သူခိုးပုံပြင်

 

U Lay Aung

 

((( သူခိုးပုံပြင် )))
###########

တစ်ခါက မြို့ငယ်လေးတစ်ခုမှာ ခိုးတတ်တဲ့ ကောင်လေး တစ်ယောက်ရှိသတဲ့။ သူ့ကို မကြာခဏ ဖမ်းမိပေမယ့် ဘယ်တော့မှ ကြာကြာမချုပ်ခံရဘဲ အများဆုံး တစ်ရက်သာ အဖမ်းခံရလေ့ရှိသတဲ့။

တစ်ခုကောင်းတာကတော့ သူဟာ ဘယ်တော့မှ သူများစီးပွားပျက်အောင် ရွှေတွေ ငွေတွေကို မခိုးဘဲ သူလိုအပ်တဲ့ ပစ္စည်းပစ္စယတွေကိုသာ ခိုးလေ့ရှိပါသတဲ့။
ဥပမာ--သူမှာဖိနပ်မရှိတော့ဘူး ဆိုရင် ဖိနပ်ကိုပဲ ခိုးပြီး စားစရာမရှိတဲ့အခါမှာ ဆိုလည်း စားစရာကိုပဲ ခိုးယူလေ့ရှိသတဲ့။

သူ့ရဲ့ထူးခြားချက်တစ်ခုကတော့ ခိုးခိုး မခိုးခိုး မြို့အနှံ့လျှောက်သွားနေတတ်ပြီး တွေ့တဲ့နေရာမှာ အိပ်ကာ တွေ့တဲ့စာကောက်ဖတ်နေတတ်ပါသတဲ့။ ဒါ့အပြင် မြို့ခံလူအချို့ရဲ့ လူသိမခံချင်တဲ့ အချို့ကိစ္စတွေကိုလည်း သိနေလေ့ရှိပါသတဲ့။ ဒါ့ကြောင့် သူခိုးနေတာကို ထိပ်တိုက်တွေ့လိုက်တဲ့ အဲ့ဒီမြို့ငယ်လေးက လူကြီး လူငယ်အချို့ဟာ 'စကားတစ်ခွန်း'ကို မေးလိုက်တာနဲ့ သူ့ကို လန့်ဖျတ်သွားကြပြီး အချို့တွေကတော့ သူလာတတ်တဲ့ အချိန်ကိုမှန်းကာ မုန့်တွေ၊ အဝတ်အစား
တစ်ပတ်နွမ်းတွေကိုတောင် ထားပေးတတ်ကြပါသတဲ့။

တစ်နေ့မှာတော့ သူ့လိုမျိုးပဲ လေလွင့်လူငယ် တစ်ယောက် သူ့ဆီရောက်လာပြီး သူလည်း ခိုးချင်ကြောင်း၊ ဒါပေမယ့် ရဲတွေ၊ ပစ္စည်းပိုင်ရှင်တွေနဲ့ ခဏခဏမိပြီး နောက်တော့ မခိုးရဲတော့ကြောင်း စသည်ဖြင့်ပြောကာ ရဲတွေ၊ ပိုင်ရှင်တွေ မဖမ်းမိအောင်၊ ဖမ်းမိရင်လည်း အမြန်လွတ်အောင်လုပ်တဲ့ ပညာသင်ချင်ကြောင်း' စသည်ဖြင့် ပြောပြပါသတဲ့။

အဲ့ဒီတော့ သူခိုးလူငယ်က သူ့မှာ ဘာပညာမှ မတတ်ကြောင်း၊ ဒါပေမယ့် သူ့ကို အမြန်ပြန်လွတ်အောင်ကယ်တဲ့ အရာက စကားတစ်ခွန်းသာဖြစ်ကြောင်းပြောတော့ လေလွင့်လူငယ်လေး အံ့လည်း အံ့သြသွားပြီး 'ပြောလိုက်ရုံနဲ့ လွှတ်ပေးတယ်'ဆိုတဲ့ အဲ့ဒီစကားကို ပြန်သင်ပေးဖို့ တောင်းဆိုသတဲ့။

သူခိုးလူငယ်က 'ရပါတယ်'ဆိုပြီး 'အဲ့ဒီစကား'ကို သင်ပေးလိုက်သတဲ့။ နောက်ပြီး စည်းကမ်းရှိဖို့နဲ့ နေရာတိုင်းလူတိုင်းကိုမပြောဖို့အပြင် ကျေးဇူးသိတတ်ဖို့ကိုပါ ထည့်သွင်းသတိပေးပြောကြားလိုက်ပါသတဲ့။

