ရှက်ချိန်တန်ပြီ (မင်းဒင်)

 

မင်း ဒင်

၂၉ နိုဝင်ဘာ၂၀၁၅နေု့ထုတ် သည်ဗွိုက်ဒေးလီးသတင်းစာမှ။ ။

ရှက်ချိန်တန်ပြီ
(မင်းဒင်)
(၁)
ဖူးခက်မြို့စဖန်ဟင်ကမ်းခြေနှင့်မနီးမဝေးရှိမြို့နယ်လူဝင်မှုကြီးကြပ်ရေး
(တောမော)ရုံးသို့၊ကျွန်တော်ရောက်ရှိချိန်သည်နံနက်ဆယ်နာရီ
ဝန်းကျင်ဖြစ်၏။ထိုင်းဘာသာစကားအရ “စဖန်”ဟူသည် တံတားဖြစ်၍၊
“ဟင်” ဆိုသည် မှာ၊ကျောက်တုံးဟုအဓိပ္ပါယ်ရလေရာ၊မြန်မာဘာသာဖြင့်
ကျောက်တံတားအရပ်ဟု ဆိုသော်ရနိုးအံ့ ထင်သည်။

စဖန်ဟင်ကမ်းခြေတဝိုက်သည်ကျောက်သားမြေထူထပ်သော
ဒေသဖြစ်ဟန်ရှိသည်။လွန်ခဲ့သောနှစ်ပေါင်းနှစ်ရာကျော်၊(၁၈)ရာစုနှောင်းပိုင်း
ဝန်းကျင်ကဤစဖန်ဟင်အရပ်တွင်ဧရာမငွေဖြူကျောက်မိုင်းတွင်းများ
ရှိခဲ့ဖူးရာ၊ထိုမိုင်းတွင်းများကိုမြန်မာဘုရင်တို့ချုပ်ကိုင်ပိုင်ဆိုင်ခဲ့ဖူးသည်။

စဖန်ဟင်ကမ်းခြေအဝင်ဝတွင်၊ကွန်ကရိဖြင့်သွန်းလုပ်ပုံဖော်ထားသော
သင်္ကေတမှာ အမြင့်ပေနှစ်ဆယ်ကျော်ခန့် အရွယ်အစားရှိသော ဧရာမလွန်သွားကြီးတစ်ခုပုံဖြစ်၏။ကျောက်မိုင်းတူးရာတွင်အသုံးပြုသည့်
လွန်သွားတစ်ခုကို ပုံစံတူပြုလုပ်ထားခြင်းဖြစ်သည်။

တောမောရုံးအတွင်းသို့ကျွန်တော်ကားမောင်းဝင်လာချိန်တွင်
လူစည်ကားလျက်ရှိပြီ။နိုင်ငံခြားသားအများစုဖြစ်၏ထိုင်းနိုင်ငံအတွင်းတွင်
ရက်ရှည်နေထိုင်ခွင့်၊ပြန်လည်ဝင်ရောက်ခွင့်စသည့်ဗီဇာကိစ္စများအတွက်
ရောက်ရှိနေကြခြင်းဖြစ်သည်။နိုင်ငံခြားသားအချို့မူကား၊စကားပြန်လော၊
အဖော်လောမဝေခွဲနိုင်သည့်ထိုင်းမိန်းမပျိုကိုယ်စီနှင့်ဒွိယံဒွိယံဖြစ်၏။

ဤဒွိယံ၊အကြင်ဒွိယံတို့ကိုမြင်သော်၊လွန်ခဲ့သောဆယ်နှစ်ခန့်က၊ဖူးခက်မြို့ဆီသို့၊
ရနောင်းဖူးခက်ဘတ်စ်ကားစီးလျက်ခရီးဆောင်အိတ်တစ်လုံးဖြင့်၊
စမ်းတဝါးဝါးရောက်ခဲ့ရသောနိုင်ငံပျောက်သူကျွန်တော့်အဖြစ်ကို
ပြန်ပြောင်းအောက်မေ့မိပြန်သည်။ထိုစဉ်ကကျွန်တော်သည်
ထိုင်းမြေနှင့်စိမ်းလှသည့်အပြင်ထိုင်းဘာသာစကားဟူ၍
တစ်နှစ်သုံးလေးဂဏန်းစဉ်မျှကိုပင်သိနားလည်ခဲ့သူမဟုတ်ချေ။

