အိုဘားမားရဲ့မိန့်ခွန်း ဘယ်သူရေးပေးတာလဲ ?

Han Min Sein

 

အိုဘားမားမိန့်ခွန်းတွေဖတ်ကြည့်ရင်း စိတ်ဝင်စားလာတာနဲ့ နောက်ကွယ်က မိန့်ခွန်းရေးသူအကြောင်း အွန်လိုင်းမှာ ရှာဖတ်ကြည့်ပါတယ်။ ၃၃နှစ်ပဲရှိသေးတာကြောင့် ပိုအံ့သြသွားပြီး အားလုံးဖတ်နိုင်အောင်လို့ အကြမ်းဖျဉ်း ကောက်နုတ်ရေးသားထားပါတယ်။

အိုဘားမားရဲ့မိန့်ခွန်း ဘယ်သူရေးပေးတာလဲ ?
=================================

Jon Favreau ဟာအမေရိကန်သမ္မတ ဘာရတ်အိုဘားမားရဲ့ မိန့်ခွန်းတွေရေးသားပေးနေတဲ့သူဖြစ်ပါတယ်။ အသက် ၃၃ နှစ်ပဲ ရှိသေးတဲ့ Winchester မြို့ဖွား Jon Favreau ဟာ ၂၀၀၅ ခုနှစ်ကတည်းက အိုဘားမားရဲ့ မိန့်ခွန်းရေးသားသူအဖြစ်တာဝန်ယူခဲ့သူဖြစ်ပြီး အမေရိကန်သမ္မတသမိုင်းတလျှောက် ဒုတိယအသက်အငယ်ဆုံး မိန့်ခွန်းရေးသားသူလည်းဖြစ်ပါတယ်။ Holy Cross College ကနေ Political science and sociology မေဂျာနဲ့ ၂၀၀၃ ခုနှစ်မှာ ဘွဲ့ရခဲ့ပြီး ဘွဲ့ရပြီးတာနဲ့ ၂၀၀၄ ခုနှစ်အမေရိကန်သမ္မတရွေးကောက်ပွဲဝင် ဒီမိုကရက်တစ်သမ္မတလောင်း ဂျွန်ကယ်ရီ (လက်ရှိ ကန်နိုင်ငံခြားရေးဝန်ကြီး)အတွက် မဲဆွယ်စည်းရုံးရေးလုပ်ငန်းစဉ်တွေမှာ စတင်ပါဝင်ခဲ့ပါတယ်။

ဂျွန်ကယ်ရီအတွက် မဲဆွယ်စည်းရုံးရေးလုပ်နေစဉ်ကာလအတွင်းမှာ မိန့်ခွန်းရေးသားပေးသူမရှိတာကိုလည်း ပါတီက တွေ့ရှိခဲ့တဲ့အတွက် Jon Favreau ကို ချက်ချင်းပဲ Deputy Speechwriter အဖြစ်ခန့်အပ်ခဲ့ပါတယ်။

Jon Favreau အနေနဲ့ အိုဘားမားကို စတင်တွေ့ရှိချိန်က အိုဘားမားဟာ အီလီနွိုက်ပြည်နယ်အတွက် ဆီနိတ်တာအမတ်အဖြစ်ဝင်ရောက်အရွေးခံစဉ်ကာလကဖြစ်ပါတယ်။ ၂၀၀၅ ခုနှစ်မှာတော့ ဂျွန်ကယ်ရီရဲ့ campaign တွေမှာ ဦးဆောင်လုပ်ရှားသူဖြစ်တဲ့ ရောဘတ်ဂစ်ဟာ Jon Favreau ကို အိုဘားမားရဲ့ excellent writer အဖြစ်ခန့်အပ်ဖို့ အကြံပြုခဲ့ပါတယ်။ ဒါနဲ့ပဲ ၂၀၀၇ ခုနှစ်မှာတော့ Jon Favreau ဟာ ၂၀၀၈ အမေရိကန်သမ္မတရွေးကောက်ပွဲဝင် ဒီမိုကရက်တစ်သမ္မတလောင်း အိုဘားမားရဲ့ Chief Speechwriter ဖြစ်လာပါတယ်။

၂၀၀၉ ခုနှစ် အမေရိကန်သမ္မတအိုဘားမားဟာ အိမ်ဖြူတော်မှာ စတင်တာဝန်ထမ်းဆောင်စဉ်မှာ Jon Favreau ကို သမ္မတလက်ထောက်အပြင် Director of Speechwriting အဖြစ်လည်း ခန့်အပ်ခဲ့ပါတယ်။ ၂၀၀၉ ခုနှစ်မှာပဲ Jon Favreau ဟာ Time Magazine ရဲ့ ကမ္ဘာ့အရှိန်အဝါအကြီးဆုံးပုဂ္ဂိုလ် ၁၀၀ ထဲမှ Scientists & Thinkers ကဏ္ဍမှာ ရွေးချယ်ခံရသူလည်းဖြစ်ပါတယ်။

Ref : Wikipedia, TheBostonGobe