! နိူင်ငံတကာ ဆုရ ဓါတ်ပုံများရဲ့နောက်ကွယ် ... (၄)

 

Zaw Min Latt·Tuesday, October 13, 2015

! နိူင်ငံတကာ ဆုရ ဓါတ်ပုံများရဲ့နောက်ကွယ် ... (၄)

==================================

- ကျော်ကျော်ဝင်း (P.MPS, Hon; FPSBP)

ဒီတစ်ခါ တင်ပြဖို့အတွက် တွံတေးမြို့ အိုးလုပ်ငန်းခွင်တစ်ခုမှာ ရိုက်ခဲ့တဲ့ ပုံလေးကို ရွေးချယ်လိုက်ပါတယ် ။ ဒီပုံလေးက ကြည့်လိုက်ရင် ရိုးရိုးရှင်းရှင်းလေးပဲဆိုပေမယ့် ဓါတ်ပုံပညာရပ်တွေ ၊ ဖန်တီးမှုတွေ ပေါင်းစပ်ပါဝင်နေလို့ ရှင်းပြစရာတွေ အများကြီးရှိနေပါတယ် ။ ဒီပုံကို ၂၀၀၆ ခုနှစ်ကတည်းက ရိုက်ခဲ့တာဖြစ်ပေမယ့် ဖန်တီးမှုက ဒီနေ့အထိ လတ်ဆတ်နေတုန်းပါပဲ ။

ဓါတ်ပုံဆိုတာ အလင်းနဲ့ ဆေးခြယ်တဲ့ ပညာရပ်ဆိုတာကတော့ အားလုံးသိထားပြီးသားပါ ။ ဒါပေမယ့် အလင်း သက်သက်ပဲ သုံးပြီး ရိုက်ယူမယ်ဆိုရင်တော့ လုံးကြွ ပေါ်လွင်မှု မရှိတဲ့ ပုံမျိုးတွေပဲ ထွက်လာမှာပါ ။ ဓါတ်ပုံတွေထဲမှာ အလင်းပိုင်းတွေနဲ့ အတူ အမှောင်ပိုင်းတွေကိုပါ ပေါင်းစပ်ပေးမှသာ လုံးကြွ ပေါ်လွင်တဲ့ ပုံမျိုး တွေ့ရမှာပါ ။ ဒါကြောင့် ဓါတ်ပုံသမားတွေက ဓါတ်ပုံရိုက်မယ့်အကြောင်းအရာဆီကို ဘေးဘက်ကကျနေတဲ့ Side Light အလင်းတွေ ၊ ဒါမှမဟုတ် အနောက်ဘက်က လာနေတဲ့ Back Light အလင်းတွေကိုသာ အဓိကထားပြီး ရွေးချယ်လေ့ရှိကြပါတယ် ။

တွံတေးမြို့ အိုးလုပ်ငန်းခွင်တွေမှာ အိုးတွေကို မီးဖုတ်တဲ့ အိုးဖိုကြီးတွေက ဓါတ်ပုံသမားတွေရဲ့ စိတ်ကြိုက်နေရာတွေ ပါပဲ ။ အဲ့ဒီအိုးဖိုကြီးတွေမှာ အိုးတွေ ထည့်သွင်းတဲ့ အပေါက်နေရာ ၊ မီးခိုးခေါင်းတိုင်အပေါက်တွေ ရှိပြီး အတွင်းကတော့ မှောင်နေပါတယ် ။ အထဲမှာလည်း အိုးတွေ စီထားတာမို့ အလင်းအမှောင် ၊ အရောင်အရိပ်ပုံသဏ္ဍာန်တွေက အလှပဆုံး ပေါင်းစပ်ပေးထားပြီးသားပါပဲ ။ ဒီတော့အလင်းနဲ့ ဆေးခြယ်ဖို့ အကောင်းဆုံး ဖြစ်နေတော့တာပေါ့ ။

