အယ်ဒီတာ့ အာဘော်
အလှမယ်များအတွက် သင်ခန်းစာ
အလှမယ်များအတွက် သင်ခန်းစာ
မြန်မာနိုင်ငံအတွက် အရှက်ရစရာကိစ္စတစ်ခု နိုင်ငံတကာသတင်းစာမျက်နှာများပေါ်တွင် ထပ်မံပေါ်ပေါက်လာပြန်ပါပြီ။ အသက် (၁၉) နှစ်အရွယ် မြန်မာအလှမယ် မေမြတ်နိုး အာရှပစိဖိတ်အလှမယ်သရဖူအသိမ်းခံရခြင်း၏ နောက်ဆက်တွဲအဖြစ် ဒေါ်လာတစ်သိန်းတန် သရဖူကိုယူပြီး တိမ်းရှောင်နေသည်ဆိုသည့် သတင်းများကို နိုင်ငံတကာမီဒီယာများက သြဂုတ် ၂၉ ရက်မှစ၍ အကျယ်တ၀င့်ဖော်ပြနေသောကြောင့် ဖြစ်သည်။
အချို့သတင်းဌာနများတွင်ဆိုလျှင် တောင်ကိုရီးယားရှိ အဖွဲ့အစည်းကို ကိုးကားကာ သရဖူကို ‘‘ခိုးယူသွားသည်’’ဟုပင် သုံးနှုန်းထားသည်။
လွန်ခဲ့သော သုံးလခန့်က မြန်မာနိုင်ငံအတွက် ပထမဆုံး နိုင်ငံတကာ အလှမယ်သရဖူကို ယူဆောင်ပေးခဲ့စဉ် မြန်မာပရိသတ်များ ဂုဏ်ယူ ၀မ်းသာခဲ့ရသော်လည်း ယခုကဲ့သို့ သတင်းများထွက်ပေါ်လာချိန်တွင်တော့ ပရိသတ်များအံ့အားသင့်၊စိတ်ပျက်၊ စိတ်မကောင်းဖြစ်ခဲ့ရပြန်သည်။
အလှမယ်နှင့် အဖွဲ့အစည်းကြားတွင် မည်သူမှားသည်၊ မည်သူမှန်သည် အတိအကျမသိရသော်လည်း နိုင်ငံနှင့် လူမျိုးချီကာ ဂုဏ်သိက္ခာကျဆင်းစရာဖြစ်ခဲ့သည်။
အလှမယ်နှင့် MISS
Asia Pacific World အဖွဲ့အစည်း၏ မြန်မာ နိုင်ငံဆိုင်ရာ ညွှန်ကြားရေးမှူးတို့ကြားမှ မပြေလည်မှုများ၊ အချင်းချင်းမစည်းလုံးခဲ့ရာမှ ဖြစ်တည်လာသော အစိုင်အခဲမှသည် ယခုတော့နိုင်ငံနှင့်ချီကာ အရှက်တကွဲအကျိုးနည်းသော ဖြစ်ရပ်အဖြစ် မှတ်တမ်းဝင်ခဲ့သည်။
Asia Pacific
အထက်ပါ အဖွဲ့အစည်းက မေမြတ်နိုးသည် သူမ၏ မန်နေဂျာ၊ မီဒီယာနှင့် ပရိသတ်များကို မည်သည့်အခါကမှ မလေးစားခဲ့ကာ လိမ်ခဲ့ကြောင်း သရဖူရုပ်သိမ်းကြောင်း ကြေညာချက်တွင် ရေးသားခဲ့သည်။ ထို့အပြင် ပုဂ္ဂိုလ်ရေးဆန်သော မေမြတ်နိုးရင်သားခွဲစိတ်ခဲ့သည့်အကြောင်းကိုပင် ထိုအဖွဲ့အစည်းမှ တာဝန်ရှိသူက မီဒီယာများကို ထုတ်ဖော်ပြောကြားခဲ့၍ ထိုအဖွဲ့၏ လုပ်ရပ်နှင့် အဆင့်အတန်းပေါ်တွင်လည်း မေးခွန်းထုတ်စရာဖြစ်နေသည်။
