အာရုံစူးစိုက်လုပ်ပါ

Bamaw Thein Pe added 2 new photos.

ကြီးပွားအောင်မြင်ရေးအကျင့် (၁၈)
#အာရုံစူးစိုက်လုပ်ပါ
ဒီနေ့ခေတ်မှာ multi-tasking ဆိုတဲ့ စကားလုံးဟာ အတော်လေး ခေတ်စားနေပါတယ်။ လူတစ်ယောက်ဟာ တပြိုင်နက်ထဲမှာ အလုပ်အများကြီး လုပ်နိုင်ခြင်းကို ဆိုလိုတာပါ။ ကုမ္ပဏီတွေမှာ လူတစ်ယောက်ဟာ အလုပ် ၄ - ၅ မျိုး လုပ်တတ်တဲ့အတွက် ဝန်ထမ်းအများကြီး မခန့်တော့ဘဲ လူနည်းနည်းနဲ့ ကြဲကြဲဝိုင်းလုပ်တဲ့ သဘောပါ။ ဒါပေမဲ့ multi-tasking ကို အောင်မြင်ကြီးပွားသူတွေ လုံးဝမသုံးကြပါ။ ဘာကြောင့်လဲဆိုတော့ အလုပ်တစ်ခုထက်မကပဲ အလုပ် ၃ - ၄ မျိုးကို တပြိုင်နက်ထဲ လုပ်တတ်သူဟာ ဘယ်အလုပ်ကိုမှ ရာနူန်းပြည့် အာရုံစိုက်မလုပ်ဘဲ အရည်အသွေးမီတဲ့ အလုပ်ဖြစ်အောင် မလုပ်နိုင်ကြလို့ပါ။
ဥပမာ ပြောပြပါမယ်။ လူတစ်ယောက်ဟာ သတင်းစာဖတ်ရင်း တီဗီကြည့်တယ်ဆိုပါစို့။ သတင်းစာကိုလည်း ဖတ်ပြီးသွားပြီ။ ကြည့်နေတဲ့ တီဗီအစီအစဉ်လည်း ပြီးသွားပြီ ဆိုပါစို့။ သူ့ကို သတင်းစာထဲက အချက်အလက်အသေးစိပ်ကို မေးကြည့်ပါ။ သူ ဖြေနိုင်မှာ မဟုတ်ပါဘူး။ အဲဒီတိုင်းပဲ တီဗီဇာတ်လမ်းထဲက မင်းသား၊ မင်းသမီးတွေ ဘာပြောကြသလဲ၊ ဇာတ်လမ်းအသေးစိပ်ကို မေးကြည့်လိုက်ပါ။ ဒါလည်း သူ သိသလို မသိသလို ဖြေပါလိမ့်မယ်။ ဘာကြောင့် သူ ဒီလိုဖြစ်ရတာလဲ။ လူ့ဦးနှောက်ဟာ အလုပ် ၂ ခု သို့မဟုတ် ၂ ခုထက်ပိုတဲ့ အလုပ်ကို အာရုံပြည့် စူးစိုက်လုပ်နိုင်တဲ့ စွမ်းရည်မရှိလို့ပါ။

