ဒေါ်အောင်ဆန်းစုကြည်၏ နှစ်သစ်ကူးမိန့်ခွန်းမှ မိန့်ခွန်းတစ်ချို့

 Nine Nine Sanay @ နိုင်းနိုင်းစနေ

 

ကျွန်မတို့နိုင်ငံဟာ သဘာဝသယံဇာတပစ္စည်းပေါများတဲ့ နိုင်ငံဖြစ်တယ်ဆိုပြီးတော့ တစ်ကမ္ဘာလုံးကနေပြီးတော့ ပြောကြပါတယ်။ ဒါပေမယ့် ပွင့်ပွင့်လင်းလင်းပြောရရင် ကျွန်မဒါကိုသိပ်အလေးမထားပါဘူး။

တကယ့်အရေးကြီးတာ ကျွန်မတို့ရဲ့နိုင်ငံသူနိုင်ငံသားများရဲ့စွမ်းအားပါပဲ။ သယံဇာတပစ္စည်းတွေ မဟုတ်ပါဘူး။ သဘာဝသယံဇာတပစ္စည်းတွေဆိုတာ တစ်နေ့တစ်ချိန်တစ်ခါမှာ ကုန်ခန်းသွားနိုင်ပါတယ်။ နောက်ပြီးတော့ ဒီကမ္ဘာကြီးမှာ လှည့်ကြည့်လိုက်လို့ရှိရင် အင်မတန်သေးငယ်ပြီးတော့ သဘာဝသယံဇာတ ပစ္စည်းမရှိတဲ့နိုင်ငံများပင်လျှင် အင်မတန်မှ သြဇာလွှမ်းမိုးနေတယ်။ စီးပွားရေးအရတိုးတက်မှုရှိနေတယ်ဆိုတာလည်း သတိပြုမိကြမှာပါ။ ဒါကြောင့် ကျွန်မဟာ ကျွန်မတို့ရဲ့ ပြည်သူ ပြည်သားတွေကို အားကိုးပါတယ်။ ကျွန်မတို့အစိုးရသစ်ရဲ့ ရည်ရွယ်ချက်တစ်ခုဟာ ပြည်သူပြည်သားများရဲ့စွမ်းအင်တွေ၊ အရည်အချင်းတွေကို မြှင့်တင်ပေးဖို့ပါပဲ။

အခုချိန်မှာ ကမ္ဘာကြီးက အလျင်အမြန်တိုးတက်နေပါတယ်။ ကျွန်မတို့က ဒီတိုးတက်နေတဲ့ကမ္ဘာကြီးနဲ့ မီအောင်လိုက်ဖို့ဆိုတာဟာ တခြားလူတွေထက် ပိုပြီးတော့ ကြိုးစားရမယ့်အခြေအနေရှိပါတယ်။

အခုလည်း ကျွန်မတို့ အဲဒီတုန်းက အခြေအနေနဲ့တော့သိပ်ပြီးတော့ မကွာဘူးလို့ပဲ ကျွန်မမြင်ပါတယ်။ ကျွန်မတို့ဟာ တခြားနိုင်ငံတွေ လမ်းလျှောက်နေတဲ့အချိန်မှာ ပြေးပြီးတော့၊ အပင်ပန်းခံပြီးတော့ လုပ်မှသာလျှင် တခြားနိုင်ငံတွေနဲ့ကို ကျွန်မတို့မီမှာဖြစ်ပါတယ်။ အဲဒီတော့ တခြားနိုင်ငံတွေကို မီအောင်လို့လုပ်တဲ့နေရာမှာ မှန်ကန်တဲ့နည်းတွေပဲ ကျွန်မတို့သုံးချင်ပါတယ်။

ကျွန်မတို့နိုင်ငံကို ကမ္ဘာ့အလယ်မှာ တင့်တယ်စေချင်တယ်ဆိုတာ ကျွန်မက ရုပ်ပိုင်းဆိုင်ရာအရ ချမ်းသာမှုကိုတင် ပြောတာမဟုတ်ပါဘူး။ ကျွန်မတို့ရဲ့နိုင်ငံသူ နိုင်ငံသားများရဲ့အရည်အချင်းကို ကမ္ဘာ ကနေပြီးတော့ လေးစားရအောင်လို့၊ ကမ္ဘာကနေပြီးတော့ တန်ဖိုးထားအောင်လို့လုပ်ချင်တဲ့ စိတ်ဓာတ်အရပြောတာဖြစ်ပါတယ်။ ကျွန်မတို့နိုင်ငံ ကမ္ဘာ့အလယ်မှာ တင့်တယ်တယ်ဆိုရင် ကျွန်မတို့ နိုင်ငံသူနိုင်ငံသားတွေ ဘယ်နိုင်ငံသွားသွား မြန်မာနိုင်ငံကလာတဲ့ နိုင်ငံသူနိုင်ငံသားတွေဟေ့ဆိုပြီးတော့ ခေါင်းမော့ပြီးတော့ ဂုဏ်ယူနိုင်တဲ့အဆင့်ကို ဖြစ်စေချင်ပါတယ်။
အဲဒါအတွက်ဆိုရင် အားလုံးကကြိုးစားရမှာပါ။

----- ဒေါ်အောင်ဆန်းစုကြည်၏ နှစ်သစ်ကူးမိန့်ခွန်းမှ မိန့်ခွန်းတစ်ချို့

Copy from The Irrawaddy (Burmese Version)