ဖေ့စ်ဘုတ် (Facebook) ဝင်ငွေ ဘယ်လိုရသလဲ

ဗန်းမော်သိန်းဖေရဲ့မျှဝေလိုသောအတွေးများ

 

#ဖေ့စ်ဘုတ် (Facebook) ဝင်ငွေ ဘယ်လိုရသလဲ

၂၀၁၆ ခုနှစ်က ထုတ်ပြန်ခဲ့တဲ့ စာရင်းဇယားတွေအရ ဖေ့စ်ဘုတ်ရဲ့တန်ဖိုး (ရှယ်ယာစုစုပေါင်း) ဟာ အမေရိကန်ဒေါ်လာ ၃၅၀ ဘီလီယံဖြစ်ပြီး၊ ဖေ့စ်ဘုတ်ကို တီထွင်သူ မာ့ခ်ဇူကာဘတ်ရဲ့ ပိုင်ဆိုင်မှုဟာ ဒေါ်လာ ၅၄ ဘီလီယံ ဖြစ်ပါတယ်။ ဇူကာဘတ်ရဲ့ ပိုင်ဆိုင်မှုဟာ မြန်မာနိုင်ငံက ပိုင်ဆိုင်တဲ့ နိုင်ငံခြားငွေထက် အများကြီးပိုပါတယ်။

ဒီလောက်များပြားလှတဲ့ ဒေါ်လာဘီလီယံချီတဲ့ ပိုက်ဆံတွေကို ဖေ့စ်ဘုတ်က ဘယ်ကနေဘယ်လို ရနေတာလဲ။

ဒီမေးခွန်းကို လူငယ်တွေက ကျွန်တော့်ဆီကို message ပို့ပြီး မကြာခဏ မေးတတ်ကြတယ်။ သိလည်း သိချင်စရာပါ။

တနေ့တနေ့ ဖေ့စ်ဘုတ်မှာ တက်လာတဲ့ ပို့စ်တွေကို ဖတ်တယ်။ ကွန်မင့်ပေးတယ်။ like; share လုပ်တယ်။ ရေးချင်တာတွေ ရေးတင်တယ်။ ဆဲဖီလ်ရိုက်ပြီး ဓါတ်ပုံတွေ တင်ကြတယ်။ ဆဲကြတယ်။ ဒါတွေအားလုံးအတွက် ဖေ့စ်ဘုတ်ကို ပိုက်ဆံတစ်ပြားမှ ပေးစရာ မလိုဘူး။ (အင်တာနက်သုံးခက ဖုန်းကုမ္ပဏီ၊ အင်တာနက်ကုမ္ပဏီက ယူတာပါ)။ ဖေ့စ်ဘုတ်က တစ်ပြားမှ မရပါဘူး။

ဖေ့စ်ဘုတ်ပိုက်ဆံ ဘယ်လိုရတယ်ဆိုတာ သာမန်လူတွေ အတော်များများ မသိကြပါဘူး။ ဘာလို့လဲဆိုတော့ ဖေ့စ်ဘုတ်ပေါ်မှာ အဲဒီသဲလွန်စလေးကို တစ်စွန်းတစတောင် မတွေ့ရလို့ပါ။ ဖေ့စ်ဘုတ်ကို စီးပွားဖြစ်သုံးနေသူတွေနဲ့ ကြော်ငြာတင်တဲ့ ကုမ္ပဏီကြီးတွေလောက်ပဲ သိကြပါတယ်။