အလုပ်တစ်ခုထဲကိုဲ့ အာရုံစူးစိုက်လုပ်တတ်သူဟာ ဦးနှောက်ရဲ့ စွမ်းအားအပြည့်ကို အသုံးချနိုင်လို့ အောင်မြင်မှုရတတ်ကြပါတယ်။ အလုပ်တစ်ခုထဲ အာရုံစိုက်လုပ်လို့ အောင်မြင်မှုရတဲ့ အကြောင်းတွေကို ဥပမာလေးတွေနဲ့ ရှင်းပြချင်ပါတယ်။
- လမ်းဘေးမှာ လက် ၂ ဖက်စလုံး လက်မောင်းရင်းကနေ ပြတ်နေတဲ့ လူတစ်ယောက် တောင်းစားနေတာကို မြင်ဖူးတယ်။ သူဟာ ပါးစပ်က “သနားကြပါ၊ ထမင်းဖိုး ဟင်းဖိုးလေး စွန့်ကြဲပေးကမ်း သနားကြပါ”လို့ တစာစာ အော်ပြီး တောင်းနေတာ မဟုတ်ပါဘူး။ မြေကြီးပေါ် ဖျာခင်းပြီး ဆောင့်ကြောင့်ထိုင်နေတဲ့ သူ့ရှေ့မှာ ဖြန့်ခင်းထားတဲ့ စာရွက်တွေပေါ် ခြေချောင်းကြားမှာ စုတ်တံညှပ်ပြီး ပန်းချီလှလှလေးတွေ ဆွဲပြပြီး စေတနာရှိသူတွေထံက အလှူခံနေတာပါ။ ဝိုင်းအုံကြည့်နေကြတဲ့ လူတွေဟာ သူ့ကို သနားတာရယ်၊ သူ့ရဲ့ ခြေထောက်ကို သုံးပြီး ပန်းချီဆွဲတာကို သဘောကျတာရယ်၊ ဆွဲပြတဲ့ ပန်းချီပုံလေးတွေကလည်း လှပတာကြောင့် သူ့ရှေ့မှာ ချထားတဲ့ ခွက်ထဲကို ငွေအကြွေစေ့ထဲ ထည့်ပေးရင်း အားပေးကြတယ်။
-
- တစ်ခါမှာလည်း ဘတ်စ်ကားဂိတ်မှာ တောင်းစားနေတဲ့ မျက်မမြင်တစ်ယောက်ကို တွေ့ဖူးတယ်။ သူလည်း ပါးစပ်က တစာစာအော်ပြီး တောင်းနေတာ မဟုတ်ပါဘူး။ ကုလားထိုင်တစ်လုံးမှာ အကျအနထိုင်ရင်း ဂစ်တာကို ကိုယ်တိုင်တီးပြီး သီချင်းဆိုပြနေတာပါ။ အနားမှာ ချထားတဲ့ sound box ဆောင်းဘောက်ကနေ အီလက်ထရောနစ် အော်ဂင်သံ၊ ဘေ့စ်သံ၊ ဒရမ်တီးသံတွေလည်း နောက်ခံဂီတသံအနေနဲ့ ပေါ်ထွက်နေပါတယ်။ သူက အင်္ဂလိပ်သီချင်းတွေကို ဆိုပြနေတာပါ။ သူဆိုတဲ့ သီချင်းတွေဟာ မူရင်းအဆိုတော်ရဲ့ အသံနဲ့ တူအောင်ဆိုနိုင်တာရယ်၊ ဂစ်တာကိုလည်း ကျွမ်းကျွမ်းကျင်ကျင် တီးခတ်နိုင်တာရယ်ကြောင့် လူအများကြီး ဝိုင်းအုံ အားပေးကြတယ်။ သူ သီချင်းတစ်ပုဒ်ဆိုပြီးတိုင်း လူတွေက လက်ခုတ်တီး အားပေးကြတယ်။ ငွေအကြွေတွေကို သူ့ရှေ့က စက္ကူပုံးထဲကို ထည့်ပေးကြတယ်။
-
စောစောက လက် ၂ ဖက်ပြတ်နေသူဟာ ဘာလို့ ခြေထောက်နဲ့ ပန်းချီဆွဲတာ ကျွမ်းကျင်ရတာလဲ။ သူ့မှာ လက်တွေ မရှိတော့ ခြေထောက်ကိုပဲ အားကိုးရတော့မယ်။ ခြေထောက်ကို အာရုံပြည့်ထားပြီး လေ့ကျင့်လိုက်လို့ ခြေအစွမ်းပြနိုင်တာပါ။ မျက်စေ့မမြင်သူဟာ ဘာလို့သီချင်းဆို ကောင်းရတာလဲ။ ဂစ်တာကို ဘာလို့ ကျွမ်းကျွမ်းကျင်ကျင် တီးခတ်နိုင်ရတာလဲ။ သူလည်း စောစောက လက်ပြတ်နေသူလိုပါပဲ၊ မျက်စေ့အစုံကို အားမကိုးရတော့လို့ နားအစုံနဲ့ လက်တွေကိုပဲ အားကိုးရတော့တယ်။ နားကို အာရုံစိုက်ပြီး နာမည်ကျော်အဆိုတော်တွေရဲ့ အင်္ဂလိပ်သီချင်းတွေကို နားထောင်လေ့ကျင့်လို့ မူရင်းအဆိုရှင်တွေရဲ့ ဆိုပုံဆိုဟန် အသံအနိမ့်အမြင့်တွေကို တသွေမတိမ်း အတုယူ သီဆိုနိုင်ခဲ့တာပါ။
ဒါကြောင့် ဘာအလုပ်ကိုပဲ လုပ်လုပ် ရာနူန်းပြည့် အာရုံစူးစိုက်လုပ်ပါ။ ကျောင်းသားဟာ ကျောင်းစာတစ်မျိုးထဲ အာရုံစူးစိုက် အလုပ်လုပ်ရင် ပညာရေးမှာ ထူးချွန်မှာပါ။ ဒီလိုမှ မဟုတ်ဘဲ သီချင်းဆိုချင်တယ်။ ကွန်ပျူတာဂိမ်းလည်း ဆော့ချင်သေးတယ်။ သူငယ်ချင်းတွေနဲ့ အပျော်အပါး လိုက်စားချင်သေးတယ်။ ရည်စားလည်း ထားလိုက်သေးတယ်။ အဲဒီလို အာရုံထွေပြားနေသူဟာ ဘယ်တော့မှ အောင်မြင်ကြီးပွားမှာ မဟုတ်ပါဘူး။
စီးပွားရေးလုပ်ငန်းလုပ်သူဟာလည်း မိမိ တကယ်စိတ်ဝင်စားတဲ့ ကျွမ်းကျင်တဲ့ လုပ်ငန်းတစ်ခုကိုပဲ ဇောက်ချမလုပ်ဘဲ ဟိုအလုပ်ကောင်းနိူးနိူး ဒီအလုပ်က အမြတ်ရနိူးနိူးနဲ့ တစ်ခုပြီး တစ်ခု စမ်းတဝါးဝါး လျှောက်လုပ်နေရင် အောင်မြင်မှုရဖို့ ခဲယဉ်းပါလိမ့်မယ်။
ဒါကြောင့် အောင်မြင်ကြီးပွားချင်ရင် မိမိစိတ်ဝင်စားတဲ့ အလုပ်တစ်ခုထဲမှာပဲ အာရုံပြည့် စူးစိုက်လုပ်ကိုင်ပါ။
ဗန်းမော်သိန်းဖေ
၂၈-၀၁-၂၀၁၇