ကျော်သူနဲ့ မူဆာ ဘယ်သူက သွေးပိုရဲသလဲ ?
စိန်ကုလားကို တာမွေအရိုးကုန်းကလို့သာ နာမည်တပ်ရတာ။ တကယ်တော့ တာမွေအိုးစုထွက် လူမိုက်တစ်ယောက်ပဲ ဆိုပါတော့။ အဲဒီအချိန်က ရန်ကုန်မှာ “ဇ” ရှိတဲ့ လူမိုက်တွေက တာမွေအိုးစုနဲ့ ကြည့်မြင်တိုင် ဆင်မလိုက်ကပဲ ထွက်လာလေ့ရှိပါတယ်။ စိန်ကုလားနဲ့ မအူကုန်းသား မူဆာက တာမွေအပိုင်သားချင်းဆိုတော့ ထောင်ထဲမှာ “အိုးစား”တွေ ဖြစ်နေတယ်။ စိုးမြတ်ကြီး မရှိတဲ့နောက် အင်းစိန်ထောင်မှာ “ဆေးရုံကြီးအုပ်စု”က နေရာပိုရလာတယ်။ ဆေးရုံကြီးအုပ်စုဆိုတာကတော့ ဆေးရုံကြီး ရင်ခွဲရုံမှာ မျိုးရိုးစဉ်ဆက် အလုပ်လုပ်လာခဲ့တဲ့ အိနိ်္ဒယနွယ်ဖွားတွေကို ဆိုလိုတာပါ။ သူတို့တွေက အရေးအခင်းခေါင်းဖြတ်နဲ့ အစုလိုက်ထောင်ကျလာတာ ဖြစ်ပါတယ်။ သူတို့ထဲမှာ စိန်ဝင်းနဲ့ မတ်သီးဝါးလားတို့က ထင်ရှားပါတယ်။ သူတို့ကို ချုပ်ထားတာကတော့ မူဆာပါပဲ။ လူမျိုးရေးအရလည်း ပိုပြီးစည်းလုံးတာပေါ့။
သူတို့အုပ်စုက စိုးမြတ်ကြီးမရှိတော့တဲ့အချိန်မှာ စိုးမြတ်ကြီးရဲ့ အစွယ်အပွားတွေကိုပါ ရှင်းပစ်ချင်တာပါ။ ထောင်အာဏာပိုင်နဲ့ ပေါင်းပြီး မူဆာက စိုးမြတ်ကြီးတပည့်တချို့ကို ထောင်ပြောင်းထည့်ပြီး တချို့ကို ရဲဘက်ထည့်တဲ့နည်းနဲ့ ရှင်းနေပါတယ်။ ရှင်းရမယ့်အထဲမှာ ကျော်သူလည်းပါလာတယ်။ တစ်ရက်တော့ ကျော်သူနေတဲ့ အဆောင်ထဲကို မူဆာနဲ့ သူ့တပည့်တွေ ရောက်လာတယ်။ မူဆာက “ကျော်သူ (ဘ) ဦးလှမောင်” ဆိုပြီး အော်လိုက်တယ်။ ကျော်သူက အိပ်နေရာက ထလာတယ်။ ထောင်ပြောင်းဆိုရင် ညဘက်မှခေါ်လေ့ရှိပြီး နေ့ခင်းဘက်ခေါ်တာဖြစ်တဲ့အတွက် ရဲဘက်ထွက်ဖို့ ခေါ်တယ်ဆိုတာ သေချာသွားတယ်။ ကျော်သူက မူဆာ့ကို “မင်း လာနောက်နေတာလား”လို့ လှမ်းမေးတယ်။ မေးလည်းမေးလောက်စရာပဲ။ စိုးမြတ်ကြီးရှိကတည်းက ကျော်သူ ရဲဘက်မထွက်ရအောင် ထောင်ကျရုံးကိုသာမက အကျဉ်းဦးစီးဌာနရုံးချုပ်အထိ အကုန်အကျခံထားခဲ့တာပါ။ ဒါပေမဲ့ ကျော်သူခေတ် ကုန်သွားပါပြီ။ မူဆာက