သက်ခိုင်ကို ဖန်ဆင်းခဲ့သူ (သို့မဟုတ်) မင်းဒင်

မြန်မာ့ဒီမိုကရေစီနှင့်နိုင်ငံရေးမှတ်တမ်းများ added 2 new photos.

သက်ခိုင်ကို ဖန်ဆင်းခဲ့သူ (သို့မဟုတ်) မင်းဒင်
——————————————————
ဌေးဝင်း, The Ladies News
BurmaDemocracy, 4 October 2017

(က)
၂၀၁၂ ခုနှစ် မေလ ၁၆ ရက်နေ့ ညဦးပိုင်း။
ထိုင်းနိုင်ငံ ဘန်ကောက်မြို့တော်၏ အမြင့်ဆုံး အဆောက်အအုံကြီး တခုဖြစ်သော ဘိုင်းယောင့် အဆောက် အအုံနားက ဂျူးလဒစ် ဟော်တယ်၏ ၁၄ ထပ်မှာရှိသော သူတည်းခိုရာ အခန်းတွင် ကျွန်တော့် မိတ်ဆွေက ယခုလိုပြောသည်။
“ဗိုလ်ဌေး။ ကျွန်တော်လည်း မထင်မှတ်ဘဲနဲ့ အလုပ်ကြီးတစ်ခုကို လုပ်မိလျက်သား ဖြစ်နေပြီဗျာ”
ဟု ကျွန်တော့် မိတ်ဆွေက ဆိုသည်။
အခုအချိန်မှာ သူဟာ အရင်ကလို ဖူးကက်မြို့က မြန်မာပစ္စည်း ရောင်း သည့် ကုန်သည် သက်သက် မဟုတ်တော့။ အွန်လိုင်း ပေါ်မှာရော ပုံနှိပ်စာပေ လောကမှာပါ အုတ်အော်သောင်းတင်း အောင်မြင်သည့် စာရေးဆရာ တယောက် ဖြစ်နေချေပြီ။

“မထင်မှတ်ဘဲ လုပ်မိတယ်ရယ်တော့ ဘယ်ဟုတ်ပါ့မလဲ ဆရာဒင်။ ခင်ဗျားစာအုပ်က ခေတ်တစ်ခေတ်ကို ပြတင်းပေါက်က လှမ်းကြည့်လို့ မြင်ရသလိုမျိုး မြင်အောင်ရေးထားတာ မဟုတ်လား။ ပြီးတော့ ဇာတ်ကောင်တွေ ကလည်း သက်ရှိ ဇာတ် ကောင်တွေ ပါနေတယ်လေ။ ကာလဒေသ အခြေအနေကလည်း ဒီနေ့ လူလတ်ပိုင်းတွေ အဲဒီအချိန်မှာ ခင်ဗျား ဇာတ်ကောင် သက်ခိုင် ကျင်လည်ခဲ့တဲ့ အခင်းအကျင်းမျိုးမှာ တနည်း မဟုတ်တနည်း ပတ်သက်နေခဲ့တော့ သူနဲ့တူသလိုလို ကိုယ်နဲ့ပဲ ဆင်သလိုလို ထင်မိယောင်မှား တွေလည်း ခံစားလို့ရတာပေါ့။ ဒါကြောင့် လူကြိုက်များတာပေါ့ဗျာ”
ဟု ကျွန်တော်က သူ့ကို ပြန်ပြောသည်။
သူသည် “မင်းဒင်ရဲ့ သက်ခိုင်” အမည်ရှိ ဇာတ်လမ်းတွဲ ၀တ္တုရှည်ကြီး တပုဒ်ကို ရေးသား ထုတ်ဝေခဲ့သူ နာမည်ကျော် စာရေးဆရာ မင်းဒင် ဖြစ်၏။ သူနှင့်ကျွန်တော်ကား “သက်ခိုင်” ကို မရေးသားမီ အချိန်ကပင် မိတ်ဆွေ ဖြစ်ခဲ့ကြသည်။ ထို့ကြောင့် သူက မထင်မှတ်ဘဲ အလုပ်ကြီးတခုကို လုပ်မိလျက်သား ဖြစ်နေပြီဗျာဟု ဆိုခြင်းဖြစ်သည်။
(ခ)
