.jpg)
ပဲခူးတိုင်း သာယာကုန်းကျေးရွာအုပ်စု အငြင်းပွားလယ်မြေဧက ၅၈၀၀ ပေါ်၌ တပ်မတော်က အုတ်တံတိုင်းခတ် ကာရံလိုက်သဖြင့် လူမှုဘ၀အခက်အခဲကြုံရဟု တောင်သူများ ရှင်းလင်း
ပဲခူးတိုင်း သာယာကုန်းကျေးရွာအုပ်စုတွင် အငြင်းပွားနေဆဲ လယ်မြေဧက ၅၈ဝဝ ပေါ်၌ တပ်မတော်က အုတ်တံတိုင်းခတ် ကာရံလိုက်သဖြင့် တောင်သူများနှင့် ကျောင်းသားများ အခက်အခဲဒုက္ခဖြစ်ပေါ်နေသည်ဟု ဒေသခံလယ်သမားများက စက်တင်ဘာ ၃ဝ ရက်က မြန်မာဂျာနယ်လစ်ကွန်ရက်ရုံးခန်း၌ သတင်းစာရှင်းလင်းခဲ့သည်။
၁၉၉၇-၁၉၉၈ ခုနှစ်မှ စတင်၍ ပဲခူးတိုင်းသာယာကုန်းကျေးရွာအုပ်စုရှိ ကျေးရွာငယ် ခုနစ်ရွာရှိ လယ်မြေဧက ၅၈ဝဝ ကို ခဲယမ်းမီးကျောက်တပ်(ခယရ)နှင့် လေတပ် ခဲယမ်းမီးကျောက်တပ်မှ သိမ်းယူခဲ့ပြီး သိမ်းဆည်းခံလယ်မြေများပေါ်ရှိ လယ်သမားများအား ပေ ၇ဝ x ပေ ၉ဝ အကျယ်မြေတစ်ကွက် စီပေးပြီး နိုင်သာယာကျေးရွာဆိုသော ကျေးရွာသစ်တစ်ရွာ တည်ပေးခဲ့ကြောင်း ရှင်းလင်းပွဲမှ သိရသည်။
သို့ရာတွင် ကျေးရွာသစ်တွင် လယ်ယာမြေလုပ်စရာမရှိသည့်အတွက် စားဝတ်နေရေး ကျပ်တည်းလာသော တောင်သူလယ်သမားများမှာ ရွာဟောင်းသို့ပြန်ပြောင်းလာကာ လယ်ပြန်လုပ်ခဲ့ပြီး တပ်မတော်သို့ တစ်နှစ်လျှင် မိုးစပါး ရှစ်တင်း၊ နွေစပါး ၁ဝ တင်းနှုန်းဖြင့် ပြန်လည်ပေးသွင်းရကြောင်း သိရသည်။
ထို့ပြင် ယင်းကဲ့သို့ ပြန်လည်ပြောင်းရွှေ့နေထိုင်စဉ်ကာလအတွင်း လယ်သမားများအား နှစ်ရှည်ပင်များစိုက်ပျိုးမှု၊ အိမ်ကြီးအိမ်ကောင်းများ ဆောက်လုပ်မှုတို့ကို တပ်မတော်တာဝန်ရှိသူများက တားမြစ်ခဲ့သည်ဟု လယ်သမားများထံမှ သိရသည်။
လယ်သမားတစ်ဦးဖြစ်သူ ဦးခိုင်ရွှေက “ကျွန်တော်တို့ လယ်ပိုင်ဘဝကနေ လယ်ကျွန်ဘဝ ရောက်ခဲ့ရပါတယ်။ တပ်က သိမ်းတယ်ဆိုတာက ၁၉၉၃ ခုနှစ်လောက်က သိတယ်။ ဒါပေမဲ့ တကယ်သိမ်းတာက တကယ်သိမ်းတာပါ” ဟု ဆိုသည်။
ယင်းကဲ့သို့ စပါးပုံမှန်သွင်းရင်း ၁၉၉၇ -၉၈ ခုနှစ်များမှ ၂ဝ၁၂ ခုနှစ်အထိ နေထိုင်လာသော လယ်သမားတို့မှာ ယင်းနှစ်များအတွင်း အမှတ်(၁) ခဲယမ်းမီးကျောက်တပ်က ၎င်းတို့သိမ်းယူထားသော လယ်မြေဧကများထက် ဆောက်လုပ်သောအဆောက်အအုံ အချိုးအစားမှာ သိသိသာသာနည်းနေခြင်း၊ မိမိလယ်တွင် မိမိသီးစားပြန်လုပ်ပေးရသည်များကို မနှစ်မြို့ခြင်း တို့ကြောင့် ၂ဝ၁၂ ခုနှစ်၊ နှစ်ကုန်ပိုင်းတွင် နှစ်စဉ် စပါးသွင်းရန် ငြင်းဆန်ခဲ့ရာမှ ယခုကဲ့သို့ တပ်မတော်က လယ်မြေဧရိယာများကို ဝင်းခတ်လာခြင်းဖြစ်သည်ဟု လယ်သမားများထံမှ သိရသည်။
