အသည်းကွဲ ဒဿန

Nine Nine Sanay @ နိုင်းနိုင်းစနေ

 

အသည်းကွဲ ဒဿန
----------------
ဂရိဒဿနိကဗေဒပညာရှင် ဆိုကရေးတီးသည် မစားမသောက်ဘဲ မှိုင်တွေငေးမောနေသော လူငယ်တစ်ဦးကိုမြင်သော် အဘယ်ကြောင့် ဤသို့ ခံစားနေရသနည်းဟု မေးလေ၏။
.
လူငယ်.....
ကျွန်တော် အသည်းကွဲနေပါတယ်။
.
ဆိုကရေးတီး....
အော်...ဒါကဖြစ်တတ်ပါတယ်။ အသည်းကွဲလို့ နာကျင်တာမခံစားရဘူးဆိုရင် ချစ်ခဲ့တာ အရသာမရှိသလိုဘဲ။ ဒါပေမယ့်....လူလေးက ဘာဖြစ်လို့ ဒီအသည်းကွဲတဲ့ဝေဒနာကို ချစ်တာထက် ပိုနစ်ပြီးခံစားနေရသလဲ...
.
လူငယ်....
လက်ထဲရောက်လာတဲ့ စပျစ်သီးကိုပစ်လိုက်ရတယ်။ ဒီလိုခံစားရတဲ့ ဆုံးရှုံးမှုဝေဒနာကို လူငယ်မဟုတ်တဲ့ ခင်ဗျားက ဘယ်နားလည်နိုင်မလဲ...
.
ဆိုကရေးတီး.....
ပစ်လိုက်ရပြီဆိုလည်း ပစ်လိုက်ရပြီပေါ့။ ဘာဖြစ်လို့ ရှေ့ဆက်မလျောက်တာလဲ၊ ဒီထက်ပိုချိုတဲ့ စပျစ်သီးတွေအများကြီးပါ။
.
လူငယ်......
ကျွန်တော် စောင့်မျှော်နေတာ။ သူလည်ပြန်လှည့်လာမဲ့နေ့ကို ကျွန်တော် စောင့်နေတာပါ။
.
ဆိုကရေးတီး.....
တကယ်လို့ ဒီလိုနေ့မျိုး လုံးဝရောက်မလာခဲ့ဘူးဆိုရင် တခြားတစ်ယောက်လက်ထဲ သူပါသွားတာကိုပဲ လူလေးကြည့်နေရလိမ့်မယ်။
.
လူငယ်......
ကျွန်တော့်ကိုယ်ကျွန်တော် အဆုံးစီရင်ပြီး သူ့ကိုချစ်တဲ့အကြောင်း သက်သေပြမှာပေါ့။
.
ဆိုကရေးတီး.....
ဒီလိုသာ သက်သေပြမယ်ဆိုရင် ကိုယ့်ချစ်တဲ့သူကိုလည်း ဆုံးရှုံးမယ်။ ကိုယ့်ကိုယ်ကိုယ်လည်း ဆုံးရှုံးမယ်။ နှစ်ဦးနှစ်ဖက်ရဲ့ ဆုံးရှုံးခြင်းကို လူလေးခံစားရလိမ့်မယ်။
.
လူငယ်....
ဒါဆို သူ့ဘဝပျက်အောင်လုပ်မယ်။ ကျွန်တော်မရတာကို သူတစ်ပါးလည်း မရစေချင်ဘူး။
.
ဆိုကရေးတီး......
ဒီလိုလုပ်ရပ်က သူနဲ့ ပိုဝေးစေမယ်။ လူလေးက သူနဲ့နီးချင်တာ မဟုတ်လား။
.
လူငယ်....
ဒါဆို ကျွန်တော် ဘာလုပ်ရမလဲ။ ကျွန်တော် သူ့ကိုအရမ်းချစ်တယ်။
.
ဆိုကရေးတီး......တကယ် အရမ်းချစ်လား....
.
လူငယ်....တကယ်။
.
ဆိုကရေးတီး....ကိုယ့်ချစ်တဲ့သူကို ပျော်ရွှင်စေချင်တယ် မဟုတ်လား....
.
လူငယ်..... ဒါပေါ့...ကိုယ့်ချစ်တဲ့သူကို ပျော်ရွှင်စေချင်တာပေါ့။
.
ဆိုကရေးတီး...........
တကယ်လို့...လူလေးကိုခွဲသွားတာက သူ့အတွက် ပျော်ရွှင်ခြင်းလို့ သူထင်ခဲ့ရင်ကော...
.
လူငယ်.....
မဖြစ်နိုင်တာ...ကျွန်တော်နဲ့နေမှ သူပျော်ရွှင်တယ်လို့ အရင်က သူပြောခဲ့ဖူးတယ်။
.
ဆိုကရေးတီး......