၂၀၀၈ ခုနှစ်၊ နှစ်ဦးပိုင်း
ထိုစဉ်က ကျွန်တော်သည် ဘန်ကောက်မြို့ ဘန်ဘော်အရပ်ရှိ ဧကချိုင်လမ်းမကြီးရဲ့ လမ်းသွယ် ၈၃ တွင်နေထိုင်ရင်း ရခိုင်အမျိုးသား သတင်းစာကို ထုတ်ဝေလျက်ရှိသည်။ တနေ့တွင် ကိုမင်းဒင်က ကျွန်တော့်ကို
“ဗိုလ်ဌေး ကျွန်တော် စာရေးဖို့ ကြိုးစားနေတယ်။ ၀တ္ထုရေးဖို့ ပေါ့။ အရင်က နည်းနည်းပါးပါး ရေးဖူးတယ်။ ကျွန်တော့် လက်ရာကို ခင်ဗျား နည်းနည်း မြည်းစမ်းကြည့်ပြီး ဝေဖန်ပေးပါဗျာ။ ခင်ဗျားက တက္ကသိုလ်က မြန်မာစာ နည်းပြဆရာ ဟောင်းဆိုတော့”
လို့ ဆိုလာသည်။
သူစပြီး မြည်းခိုင်းသည့်စာက “သက်ခိုင်” စာအုပ် မဟုတ်သေး။ သူ့အရင်ရေးပြီး အခုရက်ပိုင်းအတွင်း ထွက်ရှိလာသည့် “ဖြစ်ပျက် ရှာပုံတော်” ၀တ္ထုရှည်ပါ။ ဇာတ်လိုက်ကျော်ကတော့ သက်ခိုင်ပါပဲ။ သူပေးလာတုန်းက အစအဆုံး ရေးထားသည့် ၀တ္ထစာအုပ် ကြီး မဟုတ်။ “ဖြစ်ပျက်ရှာပုံတော်” ကို စတည်ခါစ ဖြစ်သည်။ ဖြစ်ပျက်ကို မြည်းကြည့် တော့ ကျွန်တော့် မိတ်ဆွေမှာ မှော်ကလောင် တချောင်း ရှိနေပါလား ဆိုတာကို သိလိုက်ရသည်။ ဒါကြောင့်
“ကိုယ့်ဆရာ ခင်ဗျား လက်ရာ မိုက်တယ်။ ခင်ဗျား သေချာပေါက် အောင်မြင်တဲ့ စာရေးဆရာတယောက် ဖြစ်ကိုဖြစ်မယ်”
ဟု အားပေးတာလည်းဟုတ်၊ အနာဂတ်ကို ကြိုဟောသည့် သဘော လည်းပါသော စကားကို စိတ်ထဲက အရှိအတိုင်း ပြောချလိုက်သည်။ သူစာစရေးတုန်းက မိုင်ပေါင်းများစွာ ဝေးကွာသော ဖူးကက်နှင့် ဘန်ကောက် မြို့များမှာ နေထိုင် ကြသည့် ကျွန်တော်တို့ နှစ်ယောက်သည် တခါတခါ အွန်လိုင်းပေါ်မှာ။ တခါတလေလည်း တယ်လီဖုန်းနဲ့ စာပေ အကြောင်း ဆွေးနွေးကြ ငြင်းကြ ခုံခဲ့ကြသည်။
(ဂ)
ရေးပြီးသည့်စာမူများကို သူ့ကိုယ်ပိုင် ဘလော့ဂ်မှာ တင်သည်။ ဖတ်ပြီး ချီးမွှန်းသည့် လူလည်းရှိသလို “ခင်ဗျား စာမရေးတတ်ပါ ဘူးဗျာ။ ရေးမနေပါနဲ့ ဟု ထောပနာ ပြုသူလည်းပြု။ “မင်းသိင်္ခ” လိုလို “ရွှေဥဒေါင်း” လိုလို ဟု ငေ့ါသူကငေါ့။ “ခင်ဗျား ရောင်ကြီးဗွေ ဇာတ်လမ်းကြီး မပြီးသေးဘူးလား” ဆိုပြီး ခနဲ့သူက ခနဲ့။ ဒီကြားထဲ မင်းဒင် ကလောင်က ဈာန်ဝင်ကာ တစ်ခန်းပြီး တစ်ခန်း ဆက်ရေးနေသည်။