ဓါတ်ပုံရိုက်မယ့် အိုးဖိုကို ကျွန်တော်တို့ ရောက်သွားချိန်မှာ မီးဖုတ်ပြီးသား အိုးတွေကို အပြင်ကို သယ်ထုတ်တော့မယ့် အချိန်ပါ ။ အိုးတွေက မီးကျက်ထားပြီးသားမို့ အ၀ါရောင် တောက်နေပါတယ် ။ အိုးဖိုထဲကို ၀င်ပြီး အမြင့်ကနေ ကြည့်လိုက်တော့ စီထားတဲ့ အိုးတွေရဲ့ ထိပ်ဝတွေကို စက်ဝိုင်းတွေ စီထားသလို မြင်နေရပါတယ် ။

ဒါပေမယ့် ဓါတ်ပုံရိုက်ဖို့အတွက် အဓိက အခက်အခဲကတော့ အိုးဖိုထဲမှာ အလင်းအားနည်းလွန်းနေတာပါပဲ ။ Tripod သုံးပြီး Long Exposure နဲ့ အချိန် အကြာကြီး ရိုက်ယူတော့လည်း ကိုယ်လိုချင်တဲ့ ပုံမျိုးမရပြန်ပါဘူး ။ ကိုယ့်အတွက် နောက်ထပ် ပြဿနာတစ်ခုကတော့ အိုးဖိုထဲကနေ မြင်နေရတဲ့ အပြင်ဘက်ကိုပါ ထည့်ပြီး ရိုက်ချင်နေတာပါပဲ ။ အနေအထားက အိုးဖိုထဲမှာတော့ မှောင်မည်းနေပြီး အပြင်ဘက်မှာတော့ အလင်းတောက်ပနေပါတယ် ။ အတွင်းနဲ့ အပြင် အလင်းအားချင်း မမျှပါဘူး ။ ဓါတ်ပုံစကားနဲ့ ပြောရရင် Exposure အလွန်အမင်း ကွာဟနေပါတယ် ။ ဒီလို အလွန်အမင်း Exposure ကွာဟနေတဲ့ အကြောင်းအရာ နှစ်ခုကို ဓါတ်ပုံတစ်ပုံတည်းမှာ Exposure အညီအမျှဖြစ်အောင် သဘာဝအတိုင်း ရိုက်ယူလို့ မရပါဘူး ။

အိုးဖိုအတွင်ပိုင်းက မှောင်နေတဲ့ နေရာတွေကို အသေးစိတ်ပေါ်လွင်လာအောင် Exposure ပေးပြီး ရိုက်ယူလိုက်ရင် အိုးဖို အပြင်ပိုင်းတွေက Over Exposure ဖြစ်ပြီး Burn (ဖြူဖွေး) သွားမှာပါ ။ အိုးဖို အပြင်ပိုင်းတွေကိုပဲ အနုစိတ်ပေါ်အောင် Exposure ပေးပြီး ရိုက်ယူလိုက်ပြန်ရင်လည်း အတွင်းပိုင်းက Under Exposure (မဲမှောင်) သွားမှာဖြစ်ပါတယ် ။ အထဲက အိုးတွေရဲ့ အနုစိတ် လက္ခဏာတွေပေါ်မှာ မဟုတ်တော့ပါဘူး ။

ဒီလို အခြေအနေမှာ အတွင်းအပြင် နှစ်ခုလုံးကို ဓါတ်ပုံတစ်ပုံတည်းမှာ Exposure အမှန်ရနိုင်ဖို့က ဖန်တီးယူရတော့မှာ ဖြစ်ပါတယ် ။ မတူညီတဲ့ အလင်းအားနှစ်ခုကို တူညီလာအောင် ဖြည့်ပေးရတော့မှာပါ ။ ဒီတော့ အပြင်ဘက်က များနေတဲ့ အလင်းတွေကို လျော့ချပေးမလား ၊ ဒီကိစ္စကတော့ မလွယ်ကူပါဘူး ။ သဘာဝအလင်းရောင်ကျသွားတဲ့ အထိ စောင့်ရပါလိမ့်မယ် ။ ဒါ့အပြင် အပြင်ဘက်မှာ သဘာဝ အလင်းအားလျော့ကျသွားတာနဲ့ အမျှ အတွင်းပိုင်းမှာလည်း အလင်းအားက လိုက်ပြီးလျော့သွားဦးမှာပါ ။ ဒီတော့မှောင်နေတဲ့ အိုးဖိုအတွင်းပိုင်းတွေကို အလင်းအားဖြည့်ပေးမလား ၊ ဒါက ကျွန်တော်တို့အတွက် ပိုပြီး လွယ်ပါလိမ့်မယ် ။

