လူငယ်နှင့်ပတ်ဝန်းကျင်

 

Eternal Light Magazine

 

#လူငယ်နှင့်ပတ်ဝန်းကျင်
#နေဘုန်းလတ်

ကလေးငယ်ဆိုတဲ့ အသက်အရွယ် အပိုင်းအခြားတစ်ခုကို ကျော်လာပြီးတဲ့နောက်မှာတော့ လူငယ်ဆိုတဲ့ အပိုင်းအခြားထဲကို ၀င်လာပါပြီ။ မိမိကိုယ်မိမိ တာဝန်မယူနိုင်သေးတဲ့အချိန်၊ မိမိရဲ့ပတ်ဝန်းကျင်ကို မိမိကိုယ်တိုင် မရွေးချယ်နိုင်သေးတဲ့အချိန်တွေမှာ မိဘတွေနဲ့ ဆွေမျိုးအသိုင်းအ၀ိုင်းတွေရဲ့ အခန်းကဏ္ဍက အရေးပါတဲ့ အနေအထားမှာ ရှိနေပါတယ်။ ဒါပေမဲ့ ကလေးငယ်တွေ အသက်ကြီးလာပြီး ဆယ်ကျော်သက်အရွယ် လူငယ်ဖြစ်လာပြီဆိုရင်တော့ မိဘနဲ့ ဆွေမျိုးအသိုင်းအ၀ိုင်းတို့ရဲ့ တာဝန်ယူလိုမှုနဲ့ လူငယ်တွေရဲ့ မိမိကိုယ်မိမိ တာဝန်ယူချင်မှုကြားမှာ ပဋိပက္ခတချို့ ရှိလာတတ်ပါတယ်။ ကလေးငယ်အဖြစ်ကနေ လူငယ်ဘ၀ကို တရွေ့ရွေ့ချဉ်းကပ်လာချိန်မှာတော့ မိဘနဲ့ ဆွေမျိုးအသိုင်းအ၀ိုင်းတွေအနေနဲ့ မိမိတို့ရဲ့တာဝန်ယူမှုကို လူငယ်တွေအနေနဲ့ သူတို့ကိုယ်သူတို့ တာဝန်ယူနိုင်မှုဆီရောက်သွားအောင် တဖြည်းဖြည်း ကူးပြောင်းပေးသင့်ပါတယ်။ လူငယ်တွေအနေနဲ့ကလည်း မိမိအပေါ် မိမိနဲ့ထိစပ်နေသော ပတ်ဝန်းကျင်တစ်ခုက သက်ရောက်လာတဲ့ သက်ရောက်မှုတွေကို မှန်မှန်ကန်ကန်နဲ့ လက်ခံတုံ့ပြန်မှုတွေ လုပ်နိုင်ဖို့အတွက် စိတ်ခံအားတစ်ခုတော့ ရှိနေဖို့ လိုပါလိမ့်မယ်။ ခန္ဓာကိုယ်ပေါ်ကျရောက်လာမယ့် ရောဂါပိုးမွှားတွေအတွက် ကိုယ်ခံအားကောင်းနေဖို့လိုသလို မိမိရဲ့ စိတ်သန္တာန်အပေါ်ကျရောက်လာနိုင်တဲ့ Virus တွေကို ခုခံတွန်းလှန်ဖို့အတွက် စိတ်ခံအားကောင်းနေဖို့ လိုပါတယ်။

#သိမှတ်မှုအစုအဝေး
လူတိုင်းလူတိုင်းဟာ မိမိရဲ့ သိမှတ်မှုအစုအဝေး (Mindset) ကို ကိုယ်တိုင်တည်ဆောက်ကြရပါတယ်။ တချို့ကျတော့ စနစ်တကျတည်ဆောက်ပြီး တချို့တွေကျတော့ မသိလိုက်မသိဘာသာပဲ တည်ဆောက်ကြပါတယ်။ သိသိ မသိသိ ကျွန်တော်တို့အားလုံးမှာ ကျွန်တော်တို့ကိုယ်တိုင် တည်ဆောက်ထားတဲ့ သိမှတ်မှုအစုအဝေး (Mindset)တစ်ခုစီ ရှိကြပါတယ်။ ဘယ်လိုတည်ဆောက်သလဲဆိုတော့ ကျွန်တော်တို့ ကြုံတွေ့ခဲ့ရတဲ့ပတ်ဝန်းကျင်တွေ၊ ကျွန်တော်တို့ ဖြတ်သန်းခဲ့ရတဲ့ဖြတ်သန်းမှုတွေ၊ ကျွန်တော်တို့ ဖတ်မှတ်လေ့လာဖူးတဲ့ အသိပညာ၊ အတတ်ပညာတွေ၊ ကျွန်တော်တို့ ဆုံတွေ့ပေါင်းဖော်ဖူးကြတဲ့လူတွေ၊ ကျွန်တော်တို့ရဲ့ဘ၀အတွေ့အကြုံတွေထဲကရတဲ့ အုတ်ချပ်၊ သဲပွင့်၊ သွပ်တို့၊ သံတို့နဲ့ အလားသဏ္ဌာန်တူသော သိမှတ်မှုတွေနဲ့ Mindset တွေကို တည်ဆောက်ကြပါတယ်။ ငယ်ရွယ်စဉ်အချိန်မှာပဲဖြစ်ဖြစ်၊ စိတ်ခံအားနည်းတဲ့သူတွေမှာပဲဖြစ်ဖြစ် အဲဒီ Mindset ဟာ တစ်စုံတစ်ရာခိုင်မာမှုမရှိသေးတဲ့ အနေအထားဖြစ်တာကြောင့် ပတ်ဝန်းကျင်ကပေးတဲ့ သိမှတ်မှုတွေက မိမိကို လွှမ်းမိုးပြီး မိမိရဲ့စိတ်မှာ အပြောင်းအလဲ တစ်စုံတစ်ရာ ဖြစ်သွားတာမျိုးတွေ ရှိတတ်ပါတယ်။ ရှင်းရှင်းပြောရရင် ပတ်ဝန်းကျင်ကနေ ကိုယ့်ကို ပြောင်းလဲပစ်လိုက်တာပါ။ ပတ်ဝန်းကျင်က ပြုလုပ်သူ(Subject) ဖြစ်ပြီး ကိုယ်က အပြုခံ(Object) သဘောမျိုးပါ။