ကျွန်တော်ကား လူပုစိတ်တိုဟုသာ ကြားဖူးသည်။ ဒါပေမဲ့ ကျွန်တော့် မိတ်ဆွေကတော့ အရပ်ခြောက်ပေ နီးပါးရှည်ပြီး ကီလို ၈၀ ကျော်ရှိသည့် လူရှည်စိတ်တို အမျိုးအစား ထင်ပါရဲ့။ တခါတခါ ရှူးရှူးရှားရှား လုပ်တတ် သည်။ ထို့ကြောင့် ကျွန်တော်က သူ့ကို အခုလို ဖျောင်းဖျပေးခဲ့ဖူး၏။
“ဟေ့လူ ဒါများ တင်းစရာလားဗျာ။ ဆရာကြီး ရွှေဥဒေါင်းလို ဂန္ထ၀င် ဆင်ကလောင်နဲ့ နှိုင်းပြောခံရတာ။ မင်းသိင်္ခလို တိုင်းကျော် ပြည်ကျော်နဲ့ နှိုင်းပြောခံရတာကဖြင့် ခင်ဗျားအစား ဂုဏ်ယူတယ်ဗျာ။ ပြောတဲ့လူတွေက ရွှေဥဒေါင်းရဲ့ စာမျိုးရေးဖို့ အသာထား၊ စဉ်းစားဖို့တောင် ခေါင်းရှိမယ် မထင်ပါဘူး။ ဒီလိုပဲ မင်းသိင်္ခဆိုတာလည်း မြန်မာပြည် စာပေလောကမှာ အထင်ကရ ဘက်ဆဲလားဗျာ။ ဘယ်အရာမဆို အစမှာတော့ ဒီလိုပဲ မလို တမာတွေ ပြောကြမှာပေါ့။ နောက်တော့ ဒါတွေ အားလုံးဟာ လေထဲမှာ လွင့်ကျန်ရစ်ပြီး မင်းဒင် မင်ဒင် ဖြစ်နေမှာ မြင်ယောင်သေး” ဟု သူ့ကို ပြောဖြစ်ခဲ့ဖူးသည်။
“ဖြစ်ပျက်ရှာပုံတော်”ကို ဖတ်ရှုရသည့် အွန်လိုင်းပရိသတ်တွေက စာတွေ ဆက်ရေးဖို့ ပူဆာကြသည်။ နေ့စဉ် ပို့စ်အသစ်တွေ တင်ဖို့ တွန်း လာကြသည်။ သူလည်း စာပေဈာန် အတော်ဝင်သွားပြီး ဖြစ်သည်။ အစကနဦးကလို မိမိလက်ကို မယုံမရဲ မဟုတ်တော့ဘဲ ကလောင် ၀င့်လာ သည်ကို တွေ့ရသည်။ သူက
“ဗိုလ်ဌေး ခင်ဗျားပြောတာ မှန်တယ်ဗျ။ ခုလောက်ဆို ကျွန်တော့်လက်က စာကောင်းကောင်း ရေးနိုင်ပြီဆိုတာ ယုံသွားပြီ။ ခင်ဗျား နိမိတ်ဖတ်ပေး တာ အားပေးတာ ကျေးဇူးတင်တယ်ဗျို့။ ပြီးတော့ ကျွန်တော် စာစရေး တုန်းက ဝေဖန်ပေး၊ လိုတာကို ပြောပေးဆိုပေးတာလည်း တကယ် ကျေးဇူးတင်တယ်"
ဟုလည်း ဆိုသည်။
ထို့နောက် သူ့ဘ၀အတွေ့အကြုံတွေကို အခြေခံပြီး စာအုပ် တစ်အုပ် ရေးမယ်လို့ ဆုံးဖြတ်လိုက်ပြီဟု ပြောပြီး မကြာခင် မှာ “မင်းဒင်ရဲ့ သက်ခိုင်” ကို သူ့ဘလော့ဂ်တွင် စမြင်ရသည်။