(၂)
ကျွန်တော့်မှာနာကျည်းစရာအတိတ်ရှိခဲ့သည်။ခံပြင်းစရာကောင်းလှသော
ဖြစ်ရပ်အတွေ့အကြုံမြောက်များစွာအနက်တွင်၊ဤဖူးခက်တောမော
(လူဝင်မှုကြီးကြပ်ရေး)မှပေးသောခါးသီးလှသည့်သင်ခန်းစာတို့
တပုံတပင်ရှိခဲ့သည်။

ဤရုံးသည်ကျွန်တော့်အား၊ခုနှစ်ရက်အတွင်းထိုင်းဘုရင့်နိုင်ငံမှ
ထွက်ခွာသွားရန်သတိပေးခဲ့ဖူးသည်။အခြားသောနိုင်ငံခြားသားများကို
အလွယ်တကူထုတ်ပေးသည့်ထောက်ခံစာ၊ဗီဇာစသည်တို့အတွက်
၊မြန်မာနိုင်ငံသားဖြစ်နေသည်ဟူသောအကြောင်းပြချက်ဖြင့်
၊ကြံကြံဖန်ဖန်ရှာရှာဖွေဖွေစာရွက်စာတမ်းအထောက်အထားတို့ကို
တင်ပြခိုင်းခဲ့ဖူးသည်။

အဆိုးဝါးဆုံးဖြစ်ရပ်ကား၊ကျွန်တော့်ကုမ္ပဏီတွင်ခန့်ထားသော
ထိုင်းဝန်ထမ်းတို့မှာစည်းမျဉ်းဥပဒေနှင့်မညီဟုဆိုကာ၊
ကျွန်တော့်နေအိမ်အိပ်ခန်းတွင်းထိဝင်ရောက်လျက်၊သေနတ်ဖြင့်
ချိန်ရင်းလှေခါးအဆင်းတွင်နောက်မှဆောင့်အကန်ခံခဲ့ရသည့်ဖြစ်ရပ်ကို၊
ကျွန်တော့်ရင်မှာယနေ့ထက်တိုင်နာနာကျင်ကျင်ခံစားနေရဆဲဖြစ်သည်။

။နောက်ပိုင်းတွင်ကျွန်တော်သည်ကျွန်တော်၏ဇကို၊ဒင်းတို့သိစေအံ့အလို့ငှာ၊
အံကြိတ်တွန်းလှန်ရုန်းထွက်ခဲ့သည်။

တောမောရုံးကအရာရှိဝန်ထမ်းတွေကိုနှစ်စဉ်နှစ်သစ်ကူး
လက်ဆောင်ပေးခဲ့ရာတွင်အဖိုးတန်ကျောက်မျက်များပင်ပါဝင်သည်။
မကြာခဏဆိုသလိုဖူးခက်မှထိပ်တန်းကျလှပါသည်ဆိုသောခေတ်မီ
ဟိုတယ်ကြီးများတွင်သူတို့ကိုဖိတ်ခေါ်ကျွေးမွေးသည်။မြန်မာငွေငါးသိန်း
ခန့်တန်သောလက်ကိုင်တယ်လီဖုန်း၊ကျပ်တသိန်းကျော်တန်နိုင်ငံခြားဖြစ်
ယမကာပုလင်းစသည်တို့ဖြင့်တံစိုးလက်ဆောင်ခွံ့သည်။

နောက်ဆုံးတွင်မူဤတောမောရုံးမှအရာရှိဝန်ထမ်းတို့အပြင်၊
၎င်းတို့၏အမြင့်ဆုံးအရာရှိခရိုင်ဦးစီးပင်လျှင်၊ကျွန်တော်နှင့်
အကျွမ်းတဝင်ဖြစ်လာသည်မှာ၊ထိုင်းနိုင်ငံတစ်နံတစ်လျားမည်သည့်
အရပ်သို့ရောက်သည်ဖြစ်စေ၊လူဝင်မှုကြီးကြပ်ရေးနှင့်ပတ်သက်လာပါက၊
သူ့ထံအချိန်မရွေးဆက်သွယ်ရန်လမ်းဖွင့်ပေးထားသည်အထိဖြစ်၏။