ယင်းကဲ့သို့ သံဆူးကြိုးများဖြင့် အုတ်တံတိုင်း ကာရံလိုက်မှုကြောင့် ရွာတစ်ဖက်ခြမ်းရှိ နေအိမ်ငယ်များမှ လယ်မြေများဆီသို့ သွားရန် အခက်အခဲရှိလာခြင်း၊ ကျွဲနွားများအား လယ်ထဲသို့သွင်းရန် အခက်အခဲရှိလာခြင်းတို့အပြင် ကျေးရွာရှိ လယ်သမားများ၏ သားသမီးများ နေ့စဉ်ပညာဒါနကျောင်းသို့ သွားရာတွင် အုတ်တံတိုင်းကိုဖြတ်သန်းရန် ထောင်ထားသောဝါးလှေကားကို ဖြတ်သန်းနေရခြင်း၊ ယင်းဝါးလှေကားမှာလည်း တပ်မှလာရောက်ဖျက်ဆီးမှုကြောင့် ဒုတိယအကြိမ် ထပ်မံပြုလုပ်ရခြင်းစသည့် အခက်အခဲများဖြစ်ပေါ်နေသည်ဟု တောင်သူလယ်သမားများက ဆိုသည်။
တပ်မတော်နှင့် လယ်သမားတို့ ယင်းမြေအငြင်းပွားမှုအပေါ် လေးကြိမ်ခန့်တွေ့ဆုံခဲ့ပြီး လယ်သမားတို့အား လယ်ပြန်မပေးနိုင်ကြောင်းနှင့် တပ်လိုအပ်ချက်အရ ယူထားကြောင်းကို တပ်တာဝန်ရှိသူများက ပြောကြားခဲ့သည်ဟု လယ်သမားများကဆိုသည်။
“တပ်က သိမ်းသွားကတည်းက ကိုယ့်လယ်ကို ကိုယ်ထွန်ပြီး သီးစားခပြန်ပေးနေရတယ်။ နောက်ပြီး အဲဒီလိုသာ သီးစားခပေးနေရတာ စိုက်စရိတ်ချေးငွေလည်း မရဘူး။ ၂ဝ၁၂ ခုနှစ်မှာ လယ်ယာမြေဥပဒေပေါ်လာပြီဆိုတော့ ကျွန်တော်တို့လည်း လယ်ပြန်တောင်းတဲ့အခါမှာ အခုလိုတပ်က လယ်တွေလုပ်မရအောင် အုတ်တံတိုင်းခတ်တဲ့ အနေအထားတွေ ဖြစ်သွားတာပဲ”ဟု ပဲခူးတိုင်းသာယာကုန်းကျေးရွာအုပ်စု ရွှေလေးရွာရှိ လယ်သိမ်းခံရသူ ကိုစံရွှေက ပြောကြားသည်။
တပ်မတော်က အုတ်တံတိုင်းခတ်ကာရံမှုမှာ ၂ဝ၁၃ ခုနှစ်ကတည်းက စတင်နေခြင်းဖြစ်သည်ဟုသိရပြီး လက်ရှိအချိန်တွင် ကာရံခြင်းမပြုရသေးသော မြေဧရိယာများလည်း ရှိနေကြောင်း သိရသည်။
အဆိုပါဖြစ်စဉ်နှင့်ပတ်သက်ပြီး တပ်မတော်ဘက်သို့ ဆက်သွယ်မေးမြန်းရန်အတွက် အမှတ်(၁) လက်နက်ခဲယမ်းမီးကျောက်တပ် မှ တပ်မှူးမင်းသော်၏ လက်ကိုင်ဖုန်းအား ဆက်သွယ်မေးမြန်းခဲ့သော်လည်း အဆက်အသွယ် မရရှိခဲ့ပေ။
No comments:
Post a Comment
မိတ်ဆွေ...အချိန်လေးရရင် blogg မှာစာလာဖတ်ပါနော်
ဗဟုသုတ ရနိုင်တယ်။