အဖွဲ့အစည်းသမိုင်း ပြန်ကြည့်လျှင် ပြိုင်ပွဲစတင်ကျင်းပသည်မှာ လေးနှစ်သာရှိသေးပြီး ၂၀၁၁ က ကျင်းပသော ပြိုင်ပွဲတွင် မရိုးသားမှုအချို့ရှိသည်ဆိုကာ အလှမယ်အချို့က ပြိုင်ပွဲတွင် ဆက်မပြိုင်ဘဲ ပြန်သွားခဲ့ဖူးသည်ကို တွေ့ရသည်။
သမ္မတဦးသိန်းစိန်လက်ထက် မြန်မာနိုင်ငံတွင် ထင်သာမြင်သာရှိ သာ နိုင်ငံရေးပြုပြင်ပြောင်းလဲမှုများပြုလုပ်ပြီးနောက် နိုင်ငံတကာ စင်မြင့်ထက်တွင် ပြန်လည်လူဝင်ဆံ့နိုင်သည့် သာဓကများ၌ မြန်မာအလှမယ်များ၊ နိုင်ငံတကာမယ်ပြိုင်ပွဲများတွင် ၀င်ပြိုင်လာနိုင်ခြင်းလည်း ပါဝင်သည်။
ဆယ်စုနှစ် ငါးခုကျော်အတွင်း ပထမဆုံးအဖြစ် မယ်စကြ၀ဠာပြိုင်ပွဲသို့ ပြီးခဲ့သောနှစ်က ပြန်လည်ဝင်ပြိုင်ခဲ့သည်။ အဘက်ဘက်က နိမ့်ကျခဲ့ပြီး နိုင်ငံတကာတွင် မြန်မာဟူ၍ ဂုဏ်ယူလိုခဲ့သော နိုင်ငံသား များက နှစ်ထောင်းအားရရှိခဲ့ပြီး အားပေးခဲ့ကြသည်။
အမျိုးသမီးငယ်များစွာ၏ စိတ်ကူးယဉ်အိပ်မက်များတွင် နိုင်ငံကိုယ်စားပြုအလှမယ်ဖြစ်ရေးမှာ တစ်ခုအပါအ၀င်ဖြစ်လာသည်။
ထို့ကြောင့် နိုင်ငံတကာမယ်ပြိုင်ပွဲများယှဉ်ပြိုင်မည့် မြန်မာအလှမယ်များအနေဖြင့် မေမြတ်နိုးဖြစ်စဉ်ကို သင်ခန်းစာယူရန်လိုသည်။ ပြိုင်ပွဲတစ်ခု ယှဉ်ပြိုင်မည်ဆိုလျှင် ထိုပြိုင်ပွဲအကြောင်း ကောင်းစွာ သိရှိရန်နှင့် ပြိုင်ပွဲမှ စည်းကမ်းများ၊ မယ်တစ်ဦး လိုက်နာရမည့်စည်းကမ်းများကို သိရှိလိုက်နာရန်လိုပါသည်။
နိုင်ငံ့ကိုယ်စားပြုမယ်များမှာ နိုင်ငံတကာမယ်ပြိုင်ပွဲစင်မြင့်တွင် တိုင်းပြည်ဂုဏ်တက်အောင် လုပ်နိုင်သကဲ့သို့ တိုင်းပြည်ဂုဏ်သိက္ခာကျဆင်းအောင်ပြုလုပ်ရန် လွယ်ကူနေသည်ကို အမြဲဆင်ခြင်သတိရကြရန် တိုက်တွန်းအပ်ပါသည်။
http://www.7daydaily.com/story/19564#.VALc3eN_vIo
No comments:
Post a Comment
မိတ်ဆွေ...အချိန်လေးရရင် blogg မှာစာလာဖတ်ပါနော်
ဗဟုသုတ ရနိုင်တယ်။