သဘာဝ၏ စိတ်ရိုင်းများ

ဖြိုး သုတ

 

သဘာဝ၏ စိတ်ရိုင်းများ
--------------------------
ကလေးငယ်တွေဟာ...သူတို့ရဲ့ဥပဒေကို ဒီအတိုင်းသတ်မှတ်ထားလေ့ရှိကြတယ်..

(၁) ဒီအရုပ်လေးငါကြိုက်တယ်။ ဒါကြောင့် ဒီအရုပ်လေးက ငါ့အရုပ်။
(၂) ဒီအရုပ်လေးကို ငါကိုင်ထားတယ်။ ဒါကြောင့် ဒီအရုပ်လေးက ငါ့အရုပ်ပဲ။
(၃) နင့်လက်ထဲကအရုပ်ကို ငါရအောင်လုနိုင်တယ်။ ဒါကြောင့် ဒါလဲငါ့အရုပ်ပဲ။
(၄) အရင်က ဒါလေးကို ငါကိုင်ထားခဲ့တာလေ။ ဒါကြောင့် အဲဒါငါ့အရုပ်။
(၅) အဲဒါအရုပ် ငါ့အရုပ်လေ။ ဒါကြောင့် နင့်အရုပ်မဖြစ်နိုင်ဘူး။
(၆) ငါဒါနဲ့ ကစားနေတယ်။ ဒါကြောင့် နင်ဒါကို ထိလို့မရဘူး..။ ငါ့အရုပ်။
(၇) ဒါလေးက ငါ့အရုပ်လေးနဲ့တူလိုက်တာ။ အဲဒါကြောင့် ဒါငါ့ဟာပဲ။
(၈) ငါဒါကို အရင်မြင်တာ၊ အဲဒါကြောင့် ဒါငါ့ဟာပဲ။
(၉) နင်ကစားနေတဲ့အရုပ်ကို အမြဲတမ်းကိုင်ထား။ အောက်ပြုတ်ကျတာနဲ့ ငါ့ဟာပဲ။
(၁၀) တကယ်လို့ ကစားနေရင်း ငါ့အရုပ်ပျက်သွားခဲ့ရင်တော့ နင့်ဟာဖြစ်ချင်ဖြစ်နိုင်တယ်..။

လူအပါအ၀င် သတ္တ၀ါတွေဟာ ကြမ်းတမ်းတဲ့ကမ္ဘာမြေပေါ်မှာ အသက်ရှင်ရပ်တည်ဖို့အတွက် သဘာဝရဲ့ တွန်းအားတွေ လိုအပ်တယ်လို့ဆိုတယ်။ တစ်နည်းအားဖြင့် ငါအနိုင်ရမှ၊ ငါရအောင်ယူနိုင်မှ၊ ငါဝအောင်စားရမှ၊ ငါသတ်ဖြတ်မှ အသက်ရှင်မယ်ဆိုတဲ့ အသက်ရှင်ရပ်တည်ရေး survival အတွက် မရှိမဖြစ်လိုအပ်တဲ့ အတ္တဗီဇ နဲ့တကွ မွေးဖွားလာခဲ့ကြတာလို့ဆိုတယ်။ အဲဒီအတ္တ စိတ်ကို ကြမ်းတမ်းတဲ့ ဗီဇနဲ့ ပေါင်းဖက်တဲ့အခါမှာတော့ ကြမ်းတမ်းတဲ့သဘာဝ violent nature ဖြစ်ပေါ်လာခဲ့ပြန်တယ်။

လူသားတွေဟာ.. ဂူအောင်းဘ၀ကစလို့ အဲဒီရန်လိုတဲ့သဘာဝ အဲဒီ violent nature ကြောင့်ပဲ အခြားမျိုးစိတ်တိရစ္ဆာန်တွေအပြင်၊ လူသားမျိုးစိတ်အချင်းချင်းကို ပါ သတ်ဖြတ်အနိုင်ယူခဲ့ကြတာပဲဖြစ်တယ်။ အစာရေစာကို ကိုယ်တိုင်မထုတ်လုပ်၊ မစိုက်ပျိုးနိုင်ခဲ့အခိုက်အတန့်မှာတော့ အဲဒီကြမ်းတမ်းတဲ့ အတ္တစိတ်ဟာ လူသားတွေရဲ့ အသက်ရှင်နေထိုင်ခြင်းအတွက် မရှိမဖြစ် ဥပဒေသ တစ်ရပ်ဖြစ်ဘူးခဲ့တယ်လို့ဆိုတယ်။ နိုင်သူစားစတမ်း winner takes all ဆိုတဲ့အရာနဲ့သာလျင်ဆုံးဖြတ်ခဲ့တဲ့ အတွက် အရိုင်းအစိုင် ဘ၀လို ခေါ်တွင်ခဲ့တာပဲဖြစ်တယ်။