သက်ခိုင် အခန်း ၂၅ လောက်ထိတော့ သူနှင့်ကျွန်တော် အဆက်အသွယ် သိပ်မပြတ်။ အသစ်တင်တိုင်း ကျွန်တော်နှင့် အချီအချ ပြောကြသည်။ အခန်း ၂၅ နောက်ပိုင်းမှာတော့ သူ့မှာ ပရိသတ်တွေ အုံခဲလာသည်။ ကမ္ဘာအရှေ့ခြမ်းက စာဖတ်သူမှသည် ကမ္ဘာအနောက်ခြမ်းထိ။ မြောက်ခြမ်းမှ တောင်ခြမ်းထိ။ အွန်လိုင်းဖြန့်ကြက်ရာ ဒေသအသီးသီးမှ မြန်မာစာဖတ် ပရိသတ် အထောင်အသောင်းနှင့် ပြောနေဆိုနေရတာ များလာသည်။
ကျွန်တော်လည်း ထိုစဉ်က အလုပ်လုပ်နေသော ဧရာဝတီ သတင်း ထောက်ဘ၀မှ ရုတ်တရက် ပြုတ်သွားသဖြင့် စားဝတ်နေ ရေးခက်ခဲကာ သူ့စာကို နောက်ပိုင်းတွင် အရင်လို မဖတ်အားတော့။ အလျဉ်းသင့် သည့်အခါ ကြည့်ဖြစ်ရုံ မျှသာ။ သူ့ကို လည်း ဝေဖန်ထောက်ပြစရာ မလိုတော့ပါ။ ဆင်ကလောင် မြန်မာစာရေးဆရာများ ကမ္ဘာအနှံ့ ကျော်ကြားသော မြန်မာ ပြည်ဖွားများက ဘရာဗို၊ ချီးယားစ်၊ ကွန်ကရက် ကျူးလေးရှင်း လုပ်ခံနေရချိန်မှာ ကိုယ်က ၀မ်းသာအားရ လက်ခုပ် တီးရုံက လွဲပြီး မိတ်ဆွေကြီးကို အကြံပြုစရာ လိုမှမလိုတော့တာ။
(ဃ)
နောက်ပိုင်း ကြားရတာက သူ့စာကို ပရင့်ထုတ်ပြီး မိတ္တူပွားကာ ဖတ် နေကြကြောင်း၊ စင်ကာပူမှာ ဆိုလျှင် မိတ္တူ ပွားထားသည့် စာကို အားရပါးရ ၀ယ်ဖတ်နေကြကြောင်း သိရသည်။
ထို့ပြင် ရန်ကုန်မြို့မှာလည်း ဒိုင်လျှို မိတ္တူကူးကာ အချင်းချင်း ဖြန့်ဝေ နေကြသဖြင့် ခေတ်ပျက် သူဌေးများနှင့် အာဏာပိုင် အသိုင်းအ ၀ိုင်းကြား တွင် “ခင်ဗျား ရုတ်ရုတ် ရုတ်ရုတ် မလုပ်နဲ့။ မင်းဒင်ကို ပြောလိုက်ရမလား” ဟူသော ရွှတ်နောက်နောက် စကားတခွန်း ပေါ်ပေါက်ရသည်ထိ “သက်ခိုင်” စာအုပ်က ပေါက်နေသည်။
ဒီကြားထဲမှာ သူနှင့် ဖုန်းပြောဖြစ်တိုင်း စာအုပ်အဖြစ် ထုတ်ဝေရန် ကျွန်တော်က သူ့ကိုတွန်းသည်။ ဘာကြောင့်လဲ ဆိုတော့ ပြည်ပမှာ ထုတ်ဝေကြသည့် စာပေအများစုက အလှူ့ရှင်ပိုက်ဆံနှင့် ထုတ်ကြသော သုတစာပေများ၊ အစီရင်ခံစာများ၊ မှတ်တမ်းများသာ များသည်။ ရသစာပေ လုံးချင်းဝတ္ထုကြီး တအုပ်ကို ဈေးကွက်တင် ရောင်းသည့် မြန်မာစာအုပ်မျိုး ကျွန်တော် မကြားဖူးသေး။ ရှိတော့ ရှိပါလိမ့်မည်။ ခေတ်ပြိုင် ၀က်ဘ်ဆိုဒ် တွင် ဆရာမောင်သာရ ကြော်ငြာများကို တွေ့ဖူးသည်။ သို့သော် ဈေးကွက်အရ အဘယ်မျှ ပေါက်ရောက်သည်ကို ကျွန်တော်မသိ။
