ပြည်သူ့လွှတ်တော်သည် အာဏာရူးသူခိုးဓားပြကြီးများကို ကာကွယ်အားပေးထောက်ခံတော့မည်လော။ (ပေါက်ကွဲမှုဆောင်းပါး)

Ko Nyo

 

ပြည်သူ့လွှတ်တော်သည် အာဏာရူးသူခိုးဓားပြကြီးများကို ကာကွယ်အားပေးထောက်ခံတော့မည်လော။ (ပေါက်ကွဲမှုဆောင်းပါး)

လွှတ်တော်အသံ၊ ပြည်သူ့အသံဆိုတဲ့ ဆောင်ပုဒ်ကို လွှတ်တော်အသံ၊ ပြည်သူမခံ။ လွှတ်တော်ပါးစပ် ပြည်သူ့ချဉ်ဖတ် လို့ နာမည်ပြောင်းဖို့သင့်ပြီ။
အမေရိကန်အစိုးရက ဦးအောင်သောင်းကို နာမည်ပျက်စာရင်းထဲထည့်လိုက်တာကို ပြည်သူ့လွှတ်တော်က တညီတညွတ်တည်း ကန့်ကွက်ရှုံ့ချတဲ့သတင်း ဆဲဗင်းဒေးကဖော်ပြတော့ စာဖတ်သူတွေအားလုံး တအံ့တသြဖြစ်ကုန်တယ်။ နာရီပိုင်းအတွင်း ဆဲဗင်းဒေးသတင်းအွန်လိုင်းကွန်မင့်တွေမှာ လွှတ်တော်ဆုံးဖြတ်ချက်အပေါ် ကဲ့ရဲ့ရှုံချ ဝေဖန်မှုတွေ အမြောက်အများပေါ်ထွက်လာတယ်။ အဲဒါ ပြည်သူ့အသံ အမှန်အကန်ပါ။

တကယ်ဆို ဦးအောင်သောင်း ဘယ်လိုသဘောထားရှိပြီး ဘာစီးပွားရေးတွေလက်ဝါးကြီးအုပ်ထားတယ်၊ ဒီမိုကရေစီလိုလားသူတွေနဲ့ ပြည်သူလူထုခေါင်းဆောင် ဒေါ်အောင်ဆန်းစုကြည်အပေါ်မှာရော၊ ပြည်သူတွေအပေါ်ရော၊ နိုင်ငံအပေါ်ရော ကောင်းကျိုးပေးခဲ့လား၊ ဆိုးကျိုးတွေဖန်တီးခဲ့လား..သုံးသပ်ဖို့လိုတယ်။

သတင်းထဲမှာ (အဆိုကို တနိုင်းမဲဆန္ဒနယ်မှ လွှတ်တော်ကိုယ်စားလှယ်ဦးမျိုးဆွေက ထောက်ခံဆွေးနွေးခဲ့ပြီး အမျိုးသားဒီမိုကရေစီအဖွဲ့ချုပ်ပါတီမှ ကိုယ်စားလှယ်များ အပါအဝင် ပြည်သူ့လွှတ်တော်ကိုယ်စားလှယ်များအားလုံးက ကန့်ကွက်သူမရှိ အတည်ပြုခဲ့ခြင်းဖြစ်သည်) လို့ ဖော်ပြထားပြန်တော့ အန်န်အယ်လ်ဒီပါ အမေရိကန်ဆုံးဖြတ်ချက်ကို မကြေမနပ်ကန့်ကွက်ရာရောက်နေတယ်။
တချိန်က တိုင်းပြည်ကို ဒုက္ခပေးနေတဲ့ အာဏာရှင်စနစ်အပေါ် အမေရိကားရဲ့ အရေးယူပိတ်ဆို့မှုကို ရေငုံနှုတ်ပိတ်ခဲ့တဲ့ လူထုဦးဆောင်ပါတီကြီးက ဒီအချိန်ကျမှ အမေရိကန်ရဲ့ ထိရောက်တဲ့ အရေးယူမှုကိုနာမည်ပျက်သူခိုးပါတီကြီးတွေရောနှောပြီး ကန့်ကွက်လိုက်တာဟာ အမေရိကန်ဆုံးဖြတ်ချက်ကို မလိုလားတဲ့သဘော၊ ဆန့်ကျင်တဲ့သဘောရောက်နေတယ်။
အမေရိကန်က ဦးအောင်သောင်းကို နာမည်ပျက်စာရင်းထဲ ဘာကြောင့်ထည့်တာလဲဆိုတာ ပြန်လေ့လာကြည့်ဖို့ကောင်းတယ်။ အမှန်တော့ မြန်မာ့ဒီမိုကရေစီခရီးလမ်းက ခလုတ်ကန်သင်း၊ အမှိုက်သရိုက်လိုဖြစ်နေတာမို့ ပညာပြ သင်ခန်းစာပေးတာဖြစ်တယ်။