အဲဒီလျှို့ဝှက်ချက်ကို အခု ပြောပြပါမယ်။

တချို့ ပစ္စည်းရောင်းချင်သူတွေဟာ ဖေ့စ်ဘုတ်မှာ Page တစ်ခုတည်ဆောက်ပြီး အဲဒီ Page ပေါ်မှာ ကြော်ငြာချင်တဲ့ ပစ္စည်းကို စာနဲ့ ဓါတ်ပုံတင်ပြီး boost post ဆိုတဲ့ ခလုတ်ကို နှိပ်လိုက်ရင် ဖေ့စ်ဘုတ်က ဖေ့စ်ဘုတ်သုံးသူတွေဆီကို ပို့ပေးလိမ့်မယ်။ Sponsored Page ဆိုပြီး လူတွေရဲ့ home page မှာ လာပေါ်ပါတယ်။ အဲဒီ Page ကို လူဘယ်နှစ်ယောက် ဘယ်နှစ်ရက်ဆိုတာက ပိုက်ဆံဘယ်လောက်ပေးတယ်ဆိုတဲ့ အပေါ်မှာ မူတည်ပါတယ်။ ကြော်ငြာခကို Credit Card နဲ့ ပေးရပါတယ်။ အဲဒါကို ဖေ့စ်ဘုတ်ကုမ္ပဏီက ရတယ်။ (ဒါကို ခေတ်မှီတဲ့ မြန်မာစီးပွားရေးသမားအတော်များများ သိကြပါတယ်)။

နောက်တခါ ဖေ့စ်ဘုတ်ကနေ မွေးနေ့အတွက် ကိတ်မုန့်နဲ့ မီးထွန်းထားတဲ့ ဖယောင်းတိုင်ပုံလေးကို မွေးနေရှင်ဆီပို့ပေးတာမျိုး၊ Valentine day မှာ ချစ်သူဆီကို ပန်းစည်းပုံလေးတွေ ပို့ပေးတာလေးတွေ လုပ်ပေးတယ်။ အဲဒါတွေကို virtual gifts လို့ ခေါ်ပြီး ဖေ့ဘုတ်ကနေ ပိုက်ဆံပေးဝယ်ရတယ်။

ကြော်ငြာချင်သူတွေရဲ့ banner လို့ ခေါ်တဲ့ ကြောငြာစာတမ်းထိုးပေးတာ၊ ကြော်ငြာပုံလေးတွေကို Microsoft ဝက်ဆိုက်ဒ်နဲ့ ပေါင်းပြီး ကြော်ငြာပေးတယ်။ တစ်ခါတလေ PayPal လိုမျိုး ဖေ့စ်ဘုတ်က ကြားပွဲစားလုပ်ပြီး အရောင်းအဝယ်ဖြစ်ရင် ကော်မရှင်ခ ယူပါတယ်။

တကယ်တမ်းက အဲဒီကြော်ငြာနည်းတွေကနေ ရတဲ့ ဝင်ငွေဟာ နည်းနည်းလေးပါ။ ဖေ့စ်ဘုတ်ကို အကြီးအကျယ် ဒေါ်လာဘီလီယံချီတဲ့ ငွေတွေရစေတဲ့ ကြော်ငြာနည်းကို ဇူကာဘတ်က (CEO မစ္စစ်ရှယ်ရီစတင်းဘတ်နဲ့ ပေါင်းပြီး) ၂၀၀၉ ခုနှစ်မှာ စတင်လိုက်တာပါ။ ဖေ့စ်ဘုတ်က အဲဒါကို "engagement ads"လို့ နာမည်ပေးလိုက်တယ်။

ဇူကာဘတ်ဟာ သတင်းစာ၊ မဂ္ဂဇင်း၊ တီဗီ၊ Google; Yahoo နဲ့ တခြားဝက်ဆိုက်ဒ်စတာတွေရဲ့ ကြော်ငြာနည်းကို မကြိုက်ဘူး။ အလုပ်မဖြစ်ဘူးလို့ ထင်တယ်။ ဘာဖြစ်လို့လဲဆိုတော့ အဲဒီကြော်ငြာနည်းက မြှားအစင်းတစ်ရာကို ပစ်လွှတ်လိုက်တယ်။ တစ်ယောက်တလေကိုတော့ မှန်မှာပဲ ပုံစံနဲ့ ကြည့်သူ ရှိရှိ မရှိရှိ ပုံမှန်တင်ပေးနေတယ်။