အဲဒီလို လူသားရဲ့ "အရိုင်းစိတ်"ရဲ့ လက္ခဏာနဲ့ သဘောသဘာဝကို ဟန်ဆောင်ခြင်းမရှိသေးတဲ့ ကလေးငယ်တွေဟာ သဘာဝအတိုင်း ဖော်ပြနေကြဆဲပဲဖြစ်တယ်။ တစ်နည်းအားဖြင့် အတ္တကို ဗဟိုပြုစဉ်းစားတဲ့ စိတ်ဓါတ်တစ်မျိုးလို့ ခေါ်နိုင်တယ်။
လူသားတွေရဲ့ အယဉ်ကျေးဆုံးခေတ်ကာလလို့ ပြောနိုင်တဲ့ ယနေ့ခေတ်လိုမျိုးရောက်လာတဲ့အခါမှာတော့ အဲဒီလို ကြမ်းတမ်းတဲ့အတ္တစိတ်တွေဟာ သမိုင်းဦးအချိန်တွေလောက်တော့ မလိုအပ်တော့ဘူးလို့ဆိုနိုင်တယ်။ ဒါပေမယ့်လည်း.. လူတွေရဲ့ ကြမ်းတမ်းပြီး သွေးဆာတဲ့ ဗီဇကတော့ ပျောက်ပျက်ခြင်းမရှိသေးပဲဖြစ်နေပြန်တယ်။ အဲဒီစိတ်ရဲ့ မတရားလုပ်လိုမှု အတ္တစိတ်ရဲ့ ဆာလောင်မှုကို ပြေပျောက်စေဖို့အတွက်..သွေးသံရဲရဲသတ်ဖြတ်တဲ့ video games တွေ၊ လုယက်သတ်ဖြတ်ခြင်းတွေအပြည့်နဲ့ ရုပ်ရှင်တွေကို အစားထိုးဖြေဖျောက်ကြပြန်တယ်။ လူ့သဘာဝအတ္တစိတ်ကို ဖောက်ထုတ်ဖို့အတွက် အဲဒီအရာတွေကို ကြိုက်နှစ်သက်နေတာလို့လည်း သုတေသီတွေက ပြောဆိုကြပြန်တယ်။

အဲဒီအချက်ရဲ့ မှန်ကန်ခြင်းကိုတော့ အရောင်းရဆုံးစာရင်းတွေထဲမှာ ထိပ်ဆုံးက ရပ်တည်နေတတ်တဲ့ အက်ရှင်ဇာတ်လမ်းတွေ၊ ဂိမ်းတွေက ပြသနေကြပြန်တယ်။ အကြိတ်အနယ်ပြိုင်ဆိုင် အနိုင်ယူရတဲ့အားကစားတွေ၊ လက်ဝှေ့ပွဲတွေကို ကြိုက်နှစ်သက်ခြင်းဟာ အဆိုပါ အတ္တစိတ်ရဲ့ ဘေးထွက်လက္ခဏာတွေလို့ဆိုတယ်။

လူသားနဲ့ အခြားသောသက်ရှိသတ္တ၀ါတွေရဲ့ ခြားနားချက်ဟာ သုံးသပ်ဆင်ခြင်နိုင်ပြီး၊ တီထွင်ဆန်းသစ်နိုင်တဲ့ ဥာဏ်ရည်ပဲဖြစ်တယ်။ လူသားဟာ ဥာဏ်ရည်ဖွံ့ဖြိုးလာလေလေ၊ အထက်ကဆိုခဲ့တဲ့ ရိုင်းစိုင်းကြမ်းတမ်းတဲ့ ဗီဇစိတ်ကို ချိုးနှိမ်နိုင်လာလေလေ ဖြစ်လာတယ်လို့ဆိုတယ်။ တစ်နည်းအားဖြင့်..ဥာဏ်ပညာနဲ့ ဆင်ခြင် ထိန်းချုပ်ခြင်းဟာ လူကို ယဉ်ကျေးစေတယ်လို့ဆိုလိုချင်တာပဲဖြစ်တယ်။ တိရစ္ဆာန်တွေဟာ ဥာဏ်ရည်မမြင့်မားတဲ့အတွက် ဗီဇစိတ်ရဲ့စိုးမိုးခြင်းကြောင့်၊ ယနေ့ထက်တိုင် ကြမ်းတမ်းတဲ့ နိုင်သူစားစတမ်းဆိုတဲ့ nature rule ဟာ သူတို့အတွက် ယနေ့အထိ မှန်ကန်နေဆဲပဲဖြစ်တယ်။

