ဂီတ၀ါသနာ ဗီဇရှိသူများအတွက် ဂီတလမ်းကြောင်းပေါ်သို့ လျှောက်လှမ်းရန် ပထမခြေလှမ်းဟု ဆိုရမည့် အဆိုပြိုင်ပွဲများစွာ ရှိနေသည်။ ယင်းတို့အနက် ခက်ခဲမှုများ၊ စိန်ခေါ်မှုများနှင့် ကိုယ်ပိုင်ဖန်တီးမှု များစွာဖြင့် သီဆိုယှဉ်ပြိုင်ရသည့် အိပ်မက်ဆုံရာ ရာသက်ပန် အစီအစဉ်မှာ လူငယ်များ၏ အိပ်မက်တွင် နေရာယူထားသည့် ပြိုင်ပွဲတစ်ခု ဖြစ်သည်။ အိပ်မက်ဆုံရာ ရာသက်ပန် Season 2 ၏ ပြိုင်ပွဲတစ်လျှောက်လုံးတွင် ပရိသတ် အားပေးမှု အများအပြား ရရှိခဲ့ပြီး တေးသီချင်းများအား ကိုယ်ပိုင်ခံစား သက်ဝင်မှု၊ ဖန်တီးမှု များစွာဖြင့် ယှဉ်ပြိုင်နိုင်ခဲ့သူ ပြိုင်ပွဲဝင် အဆိုရှင် David လိုင်မှာ နောက်ဆုံးအဆင့် ပြိုင်ပွဲတွင် Winner ဆုကို ဆွတ်ခူး ရရှိခဲ့ပြီ ဖြစ်သည်။ ပရိသတ်များ၏ မဲပေးရွေးချယ်မှု၊ အကဲဖြတ်ဒိုင်တို့၏ အမှတ်ပေး ရလဒ်များဖြင့် Winner ဆုကို ဆွတ်ခူးနိုင်ခဲ့သူ ချင်းတိုင်းရင်းသား အဆိုရှင် David လိုင်နှင့် တွေ့ဆုံ၍ မေးမြန်းဖြစ်သမျှမှာ
မေး- အိပ်မက်ဆုံရာ ရာသက်ပန် Season 2 ရဲ့ Winner အဖြစ် ပရိသတ်တွေက မျှော်လင့်ထားကြတဲ့ အတိုင်း မောင်လေး ဆုရခဲ့တဲ့အပေါ် ၀မ်းသာပီတိလေး အရင်ပြောပြပါဦး။
ဖြေ- ကျွန်တော်ကတော့ အရမ်းကြီး မျှော်လင့်မထားရဲပါဘူး။ ကျွန်တော့်ကို ချစ်ခင်အားပေးတဲ့သူတွေ၊ ပရိသတ်တွေ၊ မိသားစုတွေက ဆုရစေချင် သလိုမျိုး အခုရရှိခဲ့တဲ့ အတွက် ၀မ်းသာပါတယ်။ ကျွန်တော့်ဘက်က အများကြီး လုပ်နိုင်ခဲ့တာမျိုး မရှိပါဘူး။ အခု သူတို့ဖြစ်စေချင်သလို ဖြစ်လာတဲ့အတွက် ပျော်ပါတယ်။
မေး- နောက်ဆုံးအဆင့် ပြိုင်ပွဲမှာ သီချင်းသုံးပုဒ် ယှဉ်ပြိုင်ရတယ်နော်။ အဲဒီအတွက်ရော ဘယ်လောက်ပြင်ဆင်ခဲ့ရလဲ။
ဖြေ- ကျွန်တော့်အတွက်ကတော့ အချိန်သိပ် မရဘူးလို့ ဆိုရမှာပါ။ နောက်ဆုံးအဆင့် ပြိုင်ပွဲမှာက သီချင်းသစ် နှစ်ပုဒ်နဲ့ သီချင်းဟောင်း တစ်ပုဒ်ကို ယှဉ်ပြိုင်ခဲ့ရတာပါ။ သီချင်းသစ် နှစ်ပုဒ်နဲ့ တစ်သားတည်း ဖြစ်ဖို့ကို တော်တော်လေး ကြိုးစားလိုက်ရပါတယ်။ သီချင်းဟောင်းကိုလည်း ပုံစံပြောင်းအောင် ကြိုးစားရတယ်။ သီချင်းသစ် ဆိုရာမှာလည်း ကိုယ်ပိုင်ဖန်တီးမှုလေး ပါဝင်အောင် ကြိုးစားရတဲ့အတွက် တော်တော်လေးတော့ ပြင်ဆင်ခဲ့ရပါတယ်။
