Lazy Club ကိုနိုင်ဇော် ပြောပြတဲ့ ဂစ်တာသမားဆိုတာ

ဂီတအကြောင်း သောင်းပြောင်းထွေလာ

 

Lazy Club ကိုနိုင်ဇော် ပြောပြတဲ့ ဂစ်တာသမားဆိုတာ
=====================================
အမည် - ကိုနိုင်ဇော်
အလုပ်အကိုင် - ဂစ်တာပညာရှင်
(Lazy Club Band)
---------------------------------------
လုပ်ငန်းခွင်သို့ဝင်ရောက်လာပုံ
---------------------------------------
ရန်ကုန်တက္ကသလိုလ်၌ ဥပဒေတတိယနှစ်ကျောင်းသား
တစ်ယောက်အဖြစ် ပညာသင်ယူနေစဉ်ကာလ ၁၉၉၀ခုနှစ်မှ
စတင်၍ ရွှေသံစဉ်တီးဝိုင်းတွင် ဒုတိယဂစ်တာသမားအဖြစ်
တီးခတ်ခဲ့ပြီး Aces တီးဝိုင်း၌လည်း အချိန်ပိုင်းဝင်တီးခဲ့သည်။
တက္ကသိုလ်မှဘွဲ့ရရှိခဲ့ပြီး နောက်ပိုင်းတွင် Lazy Club တီးဝိုင်းသို့
ပြောင်းရွှေ့ဝင်ရောက်၍ လက်ရှိအချိန်အထိ Lazy Club တွင်
Lead ဂစ်တာတီးခတ်သူအဖြစ် လုပ်ကိုင်လျှက်ရှိသည်။

-----------------------------
လုပ်ငန်းအောင်မြင်မှုများ
------------------------------
Lazy Club ၏တီးခတ်မှုအဖြစ် “မြတ်နှိုးခွင့်” Unplugged Live
Show ဗီစီဒီ၊ ထွန်းအိန္ဒြာဗို၏ “ဒိုင်ယာရီ” တစ်ကိုယ်တော်
Live Show နှင့် “စိုးလွင်လွင် အမှတ်တရ” Live Show များကို
အမှတ်တရရှိခဲ့ပြီး နိုင်ဇော်၏တစ်ကိုယ်တော်ဂီတမှတ်တိုင်များ
ဖြစ်သော “မြေအောက်ကကြိုး” နှင့် “သိပ္ပံခေတ်ရဲ့သားကောင်များ”
အမည်ရှိ ဂီတတေးစီးရီးများနှင့် ဂီတနုတ်စ်စာအုပ်များမှာလည်း
ဂီတဝါသနာရှင်ပရိသတ်များ လက်သို့ ရောက်ရှိခဲ့ပြီးဖြစ်သည်။

----------------------------------------------------------------------
ဂစ်တာသမားတစ်ယောက်ဖြစ်ဖို့အတွက် အသစ်ဘဝမှာ
အခက်အခဲတွေတော်တော်ဖြတ်သန်းခဲ့ရတယ်။
---------------------------------------------------------------------
“အသစ်ဘဝတွေမှာ ဂစ်တာသမားတစ်ယောက်ကို အဆိုတော်
တွေက တော်ရုံတန်ရုံမယုံကြည်ဘူး။ စတိတ်ရှိုးဆိုမယ်ဆိုရင်
ဂစ်တာသမားဘယ်သူလဲလို့ မေးကြတယ်။ အကြောင်းမသိတဲ့
ဂစ်တာသမားတီးမယ်ဆိုရင် သူတို့ဆိုတဲ့အခါမှာ အနှောင့်အယှက်
ဖြစ်မှာစိုးရိမ်တာမျိုး ရှိတယ်။ ဂစ်တာကိုတော်တော်များများကလည်း
တီးတတ်ကြတယ်လေ။ အဆိုတော်ကလည်း ဂစ်တာသမားကို
စိတ်မချရင် ဖယ်ခိုင်းလိုက်ပြီး ကိုယ်တိုင်တီးပြီးဆိုတတ်ကြတယ်။
အဲဒါကြောင့် ဂစ်တာသမားအသစ်တစ်ယောက်ဘဝမှာတုန်းက
ဒီလိုမျိုးဖြစ်ရပ်တွေ တွေ့ကြုံခံစားခဲ့ရဖူးတယ်။ ကိုယ်ကအရမ်း
ကြိုးစားလေ့ကျင့်ထားပြီး ဒီပွဲမှာတီးပြလိုက်မယ်လို့
ရည်မှန်းထားသမျှ တကယ်တမ်းစင်ပေါ်လည်းရောက်ရော
ကိုယ့်ကိုမယုံကြည်တာတွေ၊ ဂရုမစိုက်တာမျိုးတွေဖြစ်လာတော့
စင်အောက်မှာ စိတ်မကောင်းဖြစ်ပြီး သွားထိုင်နေခဲ့ရဖူးတယ်။

