လိပ်ပြာသန့်ပါစေ …

မောင်(စွယ်စုံကျမ်း)

 

လိပ်ပြာသန့်ပါစေ …
============

တစ်နေ့မှာ ကောင်လေးတစ်ယောက် နဲ့ ကောင်မလေး တစ်ယောက် အတူတူ ကစားနေကြပါတယ် … ။ ကောင်လေးမှာ ကျောက်ဒိုးလေးတွေ ရှိတယ် …. ကောင်မလေးမှာတော့ သကြားလုံးလေးတွေ ရှိပါတယ် … ။

ကောင်လေးက ကောင်မလေးကို “နင့်ကို ငါ့ရဲ့ ကျောက်ဒိုးလေးတွေပေးမယ် … ငါ့ကို နင့်ရဲ့ သကြားလုံးတွေ ပေးမလား …. နင့်ရဲ့ သကြားလုံးနဲ့ ငါ့ရဲ့ ကျောက်ဒိုးတွေ လဲကြမယ်လေ …” လို့ ပြောပါတယ် … ။ ကောင်မလေးက လည်း သဘောတူပါတယ် … ။

ဒါပေမယ့် တကယ့်တကယ် လဲကြတော့ … ကောင်လေးက အလှဆုံး နဲ့ အကြီးဆုံးဆိုတဲ့ ကျောက်ဒိုးကို ချန်ထားလိုက်ပြီးတော့ … ကျန်တာတွေကို ပေးလိုက်ပါတယ် … ၊ ကောင်မလေး ကတော့ ကတိထားကြတဲ့ အတိုင်း သူ(မ)ရဲ့ သကြားလုံးတွေ အားလုံးကို ကောင်လေးကို ပေးလိုက်ပါတယ် … ။

အဲဒီလိုနဲ့ ကစားပြီးလို့ ကိုယ်စီ ကိုယ်စီ အိမ်ကို ပြန်ကြတယ် … ညဖက်ရောက်လို့ အိပ်ရာဝင်တော့ ကောင်မလေးက တော့ နှစ်နှစ်ခြိုက်ခြိုက် အိပ်ပျော်ပါတယ် … ။ ဒါပေမယ့် ကောင်လေး ကတော့ တလူးလူး တလွန့်လွန့် နဲ့ ကောင်းကောင်း အိပ်မပျော်ပါဘူး … ၊ ကောင်လေးစိတ်ထဲမှာ သူက ကျောက်ဒိုး တွေ အကုန်မပေးဘဲ အကြီးဆုံး အလှဆုံးဆိုတာကို ချန်ထားလိုက်သလိုမျိုး … ကောင်မလေးကများ သကြားလုံးတွေ ချန်ထားသလား ဆိုတာ သိချင်တဲ့ စိတ်နဲ့ … အိပ်လို့ မပျော်နိုင်တာပါ …. ။

စာစုလေးကတော့ ဒါပါပဲ … ကိုယ့်ဘက်ကသာ ရာနှုန်းပြည့် ရိုးသားတယ်ဆိုရင် … လိပ်ပြာသန့်ပြီး တော့ အရာရာမှ စိတ်ရှင်းပါတယ် … ကိုယ့်ဘက်က မရိုးသားခဲ့ရင် … ကိုယ့်လိုပဲ သူ့ကလုပ်လေမလား ဆိုတဲ့ သံသယ စိတ်က ကိုယ့်စိတ်ကို ပြန်ပြီး ပင်ပန်းစေပါတယ် … ။

ရုရှားစကားပုံ လို့ ထင်ပါတယ် … “A clear conscience is the softest pillow.” လို့ ကြားဖူး ပါတယ် …. တစ်ချို့ကလည်း “A good conscience is a good pillow.” လို့ ပြောကြပါတယ် … ဂျာမာန် စကားပုံလို့လည်း ဆိုပါတယ် ဘာပဲဖြစ်ဖြစ် ဆိုလိုရင်းကတော့ အတူတူပါပဲ … ။