ဒီလိုနဲ့ အဲ့ဒီမြို့ငယ်လေးမှာပဲ လေလွင့်လူငယ်ဟာ ခိုးစားဖို့ ကြိုးစားပါတော့တယ်။ ဒါပေမယ့် ကံဆိုးစွာပဲ သူဟာ မအောင်မြင်ဘူး တဲ့။ မကြာခဏဆိုသလို အဖမ်းခံရပြီး အဖမ်းခံရရင်လည်း တစ်လ ကိုးသီတင်း ကြာပါသတဲ့။

ဒါနဲ့ သူအချုပ်ကလွတ်လာတဲ့တစ်ရက်မှာ သူခိုးလူငယ်ဆီ ပြန်ရောက်လာပြီး လူလိမ်ဖြစ်ကြောင်း၊ အဲ့ဒီစကားတစ်ခွန်း ပြောရုံနဲ့ အဆင်မပြေကြောင်း စသည်ဖြင့် ပြစ်တင်ပြောဆို ပါသတဲ့။

ဒါနဲ့ သူခိုးလူငယ်က လေလွင့်လူငယ်ကို 'အားတဲ့အချိန် ဘာလုပ်သလဲ'လို့ မေးပါသတဲ့။ 'ဘာမှမလုပ်ဘဲ အိပ်နေတယ်'လို့ ဖြေသတဲ့။ အဖြေကိုကြားတော့ သူခိုးလူငယ်က အံ့သြသွားပြီး 'ဘယ်အချိန်မှာ ဘယ်နေရာတွေက ဘယ်လိုအိမ်တွေကို ခိုးပါသလဲ'လို့ ထပ်မေးတော့ လေလွင့်လူငယ်က 'ခိုးချင်တဲ့အချိန်မှာ ခိုးချင်တဲ့ နေရာက ခိုးချင်တဲ့အိမ်ကို သွားခိုးပါတယ်' လို့ ဖြေသတဲ့။

သူခိုးလူငယ်က မျက်လုံးပြူးသွားပြန်ပြီး နောက်ဆုံးတစ်ခုမေးမယ် ဆိုပြီး 'ခိုးတဲ့အိမ်တွေ နေရာတွေအတွက် ဘာလုပ်ပေးခဲ့သေးလဲ' လို့ မေးတော့ လေလွင့်လူငယ်က 'အလုပ်မလုပ်ချင်လို့ ခိုးပါတယ်ဆိုမှ ဘာလုပ်ပေးရဦးမှာလဲ'လို့ ပြန်မေးသတဲ့။

သူခိုးလူငယ်က ပြုံးလိုက်ပြီး 'မင်းမအောင်မြင်တာ ဘာဆန်းလို့လဲ၊ ငါ့စကားမှ နားမထောင်ဘဲ'လို့ စကားစ,ကာ လေလွင့်လူငယ်ရဲ့ အားနည်းချက်တွေကို ပြောပြပါသတဲ့။

"နံပတ်တစ်အချက် မင်းမှာ စည်းကမ်းမရှိဘူး။
မင်းဟာ အချိန်မရွေး နေရာမရွေး ခိုးချင်တဲ့အချိန်ခိုးတယ်၊ ခိုးချင်တဲ့နေရာက ခိုးချင်တဲ့ အိမ်မှာခိုးတယ်။ ဒါဟာ သူတို့ကို ကြောက်လန့်စေတယ်။ မင်းဟာ အန္တရာယ်ရှိတယ်လို့
သူတို့က သတ်မှတ်ကြမှာပဲလေ။

နံပတ်နှစ်အချက် မင်းမှာ ကြိုးစားအားထုတ်မှု မရှိဘူး။ စူးစမ်းလိုစိတ်မရှိဘူး။ အားရင် အိပ်နေတယ်။ မင်းဟာ ဘာမှမစူးစမ်းတော့ ဘာမှ မသိတော့ဘူးပေါ့။ ဒီတော့
ငါ မင်းကို သင်ပေးထားတဲ့ "ခင်ဗျားအကြောင်းတွေ ဖော်လိုက်ရမလား"ဆိုတဲ့စကားကို သူတို့ မကြောက်ကြတော့ဘူး။ မင်းဘာမှမသိဘူးဆိုတာကို သူတို့ကသိနေကြတာကိုး။ ဒီတော့ အဲ့ဒီစကားဟာ
မင်းအတွက် မထိရောက်မအောင်မြင်တော့ဘူး။

