ဝန်ဆောင်မှု ကျော်ကျော်စိုး (ဂျပန်)

 

Kyawkyaw Soe

 

ဝန်ဆောင်မှု
ကျော်ကျော်စိုး (ဂျပန်)

ဒီမနက်အလုပ်အသွား ရထားပြောင်းစီးရမယ့်ဘူတာမှာ ဆင်းတယ်။ မြေအောက်ရထားလိုင်းဝန်ထမ်းတစ်ဦး ဟာ လက်ထဲမှာ သုံးခေါက်ချိုး အလူမီနီယံပြားတစ်ချပ်ကိုကိုင်ပြီး ဘီးတပ်ကုလားထိုင်နဲ့ မသန်စွမ်းခရီးသည် တစ်ယောက်ဆီ ဦးတည်သွားနေတာကို တွေ့လိုက်ရတယ်။ ကျနော်လည်း ရှေ့ဆက်မလျှောက်တော့ပဲ ကြည့်နေမိတယ်။

အမှန်တော့ တိုကျိုမြို့တွင်းမှာသာမက တခြားဂျပန်မြို့ကြီးတွေမှာ ဘီးတပ် ကုလားထိုင်နဲ့ တစ်ယောက်တည်းသွားလာနေတာတွေကို မြင်တွေ့ရတာဟာ မထူးဆန်းတဲ့မြင်ကွင်းပါ၊ ဂျပန်မှာနေနေတဲ့သူတွေအတွက်ကတော့ ဒီမြင်ကွင်း ဟာ ရိုးနေပါပြီ ၊ အဲဒီလိုပဲ ဂျပန်မှာနေဖူးတဲ့သူတွေလည်း ဒါကို သိပါတယ်။

ရထားဝန်ထမ်းဟာ အဲဒီဘီးတပ်ကုလားထိုင်စီးတဲ့ မသန်စွမ်းသူ အနားရောက်တော့ ခါးလေးကိုင်းပြီး “အိုမာ့တာစဲ ရှီမာ့ရှိတာ့” (omatase shimashita) စောင့်ဆိုင်းနေရတဲ့အတွက် ၀မ်းနည်းပါတယ်လို့ ပြောလိုက်တယ်။ ဘီးတပ်ကုလားထိုင်ပေါ်ကပုဂ္ဂိုလ်ကလည်း “အိအဲ အာရိဂတ်တိုး ဂိုဇိုင်းမတ်စ်” ( iie arigato gozaimasu ) ရပါတယ် ၊ ကျေးဇူးတင်ပါတယ် လို့ပြန်ပြောတယ်။ ပြီးတော့ သူတို့နှစ်ယောက်ဟာ ဓာတ်လှေခါးဆီကို ဦးတည်သွားကြတယ်။

သူတို့နှစ်ယောက်ဟာ ဓာတ်လှေခါးစီးပြီး ပလက်ဖောင်းပေါ်သွားကြမှာဖြစ် တယ်။ ပလက်ဖောင်းပေါ် ရောက်လို့ ရထားဝင်လာပြီး ရထားရပ်လို့ တံခါးဖွင့်တဲ့အခါ ရထားဝန်ထမ်းဟာ လက်ထဲက အလူမီနီယံပြားကို ရထားတံခါးဝကြမ်းပြင် နဲ့ ဘူတာပလက်ဖောင်းတို့ကြား ဆက်သွားအောင် ခင်းပေးလိမ့်မယ်။ အဲဒီအခါ ဘီးတပ်ကုလားထိုင်ပေါ်ကလူဟာ ကုလားထိုင် လက်ရမ်းပေါ်ကခလုပ်ကိုနှိပ်ပြီး အလူမီနီယံပြားပေါ်ကနေ တဆင့် ရထားထဲ ၀င်လိမ့်မယ်။

တကယ်လို့ ရထားပေါ်ကနေဆင်းမယ့်သူရှိရင် ဆင်းတဲ့သူတွေ အားလုံးဆင်း ပြီးမှ ရထားဝန်ထမ်းက အလူမီနီယံပြားကို ခင်းမှာဖြစ်တယ်။ အဲဒီ တံခါးပေါက်နေရာကနေ တခြားခရီးသည်တွေတက်ဖို့ရှိတယ်ဆိုရင်လည်း ဘီးတပ်ကုလားထိုင်ကခရီးသည် ရထားပေါ်တက်ပြီးမှ သူတို့လိုက်တက် လိမ့်မယ်။ ရထားပေါ်မှာရှိနေတဲ့ ခရီးသည်တွေကလည်း ဘီးတပ်ကုလားထိုင် အတွက် နေရာဖယ်ပေးကြလိမ့်မယ် ။ ဒီမြင်ကွင်းနဲ့ ဒီလုပ်ရပ်က ရထားစီး ခရီးသည်တိုင်း မြင်နေကြ လုပ်ပေးနေကြ။

