သုံးတတ်လျှင်မိတ်ဆွေ၊ မသုံးတတ်လျှင်ရန်သူ

 

အကီ

 

သုံးတတ်လျှင်မိတ်ဆွေ၊ မသုံးတတ်လျှင်ရန်သူ

credit card အကြောင်း ကောင်းကောင်းမသိဘဲ အသုံးလွန်ပြီး ဒုက္ခရောက်နေတဲ့လူတွေ များလာလို့ ဒီ post လေး ရေးပေးလိုက်ပါတယ်။

1). credit card ဆိုတာ ဘာလဲ
ပထမဦးဆုံး credit card ဆိုတာ ဘာလဲဆိုတာကို အရင်ဆုံးလေ့လာကြည့်ရအောင်။

credit card ဆိုတာ ကျသင့်ငွေကို ငွေသားဖြင့် လက်ငင်းမပေးချေပဲ ကတ်ပြားဖြင့်ပေးချေတဲ့ စနစ်တစ်မျိုးသာဖြစ်ပါတယ်။
အဘိဓာန်တွေထဲမှာတော့ credit card ကို အကြွေးဝယ်ကတ်ပြားလို့ အဓိပ္ပါယ်ဖွင့်ကြပါတယ်။

credit card စနစ်မှာ
၁). ကတ်ပြားသုံးစွဲသူ (ကတ်ပြားကိုင်ဆောင်သူ)
၂). ဆိုင်( ကတ်ပြားသုံးလို့ရတဲ့ဆိုင်)
၃). ကတ်ပြားကုမ္ပဏီ (visa, master, etc...)
ဆိုပြီး အပိုင်း၃ပိုင်း ရှိပါတယ်။

ကျွန်တော်တို့တွေ ဆိုင်တစ်ဆိုင်မှာ credit card သုံးပြီး ဈေးဝယ်ကြတယ်ဆိုပါစို့။ ကျွန်တော်တို့တွေ အဲ့ဒီဆိုင်မှာငွေသားနဲ့ လက်ငင်းရှင်းစရာမလိုပါဘူး။ ကတ်ပြားနဲ့ ရှင်းလိုက်ရုံပါပဲ။ ဆိုင်က ကျွန်တော်တို့ဆီကနေ ငွေမရတဲ့အတွက် ကတ်ပြားကုမ္ပဏီ(visa, master, etc...) ကို တောင်းပါတယ်။ ကတ်ပြားနံပါတ် ဘယ်လောက်အတွက် ငွေဘယ်လောက်ပေးပါ ဆိုပြီးတောင်းပါတယ်။ ကတ်ပြားကုမ္ပဏီက ကျသင့်ငွေကို ကြားကနေ ပေးချေပေးပါတယ်။

ကျွန်တော်တို့တွေက နောက်တော့မှ ကတ်ပြားကုမ္ပဏီကို ပြန်ပေးဆပ်ကြရပါတယ်။ ပုံမှန်အားဖြင့် တစ်လလုံးသုံးထားသမျှကိုပေါင်းပြီး နောက်လရဲ့သတ်မှတ်ထားတဲ့ရက်မှာ ပြန်ပေးကြရပါတယ်။

ဒီနေရာမှာ ကျွန်တော်တို့တွေဟာ ကတ်ပြားသုံးချင်တဲ့အတွက် credit card ကုမ္ပဏီတွေနဲ့ စာချုပ်ချုပ်ကြရပါတယ်။ credit card ကုမ္ပဏီတွေကလည်း ယုံကြည်စိတ်ချရတဲ့လူတွေကိုပဲ ကတ်ပြားထုတ်ပေးကြပါတယ်။

တစ်ဖက်မှာလည်း credit card ကုမ္ပဏီတွေဟာ ဆိုင်တွေနဲ့ချိတ်ဆက်ထားကြရပါတယ်။ ဒီကတ်ပြားကို သုံးလာတဲ့လူတွေကို လက်ခံပေးပါ၊ အာမခံပါတယ်ဆိုပြီး စာချုပ်ချုပ်ဆိုထားကြရပါတယ်။

credit card စနစ်မှာ credit card ကုမ္ပဏီတွေဟာ အလွန်အဓိကကျပါတယ်။ visaတို့လို master တို့လို credit card ကုမ္ပဏီ တွေ ရှိတဲ့အတွက်ကြောင့်မို့ ကျွန်တော်တို့တွေဟာ ငွေသားကို သုံးစရာမလိုပဲ ကတ်ပြားနဲ့ ဈေးဝယ်ယူမှုတွေ လုပ်ဆောင်နိုင်တာ ဖြစ်ပါတယ်။

2). credit card ရဲ့ အားသာချက်
credit card ဘာလဲဆိုတာ နားလည်သွားပြီဆိုရင် ဒီကတ်သုံးတဲ့အတွက် ကောင်းတဲ့အချက်တွေကို လေ့လာကြည့်ကြရအောင်...