အဲတာက အရင်က...ပြီးခဲ့ပြီလေ။ ခုတော့ သူက ဒီလိုမထင်တော့ဘူးလေ။
.
လူငယ်....သဘောက ကျွန်တော့်ကိုသူလိမ်ခဲ့တာပေါ့။
.
ဆိုကရေးတီး.....
ဒီသဘော မဟုတ်ဘူး။ လူလေးအပေါ် သူသစ္စာရှိခဲ့တယ်။ ချစ်တုန်းက လူလေးနဲ့အတူ ချစ်နေခဲ့တယ်။ အခုမချစ်တော့ ခွဲသွားတယ်။ ဒီလောကမှာ ဒီထက်မြတ်တဲ့ သစ္စာမရှိတော့ဘူး။ မချစ်တော့ဘဲနဲ့ ချစ်ချင်ဟန်ဆောင်ပြီး လူလေးနဲ့ သူအတူရှိနေမယ်၊ မင်္ဂလာဆောင်မယ်၊ သားသမီးတွေ မွေးမယ် ဒါကမှ တကယ့်လိမ်ညာတယ်လို့ခေါ်တယ်။
.
လူငယ်....
သူ့ကို နစ်နစ်ကာကာချစ်ခဲ့တဲ့ ကျွန်တော့်ရဲ့အချစ်တွေ အလဟဿ ဖြစ်ကုန်ပြီပေါ့။ ဘယ်သူ အလျော်ပေးနိုင်မလဲ...
.
ဆိုကရေးတီး......
မဟုတ်ဘူး...လူလေးရဲ့အချစ်တွေ အလဟဿ မဖြစ်ခဲ့ပါဘူး။ အလျော်ဆိုတာ အချစ်မှာမရှိဘူး။ ဘာဖြစ်လို့လဲဆိုတော့ လူလေးရဲ့ အချစ်တွေ သူ့ကိုပေးဆပ်နေတဲ့အချိန်မှာ သူကလည်း သူ့အချစ်ကို လူလေးအတွက် ပေးဆပ်နေတယ်။ သူ့ကို ပျော်ရွှင်စေခဲ့သလို လူလေးကိုလည်း သူက ပျော်ရွှင်စေခဲ့တယ်။
.
လူငယ်.......
ဒါပေမယ့်...အခု ကျွန်တော့်ကို သူကမချစ်တော့ဘူး။ ကျွန်တော်က သူ့ကို ချစ်နေသေးတယ်။ ဒါဟာ မတရားဘူး။
.
ဆိုကရေးတီး......
ဟုတ်တယ် မတရားဘူး။ ဆိုလိုချင်တာက လူလေးချစ်တဲ့ သူ့အတွက် မတရားဘူး။ သူ့ကိုချစ်တာဟာ လူလေးရဲ့ အခွင့်အရေး ဒါပေမယ့် သူပြန်ချစ်တာ မချစ်တာက သူ့အခွင့်အရေး၊ ကိုယ့်အခွင့်အရေးကိုပဲ မျှော်ကိုးပြီး သူတစ်ပါးရဲ့ လွတ်လပ်တဲ့အခွင့်အရေးကို ကိုယ်က တားဆီးပိတ်ပင်မယ်။ ဒါမှ မတရားတာ ...ဘယ်လောက် ကိုယ်ချင်းစာစိတ် မရှိလိုက်သလဲ...
.
လူငယ်......
ခင်ဗျားပြောပုံနည်းအရဆိုရင် နောက်ဆုံးတော့ အရာအားလုံးဟာ ကျွန်တော့်အမှားတွေပေါ့။
.
ဆိုကရေးတီး......
ဟုတ်တယ်...စတာနဲ့ လူလေးမှားခဲ့ပြီ။ တကယ်လို့ ကိုယ်ကသူ့ကို ပျော်ရွှင်ခြင်းတွေပေးနိုင်ခဲ့ရင် ကိုယ့်ကို သူခွဲသွားမှာမဟုတ်ဘူး။ ပျော်ရွှင်ခြင်းနဲ့ ကင်းကွာချင်တဲ့လူ မရှိဘူး...ဒါကိုတော့ မှတ်ထားပါ။
.
လူငယ်.......
ပျော်ရွှင်ခြင်းဆိုတာ ဘာလဲ....
ကျွန်တော့်အသည်းနှလုံး အချစ်တွေအားလုံးပုံပေးလိုက်တာတောင် သူက မလုံလောက်လို့လား၊ သူဘာကြောင့် ကျွန်တော့်ကို ခွဲသွားရသလဲ....၊ ဒါဟာ ရက်စက်တယ်လို့ မထင်ဘူးလား...၊
.
ဆိုကရေးတီး.........
ရက်စက်တယ်။ ဒီလို ရက်စက်တဲ့လူတစ်ယောက်ရဲ့ စက်ကွင်းကလွတ်သွားတာကိုပဲ ပျော်ရွှင်ရမယ်မဟုတ်လား.. လူလေး
.
လူငယ်.....