မှောင်နေတဲ့ အိုးဖိုအတွင်းပိုင်းတွေကို Flash မီးတွေသုံးပြီး လင်းလာအောင် ဖြည့်ပေးလို့လည်း ရပါတယ် ။ ဒါပေမယ့် ဒီလို နေရာမျိုးမှာ ကိုယ်လိုချင်သလို ရဖို့အတွက်က Flash မီးတွေ အများကြီး လိုပါလိမ့်မယ် ။ Flash မီးဆိုတာကလည်း ဘယ်လို လင်းမယ် ၊ ဘယ်လောက်အထိ လင်းမယ်ဆိုတာတွေကို မရိုက်ခင်တည်းက ကြိုမြင်နေရတာမျိုး မဟုတ်လေတော့ တွက်ချက်မှုတွေ ၊ စမ်းသပ်မှုတွေ လုပ်ရပါဦးမယ် ။ ဒီတော့ ပိုလွယ်ကူပြီး သဘာဝနဲ့ ပိုနီးစပ်တဲ့ ဖယောင်းတိုင် မီးတွေ သုံးဖို့ ဆုံးဖြတ်ခဲ့ပါတယ် ။

အိုးဖိုအတွင်းပိုင်းကို ကျွန်တော်တို့ အရင်ဝင်သွားပြီး နေရာယူလိုက်ကြပါတယ် ။ ကင်မရာတွေကို Tripod တွေပေါ်မှာ တပ်ဆင်ပြီး စိတ်ကြိုက်အနေအထားရအောင် ရွေးချယ် ပြင်ဆင်ကြပါတယ် ။ ပြီးတော့မှ အိုးတွေထဲကို ဖယောင်းတိုင်လေးတွေ စပြီး ထွန်းကြပါတယ် ။ အတွင်းပိုင်းနဲ့ အပြင်ဘက်ပိုင်းကို Exposure ညှိပြီး ရိုက်လို့ ရတဲ့ အနေအထားမှာ ရပ်လိုက်ပါတယ် ။ အိုးဖိုအတွင်းပိုင်းက လေလုံပြီး အတော်လေး ပူနေပါသေးတယ် ။ ဖယောင်းတိုင်တွေ ထွန်းလိုက်တော့ ချွေးဒီးဒီးကျအောင်ကို ပူလာပါတယ် ။ ထွက်ပြေးချင်စိတ်ပေါ်လာတဲ့ အထိပါ ။ ဒီပုံကို ရဖို့အတွက် ကျွန်တော် သုံးခဲ့တာကတော့ Nikon D70 ကင်မရာနဲ့ Kit Lens 18-70mm ဖြစ်ပါတယ် ။ တကယ်တော့ ဒီထက်ပိုပြီး မြင်ကွင်းကျယ်တဲ့ မှန်ဘီလူးကို သုံးသင့်တာပါ ။ ဒါပေမယ့် ကျွန်တော့်မှာ မရှိပါဘူး ။ ရှိတာကိုပဲ သုံးထားတော့ မြင်ကွင်းက နည်းနည်း ကျပ်နေပါတယ် ။ ဓါတ်ပုံပညာရပ်မှာ ဘာသာရပ်ခွဲပေါင်း များစွာ ရှိနေပေမယ့်လည်း ဓါတ်ပုံပြိုင်ပွဲတွေအတွက်ကတော့ ဓါတ်ပုံထဲမှာ သက်ရှိတွေ ၊ လှုပ်ရှားမှုတွေ ပါမှ အကဲဖြတ် ဒိုင်တွေကို ဆွဲဆောင်နိုင်ပါတယ် ။ ဒါ့ကြောင့် ပြိုင်ပွဲဝင် ဓါတ်ပုံတွေမှာ ဒါတွေကို မပါမဖြစ် ထည့်ရိုက်ကြလေ့ ရှိပါတယ် ။ ဘာကိုပဲ ထည့်ရိုက် ရိုက်ပါ လက်ရှိ ပတ်ဝန်းကျင် အနေအထားနဲ့ သဟဇာတဖြစ်ဖို့ သဘာဝကျဖို့လည်း မဖြစ်မနေလိုအပ်ပါတယ် ။ ဇွတ်အတင်းအကြပ် လုပ်ခိုင်း ၊ နေခိုင်းထားတဲ့ ပုံစံမျိုး မဖြစ်ပါစေနဲ့ ။ သက်တောင့် သက်သာရှိနေပါစေ ။