မချိုမချဉ် မျက်နှာထားနဲ့ “သေသေချာချာ ကြည့်လိုက်ဦး ကျော်သူ၊ မင်းတကယ် ရဲဘက်ထွက်ရမှာ” လို့ ပြောလိုက်တော့ ကျော်သူမျက်နှာ ရဲခနဲ ဖြစ်သွားတယ်။ ဒါဟာ သူတို့လောကထဲမှာ သက်သက် အရှက်ခွဲတာလို့ ခံစားလိုက်ရတယ်။ ကျော်သူက ထောင်းခနဲ ဒေါသထွက်သွားပြီး လှမ်းပြောတယ်။
“ဟိတ်ကောင်မူဆာ ရဲဘက် မထွက်အောင် လုပ်တဲ့နည်းရှိတယ် သိလား”
“အေး ရှိရင် လုပ်ကြည့်လိုက်လေကွာ”
ကျော်သူက မူဆာမျက်နှာနားကို တိုးကပ်လိုက်ပြီး မျက်လုံးချင်းဆိုင် ပြောလိုက်တယ်။
“ကြည့်ထားလိုက်၊ ကျော်သူ ဘယ်တော့မှ ရဲဘက်ထွက်မှာ မဟုတ်ဘူး”
မူဆာက အပိုင်လုပ်ပြီးသားမို့ ကျော်သူ့ကို ရင်မဆိုင်တော့ဘဲ အလျော့ပေးလိုက်တယ်။ ဒါပေမယ့် ကျော်သူကိုလည်း မခံချင်အောင် လေချွန်ပြီး ပြန်ထွက်သွားတယ်။ ကျော်သူက ဘာလုပ်ရမယ်ဆိုတာ ဆုံးဖြတ်ပြီးပုံပဲ။ ရဲဘက်ထွက်ဖို့အတွက် စာရင်းထဲပါတဲ့ အကျဉ်းသားတချို့က အိပ်ယာလိပ်တွေ၊ အ၀တ်အစားတွေ သိမ်းဆည်းနေပေမယ့် ကျော်သူကတော့ ဘာမှမလုပ်ဘဲ တောင်ယာထဲကို ထွက်သွားတယ်။ ပြီးတော့မှ အဆောင်ဝကနေ ခြေကျင်းခတ်ဖို့ ခေါ်ရင်သွားမယ့်ပုံစံနဲ့ စောင့်နေတယ်။ မျက်လုံးကတော့ အငြိမ်မနေဘူး။ မိန်းဂျေးလ်က လှုပ်ရှားမှုတွေကို စောင့်ကြည့်နေတယ်။ မိန်းဂျေးလ်ဆိုတာက အင်းစိန်ထောင်တစ်ခုလုံးရဲ့ လူဝင်လူထွက်တွေကို ကွပ်ကဲရတဲ့ နေရာဖြစ်ပြီး ထောင်မှူးကြီးတွေ၊ ထောင်မှူးတွေ ရုံးထိုင်တဲ့နေရာ ဖြစ်ပါတယ်။ သိပ်မကြာခင်မှာပဲ မူဆာက ရဲဘက်ထွက်မယ့် လူစာရင်းပါတဲ့ စာရွက်တွေကို ကိုင်ပြီး ထောင်မှူးကြီးရုံးခန်းက ထွက်လာတယ်။ ကျော်သူက အဆောင်ဝကနေပြီး မူဆာကို “ခဏ”ဆိုပြီး လှမ်းခေါ်လိုက်တယ်။ မူဆာက တစ်ခုခုမေးမယ်ထင်ပြီး ရောက်အလာမှာ ကျော်သူက ခါးကြားမှာ ၀ှက်ထားတဲ့ သံချွန်နဲ့ ဆင့်ထိုးတော့တာပဲ။ မူဆာက အံ့သြလွန်းလို့ ခုခံချိန်တောင်မရဘူး။ ကျော်သူက သူ့ကို ချွတ်နဲ့ထိုးနေပါတယ် ဆိုပြီး အော်ဟစ်ပြေးလွှားနေတယ်။ ရုတ်တရက်ဆိုတော့ ဘယ်သူကမှလည်း ၀င်မဆွဲရဲဘူး။ မူဆာက အရေးအကြောင်းမှာသွေး ပျက်နေတာကတော့ အားလုံးမြင်လိုက်ရတယ်။ နောက်တော့ ထောင်ဝါဒါတွေ ရောက်လာပြီး ကျော်သူကို ဖမ်းချုပ်လိုက်တယ်။ ကျော်သူက အေးအေးဆေးဆေးပဲ မခုခံဘဲ အဖမ်းခံပါတယ်။ မူဆာကတော့ ချွတ်နဲ့ထိုးထားတဲ့ ဒဏ်ရာဒဏ်ချက်တွေ အများကြီးပဲ။ ၀န်ထမ်းတွေက သွေးအလိမ်းလိမ်း ဖြစ်နေတဲ့ မူဆာကို အင်းစိန်ဆေးရုံးကို အမြန်ဆုံး Refer ထုတ်လိုက်တယ်။ ဒါကြောင့် မူဆာ ကံကောင်းသွားပြီး အချိန်မီ အသက်ကယ်တင်လိုက်နိုင်တယ်။ ကျော်သူကိုတော့ ချက်ချင်းပဲ ခြေကျင်းခတ်ပြီး စစ်ခွေးတိုက်ကို ပို့လိုက်တယ်။ ဒီဖြစ်ရပ်ကြောင့် ကျော်သူကို ရဲဘက်စာရင်းထဲက ပယ်ဖျက်ပြီး အင်းစိန်ထောင်က နောက်မှုဖွင့်လိုက်တယ်။ ဘာပဲပြောပြော လောလောဆယ်တော့ ကျော်သူ ရဲဘက် မထွက်ရတော့တာ သေချာသွားတယ်။ ဒါကြောင့် ကျော်သူက မူဆာကို ရဲဘက်မထွက်တဲ့ နည်းရှိတယ်လို့ ပြောခဲ့တာဖြစ်မှာပေါ့။ မူဆာက ကျော်သူ့ကို လျှော့တွက်ခဲ့တဲ့အမှားပဲပေ့ါ။
စစ်ခွေးတိုက်ကို အပို့ခံရတဲ့ ဘယ်အကျဉ်းသားမဆို စစ်ခွေးတိုက်ရောက်ရင်တော့ သင်ခန်းစာ အကြီးကြီးနဲ့ ကြုံကြရတာပါပဲ။ စစ်ခွေးတိုက်ရဲ့ တာဝန်ခံက တပ်ကြပ်ကြီး ဗိုလ်ကံဖြစ်ပါတယ်။ ဗိုလ်ကံက ခေတ်အဆက်ဆက် ထောင်က စစ်ခွေးတွေကို သင်ကြားပေးရတဲ့ ကျွမ်းကျင်သူ ဆရာကြီး ဖြစ်ပါတယ်။ ဒါ့အပြင် ပြစ်ဒဏ်နဲ့ ရောက်လာတဲ့ အကျဉ်းသားတွေကို နှိပ်စက်ရာမှာလည်း နာမည်ကြီးပါတယ်။ စစ်ခွေးတိုက် အ၀ကနေ တိုက်ထဲအ၀င်အထိဆိုရင် ကိုက် ၃၀၀ လောက် ရှိပါတယ်။ အဲဒီလမ်းတစ်လျှောက်ကို အစိုးရထုတ် စက်အုတ်တွေကို ခွဲပြီးခင်းထားတယ်။ တမင် အချွန်အတက်တွေနဲ့ မျက်နှာပြင်မညီညာအောင် လုပ်ထားတာ ဖြစ်ပါတယ်။ အကျဉ်းသားတွေက စစ်ခွေးတိုက်အ၀င်ကတည်းက တိုက်ခန်းအထိ သံခြေကျင်းကိုကိုင်ပြီး မိချောင်းသွား သွားရတယ်။ အကျဉ်းသားတွေ မြန်မြန်သွားနိုင်အောင် နောက်ကနေ စစ်ခွေးနဲ့မောင်းတယ်။ စစ်ခွေးတွေထဲမှာ “ဒေစီ”ဆိုတဲ့ ခွေးမလေးက အစွာဆုံးပဲ။ အုတ်ခဲအကျိုးတွေကြောင့် ဒူးတွေ တံတောင်ဆစ်တွေ ရှပြီး ဆက်မသွားတဲ့ အကျဉ်းသားတွေကို ဗိုလ်ကံက ဒေစီနဲ့ ကိုက်ခိုင်းတယ်။ ဒေစီကလည်း လူနီးပါး နားလည်တယ်။ တကယ်မကိုက်ဘဲ ဟိန်းဟောက် ခြိမ်းခြောက်တာကို ကျွမ်းကျင်တယ်။ နောက်ဆုံး ခွေးကိုက်မှာ ကြောက်တဲ့အကျဉ်းသားဟာ လဲရင်လဲ၊ ကွဲရင်ကွဲဆိုပြီး အခန်းထဲရောက်တဲ့အထိ လေးဘက် ကုန်းသွားရတာပဲ။ တိုက်ခန်းရောက်တော့ တံတောင်မှာ သွေးချင်းချင်းနီနေပြီ။ စစ်ခွေးတိုက် တစ်ခေါက်ရောက်ပြီးရင်တော့ ပြန်လာတဲ့ အကျဉ်းသားဟာ အတော်အပိုးကျိုးသွားတယ်။ နာမည်ကြီး စစ်ခွေးတိုက်ကိုတော့ အရမ်းဆိုးတဲ့ လူမိုက်တွေရော၊ နိုင်ငံရေးသမားတွေရော အကုန်လုံးနီးပါး ရောက်ကြပါတယ်။
ကျော်သူ့ကိုလည်း စစ်ခွေးတိုက်မှာ ပညာပေးမယ်လို့ အားလုံး ထင်ထားကြတယ်။ ဒါပေမယ့် စိုးမြတ်ကြီး တပည့်တပန်းဟောင်းတွေ စစ်ခွေးတိုက်မှာ ရှိနေသေးတော့ အ၀င်တစ်ချက်ပဲ ကျော်သူ တော်တော်ခံလိုက်ရတယ်။ နောက်ပိုင်းတော့ စစ်ခွေးတိုက်မှာ ကျော်သူက အနေချောင်၊ အစားချောင်သွားတယ်။ တစ်ဖက်မှာလည်း သူလိုချင်တဲ့အတိုင်း ရဲဘက် မထွက်ရတော့ဘဲ မူဆာကို သတ်ရန် အားထုတ်မှုနဲ့ နောက်မှုပဲထွက်ရတယ်။ မူဆာ မသေတဲ့အတွက် နောက်မှုကလည်း ပြစ်ဒဏ်ကြီးမှာ မပူရတော့ဘူး။
ဒါပေမယ့် အင်းစိန်ဆေးရုံမှာ အသည်းအသန်ကုပြီး ပြန်ရောက်လာတဲ့ မူဆာက ကျော်သူကို အခဲမကျေဘူး။ မူဆာရဲ့ အင်အားစုတွေကလည်း ထောင်ထဲမှာ ဓန၊ အာဏာ၊ အင်အားအပြည့်နဲ့ အခြေအနေ အတော်ကောင်းနေတယ်။ ဆေးရုံကြီးကနေ ထောင်ကျလာတဲ့ မတ်သီးဆိုရင် သူအိပ်တဲ့ အိပ်ယာခေါင်းရင်းမှာ Lucky Strike နဲ့ Mild Seven စီးကရက်ဗူးတွေကို ကာတွန်လိုက် ထပ်ထားတယ်။ အဲဒီခေတ်က နွားနီနို့မှုန့် ထုပ်နဲ့ လက်ရွေးစင်ကော်ဖီမှုန့်ထုပ်ကို အစည်းလိုက် သူ့ဘေးမှာ ထားထားတယ်။ ဘယ်လောက်ပူပူ ဘယ်လောက်အိုက်အိုက် လယ်သာဂျာကင်နဲ့ ဂျင်းဂျာကင်တွေကို ထည်လဲဝတ်နေတယ်။ လူရည်လည်တော့ ၅ (ည)တွေနဲ့လည်း တည့်အောင်ပေါင်းတယ်။ သင်္ကြန်လို အခါကြီးရက်ကြီးမှာ တစ်ဆောင်လုံးကို ခေါက်ဆွဲကြော် ကျွေးလိုက်၊ ရွှေရင်အေး တိုက်လိုက်နဲ့ အလှူကြီးအတန်းကြီး လုပ်နိုင်တယ်။ သူတို့တွေရဲ့ ကျောထောက်နောက်ခံနဲ့ မူဆာက တန်ခိုးကြီးလာတာ ဖြစ်ပါတယ်။ အခုလည်း တစ်ဖက်သတ် ခံလိုက်ရတဲ့အတွက် မူဆာက သိက္ခာဆယ်တဲ့အနေနဲ့ ကျော်သူ့ကို ဖြိုချင်တယ်။ ကျော်သူ့ကို ဘယ်လို လက်စားချေရမလဲဆိုပြီး အကွက်ချောင်းနေတယ်။ ကျော်သူကလည်း မူဆာတို့ လက်ချက်မိမှာစိုးလို့ စစ်ခွေးမှာပဲ အထိုင်ချပြီး ဆက်နေတယ်။ မူဆာက ကျော်သူ့ကိုရှင်းဖို့အတွက် သူနဲ့ တစ်ပိုင်တည်းသားဖြစ်တဲ့ စိန်ကုလားကို စည်းရုံးတယ်။ ဒါပေမဲ့ ကျော်သူ စစ်ခွေးတိုက်က ထွက်မလာမချင်း သူတို့ဘာမှလုပ်လို့ မရဘူးဖြစ်နေတယ်။
ဒီအတောအတွင်းမှာပဲ နိုင်ငံရေးအကျဉ်းသားတွေကြားမှာ လှုပ်ရှားမှုကြီးတစ်ခု ဖြစ်ပေါ်လာတယ်။ ဒီလှုပ်ရှားမှုကတော့ စက်တင်ဘာ ၂၅ ရက်နေ့မှာ စတင်ပြုလုပ်တဲ့ အစာငတ်ခံ ဆန္ဒပြပွဲ Huanger Strike ပဲ ဖြစ်ပါတယ်။ ဒီလှုပ်ရှားမှုဟာ ထောင်အာဏာပိုင်တွေအတွက် တုန်လှုပ်ခြောက်ခြားခဲ့ရတဲ့ ဖြစ်ရပ်တစ်ခု ဖြစ်ခဲ့ပြီး ထောင်အပြင်က ပြည်သူတွေ မရိပ်မိအောင် လော်စပီကာတွေနဲ့ “စာဥ” သီချင်းဖွင့်ပြီး နိုင်ငံရေးသမားတွေကို ဂန်းပိုက်နဲ့ ရိုက်နက်ခဲ့ရတဲ့အထိ ဖြစ်ခဲ့ပါတယ်။ တကယ်တော့ ဒီလှုပ်ရှားမှုဟာ စစ်ခွေးတိုက်မှာရှိတဲ့ နိုင်ငံရေးသမားတချို့က စခဲ့တာဖြစ်ပြီး လှုပ်ရှားမှုရဲ့ ရည်ရွယ်ချက်ကတော့ ၁၉၉၀ အထွေထွေ ရွေးကောက်ပွဲမှာ အနိုင်ရရှိခဲ့တဲ့ အမျိုးသားဒီမိုကရေစီအဖွဲ့ချုပ်ကို န၀တအစိုးရက အာဏာမလွှဲတဲ့အတွက် အစာငတ်ခံ ဆန္ဒပြခဲ့တာ ဖြစ်ပါတယ်။ ဒီတိုက်ပွဲမှာ ၅ (ည)တွေ အထိနာခဲ့သလို သွေးရဲတယ်ဆိုတဲ့ ကျော်သူလည်း အထိနာသွားခဲ့ပါတယ်။
ဆက်လက်ဖော်ပြပါမည်
www.tomorrow.com.mm/?q=articles/3409
No comments:
Post a Comment
မိတ်ဆွေ...အချိန်လေးရရင် blogg မှာစာလာဖတ်ပါနော်
ဗဟုသုတ ရနိုင်တယ်။