#စိတ်ခံအားကောင်းကြစေချင်ပါတယ်
နောက်ပိုင်း အတိုင်းအတာတစ်ခုအထိ အရွယ်ရောက်လာပြီး မိမိမှာ မိမိကိုယ်တိုင်တည်ဆောက်ထားသော၊ အခြေခိုင်သောသိမှတ်မှု အစုအဝေး(Mindset) တစ်ခုရှိလာတဲ့အခါမျိုး၊ ပြီးတော့ စိတ်ခံအားတစ်ခု ပိုင်ပိုင်နိုင်နိုင် တည်ဆောက်ထားနိုင်ပြီး ဖြစ်တဲ့အခါမျိုးတွေမှာတော့ ပတ်ဝန်းကျင်ကပေးတဲ့ သိမှတ်မှုတွေရဲ့ လွှမ်းမိုးမှုကို အလွယ်တကူမခံတော့ဘဲ ချိန်ထိုးစဉ်းစားမှုတွေ၊ တန်ပြန်မေးခွန်းထုတ်မှုတွေ၊ အသစ်ရှာဖွေမှုတွေကို လုပ်နိုင်လာပါတယ်။ တကယ်လို့ ပတ်ဝန်းကျင်ကပေးတဲ့ သိမှတ်မှုမှာ ကိုယ်လက်ခံနိုင်စရာပါရင်လည်း ကိုယ့်သိမှတ်မှုထဲ ပေါင်းထည့်လိုက်ပါတယ်။ ကိုယ် ငြင်းပယ်စရာပါရင်လည်း လက်မခံဘဲ ပြတ်ပြတ်သားသား ငြင်းဆန်လိုက်ပါတယ်။ ပတ်ဝန်းကျင်ရဲ့သိမှတ်မှုဟာ မဖြစ်သင့်ဘူးလို့ မြင်လာရင်လည်း ကိုယ့်ရဲ့စိတ်ခံအားကို အခြေပြုပြီး ပတ်ဝန်းကျင်ရဲ့ သိမှတ်မှုကို ပြန်ပြီးတော်လှန်ပြောင်းလဲပစ်နိုင်ဖို့ ကြိုးစားပါတော့တယ်။ ကိုယ်ဟာ အပြုခံ(Object) သက်သက်မဟုတ်တော့ဘဲ လိုအပ်ရင် ပြုလုပ်သူ (Subject) နေရာဝင်ယူပြီး ပတ်ဝန်းကျင်ကိုပါ ပြောင်းလဲပစ်နိုင်အောင် ကြိုးစားသူအဖြစ် ရပ်တည်ပါတယ်။ ဒါကြောင့် လူနဲ့ သူ့ရဲ့ပတ်ဝန်းကျင်ဟာ အပြန်အလှန် သက်ရောက်မှုတွေကို Vise Visa သဘောမျိုး ပေးနေပါတယ်။ အခြားသူတွေဟာ မိမိရဲ့ပတ်ဝန်းကျင်ဖြစ်ပြီး မိမိကိုယ်တိုင်ဟာလည်း အခြားသူတွေရဲ့ပတ်ဝန်းကျင် ဖြစ်နေတယ်ဆိုတာကို သတိချပ်ဖို့ လိုပါတယ်။ အခုလို နည်းပညာခေတ်ကြီးထဲမှာ ပတ်ဝန်းကျင်ပေါင်းများစွာက မိမိရဲ့စိတ်ကို သိမှတ်မှုပေါင်းများစွာနဲ့ ထိုးဖောက်သွတ်သွင်းဖို့ ကြိုးစားကြတာကို ခေတ်လူငယ်တိုင်း ကြုံကြရမှာပါ။ ပတ်ဝန်းကျင် ပုံသွင်းသမျှ အများအလိုကျ ပုံလိုက်ပြောင်းပေးရတဲ့ ဖယောင်းရုပ်လို လူတွေမဖြစ်စေဖို့ လူငယ်တွေကို စိတ်ခံအားကောင်းကြစေချင်ပါတယ်။