ဇူကာဘတ်ကတော့ တကယ်ဝယ်ချင်သူဆီကို ကြော်ငြာကို ပို့ပေးချင်တယ်။ အဲဒီလို လုပ်ဖို့ကလည်း ဖေ့စ်ဘုတ်မှာ အားသာချက်ရှိနေတယ်။ အဲဒါက ဖေ့စ်ဘုတ်ရဲ့ profile ကနေ လူငယ်လား၊ လူကြီးလား၊ စာအုပ်ဖတ်တာ၊ ရုပ်ရှင်ကြည့်တာ၊ ဂေါက်သီးကစားတာစတဲ့ ဝါသနာပါတာတွေကို သိနိုင်တယ်။

ဥပမာ ရုပ်ရှင်ကားကြော်ငြာချင်သူက ဖေ့စ်ဘုတ်ဆီမှာ ကြော်ငြာအပ်တယ်။ ရုပ်ရှင်ကားက မြီးကောင်ပေါက်လူငယ်ကြိုက် အချစ်ကား။ ဖေ့စ်ဘုတ်က ရုပ်ရှင်ကားကြော်ငြာကို သူ့ဆီမှာ ဖေ့စ်ဘုတ်မှတ်ပုံတင်ထားသူတွေထဲက အသက် ၁၆ နှစ်နဲ့ ၂၀ ကြား လူငယ်တွေဆီ ပို့ပေးလိုက်တယ်။ ကလေးတွေနဲ့ လူကြီးတွေဆီ မပို့ဘူး။ ဒီတော့ အဲဒီရုပ်ရှင်ကားကို အရမ်းလူကြည့်များသွားတယ်။ နောက်ပိုင်းမှာ ကုမ္ပဏီတွေဟာ ဖေ့စ်ဘုတ်မှာ ကြောငြာရတာ တီဗွီ၊ သတင်းစာ ၊ Google တို့မှာ ကြော်ငြာတာထက် အလုပ်ပိုဖြစ်တယ်ဆိုပြီး ဖေ့စ်ဘုတ်မှာ ကြော်ငြာတွေကို အလုအယက် အပ်လာကြတယ်။

ဖေ့စ်ဘုတ်ဟာ ကြော်ငြာတစ်ခုကို လူတစ်ထောင်ကြည့်မှ ၅ ဒေါ်လာပဲ ယူပါတယ်။ ယနေ့ ကမ္ဘာပေါ်မှာ ဖေ့စ်ဘုတ်သုံးနေသူပေါင်း သန်း ၅၀၀ ရှိပါတယ်။ ဖေ့စ်ဘုတ်ဟာ ဒီလူတွေဆီ ကြော်ငြာတွေပို့ရင်း နေ့စဉ်ဒေါ်လာ သန်းပေါင်းများစွာ ဝင်နေပါတယ်။

Facebook; Google; Yahoo စတဲ့ ကုမ္ပဏီကြီးတွေရဲ့ ကြော်ငြာပုံတွေ အသေးစိပ်ကို သိချင်ရင် နောင်ဖေ့စ်ဘုတ်ကုမ္ပဏီအကြောင်း စာအုပ်ရေးရင် ဖတ်ကြည့်နိုင်ပါတယ်။

မှတ်ချက်။ လောလောဆယ်မှာ ကြောငြာကနေ ဝင်ငွေ အများဆုံး ရနေတဲ့ ကုမ္ပဏီက Google ပါ။ ဖေ့စ်ဟာ သူ့ကို မကြာခင် ကြော်ငြာခဝင်ငွေမှာ ဖြတ်ကျော်သွားမယ်လို့ လူတွေက ခန့်မှန်းထားကြပါတယ်။

ဗန်းမော်သိန်းဖေ
၂၃-၀၅-၂၀၁၇တ