“မင်းဒင်ရဲ့ သက်ခိုင်” ကိုတော့ ကျွန်တော် လုံးဝယုံသည်။ ထို့ပြင် ဆရာမင်းဒင် ကိုယ်တိုင်၏ မိတ္တဗလကို ပိုပြီး ယုံသည်။ ထို့ကြောင့် ဇွတ်တွန်းခဲ့သည်။ သူ့စာအုပ်ကို ထုတ်ဝေလိုသူများက ကမ်းလှမ်းမှုတော့ ရှိသည်ဟု သဲ့သဲ့ကြားရသည်။ သို့သော် ဆရာ မင်းဒင်က သူကိုယ်တိုင် သာ သူ့စာအုပ်ကို ထုတ်လိုကြောင်း နောက်ဆုံးတွင် ကျွန်တော့်အား ဆိုလာသည်။
“ဗိုလ်ဌေး။ သက်ခိုင်ကိုထုတ်ဖို့ အမေရိကန်က တစ်ယောက် ကမ်းလှမ်း တယ်ဗျ။ ဒါပေမဲ့ ကျွန်တော့်စာမူကို ကျွန်တော်ပဲ မူပိုင် ထားချင်တာ။ ကျွန်တော်မရှိတဲ့ တနေ့မှာ ကျွန်တော့်ရဲ့တဦးတည်းသော သမီးလေးအတွက် မူပိုင်ခွင့် အမွေပေးခဲ့ ချင်တာ။ ဒါကြောင့် လုပ်ဖြစ်ရင် ကိုယ့်ပိုက်ဆံနဲ့ ကိုယ်ချမယ်ဗျာ”
ဟု သူကပြောသည်။
ဒါကြောင့် သူသည် မဲဆောက်က စာပေ မိတ်ဆွေများနှင့် တိုင်ပင်ပြီး စိစစ်တာ တည်းဖြတ်တာ ဒီဇိုင်းဆင်တာတွေကို ကိုယ် တိုင်ဘေးမှနေ၍ ကြီးကြပ်ပြီး စာမျက်နှာ ၇၀၀ ကျော်ရှိသော စာအုပ်ကို သုတ်သင် တည်းဖြတ်၍ ပြီးစီးကြောင်း သတင်း ပို့လာသည်။
ကျွန်တော် အင်မတန် ၀မ်းသာပါသည်။ ကျွန်တော့် မိတ်ဆွေကြီး ရေး သားသော မဆလခေတ်၊ န၀တခေတ်၊ နအဖခေတ် နောက်ခံနှင့် သက်ရှိ ဇာတ်ကောင်များ ပါဝင်သော ခေတ်ပြိုင် သမိုင်းဇာတ်လမ်းတွဲကြီး၊ သို့မဟုတ် “မင်းဒင်ရဲ့ သက်ခိုင်” ၀တ္ထုကြီး အမှန်တကယ် မြန်မာ စာပေလောကတွင် ပေါ်ထွက်လာတော့မည်လေ။
(င)
၂၀၁၀ ကုန်ခါနီး ကာလလောက်က ထင်သည်။
ကိုမင်းဒင်သည် ကျွန်တော်ရှိရာ ဘန်ကောက်မြို့ ဖက်လန်ဆောင် စွယ် ၆၆ သို့ တက္ကစီစီးပြီး ပေါက်ချလာသည်။
“ဗိုလ်ဌေး စာအုပ်ထုတ်မယ်။ ပုံနှိပ်စက်အပ်မယ်။ ခင်ဗျား အပ်နေကျ ပုံနှိပ်တိုက် သွားမယ်ဗျာ။ ခင်ဗျားမဒမ်က ထိုင်းစကား တတ်တယ် မဟုတ်လား”
ဟု ဆိုပြီး ကျွန်တော့်ဇနီး ဒေါ်ငယ်ကိုပါ ချောဆွဲလေသည်။
သူသည် ပုံနှိပ်တိုက်ပိုင်ရှင်နှင့် အသေးစိတ် ဆွေးနွေးပြီးနောက် ဈေးစကား ပြောကြတော့ ပုံနှိပ်တိုက်က ဘတ် သုံးသိန်းနီးပါး ကျမည်ဟု ပြောသည်။ ကိုယ့်ဆရာ တွေသွားသည်။ ပုံနှိပ်တိုက်မတင်ခင် ကုန်ကျစရိတ်များနှင့်ပါ ဆိုလျှင် စာအုပ်တအုပ်ကို ဘတ် သုံးရာကျော်တော့မည်။ တအုပ်သုံးရာ ဆိုလျှင် အရင်းသက်သက်ပင် ဘတ် သုံးသိန်းအထက် ကုန်တော့မည်။ ထို့ကြောင့် ရန်ကုန်က ဇနီးနှင့် စင်ကာပူက သမီးကို အခြေအနေအား ရှင်းပြသည်။