တကယ်တော့ ကျွန်တော်က အိုးတွေကို တကယ်သယ်ထုတ်နေတဲ့ လှုပ်ရှားမှု Movement ပုံကို ရိုက်ချင်ခဲ့တာပါ ။ နောက်ပြီး ဓါတ်ပုံထဲမှာ အစမှ အဆုံးတိုင် ပြတ်သားနေစေချင်တာကြောင့် Aperture ကိုလည်း f/8 အောက်ကို လျော့ပြီး မသုံးချင်ပါဘူး ။ ဒီတော့ ဒီလိုအနေအထားမှာ ISO 200 ပဲသုံးပြီး Exposure ကို 3 sec ထက် ပိုမြန်အောင် ရိုက်လို့ မရတော့ပါဘူး ။ Exposure ကို 3 sec (၃ စက္ကန့်) တောင်ထားပြီး လှုပ်ရှားမှု Movement ကို ပြတ်သားအောင် ဘယ်လိုလုပ်ရိုက်နိုင်တော့မှာလဲ ၊ လှုပ်ရှားမှုတွေကို ပြတ်ပြတ်သားသားပေါ်အောင် ရိုက်ဖို့ ဆိုတာက Shutter နှုန်းအမြန်တွေကို သုံးရမှာလေ ။ ဒါ့ကြောင့် လူကို အငြိမ်ထားလို့ ရတဲ့ ပုံမျိုးတွေပဲ ရိုက်ဖို့ ရွေးချယ်လိုက်ပါတယ် ။ ပထမတော့ လူနှစ်ယောက် သုံးပြီး ရိုက်ကြပါတယ် ။ အမျိုးသမီးက အိုးတွေ သယ်ဖို့အတွက် ခေါင်းပေါ်ရွက်နေတာကို အမျိုးသားက ခေါင်းပေါ် ကူညီ ပင့်တင်ပေးနေတာကို ဖန်တီး ကြည့်ပါတယ် ။ ဒါပေမယ့် ကူညီပေးတဲ့ အမျိုးသားက တောင့်တောင့်ကြီးဖြစ်နေတယ် ။ သက်တောင့်သက်သာ မရှိတော့ သဘာဝမကျဘူး ။ တမင်ဟန်လုပ်နေမှန်း သိသာလွန်းနေတယ် ။ ဒါကြောင့် သူ့ကို ဖယ်ထုတ်ပြီး အိုးရွက်နေတဲ့ အမျိုးသမီးတစ်ယောက်ထဲကိုပဲ ရိုက်ဖြစ်သွားတယ် ။

ဓါတ်ပုံတစ်ပုံရဖို့ ၃ စက္ကန့်ကြာအောင်တောင် ရိုက်ရမှာမို့ ဓါတ်ပုံရိုက်နေချိန်မှာ သူမ ငြိမ်ငြိမ်လေးရှိနေဖို့ အရေးကြီးပါတယ် ။ ဒါကြောင့် အိုးတွေရွက်ပြီး ငြိမ်ငြိမ်လေးနေလို့ရမယ့် ကိုယ်နေဟန်ထားကို ပြင်ခိုင်းထားရပါတယ် ။ ဓါတ်ပုံရိုက်တဲ့ အချိန်မှာ လှုပ်လို့ မရကြောင့်း ရှင်းပြထားရပြီး ရိုက်ပြီဆိုရင် ငြိမ်နေဖို့ တောင်းပန်ထားရပါတယ် ။ ဒီလိုလုပ်မှလည်း ပြတ်သားတဲ့ ပုံရိပ်ကို ရမှာပါ ။