ဆန့်ကျင်ဘက်အားဖြင့်တော့ ဥာဏ်ရည်စိုးမိုးလာတဲ့လူသားဟာ တိရစ္ဆာန်တွေကနေ ကွဲထွက်လာပြီး ယဉ်ကျေးခဲ့တယ်လို့ဆိုလိုတာပဲဖြစ်တယ်။
သမိုင်းတစ်လျှောက်လုံးမှာ.. ပေါ်ပေါက်ခဲ့တဲ့ ဘာသာတရားတွေ၊ အဆုံးအမတွေဟာ လူသားတွေကို အရိုင်းစိတ်ကို ချိုးနှိမ်ပြီး ကိုယ်ချင်းစာနာစိတ်နဲ့ အကြင်နာတရားပြည့်ဝတဲ့ လူ့အဖွဲ့အစည်းကို ဖြစ်ပေါ်စေခဲ့ကြတယ်။ အဲဒီအရာတွေ ဟာ လူသားရဲ့ဥာဏ်ရည်ကို မြှင့်တင်ပေးသလို မွေးရာပါ ကြမ်းတမ်းတဲ့ အတ္တ စိတ်ကို ချိုးနှိမ်ပေးနိုင်သေးတယ်။

အဲဒီအချက်တွေကို ခြုံငုံသုံးသပ်ရင်တော့ ကိုယ်ချင်းစာတရားဟာ အသိဥာဏ်နဲ့ တိုက်ရိုက်ပတ်သက်တယ်လို့ ဆိုနိုင်သေးတယ်။ အသိဥာဏ်ပိုမိုအားကောင်းလေလေ၊ ကိုယ်ချင်းစာတရားမြင့်မားလာလေလေ၊ အတ္တစိတ် မှေးမှိန်လေလေလို့ ဆိုနိုင်သေးတယ်။

ဒါပေမယ့်လည်း ကျနော်တို့ရဲ့ လက်တွေ့ဘ၀မှာတော့ ရိုင်းစိုင်းကြမ်းတမ်းတဲ့ ဗီဇစိတ်ကို အသိဥာဏ်နဲ့ ချွန်းမအုတ်နိုင်တဲ့ လူ့အရိုင်းအစိုင်း၊ လူ့အန္ဓများကို တွေ့နိုင်ကြသေးတယ်။ သူတို့တွေဟာ ဥာဏ်ရည်နည်းပြီး ဗီဇစိတ်အားကောင်းသူများဖြစ်တဲ့အလျောက် ငါ့ပစ္စည်း၊ ငါ့ဥစ္စာ၊ ငါကောင်းစားရေး ဆိုတဲ့အရာတွေကို ရှေ့တမ်းတင်ပြီး အရာရာကို ဆုံးဖြတ်တတ်ကြတယ်။ မရင့်ကျက်သေးတဲ့ ကလေးတွေရဲ့ ဗီဇကိုလည်း အသက်အရွယ်ကြီးရင့်လာတဲ့အထိ မွေးမြူထားတတ်ကြသေးတယ်။

ဘယ်သူသေသေ ငတေမာရင်ပြီးရောဆိုတဲ့ စိတ်ထားနဲ့အတူ ဂူအောင်းဘ၀ကတည်းက မွေးမြူလာတဲ့ အရိုင်းစိတ်ကို ဦးစားပေးနေတတ်ကြပြန်တယ်။ အဲဒီလို လူမျိုးတွေဟာ လူတွေအများကြီးရဲ့ ဆာလောင်ခြင်း၊ ဆင်းရဲခြင်းတွေကို ဘယ်လိုအခြေအနေမျိုးမှာမဆို ဂရုစိုက်နေလေ့မရှိသူများပဲဖြစ်တယ်..။ တစ်နည်းအားဖြင့် အရိုင်းအစိုင်းဘ၀က မကျွတ်သေးသူများလို့လည်း ဆိုနိုင်တယ်.။

အသိဥာဏ်များပိုမိုအားကောင်းကြပါစေ
(ဖြိုးသုတ)