အံ့ဖွယ်ကောင်းလိုက်သည့် ဇနီးနှင့် သမီးပါပဲ။
စာရေးဆရာကတော်က
“ရှင် သိပ်ထုတ်ချင်နေတဲ့ စာအုပ်ကို ထုတ်သာထုတ်။ ဘာမှ နောက် မတွန့်နဲ့။ မတွေဝေနဲ့”
တဲ့။ သမီးဖြစ်သူကလည်း
“အဖေ နောက်မဆုတ်နဲ့ လိုတာအကုန် သမီးပေးမယ်။ သမီးဟာ အဖေ့ သမီး။ စာရေးဆရာ မင်းဒင်သမီး ဖြစ်ရတာကို အရမ်းဂုဏ်ယူမိတယ် အဖေ။ အဖေ လုပ်စရာရှိတာ ဆက်လုပ်”
ဟု ပါရမီဖြည့်ဖက် ဇနီးသည်နှင့် သမီး လိမ္မာတို့က ရာနှုန်းပြည့် ထောက်ခံအားပေးခဲ့ကြသည်။ ထို့ကြောင့် ကောင်းကင် အွန်လိုင်းတွင် ကျော်ကြားမင်းမူခဲ့သော “မင်းဒင်ရဲ့သက်ခိုင်” သည် ဤကမ္ဘာမြေပေါ်သို့ စက္ကူဖြင့် ချုပ်လုပ်ထားသော ခံ့ညားသည့် စာအုပ်အဖြစ်ဖြင့် ရောက်လာခဲ့ရသည်။
စာအုပ်အပ်ပြီး တပတ်အတွင်း ဘန်ကောက်မှ ဖူးကက်သို့ သက်ခိုင် စာအုပ် အုပ်ရေ ၁,၀၀၀ ရောက်ရှိ သွားတော့သည်။ မင်းဒင်၏လက်ရာ သက်ခိုင်ကား ၆ လလောက် အကြာတွင် လက်ကျန် အနည်းငယ်သာ ကျန်သည့် အဆင့်သို့ ရောက်လာသည်။
သက်ခိုင်စာအုပ်များသည် စင်ကာပူ၊ တိုကျို၊ ဆိုးလ်၊ ဆစ်ဒနီ၊ လန်ဒန်၊ ၀ါရှင်တန်၊ အော့တ၀ါ၊ ကာတာ၊ ဆိုက်ပရပ်စ်၊ ကွာလာလမ်ပူ အစရှိသော ကမ္ဘာ့မြို့ကြီးများနေ မင်းဒင်ပရိသတ်များက အလုအယက် မှာယူကြသည်။ ရန်ကုန်၊ မန္တလေး မြို့များမှလည်း သူ့ အဆက်အသွယ်နှင့်သူ မှာယူဖတ်ရှု ကြသည်။ ထိုင်းနိုင်ငံ၊ ဘန်ကောက်၊ ချင်းမိုင်၊ မဲဆောက်မြို့များမှ လည်း အားပေးကြသည်။
သက်ခိုင်ကို မွေးဖွားရာ ဖူးကက်တွင်တော့ သိပ်စွံပုံမရ။ အထူးသဖြင့် စာအုပ်ဈေးကြီး၍ လား၊ ဒါမှမဟုတ် စာဖတ်အား နည်း၍လားတော့ မပြော တတ်။ ရွှေ့ပြောင်း အလုပ်သမားများက ၀ယ်ယူအားပေးမှု အနည်း အကျဉ်းသာ ရှိပါသည်။ စာအုပ်ထွက် ပြီး တစ်နှစ်ခန့် အကြာတွင်တော့ အမှတ်တရ သိမ်းဆည်းထားရန် လက်ကျန် အနည်းအကျဉ်းသာ ရှိတော့ ကြောင်း သူက ပြောလာသည်။
(စ)