(၃)
ယခုတစ်ခေါက်ဤတောမောရုံးသို့ရောက်လာခြင်းမှာကျွန်တော့်ဗီဇာ
သက်တမ်းကိုတိုးမြှင့်ရန်ဖြစ်သည်။ရုံးအဝင်ဝရှိဝန်ထမ်းအားအကျိုးအကြောင်း
ပြောပြသည့်အခါ၊ကျွန်တော့်ကိုအလှည့်ကျနံပတ်စဉ်တုံကင်တစ်ခု
ထုတ်ပေးသည်။တန်းစီစောင့်ရန်ခုံတန်းလျားဆီသို့လှမ်းကြည့်လိုက်သော
အခါ၊ကျွန်တော့်ရှေ့မှာတုံကင်ကိုယ်စီကိုင်လျက်စောင့်နေကြ
သူနိုင်ငံခြားသားအယောက်နှစ်ဆယ်ခန့်ရှိနေသည်ကို
ကျွန်တော်မြင်နေရသည်။

အလှည့်ကျစောင့်ဆိုင်းရန်ခုံတန်းလျားရှည်ဆီသို့ကျွန်တော်လျှောက်သွား
နေစဉ်ဗီဇာခွင့်ပြုမိန့်များထုတ်ပေးနေသည့်ရုံးစားပွဲရှည်ကြီးနောက်မှ၊
ထိုင်းတောမောအရာရှိတစ်ဦးသည်ကျွန်တော့်ကိုလက်ယပ်လျက်
လှမ်းခေါ်နေလေသည်။

တုန့်နှေးလေးလံသောခြေလှမ်းများဖြင့်ကျွန်တော်သူ့စားပွဲဆီသို့
ရောက်သွားသည့်အခါသူက၊ကျွန်တော့်သက်တမ်းတိုးလျှောက်လွှာနှင့်
ပတ်စပို့စာအုပ်ကို၊သာမန်ကာလျှံကာကြည့်ကာ၊ဒုန်းကနဲ၊ဒုန်းကနဲနေအောင်
တံဆိပ်တုံးတွေထုပေးရင်း၊မှတ်တမ်းသွင်းလိုက်သည်။

တစ်ချိန်တည်းမှာပင်၊ကျွန်တော့်မာကြောင်းသာကြောင်း၊
စီးပွားရေးအကြောင်း၊ထိုင်းနိုင်ငံ၏စီးပွားရေးအတက်အကျ
၊မြန်မာနိုင်ငံ၏ရှေ့အလားအလာစသည်တို့ကို၊အချိန်အတော်ကြာ
မေးမြန်းစပ်စုနေလေရာ၊သူ့စကားထဲတွင်

“အောင်ဆန်းစုကြည်နှင့်အန်အယ်ဒီ၊ရွေးကောက်ပွဲအပြတ်အသတ်နိုင်”
ဟူသောစကားလုံးတို့ကြားညှပ်ပါလာသည်ကို၊
ကျွန်တော်တအံ့တသြကြားလိုက်ရသည်။

နောက်ကျောမလုံသောကျွန်တော်သည်သူနှင့်စကားစအမြန်ဖြတ်ကာ
သူ့ကူညီမှုအတွက်အသိအမှတ်ပြုသည့်အနေဖြင့်ထိုင်းဘတ်ငွေရာဂဏန်း
တစ်ချို့ထုတ်ပေးသော်ငြား၊သူကမယူ၊ကျွန်တော့်ရှေ့သို့ပြန်တွန်းပို့ပေးရင်း
ငြင်းဆန်သည်။သူ့ကိုကျေးဇူးတင်စကားဆိုရင်းသူ့ရှေ့မှကျွန်တော်ပြန်ထွက်
လာချိန်တွင်ကျွန်တော်ခေါင်းထဲသို့အတွေးပေါင်းစုံတိုးဝင်လာခဲ့၏။

စင်စစ်ကျွန်တော့်ထက်အရင်စောစီးစွာရောက်ရှိပြီးကျွန်တော့်နောက်မှာ
တန်းစီထိုင်စောင့်ကျန်ရစ်သော၊ကျွန်တော်နှင့်ဘဝတူနိုင်ငံခြားသားများကို
ကျွန်တော်မျက်နှာပူလှပါသည်။

မှန်ရာကိုဝန်ခံရလျှင်၊ဤကဲ့သို့သူတစ်ပါးထက်အရေးပေးခံရအောင်၊
အခွင့်ထူးရသည့်လူပေါ်လူဇော်ဘဝမျိုးကိုကျွန်တော်ကိုယ်တိုင်ဖန်တီး
တည်ဆောက်ခဲ့ခြင်းဖြစ်၏။လွန်ခဲ့သောကာလများမှာ၊မိခင်နိုင်ငံတွင်
ကျွန်တော်လှုပ်ရှားရုန်းကန်စဉ်ကလည်း၊ဤနည်းနှင်နှင်အားထုတ်မှုပေါင်း
မြောက်များစွာကိုကျွန်တော်လုပ်ခဲ့ဖူးသည်။