ဦးအောင်သောင်းကို(BLACK LIST) နာမည်ပျက်စာရင်းထည့်လိုက်တာဟာ အဓိပ္ပါယ်အများကြီးရှိတယ်။ ဒီမိုကရေစီစိတ်ဓာတ်နဲ့ မလျှော်မကန်တဲ့ အကျင့်စရိုက်၊ ပြစ်မှုကျူးလွန်ချက်တွေ၊ မင်းမဲ့စရိုက် အာဏာရှင် အလေ့အထ၊လုပ်ထုံးလုပ်နည်းတွေကို ပြန်ဆင်ခြင်သုံးသပ်ဖို့သတိပေးနေတာဖြစ်တယ်။ ဒါ့အပြင်ဦးအောင်သောင်းလို တိုင်းပြည်ဘဏ္ဍာအလွဲသုံးစားနေတဲ့ အလီဘာဘာဝန်ကြီးတွေ၊ လွှတ်တော်အမတ်တွေ၊ ခေတ်ပျက်သူဌေးခရိုနီတွေကိုပါ သတိပေးလိုက်တာဖြစ်တယ်။ ဦးအောင်သောင်းကို အကြောင်းပြုပြီး ကျန်တဲ့ မတော်မတရားကြီးပွားနေသူတွေ၊ ငွေမည်းတွေကို ငွေဖြူဖြစ်အောင် အားထုတ်လုံးပမ်းနေသူတွေကိုလည်း အကြောက်တရားတွေ လွှမ်းစေခဲ့တယ်။ ဒီတခါငါတို့အလှည့်များလားဆိုပြီး ဥစ္စာခြောက်ပြီး ကြံရာမရ ဖြစ်နေတယ်။

ဦးအောင်သောင်းနာမည်ပျက်စာရင်းဝင်သွားတော့ သူ့တပည့်အပေါင်းအပါတွေနဲ့ အကျိုးစီးပွားတူတွေကပါ သူတို့ရဲ့ လက်ကိုင်တုတ် စွမ်းအားရှင်တွေ၊ မဘသအဖွဲ့တွေ၊ စစ်ထွက် ရာဇ၀တ်ကောင်တွေ၊ ဥပဒေအပြင်ဘက်က လူမိုက်တွေကို ဆွဲစေ့ပြီး အမေရိကန်သမတ အိုဘာမားရဲ့ မြန်မာပြည်ခရီးစဉ်ကိုတောင် ကန့်ကွက်ဆန္ဒပြဘို့ ကြံစည်နေတဲ့သတင်းတောင်ကြားရသေး..။ အဲဒါ တိုင်းပြည်မှာ မတရားလူစုပြီး သူပုန်ထဖို့ကြံစည်တာ။ သူခိုးအားပေးစရိုက်တွေပြသတာဖြစ်တယ်။

အခုတခါ နာမည်ပျက် သူခိုးအကြီးစားကို နေပြည်တော် လွှတ်တော်ကြီးက တခဲနက် ထောက်ခံပြီး အမေရိကန်ရဲ့ ဆုံးဖြတ်ချက်ကို ကန့်ကွက်လိုက်တာဟာ တိုင်းပြည်နဲ့ ပြည်သူအတွက် အမှန်တကယ် အကျိုးရှိရဲ့လားလို့ မေးခွန်းထုတ်စရာဖြစ်တယ်။ စင်စစ် မြင်းကိုဂျိုတပ်၊ ကျားကိုတောင်ပံတပ်၊ သူခိုးကို ဓားရိုးကန်းမှုသက်သက်ဖြစ်တယ်။ တနည်းပြောရရင် သူခိုးအချင်းချင်းထပ်ပြီးခိုးဖို့ ညှိတဲ့သဘော၊ အကျိုးစီးပွားတူချင်း အကာအကွယ်ပေးတဲ့သဘောသာဖြစ်တယ်။ ငါတို့ပြည်တွင်းရေး၊ သူခိုးအရေး မင်းတို့ထပ်ပြီး ၀င်မရှုပ်နဲ့လို့ မီးနီပြတားလိုက်တာပါ။

အမေရိကန်က ဦးအောင်သောင်းပြီးရင် နောက်ထပ် နာမည်ပျက်စာရင်းထုတ်ပြန်မယ့်၊ နိုင်ငံရေး အမှောင့်ပရောဂသမားတွေ၊ သူခိုးအကြီးစားတွေရှိနေပါသေးတယ်။ နိုင်ငံရေးညစ်ပေါက်ကပ်ကျယ်တွေ၊ သူခိုးကျင့်သူခိုးကြံ တွေကို နာမည်ပျက်စာရင်းထည့်တာမကြေနပ်ရင်လည်း သူခိုးဓာပြ လူဆိုးလူမိုက်တွေ အုပ်ချုပ်တဲ့ တိုင်းပြည်ကြီးအဖြစ် ကမ္ဘာ့အလည် သိမ်ငယ် မျက်နှာပမ်းမလှစွာ ဆက်နေဘို့ပဲ ကျန်တော့တယ်။
ပြည်သူ့လွှတ်တော် ကြီးလဲ အမည်ခံသာရှိနေပြီး အာဏာရူးတွေနဲ့ သူခိုးဓားပြအချင်းချင်း သေဖော်ညှိတဲ့ လွှတ်တော်ကြီးအနေနဲ့သာ ထင်ရှားကျော်စောနေလိမ့်မယ်။

ပြည်သူ့ အကျိုးဆောင်ပေးမယ့် အန်လယ်လ်ဒီပါတီကိုတော့ ငြုပ်သီးနဲ့ပေါင်းလို့ အထောင်းခံနေရသလို လွှတ်တော်က အာဏာရူးသူခိုးဓားပြတွေကို မလွန်ဆန်နိုင် ပေါင်းဖက်မိလို့ ကြံရာပါ လူမိုက်ဖြစ်သွားမှာကို အများပြည်သူက စိုးရိမ်နေတဲ့အကြောင်း အားနာနာနဲ့ သတိပေးချင်ပါတယ်။

ကိုညို( အော်စလို)

ဓာတ်ပုံ- စိုးကျော်လွင်