ညဘက် မမြင်ရသည့်အကြောင်းရင်း

Good Health Journal

ညဘက် မမြင်ရသည့်အကြောင်းရင်း
------------------------------------------------------------------------
ညဘက် ဒါမှမဟုတ် အလင်းရောင်နည်းတဲ့အချိန်မှာ ကောင်းကောင်း မမြင်ရတာက ရောဂါမဟုတ်ပါဘူး။ မိမိမှာရှိတဲ့ရောဂါတစ်ခုရဲ့ လက္ခဏာတစ်ခုသာဖြစ်ပြီး များသောအားဖြင့် ကုသလို့ ပျောက်ကင်းနိုင်တဲ့ အခြေအနေပါ။ ညဘက် မမြင်ရတဲ့ အကြောင်းရင်း ငါးခုရှိပါတယ်။

#အဝေးမှုန်ခြင်း

အဝေးမှုန်တဲ့သူတွေက ပါဝါမမှန်တော့ရင် ညမှောင်တဲ့အခါမှာ အဝေးကအရာတွေကို မမြင်နိုင်ပါဘူး။ ပါဝါပြန်စမ်းပြီး မျက်မှန်အသစ်တပ်ဖို့ လိုအပ်ပါတယ်။

#အချို့ဆေးဝါးများ

တချို့ဆေးဝါးတွေကြောင့် ညဘက်မှာ ရေတိုပြဿနာအနေနဲ့ အမြင်ထိခိုက်နိုင်ပါတယ်။ အထူးသဖြင့် သူငယ်အိမ်ရဲ့ အရွယ်အစားကို ပြောင်းလဲစေတဲ့ ဆေးဝါးမျိုးတွေ၊ တောက်ပတဲ့ အလင်းရောင်ကနေ မှိန်တဲ့အလင်းရောင်ကို မျက်စိက
ချက်ချင်း ကျင့်သားရနိုင်စွမ်းကို နှေးကွေးစေတဲ့ ဆေးဝါးမျိုးတွေကြောင့် ညဘက်မမြင်ရတာတွေ ဖြစ်တတ်ပါတယ်။ ဆရာဝန်ကို ပြောပြပြီး ဆေးပြောင်းလဲသုံးစွဲသင့်ပါတယ်။

#အတွင်းတိမ်

မျက်စိမှန်ဘီလူးမှာ တိမ်စွဲနေတဲ့ အတွင်းတိမ်ရောဂါရှိသူတွေမှာလည်း ညဘက်မှာ မြင်နိုင်စွမ်းခက်ခဲပါတယ်။ အတွင်းတိမ်ကို ခွဲစိတ်ဖယ်ရှားတဲ့နည်းလမ်းကို အသုံးပြုနိုင်ပါတယ်။

#အာဟာရချို့တဲ့ခြင်း

ဗီတာမင် အေ လိုမျိုး အာဟာရဓာတ်တွေ ချို့တဲ့သူတွေအနေနဲ့လည်း ညအမှောင်မှာ အမြင်အာရုံချို့တဲ့နိုင်ပါတယ်။ ဗီတာမင်အားဆေး မှီဝဲတာ ဒါမှမဟုတ် ဗီတာမင် ပေါကြွယ်ဝတဲ့ အစာစားပေးတာမျိုး ပြုလုပ်နိုင်ပါတယ်။

#မြင်လွှာအတွင်း_ရောင်ခြယ်ပစ္စည်းရှိခြင်း (Retinits Pigmentosa)

မျိုးရိုးလိုက်တဲ့ရောဂါဖြစ်ပြီး ညဘက်မှာ လုံးဝမမြင်ရပါဘူး။ ကလေးငယ်မှာ ဖြစ်နိုင်သလို လူကြီးတွေမှာလည်း ဖြစ်တတ်ပါတယ်။ မျက်စိအတွင်းမှ မြင်လွှာ တဖြည်းဖြည်း ပျက်စီးယိုယွင်းလာတာကြောင့် ဖြစ်တာပါ။ ဘေးပတ်ဝန်းကျင်နေရာကပါ မမြင်ရနိုင်တာတွေ၊ ပုံမှန်အလင်းရောင်ရှိတဲ့အချိန်မှာတောင် မမြင်ရတာတွေ ဖြစ်နိုင်ပါတယ်။

#ဒေါက်တာခင်မိုးမိုး
(Good Health Journal 577)

#Good_Health_Journal_Facebook_Page တွင် ယခုကဲ့သို့ ကျန်းမာရေးနှင့်အလှအပဆောင်းပါးများကို ဖတ်ရှုနိုင်ပါသည်။

https://www.facebook.com/Good-Health-Journal-3907742110236…/