စိန်ခေါ်လိုက်ပါ…ကိုယ့်ကိုယ်ကို
ကမ္ဘာပေါ်မှာ အလဟာသ အဖြစ်ဆုံးက ဘယ်အရာလို့ ထင်ပါသလဲ ရှင်။ အများစုကတော့
အချိန်…လျှပ်စစ်မီး၊ ရေ…၊ ရေနံသဘာဝဓါတ်ငွေ့လို့ ဖြေဆိုကြတာ တွေ့ရပါတယ်။
ဒါပေမဲ့ အနောက်နိုင်ငံက သုတေသီတွေကတော့ နေ့စဉ်နဲ့အမျှ အလဟာသ
ဆုံးရှုံးကုန်တာက လူ့စွမ်းရည်တွေလို့ ဆိုပါတယ်။ လူအများစုအနေနဲ့
ကိုယ့်တကယ်လုပ်ဆောင်နိုင်တဲ့ စွမ်းရည်ရဲ့ ၁၀% ကိုပဲ
ကောင်းကောင်းအသုံးချကြတယ်လို့ ဆိုပါတယ်။ဒါ့အပြင် လူအချို့ကတော့ အခက်အခဲတွေကိုပဲ တွေးနေ အာရုံစိုက်နေတဲ့အတွက် ဘဝရဲ့ရည်မှန်းချက်တွေကို မဖော်ဆောင်နိုင်တော့ဘဲ ပြဿနာတွေကိုရှင်းနေရင်းနဲ့ပဲ နေ့စဉ်ဖြတ်သန်းနေတာကိုလည်း တွေ့မြင်ရတယ်လို့ဆိုပါတယ်။ အဲလိုလူတွေကတော့ အပြုသဘောဆောင်တဲ့ အတွေးအခေါ်နည်းပါးပြီး အဆိုးမြင်တဲ့ တိုက်ခိုက်ရန်လိုသူတွေ ဖြစ်လေ့ရှိတာကိုလည်း တွေ့ရတယ်လို့ဆိုပါတယ်။
ဒီကနေ့ရဲ့ လူအနည်းစုကပဲ ကိုယ်တကယ်လုပ်ဆောင်နိုင်တဲ့ စွမ်းရည်ရဲ့ ၂၅% ကို အသုံးပြုကြတယ်။ အဲဒီလူတွေကတော့ လက်ရှိနယ်ပယ်အသီးသီး လုပ်ငန်းစွမ်းဆောင်ရည်မြင့်သူများအနေနဲ့ အောင်မြင်မှုတွေ ရရှိနေတယ်လို့လည်း သုတေသီတွေက သုံးသပ်ခဲ့ပါတယ်။ လူတွေရဲ့ စွမ်းရည်နဲ့ပတ်သက်ပြီး ထွက်ပေါ်လာတဲ့ သုတေသီတွေရဲ့ ရလဒ်တွေပေါ်ကို ကိုးကားပြီးတော့ John C. Maxwell က Think on these thing ဆိုပြီး စာအုပ်ထုတ် ရေးသားခဲ့ပါတယ်။
ဒီကနေ့ လူအများစုအနေနဲ့ အလုပ်လုပ်ကိုင်ရာမှာပဲဖြစ်ဖြစ် အခြားသူတွေကို ကူညီပေးရာမှာပဲဖြစ်ဖြစ် ပြီးမြောက်အောင်မြင်အောင် မလုပ်နိုင်ကြတာ တွေ့ရပါတယ်။ အလုပ်ကို ပြီးမြောက်အောင်မြင်အောင် မဆောင်ရွက်နိုင်တာက အရည်အချင်းမရှိလို့ မဟုတ်ပါဘူး။ တကယ့်ကို ပြီးမြောက်အောင် မလုပ်တာကို တွေ့ရတယ်လို့ John C. Maxwell က Think on these thing စာအုပ်ထဲမှာ ရေးသားထားတယ်။
ကျွန်မအနေနဲ့ရော ကိုယ့်မှာရှိတဲ့ စွမ်းရည်ကို ၁၀% လောက်ပဲ အသုံးပြုမိနေသလား ? ဆိုတာ စဉ်းစားစရာ ဖြစ်လာပါတယ်။ ကျွန်မတို့ရဲ့ နေ့စဉ်လုပ်ဆောင်ချက်တွေအပေါ် ပြန်သုံးသပ်ကြည့်ရင် ကိုယ့်စွမ်းရည်ရဲ့ ဘယ်လောက်ကိုပဲ သုံးနေသလဲဆိုတာ ကိုယ့်ကိုယ်ကို တွေ့နိုင်မယ်လို့ ယူဆပါတယ်။