နောက်တစ်ချက် မင်းက ကိုယ့်အလုပ်ကို တန်ဖိုးမထားဘူး၊ 'အလုပ်မရှိလို့ ခိုးစားတယ်'လို့ ပြောတယ်။ တကယ်တော့ အဲ့ဒါ အချောင်စိတ်ဓာတ်ပဲ။ အမှန်က အဲ့ဒီခိုးတာကိုက အလုပ်ပဲလေ။ မင်းဟာ ကိုယ့်အလုပ်ကို တန်ဖိုးထား လေးစားတတ်မှသာ အောင်မြင်မှာ။

နောက်ဆုံး အရေးကြီးဆုံး တစ်ချက်ကတော့ မင်းဟာ ကျေးဇူးမသိတတ်ဘူး။ မင်းကို အစားအသောက်တွေ အဝတ်အစားတွေ အလွယ်တကူရအောင် လုပ်ပေးနေတဲ့ ပိုင်ရှင်တွေကို နည်းနည်းလေးမှတောင် ကျေးဇူးမပြုဘူး" လို့ ရှည်ရှည်ဝေးဝေး ပြန်ရှင်းပြပါသတဲ့။

လေလွင့်လူငယ်က အံ့သြနေပြီး 'ဘယ်လို ကျေးဇူးပြုသလဲ'လို့ ပြန်မေးသတဲ့။ အဲ့ဒီမှာ သူခိုးလူငယ်က ဒီလိုပြောပြပါသတဲ့။

"ငါက ခိုးပြီးပြန်လာလို့ အိမ်ရှေ့မှာ အမှိုက်ထုပ်တွေ့ရင် အဲ့ဒီအမှိုက်ထုပ်ကိုပါ ယူလာပြီး စွန့်ပစ်ပေးတယ်။ တွေ့တဲ့ အိမ်ရှေ့မှာ အိပ်တယ်ဆိုပေမယ့် ငါအိပ်တဲ့ အိမ်ရှေ့ကို ငါမအိပ်ခင် သန့်ရှင်းအောင် လှဲကျင်းပေးတယ်၊ အနည်းဆုံးတော့ ဘာမှမလုပ်ပေးခဲ့ရင်တောင်၊ ငါ့ကျေးဇူးရှင်တွေ ဆိုပြီး ထိုင်ဦးချခဲ့တယ်" တဲ့။

သူခိုးလူငယ်ရဲ့ စကားတွေကို လေလွင့်လူငယ်ဟာ ပါးစပ်အဟောင်းသားနဲ့ နားထောင်နေခဲ့ပြီး နောက်ဆုံးမှာတော့ ခေါင်းတဆတ်ဆတ်ညိတ်ကာ----------
"ဒီအလုပ်ဟာ ဒီလောက်ခက်ခဲ့တဲ့အလုပ်လို့ ငါမထင်ခဲ့တာ အမှန်ပဲ၊ နောက်ပြီး ခိုးစားတဲ့အလုပ်ကို ဒီလို စည်းကမ်းတွေ နည်းလမ်းတွေ ကျင့်ဝတ်တွေထားပြီးခိုးတာ ငါ့ဘဝမှာ မင်းတစ်ယောက်ပဲ မြင်ဖူးသေးတယ်" လို့ ပြောပြီး
အဝေးကို ထွက်ခွါသွားပါသတဲ့။

သူခိုးလူငယ်ကတော့ လေလွင့်လူငယ်ရဲ့ နောက်ကျောကို အပြုံးနဲ့ စိုက်ကြည့်ရင်း "မင်း ထင်သလောက်လွယ်နေရင် ဒီမြို့လေးမှာ ဘယ်လိုလုပ်ပြီး ငါတစ်ယောက်တည်း ခိုးလို့ရတော့မှာလဲ"လို့ တီးတိုးရေရွတ်ရင်း ကျန်ခဲ့ပါတော့သတဲ့။

ကဲ--ပုံပြင်လေးကတော့ ဒါပါပဲကွယ်။ သူခိုးလေးဆီက ပညာသင်ယူနိုင်ကြပါစေ။ :-p :-p :-p

အရှင်ကောသလ္လ(ရေဦး)
၁၊ ၁၊ ၂၀၁၇။

( ဝန်ခံချက်။ ကြားဖူးသောပုံပြင်တစ်ပုဒ်ကို မှီငြမ်းချဲ့ထွင်၍ ပြုပြင်ရေးသားထားပါသည် )။