လျှာပုံပြင်

 

Sinphyutaw

 

လျှာပုံပြင်
==========
တစ်ခါက အာဖရိကတောတွင်းမှာရှိတဲ့ လူမျိုးစုခေါင်းဆောင်တစ်ယောက်ဟာ သူ့ရဲ့ ငယ်ကျွန်တစ်ယောက်ကို ခေါ်ပြီး ဒီလိုခိုင်းစေတယ်
-
"ငယ်ကျွန်ကြီး မြို့က အနီးဆုံးဈေးမှာ ငါ့အတွက် အကောင်းဆုံးအသားသွားဝယ်ချည်"
-
အဲဒီလိုနဲ့ ငယ်ကျွန်ဟာ ဈေးကိုထွက်ခွာသွားတယ်။ တခဏအကြာမှာတော့ သူဟာ တိရစ္ဆာန်တစ်ကောင်ရဲ့ လျှာကို ယူဆောင်ပြီးပြန်လာခဲ့တယ်။ အဲဒီလိုနဲ့နောက်တစ်နေ့မှာလည်း ခေါင်းဆောင်ကြီးဟာ တပည့်ကို ခေါ်ပြန်တယ်။
-
"ဟေ့ကောင် လျှာက တော်တော်စားကောင်းတာပဲကွ၊ ဒီတစ်ခါတော့ အညံ့ဆုံးအသားရှာဝယ်ခဲ့ချည်"
-
ငယ်ကျွန်ဟာ "ဟုတ်ကဲ့" ဆိုတဲ့စကားတစ်ခွန်းကိုသာပြောပြီး ထွက်ခွာသွားပြန်တယ်။ ဒီတစ်ကြိမ်မှာလည်း သူဟာ လျှာကိုသာ ၀ယ်ယူလာခဲ့ပြန်တယ်။ အဲဒီအခါမှာတော့ ခေါင်းဆောင်ကြီးက ဒီလိုပြောတယ်
-
"ဟေ့ကောင် မင့်ဟာက အကောင်းဆုံးအသားကလဲ လျှာပဲ အဆိုးဆုံးအသားဝယ်ခဲ့ပါဆိုတော့လည်း ဒီလျှာပဲ မင်းငါကို ငတုံးများမှတ်နေလား" အဲဒီလို ခေါင်းဆောင်ရဲ့စကားကို ကြားတဲ့အခါ ငယ်ကျွန်က ဒီလိုပြန်ပြောတယ်။
-
"ခေါင်းဆောင်ကြီးခင်ဗျား။ လူတစ်ယောက်ဟာ လျှာကြောင့် တပါးသူတွေကို ပျော်ရွှင်စေပါတယ်။ အဲဒါကြောင့် လျှာဟာ အကောင်းဆုံးအသားပါပဲ။ အဲဒီလျှာကြောင့်ပဲ တဖက်လူကို ၀မ်းနည်းအားငယ်အောင်၊ စိတ်ဓါတ်ပျက်ပြားအောင် လုပ်လို့ရပါတယ်။ အဲဒါကြောင့် လျှာဟာ အဆိုးဆုံးသော အသားပါပဲ"
-
ကျွန်တော်တို့အားလုံးဟာလည်း လျှာနဲ့တင်စားတဲ့ နှုတ်ထွက်စကား တွေကို ပိုင်ဆိုင်ကြသူချည်းပဲဖြစ်တယ်။ လျှာကိုယ်စီ ပိုင်ဆိုင်ကြပေမယ့်လည်း တချို့တွေကတော့ အမုန်းတရား၊ လိမ်ညာခြင်း၊ အပုပ်ချခြင်း၊ ခြောက်လှန့်ခြင်း၊ ကြွားဝါခြင်း၊ ဆဲရေးခြင်း၊ မုသားပြောခြင်း၊ တလွဲအထင်ရောက်စေခြင်း၊ ကုန်းချောခြင်း စတဲ့ မကောင်းသောအရာတွေကို သာ ပွင့်အံထွက်ကျလာလေ့ရှိကြတယ်။ တစ်နည်းအားဖြင့် မိမိစိတ်ရဲ့ သိမ်ဖျင်းခြင်းကို ဖော်ပြနေတဲ့ လျှာပိုင်ရှင်တွေပဲဖြစ်တယ်။
-
ဆန့်ကျင်ဘက်အားဖြင့် ကောင်းသောလျှာပိုင်ရှင်တွေဟာ လမ်းညွှန်ခြင်း၊ အားပေးခြင်း၊ နှုတ်အားဖြင့် စောင်မခြင်း၊ တစ်ပါးသူခွန်အားတက်ကြွဖွယ်စကားကိုသာ ပြောဆိုခြင်း၊ မှန်သောစကားကိုသာပြောခြင်း စတဲ့ ကောင်းသော နှုတ်ထွက်စကားတွေကို ပြောကြားကြပြန်တယ်။ သူတို့ရဲ့ စိတ်နေစိတ်ထားကိုလည်း သူတို့လျှာက ကိုယ်စားပြုကြပြန်တယ်။
-
အဲဒီလို ကောင်းခြင်း/ဆိုးခြင်း အစွန်းနှစ်ပါးကို ပိုင်ဆိုင်တဲ့လျှာကနေ ပွင့်အံလာတဲ့ စကားတစ်ခွန်းကြောင့် အများသူငါ ကဲ့ရဲ့စရာ ဖြစ်ပေးလာသလို၊ အဲဒီလျှာကြောင့်ပဲ အများသူငါ ချီးမွမ်းဖွယ်ဖြစ်လာကြပြန်တယ်။ လျှာကြောင့် ဂုဏ်သိက္ခာ ကျဆင်းနိုင်သလို၊ အဲဒီလျှာကြောင့်ပဲ လူ့လောကအလည် ပွဲလည်တင့်နိုင်ပြန်တယ်။
-
Words can hurt or heal. Be sure to taste your words before you spit them out.
-
စကားလုံးတွေဟာ တဖက်သားကို ကုစားပေးနိုင်သလို၊ နာလည်း နာကျင်စေနိုင်တယ်။ မင်းပါးစပ်ထဲက စကားလုံးတွေ ထွေးမထုတ်ခင် သေချာအောင်အရသာခံကြည့်လိုက်ပါ။
-
ကျွန်တော်တို့ပြောသမျှနှုတ်ထွက်စကားတိုင်းဟာ နောက်ဆက်တွဲ consequences တွေရှိနေတတ်ကြတယ်။ အဲဒီစကားလုံးတွေဟာ တစ်ဖက်သားရဲ့ဘ၀ကို စုတ်ပြတ်နိမ့်ကျ သွားစေနိုင်သလို ကိုယ့်စကားကြောင့် တစ်ဖက်လူရဲ့ ဘ၀တစ်ခုလုံးကိုတောင် ပြောင်းလဲ မြှင့်တင်ပေးနိုင်တယ်လို့ ဆိုလိုတယ်။
ကျွန်တော်တို့တွေဟာ မိမိလျှာကို မိမိပြန်လည် ဆန်းစစ်ကြည့်ဖို့တော့ လိုနေသူများပဲဖြစ်တယ်။
-
ကောင်းသောလျှာနှင့်တူသော ကလောင်တစ်ချောင်းကို ပိုင်ဆိုင်ရပါစေ
(ဖြိုးသုတ)