အသေအချာစဉ်းစားဆင်ခြင်လျှင်၊ကျွန်တော်ဖြတ်သန်းရုန်းကန်ခဲ့သည့်
အခက်အခဲတို့သည်၊ကျွန်တော်တစ်ဦးတည်း၏ပုဂ္ဂိလကဘဝနှင့်သာ
သက်ဆိုင်၏။စနစ်ဆိုးကြီးအတွင်းမှနည်နားအမှားတစ်ရပ်သာဖြစ်၏

ဂုဏ်သိက္ခာရှိသောလူ့အဖွဲ့အစည်းတွင်နေရာတကျဗိုလ်ကျစိုးမိုးလိုသည့်
ဖျံကျရေးနည်းနာသည်အမြတ်တနိုးတန်ဖိုးထားလေးစားအပ်သည့်စာရင်းတွင်
မပါဝင်သည်မှာအလွန်တရာသေချာသည်။

(၄)
တောမောရုံးမှနေအိမ်သို့ပြန်လာလမ်းတစ်လျှောက်လုံး၊ကားမောင်းရင်း
အတွေးရှည်ကြီးကိုကျွန်တော်အဖော်ပြုလာခဲ့သည်။ကျွန်တော့်လက်ရှိဘဝသည်၊
ကျွန်တော်တစ်ဦးတည်းအနေဖြင့်မူအစစအရာရာကျေနပ်စရာကောင်းပါ၏။

ရာဇဝင်ထဲကရန်သူ့နိုင်ငံတိုင်းတစ်ပါးမှာပင်၊မျက်နှာမငယ်၊မတောင့်မတ
မကြောင့်ကျရသောအဆင့်အခြေတွင်ရှိပါ၏။သို့သော်ကျွန်တော်နှင့်
တစ်မြို့တည်းနေ၊ဖူးခက်ရောက်မြန်မာအလုပ်သမားအများစုမှာကား၊
တဝမ်းတခါးအလို့ငှာရောက်လာကြသော်ငြား၊တိုင်းတပါးတွင်သောကဗျာပါဒ
တပုံတပင်ကြီးနှင့်ရုန်းကန်နေကြရဆဲဖြစ်သည်။

မကြာမီကကျင်းပပြီးစီးခဲ့သောရွေးကောက်ပွဲရလာဒ်များအရပြည်သူလူထုနှစ်ခြိုက်
လက်ခံသော၊ပြည်သူ့အကျိုးကိုစွမ်းစွမ်းတမံဆောင်ရွက်မည်ဟုယုံကြည်ကြသော
ပါတီကြီးကိုတခဲနက်မဲပေးရွေးချယ်ပြီးခဲ့ကြလေပြီ။ခေတ်ဆိုးခေတ်ကြပ်ကြီးကို
ကျွန်တော်တို့ကျော်လွှားနိုင်ကြပေတော့မည်။

ပျက်စီးခြင်းငါးပါးဆိုက်နေသောတိုင်းပြည်ကိုပြန်လည်ဆယ်တင်နိုင်ခွင့်
ရကြပေတော့မည်။တဆက်တည်းမှာပင်၊သည်အပြောင်းအလဲမှာ
ကျွန်တော်တို့အားလုံးဝိုင်းဝန်းပါဝင်သင့်ကြသည်မဟုတ်ပေလော။

ခေတ်ဟောင်းစနစ်ဟောင်းကြောင့်ကာလကြာမြင့်စွာစွဲကပ်လာခဲ့သည့်
ကျွန်တော်တို့၏အကျင့်ဆိုးစရိုက်ဆိုးမျိုးစုံ ကိုကိုယ်စီ အသိတရားဖြင့်ပြုပြင်ပြောင်းလဲကြရမည့်အချက်များထဲတွင်၊
ကျွန်တော်စောစောကဆိုခဲ့သည်တန်းမစီလိုသော၊အခွင့်ထူးခံလိုသော၊
လူပေါ်လူဇော်လုပ်လိုသောအမူအကျင့်၊လည်းတစ်ခုအပါအဝင်ဖြစ်သည်။

