကြည့်ပါ။ “ဟောဒီသဘောထားကိုတော့ ငါ ဘယ်တော့မှ အပျက်မခံဘူး။ သေချင်ရင် သေသွားပါစေတော့” ဆိုတဲ့ ခံယူချက် ရှိရမယ်။

🌳🌳🌳
လူ့သဘာဝမှာ ဟိရိသြတ္တပ္ပဆိုတဲ့ ရှက်တတ်ကြောက်တတ်တဲ့ စိတ်ဟာ ရှိပါတယ်။ မွေးရာပါစိတ် ဖြစ်ပါတယ်။ တရားကိုသဘောပေါက်တဲ့သူမှာ အဲဒီစိတ်က သိပ်အားကြီးတယ်။ ဘယ်တော့မှ မကောင်းတာ မမှန်တာ မရိုးသားတာကို မလုပ်ဘူး။ မသိလို့လုပ်မိရင် အမြန်ဆုံး ဝန်ခံတယ်။ အဲဒီအချက်ကိုကြည့်ရင် စိတ်ဓာတ်အဆင့်အတန်း မြင့်တဲ့သူ အသိဥာဏ်အဆင့်အတန်း မြင့်တဲ့သူတွေဟာ အရှက်အကြောက် ပိုပြီးကြီးတယ်လို့ ဆိုနိုင်တယ်။ အသိဥာဏ်အဆင့်အတန်း နိမ့်သေးတဲ့သူဟာ အရှက်အကြောက်နည်းတယ်လို့ ဆိုနိုင်တယ်။☝🙇🏼 🙇🏼☝

💡ဆရာတော်ဦးဇောတိက💡
🍀 ( မဟာမြိုင်တောရ ) 🍀
▫️ ▫️ ၏ ▫️ ▫️
💧“ တွေးမိတိုင်း ပျော်တယ် ” 💧
စာအုပ်မှ ကူးယူဖော်ပြပါသည်၊၊