၁). ငွေလက်ငင်းမချေရခြင်း
ကျွန်တော်တို့တွေ ဈေးဝယ်တဲ့အခါ ငွေသားနဲ့လက်ငင်းပေးချေလျှင် လက်ထဲမှာငွေလက်ကျန် မရှိမှုတွေ ဖြစ်ပေါ်နိုင်ပါတယ်။ credit card ကို သုံးတဲ့အခါ လက်ငင်းပေးချေစရာမလိုပါဘူး။ နောက်နေ့တွေမှ ပေါင်းပြီးပေးချေလို့ရတဲ့အတွက် လက်ထဲကငွေလည်းမလျှော့သွားပါဘူး။ တနည်းပြောရလျှင် ငွေလှည့်၊ ငွေကစားလို့ရပါတယ်။ ပုံမှန်အားဖြင့် ဒီလဝယ်လျှင် နောက်လမှ စချေရပါတယ်။

၂). point ရရှိခြင်း
credit card တွေဟာ ဈေးဝယ်လျှင် ဝယ်သလောက် point တွေ ရရှိနိုင်ပါတယ်။ လစဉ်ကုန်ကျတဲ့ ရေဖိုး၊ မီးဖိုး၊ gasဖိုး၊ ဖုန်းဖိုး တွေကို credit card နဲ့ ပေးချေလျှင် point တွေ လစဉ်ရပါလိမ့်မယ်။ အဲ့ဒီ point တွေကိုစုထားပြီး ဈေးပြန်ဝယ်လို့ ရပါတယ်။ ဘယ်ကတ်ပြားနဲ့ဘယ်ဆိုင်မှာဝယ်လျှင် discount ဘယ်လောက်ပေးတယ် ဆိုတာတွေလည်း ရှိပါတယ်။

၃). ဝန်ဆောင်ခ မပေးရခြင်း
အင်တာနက်ဆားဗစ်အချို့ဟာ ငွေသားဖြင့်ဝယ်ယူပြီး အိမ်ရောက်မှငွေပေးချေလျှင် ဝန်ဆောင်ခ ပေးရတာများပါတယ်။ အင်တာနက်ကနေ credit card နဲ့ ဝယ်ယူတဲ့အခါ ဝန်ဆောင်ခ မပေးရတာများပါတယ်။

၎). ငွေချေးလို့ရခြင်း
အချို့ credit card တွေဟာ ငွေချေးလို့ရပါတယ်။
လိုအပ်တဲ့အချိန်မှာ ငွေချေးလို့ရတဲ့အတွက် ခဏတဖြုတ် ငွေလှည့်နိုင်ပါတယ်။ ဒါပေမယ့် အတိုးပေးရတယ်ဆိုတာကိုတော့ သိထားသင့်ပါတယ်။

၅). ငွေသားကိုင်ဆောင်ရန်မလိုချင်း
တန်ဖိုးကြီးပစ္စည်းတွေဝယ်တဲ့အခါ ငွေသားအမြောက်အမြားကို သယ်သွားစရာမလိုပါဘူး။ ပိုက်ဆံအိတ်ထဲမှာ credit card ထည့်သွားရုံပါပဲ။ လုယက်မှုခံရမှုမှလည်း ကင်းဝေးနိုင်ပါတယ်။

3). credit card ရဲ့ အားနည်းချက်
credit card သုံးတဲ့အတွက် အန္တရာယ်ဖြစ်နိုင်တဲ့ အချက်တွေကိုလည်း လေ့လာထားဖို့ လိုအပ်ပါတယ်။