မေး- သီချင်းသစ် တစ်ပုဒ်ဖြစ်တဲ့ တေးရေး စောခူဆဲရဲ့ သီချင်းသစ်နဲ့ ယှဉ်ပြိုင်တာ တော်တော်လေးကို အားပေးကြတယ်။ မတင်ဇာမော်ကလည်း ဒီသီချင်းလေးက မောင်လေးရဲ့ ကိုယ်ပိုင်သီချင်းလေး ဖြစ်ပြီလို့ ပြောခဲ့တယ်။ အဲဒီသီချင်းလေး အတွက် ဘယ်လောက် အားထုတ်ခဲ့ရလဲ။
ဖြေ- ဆရာစောခူဆဲ ရေးပေးတဲ့ ပြန်တွေးရင်းနဲ့ဆိုတဲ့ သီချင်းလေးကို ဆိုတဲ့အခါ ကျွန်တော့်ကို ဆရာက ခံစားပြီး ဆိုပါလို့ မှာပါတယ်။ ပထမတစ်ရက် စဆိုစဉ်မှာတော့ သီချင်းရဲ့ အဓိပ္ပာယ်ကို သေချာ နားမလည်ဘူး။ သေချာပြန်တွေးကြည့်တဲ့ အခါမှ စုတ်ပြတ်သတ်နေတဲ့ ဘ၀နဲ့ ကျွန်တော့်ကို အနစ်နာခံပြီး ပြုစု စောင့်ရှောက်ခဲ့တဲ့ ချစ်သူအကြောင်းကို ရေးဖွဲ့ထားတဲ့ သီချင်းဆိုတာကို သဘောပေါက်လာတယ်။ ဒီအခါမှာ ခံစားချက်ပေါ်လွင်အောင် ထည့်နိုင်လာတယ်။ ဘယ်လိုခံစားချက်နဲ့ ဆိုရမယ်ဆိုတာကို သိလာပါတယ်။ ကျွန်တော်ယှဉ်ပြိုင်တဲ့ အခါမှာလည်း သီချင်းရဲ့ အဓိပ္ပာယ်အတိုင်း ခံစားပြီး သီဆို ယှဉ်ပြိုင်ခဲ့ပါတယ်။ ပရိသတ်တွေက ကြိုက်တယ်ဆိုတော့လည်း ကျွန်တော့်ဘက်ကတော့ အတိုင်း မသိပါပဲ။ ဆရာ့ရဲ့ကျေးဇူးလည်း အများကြီး ပါပါတယ်။
မေး- နောက်ဆုံးအဆင့် ပြိုင်ပွဲကို အလိုလို တက်ရောက်ခွင့်ရသူက ဒေးဗစ်ဖြစ်မယ်လို့ အများက မျှော်လင့်ထားပေမယ့် မဖြစ်ခဲ့တဲ့အပြင် တကယ်တမ်း ယှဉ်ပြိုင်တော့လည်း ဒိုင်တွေက Save ကိုအသုံးပြုပြီး ကယ်တင်ခဲ့ရတယ် ဆိုတော့ အဲဒီအချိန်တုန်းက ကိုယ့်ကိုယ်ကိုယ် ဘယ်လိုပြန်ပြီး တည်ဆောက်ယူခဲ့ရလဲ။
ဖြေ- ကျွန်တော် နောက်ဆုံးအဆင့်ကို တက်ရောက်ဖို့ ရွေးချယ်တဲ့ ပြိုင်ပွဲမှာ အမှားတွေ လုပ်ခဲ့ပါတယ်။ သီချင်းစာသားလေးတွေ တော်တော်လေးကို မှားခဲ့တာ။ ဒါပေမဲ့ အဲဒီအချိန်မှာ အကဲဖြတ်ဒိုင်တွေက Save ကိုသုံးပြီး ကယ်တင်ခဲ့တယ်။ အဲဒီအချိန်မှာ ကျွန်တော် ငိုက်စိုက်ကျပြီး စိတ်ဓာတ်ကျနေလို့ မဖြစ်ပါဘူး။ ဒိုင်တွေက အခုလို ကယ်ခဲ့တာနဲ့တင် တော်တော်လေး အားနာဖို့ ကောင်းနေပါပြီ။ ဒါပေမဲ့ ကျွန်တော့်အတွက် ဒိုင်တွေက အခွင့်အရေး တစ်ခု ထပ်ပေးတယ်လို့ပဲ ယုံကြည်ခဲ့ပြီး သီချင်းပိုင်းမှာ အကောင်းဆုံး ပြင်ဆင်မယ်လို့ ဆုံးဖြတ်ခဲ့တယ်။ ကျွန်တော်က စာသားတွေလည်း မှားတတ်တော့ စာသားကအစ မမှားအောင် ကြိုးစားခဲ့ပါတယ်။ ဖန်တီးမှု အပိုင်းမှာလည်း ကျွန်တော့်ဘက်က အကောင်းဆုံးဖြစ်အောင် ကြိုးစားခဲ့ပါတယ်။