လူတစ်ယောက်၏ ဘ၀ကံကြမ္မာသည် ကြိုတင်မှန်းဆ၍ မရစကောင်းပါ။ သီချင်း တစ်ခွေတည်းနှင့် ပေါက်ခဲ့သူများ အဖြစ် အဆိုတော် ဖိုးချို၊ ထူးအိမ်သင် စသည့် နိုင်ငံကျော်များကို တွေ့ဖူးပါသည်။ စာအုပ် တအုပ် တည်းနှင့် ပေါက်သည့် မြန်မာ ၀တ္ထုရေးဆရာက ဆယ်စုနှစ် တခု၊ နှခုတွင် တယောက် ပေါ်ထွန်းချင်မှ ပေါ်ထွန်းပါမည်။
ထို့ပြင် ရသစာပေ ရေးသားခြင်းဆိုသည်က အခက်တကာ့ အခက်ခဲဆုံး အလုပ်ထဲက တစ်ခု ဖြစ်၏။ ယင်း အခက်အခဲကို ကျော်ဖြတ်ကာ နတ်မောက်သား မင်းဒင်သည် ဖူးကက်ကျွန်းမှ တဆင့် အွန်လိုင်းမှ စတင်ပေါ်ထွန်းပြီး ယခုအခါ စာပေလော ကထဲတွင် အထင်ကရ ကလောင်တစ်ချောင်းအဖြစ် အောင်မြင်ခဲ့ပေပြီ။ ယင်းသို့ အောင်မြင် လာခြင်းမှာ အလွယ်တကူ အောင်မြင်လာခြင်းတော့ မဟုတ်။ ဤ စာအုပ်ကို သုံးနှစ်သုံးမိုး အပတ်တကုတ် ရေးသားခဲ့ခြင်း ဖြစ်သည်။
နိုင်ငံတွင်းက စာရေးဆရာများ ကဲ့သို့၊ အင်္ဂလိပ်ဘာသာဖြင့် ရေးသား သော စာရေးဆရာများကဲ့သို့ စာအုပ်ထုတ်ဝေ ရန်လည်း ကနဦးက တင်ကူး ရည်ရွယ်ချက်ရှိ၍လည်း မဟုတ်။ သူ့ရင်ဘတ်ထဲတွင် အောင်း နေသော သက်ခိုင်ကို မွေးဖွားခဲ့ခြင်း သက်သက်သာ ဖြစ်သည်။
လူများစွာတို့သည် ပိုက်ဆံရသော အလုပ်များကိုပင် နှစ်ရှည်လများ ဇွဲနပဲနှင့်မလုပ်ဘဲ မျောက်လွှဲကျော်ပမာ ဟိုကသည် ကူး၊ သည်ကဟိုကူးဖြင့် ကျင်လည်နေတတ်ကြ၏။ ကုန်သွယ် စီးပွားဖြင့် အလုပ်ကို လုပ်နေသူ ကုန်သည် ကိုမင်းဒင်အဖို့မှာ တော့ တဖက်က အရောင်းအ၀ယ်လုပ်ရင်း ကျန်သည့် အချိန်တိုင်းတွင် “သက်ခိုင်” ကို ဖန်တီးနေခဲ့သည်။
ထို့ကြောင့်ထင်၏။ ၂၀၁၀ ခုနှစ်က ချင်းမိုင်တွင် ပြုလုပ်သော မြန်မာ့ သတင်းသမဂ္ဂ ညီလာခံသဘင်တွင် သူ့ကို တနှစ်တာ အကောင်းဆုံး ရသစာပေ ကလောင်ရှင်အဖြစ် ဆုပေးကာ ဂုဏ်ပြုခဲ့ပါသည်။ ထို့ထက် ကြီးမားသော ဆုတခု ကျန်ပါသေး သည်။ ယင်းကား အခြားမဟုတ်။ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်က “မင်းဒင်ရဲ့ သက်ခိုင်” ကို ဖတ်ချင်သည်ဆို၍ ရန်ကုန်မြို့ကို ရောက်အောင် ပို့ပေးခဲ့ရခြင်း ဖြစ်သည်။ ယင်းစာအုပ်ကို ရန်ကုန်သို့ သွားမည့် ဗိုလ်မှူး သောင်းထိုက်လက်ထဲသို့ ဘန်ကောက်မြို့လည်ရှိ စယမ် မိုးပျံရထားဘူတာတွင် ကျွန်တော် ကိုယ်တိုင် ထည့်ပေးခဲ့ရပါ သည်။