ဒီနေ့အချိန်မှာတော့ နိုင်ဇော်တီးလို့မဆိုဘူးဆိုတာမျိုး
မရှိတော့တဲ့အတွက် အသင့်အတင့်အားဖြင့် ဂစ်တာသမား
တစ်ယောက်ဖြစ်ပြီလို့ ပြောလို့ရပါတယ်။ ကိုယ်ဒီအခြေအနေကို
ရောက်လာတဲ့အချိန်မှာ လက်ရှိဂစ်တာသမားဝါသနာရှင်
လူငယ်တွေကိုလည်း ကိုယ့်လိုမျိုးမခံစားရအောင် အတတ်နိုင်ဆုံး
ကူညီတယ်။ သူတို့ဂစ်တာတီးဖို့အတွက် ဘယ်လောက်ကြိုးစား
ခဲ့ရတယ်ဆိုတာ နားလည်တယ်။ ကိုယ်စင်အောက်မှာ
ထိုင်နေခဲ့ရတဲ့အချိန်တွေအတွက် ကိုယ်ချင်းစာတတ်သွားပြီ။
အဲဒါကြောင့် ဒီနေ့လူငယ်တွေကိုလည်း နောင်တစ်ချိန်
ဂစ်တာသမားကြီးတွေဖြစ်သွားတဲ့အခါမှာ ဂစ်တာသမား
အသစ်ဘဝနဲ့ ကြိုးစားနေတဲ့ လူငယ်တွေအပေါ်မှာ
နားလည်မှု၊ ကူညီမှုတွေ ထားရှိစေချင်တယ်”

--------------------------------------------------------------------------
ဂစ်တာသမားတစ်ယောက်ဖြစ်ဖို့ ကြိုးစားရမယ့်အချိန်တွေကို
မနှမြောသင့်ဘူး
-------------------------------------------------------------------------
“ဂစ်တာသမားတစ်ယောက်ဖြစ်ဖို့အတွက် ကြိုးစားမှု၊
လေ့လာမှုတွေက အရမ်းများတယ်။ ကွန်ပျူတာအပိုင်းကိုလည်း
သက်သက်လေ့လာရတယ်။ Music Arrangement ပိုင်းကိုလည်း
လေ့လာရမယ်။ စာတွေဖတ်ပြီး လေ့လာရတယ်။ အဲဒါတွေအပြင်
နိုင်ငံခြားခွေတွေနဲ့ ဂီတအမျိုးအစားအားလုံးကို နားထောင်ပြီး
Live Show တွေကိုလည်း လေ့လာရတယ်။ ဂစ်တာအသုံးအနှုန်းတွေ
ဂစ်တာကာရန်တွေကို ကမ္ဘာ့ဂီတလောကမှာ တိုးပွားလာတာနဲ့အမျှ
သိအောင်လုပ်ရတယ်။ အဲဒီလိုကြိုးစားနေတဲ့ အချိန်တွေမှာ
နာမည်မကြီးလို့လဲ စိတ်ဓာတ်မကျခဲ့ဘူး။ ကိုယ်က ဂစ်တာသမား
တစ်ယောက်ပဲဖြစ်ချင်တာ။ နာမည်ကြီးအောင်လို့ တီးချင်ခဲ့တာ
မဟုတ်ဘူး။ တစ်သက်လုံးဂစ်တာကိုပဲ တီးချင်တာ။ အဲဒီလို
စိတ်ဓာတ်မျိုးပဲ ရှိတယ် ”