ဘီးတပ်ကုလားထိုင်စီးခရီးသည် ရထားပေါ်ရောက်သွားလို့ရှိရင် ရထားဝန်ထမ်း ဟာ လက်ထဲက ၀ါယာလက်စ် မိုက်ခရိုဖုန်းနဲ့ “ခရီးသည်ရထားထဲရောက်ပါပြီ၊ အဲဒီခရီးသည် တွဲနံပတ်ဘယ်လောက် တံခါးပေါက်နံပတ်ဘယ်လောက်ကနေ စီးပြီး ဘယ်ဘူတာမှဆင်းမယ်” ဆိုတာကိုပြောလိမ့်မယ်။ ဒါဆိုရင် ရထားမောင်းသူရော ရထားဂတ်ဗိုလ်ပါ သိသွားပြီ ၊ ဘီးတပ်ကုလားထိုင်စီး ခရီးသည်ဆင်းမယ့်ဘူတာက၀န်ထမ်းတွေ ဆီကိုပါ ရောက်သွားပြီ။ သူတို့လည်း ဘူတာမှာစောင့်နေကြမှာပါ။ အဲဒါ ရထားဝန်ထမ်းတွေ နေ့တဓူဝလုပ်ပေးနေကြ ၀န်ဆောင်မှုပါ။

ဂျပန်မှာအလုပ်လုပ်နေတဲ့သူအားလုံးဟာ ၀န်ဆောင်မှုဆိုတဲ့စကားရဲ့ အဓိပ္ပာယ်နဲ့တန်ဖိုးကိုသိပြီး အလေးထားကြတယ်။ ဂျပန်မှာအမြဲပြောဆို သုံးစွဲနေတဲ့စကားရှိတယ်။ အိုကယာကုစံ ၀ါ့ ခါမိစံ okyakusan wa kamisan ဧည့်သည်ဟာ နတ်ဘုရား ဆိုတာပါပဲ။ ဧည့်သည်ဟာနံပတ်တစ်ပဲ ဆိုတဲ့ အဓိပ္ပာယ်ပါ။ ဦးစားပေးနေရာမှာထားတယ်ဆိုတာပဲ ။

ဝန်ထမ်းတွေဟာ သူတို့ရဲ့ပစ္စည်း ၊ သူတို့ရဲ့ဝန်ဆောင်မှုကို ဧည့်သည်တွေ က နောက်တစ်ကြိမ်သုံးအောင် ၊ ပုံမှန်သုံးအောင် ၊ အမြဲသုံးဖြစ်အောင် ကြိုးပမ်းလုပ်ဆောင်လေ့ရှိကြတယ်။ ရယူသုံးစွဲသူတွေ စိတ်ကျေနပ်ရင် ပုံမှန်ဝယ်ယူ သုံးစွဲကြလိမ့်မယ်။ ဒါဆိုရင် ကိုယ့်လုပ်ငန်း ပုံမှန်ဝင်ငွေရမယ်။ အဲဒီလိုမျိုး ဆက်စပ်ဆင်ခြေတွေးတောပြီး အလုပ်လုပ်ကြတယ်။ ဒါက စီးပွားရေးရှုထောင့်ကကြည့်တာ။

လူမှုရေးရှုထောင့်ကကြည့်ရင် လူတစ်ယောက်နဲ့တစ်ယောက် အပြန်အလှန်လေးစား ၊ ကူညီဖေးမတာကြောင့် လူမှုဆက်ဆံရေးနယ်ပယ် မှာ မေတ္တာ အကြင်နာ စာနာစိတ် အခြေခံနဲ့ဆက်ဆံမှုတွေထွန်းကားတယ် ဆိုတာကို မြင်တွေ့နိုင်တယ် ၊ လောဘ ၊ ဒေါသ ၊ မောဟ ၊ မနာလိုမှု နည်းပါးတယ်ဆိုတာကိုတွေ့နိုင်တယ်။ အဲဒါဟာ လူမှုအသိုင်းအ၀ိုင်းအတွင်း တည်ငြိမ်မှု အေးချမ်းမှုဖြစ်ပေါ်စေဖို့ တစ်ဖက်တစ်လမ်းကနေ အထောက်အကူပေးနိုင်တာပေါ့။

ကျော်ကျော်စိုး (ဂျပန်)
၂၀၁၇ ခုနှစ် ဇန်န၀ါရီ ၆ ရက်