ဒီဓါတ်ပုံရဲ့ ဖွဲ့စည်းမှုက ဓါတ်ပုဖွဲ့စည်းမှု အခြေခံ ဥပဒေသဖြစ်တဲ့ Rule of Third နဲ့တော့ မကိုက်ညီပါဘူး ။ ပုံထဲမှာ သက်ရှိ Subject လူက ပုံရဲ့ Rule of Third နေရာမှာ ရှိမနေဘဲ အပေါ်ပိုင်းအလယ်တည့်တည့်ကို ရောက်နေပါတယ် ။ ဒါပေမယ့် ဒါက ဓါတ်ပုံရဲ့ အလေးအပေါ့ Balance ကို ပြန်ပြီး ထိန်းညှိထားတာပါ ။ ဒီနေရာ ဒီအနေအထားကသာ ဓါတ်ပုံရဲ့ ဖွဲ့စည်းမှု အလေးအပေါ့ ဟန်ချက်ကို ညီစေပါတယ် ။

ဒီဓါတ်ပုံက National Geographic Hong Kong က ဦးစီးကျင်းပတဲ့ " Yellow to Me " နိုင်ငံတကာ ဓါတ်ပုံပြိုင်ပွဲ ၂၀၀၆ မှာ Rising Star ဓါတ်ပုံဆုကို ရရှိခဲ့ပါတယ် ။ အိုးတွေထဲမှာ ထွန်းထားတဲ့ ဖယောင်းတိုင်လေးတွေ ပေါ်မနေခဲ့တာက ဓါတ်ပုံကို အားရှိသွားစေတာပါ ။ ဖယောင်းတိုင်တွေသာ ပေါ်နေရင် အဓိပ္ပါယ် မရှိတော့ပါဘူး ။ ဖယောင်းတိုင်တွေ ပေါ်မနေတော့ ဘာကြောင့်အလင်းရောင်ထွက်နေမှန်း မသိရတော့ပါဘူး ။ အလင်းရောင်ရအောင် တမင်မီးထွန်းထားတာ မပေါ်လွင်တော့ဘူးပေါ့ ။

ကျွန်တော်မြင်တဲ့ နောက်ထပ် အားနည်းချက်တစ်ခုကတော့ ခေါင်းပေါ်မှာ ရွက်ထားတဲ့ အိုးတွေက နောက်ခံမှာ ရှိနေတဲ့ အိုးတွေနဲ့ ရောနေတာပါ ။ ဒီလိုရော မသွားအောင် ထင်ရှားပေါ်လွင်လာအောင် ပြင်ပေးသင့်ပါတယ် ။ အိုးရွက်နေသူရဲ့ ကိုယ်နေဟန်ထား ဒါမှ မဟုတ် အနေအထားကို ပြင်လိုက်ပြီးတော့ပဲဖြစ်ဖြစ်ပေါ့ ။ အဲ့ဒီတုန်းကတော့ အဲ့ဒီအပြစ် (အားနည်းချက်)ကို မမြင်ခဲ့ပါဘူး ။

*** National Geographic Hong Kong (Yellow To Me: Photo Contest) - Rising Star Prize

-----------------------------------------

Camera Model - Nikon D70

Lens Model - AF-S Nikkor 18-70mm (1:3.5-4.5)

F-stop - f/8

Exposure Time - 3 sec

ISO Speed - ISO-200

Flash Mode - No Flash

------------------------------------------

■ Cyra _ ( တဆင့်ပြန်လည်မျှဝေသည် )

Digital Camera မဂ္ဂဇင်း @ http://www.fb.com/myanmardcm