ပျော်ရမယ်...ဟုတ်လား.. မဖြစ်နိုင်တာ.....ဘာပဲပြောပြော ကျွန်တော်ဟာ အစွန့်ပစ်ခံရသူ၊ ကိုယ့်ကိုယ်ကိုယ်ညံ့တယ်လို့ ခံစားမိတယ်ဗျာ။
.
ဆိုကရေးတီး.........
မဖြစ်နိုင်တာ...လူငယ်တွေရဲ့စိတ်မှာ ကြီးမြတ်တာပဲရှိသင့်တယ်။ ညံ့တယ်ဆိုတာ မရှိသင့်ဘူး။ မှတ်ထားရမှာက စွန့်ပစ်ခံရတိုင်း မကောင်းလို့ မဟုတ်ဘူး။
.
လူငယ်....ဒါ ဘာအဓိပ္ပာယ်လဲ....
.
ဆိုကရေးတီး.....
တစ်ခါက ဆိုင်တစ်ဆိုင်မှာ တန်ဖိုးကြီးတဲ့ဝတ်စုံတစ်စုံကို ကျွန်တော်တွေ့ခဲ့တယ်။ လိုချင်တာလည်း အရမ်းပဲ။ ရောင်းတဲ့လူက ကျွန်တော့်ကို ယူမလား မယူဘူးလားတဲ့။ ကျွန်တော် ဘာပြန်ပြောလိုက်သလဲ သိလား.. အဝတ်စက ညံ့လွန်းတယ် မယူဘူးလို့။ တကယ်တော့ ကျွန်တော့် အိတ်ကပ်ထဲမှာ ပိုက်ဆံမရှိလို့။ လူလေးက အဲဒီ အစွန့်ခံဝတ်စုံလိုပါပဲ။
.
လူငယ်........
ခင်ဗျား တော်တော်နှစ်သိမ့်တတ်တာပဲ။ ဒါပေမယ့် နှမြောဖို့ကောင်းတာက ဒီအသည်းကွဲတဲ့ဝေဒနာထဲကနေ ကျွန်တော်ကို ခင်ဗျား ဆွဲမထုတ်နိုင်ခဲ့ဘူး။
.
ဆိုကရေးတီး......
ဟုတ်ပါတယ်။ ဆွဲထုတ်နိုင်တဲ့အစွမ်းမရှိခဲ့လို့ ကျွန်တော်ဝမ်းနည်းပါတယ်။ ဒါပေမယ့် အစွမ်းရှိတဲ့လူတစ်ဦးနဲ့ မိတ်ဆက်ပေးပါရစေ။
.
လူငယ်.... အဲဒီအစွမ်းရှိတဲ့လူက ဘယ်သူလဲ....
.
ဆိုကရေးတီး......
အချိန်တဲ့။ အချိန်ဆိုတာ လူတွေရဲ့အကြီးမားဆုံးသော လမ်းညွှန်ဆရာပဲ။ အသည်းကွဲဝေဒနာကို အလူးအလှိမ့် ခံစားနေရတဲ့ လူတွေကို ကျွန်တော်မြင်ဖူးတယ်။ အချိန်က သူတို့ခံစားရတာတွေကို ကုစားပေးလိုက်တယ်။ နောက်ပြီး လူတွေကို အသစ်တစ်ဖန် ရွေးချယ်စေခဲ့တယ်။ လူတွေက ကိုယ်နဲ့ထိုက်တန်တဲ့ ရွေးချယ်မှုတွေမှာ ပျော်ရွှင်ခြင်းတွေကို ခံစားခဲ့ရတယ်။
.
လူငယ်.....
ဒီလိုဖြစ်လာမယ့်နေ့ကို ကျွန်တော် မျှော်လင့်ပါတယ်။ ကျွန်တော်ဘယ်ကနေ ခြေလမ်းစလှမ်းရမလဲ...
.
ဆိုကရေးတီး.....
ကိုယ့်ကို စွန့်ပစ်ခဲ့တဲ့လူကို အရင်ဆုံးကျေးဇူးတင်ပါ။ တောင်းဆုပြုပါ။
.
လူငယ်....ဘာဖြစ်လို့လဲ....
.
ဆိုကရေးတီး......
သူက ကိုယ့်ကို သစ္စာတွေပေးခဲ့လို့ပဲ။ ကိုယ့်ကို အသစ်တစ်ဖန် ရွေးချယ်နိုင်တဲ့ အခွင့်အရေးကို သူကပေးခဲ့လို့ပါပဲ။

--------------

If you love someone, let it be and set him/her free, if he/she comes back to you, it's meant to be.
.
တရုတ်သတင်းစာ တစ်စောင်မှာ ဖတ်မိတာလေးကို ဘာသာပြန်ထားပါတယ်။

#NineNineSaNay နိုင်းနိုင်းစနေ (Sunday, April 01, 2007)