-----------------------------------------------------------------------------------
တကယ့်ဂစ်တာသမားဆိုတာ ဘက်စုံထောင့်စုံက တီးခတ်နိုင်ရမယ်
----------------------------------------------------------------------------------
“ဂစ်တာတီးတဲ့သူတိုင်းဟာ ဂစ်တာသမားမဟုတ်ဘူး။ ဂီတအများအစား
အားလုံးကို လေ့လာသုံးသပ်နိုင်ပြီး တီးနိုင်တဲ့သူမျိုးကိုမှ ဂစ်တာသမားလို့
ခေါ်နိုင်မယ်။ အခုအချိန်မှာ ဂီတအလိုက် မော်ဒန်ရော့ခ်၊ ဟစ်ပ်ဟော့ပ်၊
ပန်ခ့်၊ ကန်းထရီး၊ ပေါ့ပ် ဆိုပြီးတော့ တစ်လိုင်းစီခွဲပြီး တီးသွားကြတယ်။
အမှန်မှာ တစ်လိုင်းတည်းတီးပြီး ထင်ပေါ်ကျော်ကြားရတာထက်
များများတီးတတ်ပြီး လူမသိတာမျိုးက ပိုတန်ဖိုးရှိတယ်။
တစ်မျိုးတည်းတီးခတ်ပြီး နာမည်ကျော်ကြားသွားရင် အဲဒီဂစ်တာ
သမားက အဲဒီမှာတင် လမ်းဆုံးသွားလိမ့်မယ်။ သူက ဒီမှာတင်
နာမည်ရသွားတဲ့အတွက် သူ့နာမည်အတွက် တီးရတော့မယ်။
နောက်ထပ်ကြိုးစားဖို့အတွက် သူ့မှာအချိန်ရှိတော့မှာ မဟုတ်ဘူး။
ဂစ်တာသမားဆိုတာ မျိုးစုံတီးခွင့်ရှိတယ်။ ဘယ်ဂီတအမျိုးအစားပဲ
လာလာ သူတို့ဟာ နုတ်စ်တွေ၊ ဂီတသင်္ကေတတွေနဲ့ပဲ ဖွဲ့စည်းထားတာ။
အဲဒီတေ့ာ အမျိုးအစားကိုကြည့်မှာလား တကယ့်ဂီကိုလေ့လာမှာလား
ဆိုတာ စဉ်းစားရမယ်။ မြန်မြန်နာမည်ကြီးဖို့တစ်ခုတည်းကို ဦးတည်ပြီး
လုပ်တာမျိုးကို အားမပေးချင်ဘူး။ ဘယ်လိုင်းကိုဆိုမယ့် အဆိုတော်
မျိုးပဲလာလာ စိန်ခေါ်ပြီးတီးနိုင်တဲ့သူဖြစ်ဖို့ ကြိုးစားနိုင်မှ
ဂစ်တာသမားဖြစ်မှာပါ ”

------------------------------------------------------------------------------
အရေးအကြီးဆုံးက ကိုယ့်ရဲ့ အလုပ်ကို အချိန်တိုင်းသစ္စာရှိဖို့ပါပဲ
------------------------------------------------------------------------------

“ကိုယ်ငယ်စဉ်ကတည်းကလုပ်ခဲ့တဲ့ အလုပ်တစ်ခုကို ဘယ်တော့မှ
သစ္စာမဖောက်ဘူး။ ပေးထားတဲ့ကတိတစ်လုံးကိုလည်း
တာဝန်ယူတယ်။ အလုပ်လုပ်တဲ့နေရာမှာ သူတစ်ဖက်သားက
ကိုယ့်အပေါ်ယုံကြည်မှုထားရှိနိုင်အောင် သေသေချာချာ
လုပ်ကိုင်တတ်ဖို့ကလည်း အရေးကြီးတယ်။ အနုပညာလောကက
အရမ်းခက်တယ်။ လူတစ်ယောက်ကိုကြိုက်ပြီဆိုရင် နောက်က
လိုက်ကြသလောက် မကြိုက်တော့ဘူးဆိုရင်လည်း အလကား
တီးပေးတောင် ခေါ်မယ့်လူမရှိဘူး။

လုပ်ငန်းခွင်မှာလည်း အားလုံးနဲ့ အံဝင်ခွင်ကျ လိုက်လျောညီထွေ
နေတတ်ရတယ်။ ဂီတသမားဆိုတာက ကိုယ်သွားတီးတဲ့နေရာမှာ
အဆင်ပြေသလို နေတတ်စားတတ်ရတယ်။ ကိုယ့်အိမ်မှာ
နေသလို နေရာတိုင်းမှာ စိတ်တိုင်းကျနေချင်လို့ မရနိုင်ဘူး။
အလုပ်ကို နားလည်ရမယ်။ ကိုယ်က ဘာဖြစ်ချင်တာလဲ။
ဂစ်တာတီးချင်တာ။ သူဌေးကြီးဖြစ်ချင်တာ မဟုတ်ဘူး။
အဲဒီတော့ သူဌေးကြီးအဆောင်အယောင်နဲ့ နေစရာမလိုဘူး။
ဒီအလုပ်လုပ်လို့ အောင်မြင်တာနဲ့ ပိုက်ဆံတွေရတာနဲ့
ငါပုံပြောင်းမယ်ဆိုတဲ့စိတ်ဓာတ်မျိုး မရှိသင့်ဘူး။
အောက်ခြေမလွတ်ဘဲ အမြဲတမ်းကိုယ့်ကိုယ်ကို
မှန်မှန်ကန်ကန် သုံးသပ်ဖို့ပဲလိုပါတယ်။ ”

နိုင်ဇော်(Lazy Club)
-----------------------------------------------------------..

november , 2007
People Magazine
#konaing

https://www.mediafire.com/folder/db94d7nshmu2r/နိုင်ဇော်_-_သိပ္ပံခေတ် နိုင်ဇော် သိပ္ပံခေတ်ရဲ့သားကောင်များ

နိုင်ဇော်ရဲ့ နိုင်ဇော် .. နိုင်ဇော်
https://my.pcloud.com/publink/show?code=kZ51HHZMaKB5Oqdut4XEEuzz7BjM4Vtlbky