တနေ့တာကုန်ဆုံးလို့ လုပ်ငန်းကိစ္စ အဝဝ ပြီးဆုံးလို့ အိပ်ရာဝင်တဲ့ အခါ …. အိပ်ရာပေါ်လှဲ လိုက်တာနဲ့ တစ်နေ့တာ လုပ်ခဲ့တဲ့ အတွေးတွေဟာ ခေါင်းထဲကို ဝင်လာတတ်ပါတယ် … အဲဒီအချိန်မှာ ကိုယ့်ရဲ့ တစ်နေတာ လုပ်ခဲ့သမျှ အလုပ်တွေဟာ ကိုယ့်အတွက် လိပ်ပြာသန့်တယ် ဆိုရင် ကောင်းကောင်း မွန်မွန် အိပ်စက် အနားယူနိုင်ပါလိမ့်မယ် ….. ကိုယ့်ကသာ မရိုးသားတာ … မဟုတ်တာ … တစ်စုံတရာကို လုပ်ထားခဲ့မယ်ဆိုရင် …. ဘယ်သူမှ မသိပေမယ့် ကိုယ့်ကိုကိုယ် သိပါတယ် … အဲဒီ စိတ်ကပဲ ကိုယ့်ကို ခြောက်လှန့်စေပါတယ် … ။

ပြီးတော့ မဟတ္တမ ဂန္ဒီ ပြောဖူးတဲ့ စကားတစ်ခု ရှိပါသေးတယ် …. “Happiness is when what you think, what you say, and what you do are in harmony.” ဒါကြောင့်မို့ ကိုယ့်ရဲ့အတွေးထဲမှာ ကိုယ့်ကိုယ်ကို ပဋိပက္ခဖြစ်စေမယ့် … စကားတွေ … အလုပ်တွေ … အကြောင်းအရာတွေကို မဖန်တီးမိပါစေနဲ့၊ ကိုယ့်စိတ်ထဲမှာ ရှိတဲ့အတိုင်း ပြောနိုင်ဖို့ ကြိုးစားကြည့်ပါ … ထို့အတူပဲ … ပြောတဲ့ အတိုင်းလည်း လုပ်နိုင်ဖို့ လိုပါတယ် … ။

တစ်ခါတစ်လေမှာ ကိုယ့်စိတ်ထဲမှာ တွေးထားတာက တစ်မျိုး လက်တွေ့ပြောလိုက်တာ … လုပ်လိုက်တာက တစ်မျိုး ဖြစ်တတ်ပါတယ် … ဒါကလည်း တစ်ခါတစ်လေမှ လူမှုရေးကိစ္စတွေကြောင့် တဖတ်သားအတွက် ထောက်ထားပြီး ပြောလိုက်တာမျိုးတွေလည်း ဖြစ်တတ်ပါတယ် … ဒါ့အပြင် ကိုယ့်စိတ်ထဲမှာ ကိုယ့်ကို အထင်ကြီးစေချင်တဲ့ …. လေးစားစေချင်တဲ့ … သဘောကြောင့်လည်း ကိုယ့်စိတ်ရင်းနဲ့ ကိုယ့်အပြော … ကိုယ့်အလုပ်တွေ မကိုက်ညီတော့တာမျိုးတွေလည်း လုပ်မိတတ်ပါတယ် … ။

ဒါကြောင့် ကိုယ့်ရင်ထဲမှာ ရှိတဲ့ အတိုင်း ပွင့်ပွင့်လင်းလင်း တည့်တည့်မတ်မတ် ပြောလိုက် … လုပ်လိုက်တာက ပိုကောင်းပါတယ် … တကယ်လို့မှ အဲဒီလို မပြောချင် … မလုပ်ချင်ရင်လည်း ဒီအတိုင်းလေး တိတ်တိတ်နေလိုက် တာက ပိုကောင်းပါတယ် … ။

ဒါကြောင့် စာဖတ်သူများ ဘာပဲလုပ်လုပ် ကိုယ့်လိပ်ပြာ ကိုယ်သန့်အောင် ပြောဆို လုပ်ကိုင် ဆောင်ရွက် နိုင်ကြပါစေ ....

မေတ္တာဖြင့်
အောင်ကိုဦး(UMK)
Be The Best !