၁). အတိုးပေးရခြင်း
credit card သုံးပြီး ဈေးဝယ်ကြတဲ့အခါ တစ်ကြိမ်တည်း ပြန်ဆပ်မလား၊ အကြိမ်ကြိမ်ပြန်ဆပ်မလားဆိုပြီး ရွေးချယ်ခွင့်ရှိပါတယ်။ တစ်ကြိမ်တည်းပြန်ဆပ်တဲ့အခါ အတိုးမပေးရပါဘူး။ ဂျပန်လို 一括払い(ikkatsuharai)လို့ ခေါ်ပါတယ်။ အကြိမ်ကြိမ်ပြန်ဆပ်မယ်ဆိုလျှင်တော့ အတိုးပေးရပါလိမ့်မယ်။ ဂျပန်လို 分割払い(bunkatsubarai) လို့ခေါ်ပါတယ်။
ဥပမာ ယန်း၁၀သောင်းတန် ပစ္စည်းတစ်ခု ဝယ်တယ်ဆိုပါစို့။ တစ်ကြိမ်တည်းပြန်ဆပ်တဲ့အခါ ယန်း၁၀သောင်းပဲ ပေးရပါလိမ့်မယ်။ ယန်၁၀သောင်းတန် ပစ္စည်းကို တစ်လတစ်သောင်းနဲ ၁၀ခါခွဲပြီးပြန်ဆပ်မယ်ဆိုလျှင်
၁၀သောင်းနဲ့၆၈၀ဝပြန်ဆပ်ရပါလိမ့်မယ်။ ပြန်ဆပ်တဲ့ အကြိမ်နည်းလျှင် အတိုးပေးရနည်းပြီး ပြန်ဆပ်တဲ့အကြိမ်များလျှင် အတိုးများများပေးရပါလိမ့်မယ်။
ပြန်ဆပ်ပုံဆပ်နည်းထဲမှာ နောက်တစ်မျိုး リボ払い(ribobarai) ဆိုတာလည်း ရှိပါသေးတယ်။ သူကတော့ တစ်လမှာ ဘယ်လောက်ပဲ ပြန်ဆပ်မယ်ဆိုတဲ့ system ပါ။
ဥပမာ တစ်လကို ယန်း၂သောင်းနဲ့ ကျေတဲ့အထိပြန်ဆပ်မယ်ဆိုတာမျိုးပါ။ သူကအတိုးပိုပေးရတတ်ပါတယ်။ リボ払い ကို ရှောင်တာကတော့ အကောင်းဆုံးဖြစ်မယ်လို့ ထင်မိပါတယ်။

၂). ငွေမရှိဘဲ သုံးမိခြင်း
လက်ထဲမှာငွေမရှိလည်း credit card သုံးပြီး အလွယ်တကူဝယ်ယူနိုင်တဲ့အတွက် အသုံးလွန်တတ်ပါတယ်။ မလိုအပ်တဲ့ ပစ္စည်းတွေလည်းဝယ်မိတတ်ပါတယ်။ တန်ဖိုးကြီးတဲ့ ပစ္စည်းတွေကိုလည်း ဝယ်ယူမိတတ်ကြပါတယ်။ ကိုယ့်မှာရှိတဲ့ငွေထက် ပိုသုံးမိတတ်ကြပါတယ်။ ကိုယ်သုံးထားသလောက် ကိုယ်ပြန်ဆပ်ရမယ်ဆိုတာကိုလည်း မမေ့ဖို့လိုအပ်ပါတယ်။ အထူးသဖြင့် လက်ကြီးတဲ့လူတွေ၊ လက်လွယ်တဲ့လူတွေ ပြန်မဆပ်နိုင်ဘဲ ပြဿနာတက်ကြတာများပါတယ်။

၃). ငွေချေးမိခြင်း
အချို့credit card တွေဟာ ငွေချေးလို့ရပါတယ်။
ဂျပန်လို キャッシング(kyasshingu)လို့ခေါ်ပါတယ်။
credit card ရဲ့အကြီးမားဆုံးအန္တရာယ်တစ်ခုကတော့ အလွယ်တကူ ငွေချေးလို့ရခြင်းပါပဲ။ ငွေချေးတဲ့အခါ ဈေးဝယ်တာထက် အတိုးပိုပေးကြရပါတယ်။ ငွေကိုအလွယ်တကူ ချေးတတ်တဲ့လူတွေအနေနဲ့ကတော့ သတိထားရမယ့် အန္တရာယ်ကြီးတစ်ခုပါပဲ။

၎). နှစ်စဉ်ကြေးပေးရခြင်း
credit card တော်တော်များများဟာ နှစ်စဉ်ကြေးပေးရတတ်ပါတယ်။ ဝန်ဆောင်မှုကောင်းလေ နှစ်စဉ်ကြေးလည်း မြင့်လေပါပဲ။ နှစ်စဉ်ကြေးမပေးရတဲ့ credit card တွေလည်းရှိပါတယ်။

၅). ငွေပေးချေရက်ကို သတိထားရခြင်း
credit card တွေဟာ လတစ်လရဲ့ ဘယ်နေ့အထိသုံးထားတဲ့ငွေတွေကို နောက်လဘယ်နေ့မှာ ပေးချေရမယ်ဆိုတာ ကတ်ပြားလုပ်ကတည်းက သတ်မှတ်ထားကြပါတယ်။ အဲ့ဒီရက်မတိုင်မီမှာ ဘဏ်ထဲမှာ ကိုယ်သုံးထားတဲ့ ပမာဏကို ထည့်ထားဖို့လိုအပ်ပါတယ်။ ငွေထည့်ဖို့မေ့သွားခြင်းနဲ့ ငွေထည့်ရက်မှားတဲ့အခါ အတိုးတက်လာနိုင်တယ်ဆိုတာကိုလည်း မမေ့ဖို့လိုအပ်ပါတယ်။