မေး- အခု ပန်းတိုင်တစ်ခုကို ရောက်ပြီဆိုတော့ နောက်ထပ် ပန်းတိုင်တစ်ခုကိုရော ဘယ်လို သတ်မှတ်ထားလဲ။
ဖြေ- အခုက ကျွန်တော့်အတွက် ဂီတလမ်းကြောင်းမှာ ပထမ လှေကားတစ်ထစ်ပဲ ရှိပါသေးတယ်။ ဂီတနဲ့ ပတ်သက်လို့ အများကြီး ကြိုးစားရမှာတွေ ရှိသလို လူမှုရေးပိုင်းမှာလည်း အများကြီး ကြိုးစားရဦးမှာပါ။ ကျွန်တော့်အနေနဲ့တော့ ဂီတလမ်းကြောင်းမှာ ဆက်လက် လျှောက်လှမ်းသွားမှာပါ။ အိပ်မက်ဆုံရာ အစီအစဉ်နဲ့လည်း လက်တွဲပြီး လုပ်ဆောင်ဖို့ အစီအစဉ်တွေလည်း ရှိပါတယ်။
မေး- ဂီတလမ်းကြောင်းမှာ ဆက်လျှောက်မှာဆိုတော့ ဘာတွေစတင် လုပ်ဆောင်သွားဖြစ်မလဲ။
ဖြေ- ဂီတအနုပညာကို ခံစားတတ်တဲ့ ပရိသတ်ကလည်း ဂီတ အမျိုးအစားစုံကို ကြိုက်နှစ်သက်ကြမှာပါ။ ကျွန်တော်ကိုယ်တိုင်လည်း ပေါ့ပ်၊ ရော့ခ်၊ အပြင်းစား၊ R&B စသဖြင့် ဂီတအမျိုးအစားစုံကို ကြိုက်ပါတယ်။ ရှေ့ဆက်ပြီးတော့လည်း ကျွန်တော် မြတ်နိုးတဲ့ ဂီတအလုပ်တွေကို ပရိသတ် အားပေးရကျိုးနပ်အောင် ကြိုးစားသွားမှာပါ။
မေး- အိပ်မက်ဆုံရာနဲ့က တစ်ကိုယ်တော် စီးရီးထွက်ဖြစ်မှာလား။
ဖြေ- အဲဒီလိုတော့ သေချာပြောလို့ မရသေးပါဘူး။ အားလုံး ညှိနှိုင်းတိုင်ပင် နေကြဆဲပါ။
မေး- အားပေးချစ်ခင်ကြတဲ့ ပရိသတ်တွေကို ပြောချင်တဲ့ စကားလက်ဆောင်များ ရှိသေးလား။
ဖြေ- ဒီနေ့အထိ ချစ်ခင်အားပေးခဲ့ကြတဲ့ ပရိသတ်တွေ၊ မိသားစုတွေ၊ ဆွေမျိုးတွေ၊ ငွေကုန်ကြေးကျခံ အချိန်ကုန်ခံပြီး Voting တွေ ပေးခဲ့ကြတဲ့ ပရိသတ်တွေ၊ မဲပေးခွင့် မရလိုက်လို့ စိတ်မကောင်း ဖြစ်ရတဲ့ အကြောင်း လာပြောကြတဲ့သူတွေ အားလုံးကို ဒီလောက်ထိ အားပေးခဲ့ကြတဲ့အပေါ် ကျေးဇူးအများကြီး တင်ပါတယ်။ ပရိသတ် အားပေးရကျိုးနပ်အောင်လည်း ရှေ့ဆက် ကြိုးစားသွားပါမယ်။ အဲဒီအတွက်လည်း အားပေးကြပါဦးလို့။
Writer:
လင်းလင်းခိုင်
http://news-eleven.com
No comments:
Post a Comment
မိတ်ဆွေ...အချိန်လေးရရင် blogg မှာစာလာဖတ်ပါနော်
ဗဟုသုတ ရနိုင်တယ်။