(ဆ)
ဖူးကက်မြို့မှ အာမခန်အရပ်သည် ဆိတ်ငြိမ် ရပ်ကွက်တခု ဖြစ်၏။ စီးပွားရေး ပြေလည်သူများနေသည့် အရပ်ဖြစ်သော ကြောင့် လူသွား လူလာ နည်းပါးကာ တခါတရံ ကားနှင့် ဆိုင်ကယ်များ ဖြတ်မောင်း သွားသည့် အသံမှလွဲ၍ နေ့ခင်း နေ့လယ်များဆိုလျှင် တိတ်တိတ် ဆိတ်ဆိတ် ရှိလှသည်။
သူသည် ယင်းဆိတ်ငြိမ်ရပ်ကွက် အတွင်းရှိ နှစ်ထပ်တိုက်အိမ်၏ အပေါ် ထပ်တွင် အွန်လိုင်း ပြတင်းပေါက်ကတဆင့် ကမ္ဘာ အနှံ့မှ မိတ်ဆွေများနှင့် စကားပြောနေတတ်သည်။ “မင်းဒင်ရဲ့သက်ခိုင်” ကား ယခုစာရေးနေ ချိန်တွင် ပဉ္စမအကြိမ်မြောက်ပင် ရိုက်နှိပ်နေရလေပြီ။ စာပေဝေဖန်ရေး ဂုရုကြီး ဆရာအောင်သင်းကလည်း “မင်းဒင်ရဲ့သက်ခိုင်” ကို အားရလှ သည်ဟု ဆိုသည်။ တက္ကသိုလ်စိန်တင်လို ပုဂ္ဂိုလ်မျိုးကလည်း မြန်မာစာကို ချောမွေ့ ပြေပြစ်အောင် ရေးနိုင်စွမ်းသူဟု ဆိုပြန်၏။ “မင်းဒင်ရဲ့သက်ခိုင်” အပေါ် ချီးကျူးကြသည့် ရီဗျူးများ ပြည်တွင်းထုတ် မဂ္ဂဇင်း၊ ဂျာနယ်များတွင် နေရာယူနေလျက်ရှိနေပြီ။ သူ၏ ပထမဆုံး လက်ရာဖြစ်ပြီး ဒုတိယမြောက် လုံးချင်းအဖြစ် ရိုက်နှိပ်သော “ဖြစ်ပျက်ရှာပုံတော် ခရီးသည်” နှင့် နောက် ထပ်လက်ရာ စာအုပ်တွေလည်း ထွက်လာခဲ့ပြီး ဖြစ်သည်။
သူသည် ကျွန်တော့်အား မထင်မှတ်ဘဲ အလုပ်ကြီးတခုကို လုပ်မိလျက်သား ဖြစ်နေပြီဟု ဆိုခဲ့သည်။ သို့သော် ယင်းအလုပ်ကား နှယ်နှယ်ရရမဟုတ်။ သူ့ဘ၀ကိုလည်း အောင်မြင်သော စာရေးဆရာ ဖြစ်စေခဲ့သလို ကိုယ်တိုင် ဖြတ်သန်းခဲ့သော ခေတ်ပြိုင် သမိုင်းကိုလည်း နောင်အခါ ဂန္ထ၀င်တင်ခံရ မည့် စာအုပ်တအုပ်ကို ရေးမိလျက်သား ဖြစ်နေခဲ့ခြင်းပင်တည်း။
ဌေးဝင်း
The Ladies News
The Ladies News မှကူးယူဖော်ပြပါသည်။#BurmaDemocracy
—————————————————————————

မင်းဒင်စာအုပ်များ link -
https://m.facebook.com/LinktotheBooks/photos/a.1503287736658732.1073742010.1442553069398866/1744530292534474/?type=3