ထို့ပြင်တွေ့ရာနေရာကွမ်းတံတွေးထွေး၊အမှိုက်ပစ်၊ဆေးလိပ်သောက်
၊ဆေးလိပ်တိုပစ်တတ်သည့်အမူအကျင့်၊၊ရပ်ကွက်ရုံးနှင့်ဌာနတိုင်းလိုလိုတွင်
လာဘ်ပေးလာဘ်ယူမှုတို့ဖြင့်ပျော်မွေ့နေသည့်ဓလေ့စရိုက်၊မိမိ၏
အားထုတ် မှုနှင့်မ ထိုက် တန်သောအခွင့်အရေးကို တရားနည်းလမ်းမကျစွာရယူလိုသည့်စိတ်ဓာတ်၊စသည်တို့လည်းပါဝင်နေသည်။

ခေတ်အပြောင်းစနစ်အပြောင်းမှာကျွန်တော်တို့အားလုံးတွင်
သိသိသာသာရောရော၊မသိမသာပါယဉ်ပါးနေသည့်အကျင့်စရိုက်မှားမျိုးစုံကို
အချိန်မီပြင်နိုင်မှသာ၊ကျွန်တော်တို့မျှော်မှန်းရာပန်းတိုင်သို့၊မကြာမတင်သော
ကာလတွင်၊ဒုတ်ဒုတ်ထိရောက်နိုင်ပေလိမ့်မည်။ထိုသို့မဟုတ်လျှင်မူ၊
ဒုံရင်းဘဝခေတ်ဆိုးခေတ်ကြပ်ကြီးအတွင်းမှာပင်ပြန်လည်မျော
ပါနေကြရပေလိမ့်မည်။

(၅)
သို့နှင့်ကျွန်တော့်အိမ်နားကအမ်မခန်မီးပွိုင့်ဆီသို့ရောက်လာ၏။
လမ်းမကျယ်ကြီးနှင့်လမ်းကျဉ်းတစ်ခုဆုံရာဖြစ်သည်။လမ်းကျဉ်းဆီမှ
ကားအထွက်နည်းသည်မို့ခါတိုင်းဆိုလျှင်ထိုမီးပွိုင့်တွင်မီးနီနေသော်ငြား၊
လမ်းမကျယ်ကြီးမှမောင်းနှင်နေသောကျွန်တော့်အနေဖြင့်၊မီးနီကို
မသိကျိုးကျင်ပြုလျက်ဖြတ်ကျော်ခဲ့မြဲဖြစ်၏။

ယခုသော်ကျွန်တော်သည်မီးဝါစပြုနေချိန်လည်းဖြစ်၊လမ်းကျဉ်းတွင်းမှလည်း
ကားတစ်စီးမှထွက်မလာ၊ဖြတ်ကျော်မောင်းနှင်လျှင်ရပါလျက်၊
ကျွန်တော့်ခြေထောက်သည်ကားဘရိတ်ကိုအလိုလို
အုပ်မိလျက်သားဖြစ်နေခဲ့သည်။

ကျွန်တော့်စိတ်အစဉ်တွင်ယဉ်ကျေးသော၊ခေတ်မီသောလူ့အဖွဲ့အစည်းအတွက်
ရှက်သင့်ရှက်အပ်သည်များကိုရှက်တတ်စပြုလာပြီဟုကိုယ့်ကိုယ်ကို
သတိချပ်မိသည်။

တချိန်တည်းမှာပင်၊လွန်ခဲ့သောဆယ်စုနှစ်များစွာကတည်းက၊
ရာထူး၊အာဏာနှင့်ငွေကြေးဓနဥစ္စာပြည့်စုံလျှင်ပြီးစတမ်းဟု၊
ထင်မှတ်ယုံကြည်ခဲ့ကြသူများအနေဖြင့်၊အာဏာနှင့်ငွေသည်၊
အတိတ်ပစ္စုပ္ပန်အနာဂတ်ကာလသုံးပါးစလုံးအကျုံးဝင်သည့်
ဘဝတစ်ခုကိုမပြဋ္ဌာန်းကြောင်း၊ပြီးပြည့်စုံစေသောအရာမဟုတ်ကြောင်း
ကောင်းစွာသိမြင်လျက်၊အချိန်မီရှက်တတ်ကြမူကောင်းလေစွဟု
ကျွန်တော့်တစ်ဆက်တည်းအတွေးပွားနေမိခဲ့လေသည်။