နေ့စဉ်ဘ၀တွေမှာ ကျွန်မတို့ရဲ့အတွေးအခေါ်တွေကပဲ ကျွန်မတို့ရဲ့လုပ်ရပ်တွေကို ဦးဆောင်သွားကြတာပါ။ ဒီကနေ့အဖို့ ပြဿနာနေ့လို့ တွေးလိုက်တာနဲ့ အရာရာတိုင်းဟာ ပြဿနာဖြစ်သွားတတ်တာမျိုး ရှိသလို၊ ဒီအလုပ်ကို ငါ မလုပ်နိုင်ပါဘူးလို့ တွေးလိုက်တာနဲ့ အဲဒီအလုပ်မှာ အခက်အခဲတွေနဲ့ တွေ့ပြီး တကယ့်ကို မလုပ်နိုင်တာမျိုးတွေ တွေ့လာရတယ်။
အဲတော့ ကျွန်မတို့က နေ့တစ်နေ့ရဲ့အစပိုင်းမှာ ဒီအလုပ်တွေကို… ငါလုပ်နိုင်တယ်။ ဒီနေရာကို ငါဖြစ်နိုင်တယ်ဆိုပြီး ကိုယ့်ကိုယ်ကို ယုံကြည်ထားဖို့ အပ်တာ တွေ့ရပါတယ်။ ပြီးတော့ ပြဿနာအခက်အခဲကြုံခဲ့ရင်လည်း ဒီအခက်အခဲကို ငါကျော်ဖြတ်ရင်တော့ ငါ့ရဲ့စွမ်းရည်တိုးသွားပြီလို့ တွေးခဲ့ရင် အရာရာတိုင်းကို ကျွန်မတို့ လုပ်ဆောင်လာနိုင်ပြီး အခက်အခဲဆိုတာ စွမ်းရည်မြှင့်စက်လို့ သဘောထားလိုက်ရင် …ကိုယ့်မှာရှိတဲ့ စွမ်းရည်တွေကို ကိုယ်ကိုယ်တိုင် သိမြင်လာနိုင်သလို၊ စွမ်းရည်တွေကိုလည်း နေ့စဉ်မြှင့်တင်နိုင်မယ်လို့လည်း တွေးမိပါသေးတယ်။
ဒါ့အပြင် (ကိုယ့်ကိုယ်ကို ယုံကြည်သူတစ်ဦးအဖို့ အခြားသူများကိုလည်း ယုံကြည်တတ်တာ တွေ့ရပါတယ်) ကိုယ့်ရဲ့ စွမ်းရည်ကို ဖွံ့ဖြိုးတိုးတက်စေနိုင်သလို၊ ကိုယ့်ပတ်ဝန်းကျင်က လူတွေရဲ့ စွမ်းရည်တွေကိုလည်း အားပေးမြှင့်တင်လာနိုင်မယ်လို့ နားလည်လိုက်ပါသေးတယ်။ တစ်ဆက်တည်းစဉ်းစားမိတာကတော့ ကျွန်မတို့သာ…ဒါမှမဟုတ် လူအများစုသာ ကိုယ့်စွမ်းရည်ထက် ၁၀% ထက်ပိုသော ၂၅% ထိ တိုးမြှင့်အသုံးပြုတယ်ဆိုရင် ကျွန်မတို့တိုင်းပြည်ရဲ့ ဖွံ့ဖြိုးတိုးတက်နှုန်းဟာ ဘယ်လို ဖြစ်လာနိုင်သလဲ?
လူတိုင်းဟာ……ကိုယ့်စွမ်းရည်ကို အပြည့်အဝမဟုတ်တောင်မှ ခုထက်ပိုပြီး အသုံးချနိုင်မယ်ဆိုရင်….အရာရာ ပြောင်းလဲတိုးတက်သွားမှာတော့ အမှန်ပါပဲ။ ဘာလိုပဲပြောပြောပါ…ကျွန်မအနေနဲ့ကတော့ ကိုယ့်စွမ်းဆောင်နိုင်မှုစွမ်းရည်ကို စမ်းသပ်လိုပါတယ်။ ပြီးတော့ စိန်ခေါ်လိုပါတယ်။
မေသင်္ကြန်ဟိန်(မြစ်မခ)
www.akhayar.com
No comments:
Post a Comment
မိတ်ဆွေ...အချိန်လေးရရင် blogg မှာစာလာဖတ်ပါနော်
ဗဟုသုတ ရနိုင်တယ်။