၆). ဘယ်လောက်သုံးထားမိသလဲဆိုတာချက်ခြင်းမသိနိုင်ခြင်း
credit card တွေဟာ တစ်လမှတစ်ခါ ဘယ်လောက်ပေးချေပါဆိုပြီး ဘေလ်လာတဲ့အတွက် ဒီတစ်လကိုယ်ဘယ်လောက် သုံးမိသလဲဆိုတာ ချက်ခြင်းသိဖို့ခက်ခဲပါလိမ့်မယ်။
ငွေသားဆိုလျှင်တော့ ကိုယ်လက်ထဲမှာ ကျန်တဲ့ဟာကို ရေတွက်လိုက်လျှင် ကိုယ်ဒီလ ဘယ်လောက်သုံးလိုက်တယ်ဆိုတာ ချက်ခြင်းသိနိုင်ပါတယ်။ credit card ကတော့ သုံးထားတဲ့ပမာဏကို သိရှိဖို့ ခက်ခဲတဲ့အတွက် ငွေအချိန်မီ မပေးဆပ်နိုင်တာတွေ ဖြစ်တတ်ပါတယ်။
ကတ်ပြားများများလုပ်ထားလေ ဘယ်ကတ်ကနေ ဘယ်လောက်သုံးမိပြီး ဘယ်နေ့မှာ ဘယ်လောက်ပြန်ဆပ်ရမယ်ဆိုတာ ထိန်းချုပ်ဖို့ ပိုခက်ခဲလေပါပဲ။

၇). ငွေထွက်လို့ထွက်မှန်းမသိခြင်း
ငွေသားကိုသုံးတဲ့အခါ ကိုယ်ကိုတိုင် ရေတွက်ပြီး ပေးချေရတဲ့အတွက် ပိုက်ဆံထွက်လျှက် ထွက်မှန်းသိသာပါတယ်။ credit card နဲ့သုံးတဲ့အခါ ပိုက်ဆံထွက်လို့ ထွက်မှန်မသိတဲ့အတွက် ပိုက်ဆံရဲ့တန်ဖိုးကို သိပ်နားမလည်တော့တာတွေဖြစ်တတ်ပါတယ်။

နောက်ဆုံး အနှစ်ချုပ်ပြီးပြောရမယ်ဆိုလျှင် credit card ဆိုတာ သုံးတတ်ရင်မိတ်ဆွေ၊ မသုံးတတ်လျှင် ရန်သူပါပဲ။
credit card နဲ့သုံးတယ်ဆိုတာ ငွေချေးပြီး သုံးနေတယ်ဆိုတာကို သိထားဖို့လိုအပ်ပါတယ်။ ဝယ်လိုက်၊ ပြန်ဆပ်လိုက်၊ အတိုးပေးလိုက်နဲ့ လုံးပါးပါးတတ်ပါတယ်။
မလိုအပ်လျှင် မသုံးတာ အကောင်းဆုံးပါပဲ။ အင်တာနက်ကနေဈေးဝယ်တာလောက်ဆိုလျှင် debit card ကို သုံးသင့်ပါတယ်(debit card ကတော့ ကိုယ့်ဘဏ်ထဲမှာ ငွေရှိမှ သုံးလို့ရပါတယ်)။

credit card သုံးချင်တယ်ဆိုလျှင်လည်း နားလည်တဲ့လူတွေကို လိုက်လုပ်ခိုင်းပါ။ နှစ်စဉ်ကြေးမပေးရတဲ့ ကတ်ပြားကို အရင်ဆုံးစမ်းသုံးကြည့်ပါ။ ဈေးဝယ်တဲ့အခါမှာလည်း တစ်ကြိမ်တည်းပြန်ဆပ်နိုင်အောင်လုပ်ပါ။ リボ払い ကို ရှောင်ပါ။ မလိုအပ်ဘဲ ငွေမချေးမိပါစေနဲ့။ လက်ရှိမိမိဘယ်လောက်သုံးထားသလဲဆိုတာ ချက်ခြင်းသိနိုင်မယ့် application တွေ ဖုန်းထဲမှာထည့်ထားပြီး စီမံခန့်ခွဲပြီးသုံးပါ။ credit card အကြောင်းနားမလည်သေးခင် ကတ်ပေါင်းစုံမသုံးဘဲ ကတ်တစ်ခုတည်းကိုပဲ အဓိကထားသုံးနိုင်လျှင် အကောင်းဆုံးပါပဲ။

မေတ္တာဖြင့်
အကီ ။ ။