ချင်းအနုပညာရှင်ကြီး ဆလိုင်းဂျွန်သင်ဇမ်းနဲ့ ဆလိုင်းဇာလျန်း တသက်တာဂီတထူးချွန်ဆုရရှိ

Chin World

 

ချင်းအနုပညာရှင်ကြီး ဆလိုင်းဂျွန်သင်ဇမ်းနဲ့ ဆလိုင်းဇာလျန်း တသက်တာဂီတထူးချွန်ဆုရရှိ

စက်တင်ဘာလ ၆ ရက်၊ ၂၀၁၅

အမေရိကန်ပြည်ထောင်စုအခြေစိုက် Chin TV International မှ မြောက်ကယ်ရိုလိုင်းနာပြည်နယ်၌ စက်တင်ဘာလ ၄-၆ ရက်အတွင်းကျင်းပသော ချင်းရိုးရာနှစ်သစ်ကူးပွဲတော်၌ နိုင်ငံကျော် ချင်းအနုပညာရှင်များဖြစ်သော- ဆလိုင်းဂျွန်သင်ဇမ်းနှင့် ဆလိုင်းဇာလျန်းတို့အား တသက်တာဂီတထူးချွန်ဆုများအား ချီးမြှင့်ခဲ့ကြသည်။

အမေရိကန်အခြေစိုက် ချင်းလူ့အဖွဲ့အစည်းကြီးတခုဖြစ်သော Chin Community of USA (CCUSA) မှ ၁၄ ကြိမ်မြောက် ကျင်းပသော နှစ်သစ်ကူးပွဲတော်တွင် ဖြစ်ပြီး၊ အနုပညာရှင် ဆလိုင်းဂျွန်သင်ဇမ်းမှ ကိုယ်တိုင်တက်ရောက် ရယူနိုင်ခဲ့ပြီး၊ ဆလိုင်းဇာလျန်းမှာမူ ကျန်းမာရေးကြောင့် ပွဲအား မတက်ရောက်နိုင်ဟု သိရသည်။

ဆလိုင်းဇာလျန်းသည် ၂၀၁၅ ဖေဖော်ဝါရီလ ၂၀ ရက်နေ့တွင်လည်း Myanmar Music Award မှ ချီးမြှင့်သော တသက်တာဂီတထူးချွန်ဆုအား ဆွတ်ခူးနိုင်ခဲ့ပြီး တနှစ်အတွင်း ဒုတိယမြောက် တသက်တာ ဂီတထူးချွန်ဆု ဆွတ်ခူးနိုင်ခြင်းဖြစ်သည်။ ဆလိုင်းဇာလျန်းသည် အိန္ဒိယနိုင်ငံသားဖခင်ဆရာဝန်နှင့် ချင်းအမျိုးသမီးမိခင်တို့မှ ချင်းပြည်နယ်၊ ဖလမ်းမြို့တွင် ဖွားမြင်ခဲ့သည်။ ၁၉၇၀-၈၀ နှစ်များတွင် မြန်မာနိုင်ငံ၌ လျှမ်းလျှမ်းတောက်အောင်မြင်ခဲ့သော The Aces Band ၏ ဘေ့စ်ဂီတာသမားလည်းဖြစ်သည်။ သူ၏ သီချင်းများထဲတွင် "Anybody's Answer" by Grand Funk Railroad, 1969 ၏ သံစဉ်ဖြင့် ရေးသားထားသော စစ်နဲ့ ငြိမ်းချမ်းရေးသီချင်းသည် လူကြိုက်များခဲ့သည်။ အဆိုတော်ခိုင်ထူးမှ စင်တင်ဂီတပွဲများတွင် သီဆိုကာ လူကြိုက်များခဲ့ကြသော်လည်း စစ်အာဏာရှင်ခေတ်တွင် ဤသီချင်းအား သီဆိုခွင့် ပိတ်ပင်ခဲ့သည်ဟုလည်း သိရသည်။

ဆလိုင်းဂျွန်သင်ဇမ်းသည် ဖလမ်းမြို့နယ်၊ လုံဘမ်းရွာဇာတိဖြစ်ပြီး၊ လူပျိုကြီးပဲလုပ်တော့မယ်၊ အလွမ်းကဖီး၊ တောင်ဇလပ်ပင်အောက်က သဇင်ချစ်သူ အစရှိသော လူကြိုက်များလှသော သီချင်းများအား ရေးစပ်ခဲ့သူလည်းဖြစ်သည်။ စက်တင်ဘာလ ၅ ရက်နေ့ညတွင် ဆုလက်ခံရယူပြီး ကျေးဇူးတင်စကားဆိုရာတွင် "ဤဆုအား တန်ဖိုးထားလွန်းကြောင်း၊ ကွယ်လွန်သည့်အခါ အခေါင်းထဲထိအောင် ဒီဆုကို ယူသွားမယ်၊ ကောင်းကင်နိုင်ငံသို့လည်း ယူသွားမယ်ဟု ပြောဆိုကာ၊ လူငယ်များအား ယခုထက်ပိုမိုကာ ဂီတအနုပညာတွင် ကြိုးစားကြရန်နှင့် ဂီတရဲဘော်ရဲဘက် ဆလိုင်းသွှအောင်အပေါ်တွင်လည်း ကျေးဇူးတင်ကြောင်း" တို့အား မျက်ရည်ဖြင့် ပြောကြားရယူသွားခဲ့သည်။

အင်ဒီယားနားမြို့အခြေစိုက် Chin TV International မှ ယမန်နှစ်တွင်လည်း ဆလိုင်းသွှအောင်နှင့် ဆလိုင်းသောန (ABC) တို့အား အလားတူ တသက်တာဂီတထူးချွန်ဆုများ ချီးမြှင့်ကြသည်။