#မိမိရဲ့စိတ်ဟာမိမိရဲ့ပတ်ဝန်းကျင်ကောင်း
ကိုယ့်အနားမှာ ဘယ်သူမှမရှိတဲ့အတွက် ကိုယ့်မှာပတ်ဝန်းကျင် မရှိဘူးလို့ ပြောလို့မရပါဘူး။ မိမိဘေးမှာ သစ်ပင်လေးတစ်ပင်၊ ပုရွက်ဆိတ်လေးတစ်ကောင်၊ စမ်းချောင်းလေးတစ်ခု၊ ဂစ်တာလေးတစ်လက် စသဖြင့် ရှိနေတာတွေဟာလည်း မိမိရဲ့ ပတ်ဝန်းကျင်တွေပဲလို့ မှတ်ယူသင့်ပါတယ်။ အဲဒီလို သဘာဝပတ်ဝန်းကျင်တွေအတွက်လည်း မိမိဟာ ပတ်ဝန်းကျင်ကောင်းတစ်ခုဖြစ်ဖို့ ကြိုးစားကြသင့်ပါတယ်။ နောက်ဆုံး ကိုယ့်အနားမှာ ဘာဆိုဘာမှမရှိဘဲ အခန်းကျဉ်းတစ်ခုတည်းမှာ ကိုယ်တစ်ယောက်တည်း ရှိနေပြီဆိုရင်တောင် မိမိနဲ့အတူ မိမိရဲ့စိတ် ရှိနေသေးတယ်ဆိုတာကို သတိရစေချင်ပါတယ်။ မိမိရဲ့စိတ်ဟာလည်း မိမိအတွက် ပတ်ဝန်းကျင်ကောင်းတစ်ခု ဖြစ်သင့်ပါတယ်။ စိတ်နဲ့ကိုယ် ရန်ဖြစ်ပြီး စိတ်ထောင်းကိုယ်ကြေ ဖြစ်နေကြတဲ့သူတွေကို တွေ့ဖူးကြမယ် ထင်ပါတယ်။

#မိမိကိုယ်မိမိပျိုးထောင်ကြစေချင်ပါတယ်
နောက်ဆုံးအနေနဲ့ ပြောချင်တာကတော့ လူငယ်တွေအနေနဲ့ ပတ်ဝန်းကျင်ရဲ့ ဆိုးသွမ်းသောသက်ရောက်မှုတွေမှာ ဘ၀ပျက်ရလောက်တဲ့အထိ ဖြစ်မသွားရအောင် မိမိရဲ့ကိုယ်ပိုင်စိတ်ခံအားတစ်ခုကို ပိုင်ပိုင်နိုင်နိုင် တည်ဆောက်ထားကြစေချင်ပါတယ်။ လိုအပ်ရင် ဆိုးရွားသောပတ်ဝန်းကျင်ကို ကောင်းသောအနေအထား တစ်ခုရောက်အောင် ပြောင်းလဲပစ်နိုင်စွမ်းသော လူစွမ်းကောင်းတွေ ဖြစ်လာတဲ့အထိ မိမိကိုယ်မိမိ ပျိုးထောင်ကြစေချင်ပါတယ်။ အိန္ဒိယခေါင်းဆောင်ကြီး နေရူးပြောဖူးတဲ့ စကားတစ်ခွန်းရှိပါတယ်။ “ခေတ်ကာလကြီးက မကောင်းဘူး။ ဟုတ်တယ် ... ဒါပေမဲ့ အဲဒါကို ပိုကောင်းအောင်လုပ်ဖို့ အဲဒီနေရာမှာ မင်းရှိနေတယ် (The time is bad. Well, but you are there to make it better)”တဲ့။ လူငယ်တွေ မိမိကိုယ်မိမိ ကောင်းသောပတ်ဝန်းကျင်တွေအဖြစ် ပျိုးထောင်ကြရင်း မကောင်းသောပတ်ဝန်းကျင်တွေထဲကို ပြောင်းလဲအစားထိုးနိုင်ကြပါစေ။

ချစ်ခြင်းမေတ္တာကို မြတ်နိုးပါ။
ဉာဏ်ပညာကို တန်ဖိုးထားပါ။
အနုပညာကို ခံစားတတ်ပါစေ။
#နေဘုန်းလတ်

(ဆရာနေဘုန်းလတ်ရေးသားသော "လူနှင့် သူ၏ပတ်ဝန်းကျင်" ဆောင်းပါးမှ ကောက်နုတ်ဖော်ပြသည်။ လွတ်လပ်စွာ Share နိုင်ပါသည်။)
Eternal Light Magazine
December 2016
#လူငယ်နှင့်ပတ်ဝန်းကျင်ကောင်း