ဘဝအောင်မြင်ရေးအတွက် အရေးကြီးလှတဲ့ ပတ်ဝန်းကျင်

True Man with Zar Li Aung and 2 others

 

~ဘဝအောင်မြင်ရေးအတွက် အရေးကြီးလှတဲ့ ပတ်ဝန်းကျင် ~

By လင်းသိုက်ညွန့် ( မြန်မာ့မြေ )
From သရဖူ မဂ္ဂဇင်း ၂၀၁၄ ဧပြီလ ထုတ်မှ ဖော်ပြသည်။

လူတိုင်း လူတိုင်းဟာ သူတို့ရဲ့ဘဝမှာ အောင်မြင်လာဖို့အတွက် သူတို့ရဲ့ ပတ်ဝန်းကျင်ကို ပြောင်းလဲနိုင်ဖို့ လိုပါတယ်။ အထူးသဖြင့် အောင်မြင်တိုးတက် လိုတဲ့လူတစ်ယောက်ဟာ သူ သက်တောင့်သက်တာဖြစ်နေတဲ့ နယ်ပယ်ကနေ ရုန်းထွက်နိုင်ဖို့ လိုပါတယ်။ သင်ဟာ သင့်ရဲ့ အတန်းထဲမှာ အမြဲတမ်းလိုလို ပထမရနေပါသလား။ ဒါဆိုရင် သင်ဟာ စာသင်ခန်းမှးပြီး ရောက်နေတာ ဖြစ်ပါလိမ့်မယ်။ သင့်အတွက် အကောင်းဆုံးနေရာဆိုတာ သင့်ထက်တော်တဲ့သူတွေ သင့်ကို ဦးဆောင်နိုင်တဲ့သူတွေ များများစားစား ရှိတဲ့နေရာ ဖြစ်ပါတယ်။ 

တကယ်လို့ သင်ဟာ လက်ရှိပတ်ဝန်းကျင်မှာ သက်တောင့်သက်သာနဲ့ အမြဲတမ်း ထိပ်ဆုံးက ပထမရနေတယ် ဆိုပါစို့။ ဒါဆိုရင် သငဟာ ရေအိုင်ငယ်ထဲက အလတ်စားငါးတစ်ကောင် (A medium sized fish in a very small pond) ဖြစ်နေပြီဆိုတာ သတိရလိုက်ပါ။ သင့်အနေနဲ့ ဒီထက်ပိုပြီး ကြီးပွားချင်သေးတယ် ဆိုရင်တော့ သင့်အနေနဲ့ မဖြစ်မနေ ရေအိုင်ပြောင်းဖို့ ဝါ ပတ်ဝန်းကျင်ပြောင်းလဲဖို့ လိုပါလိမ့်မယ်။

ကြီးထွားမှု = ပြောင်းလဲမှု
Growth = Change

မကြီးထွားဘဲနဲ့ ပြောင်းလဲတာ ဖြစ်ကောင်းဖြစ်နိုင်ပေမဲ့ မပြောင်းလဲဘဲနဲ့ ဘယ်တော့မှ မကြီးထွားနိုင်ပါဘူး။ သင့်ရဲ့ဘဝကြီးထွားလာဖို့ အတွက် သင့်ရဲ့ပတ်ဝန်းကျင်ကို ပြောင်းလဲနိုင်ဖို့ ကြိုးစားကြတဲ့နေရာမှာ ထည့်သွင်းစဉ်းစားရမယ့် အချက်ခြောက်ချက် ရှိပါတယ်။

၁။ သင့်ရဲ့လက်ရှိပတ်ဝန်းကျင်ကို ပြန်လည်သုံးသပ်ပါ။
သင့်ရဲ့လက်ရှိပတ်ဝန်းကျင်ကို ပြန်လည်သုံးသပ်တဲ့အခါ သင်ဟာ သင့်ရဲ့ပတ်ဝန်းကျင်မှာ
-အလွယ်တကူ ထိပ်တန်းကို ရောက်လာသလား။
-စိန်ခေါ်မှုမရှိဘူးလို့ ခံစားရသလား။
-ကိုယ့်အတွက် ဘာမှ စိတ်ဝင်စားစရာ မရှိဘူးလား။
ဒါဆိုရင် သင့်အနေနဲ့ သင့်ရဲ့ ပတ်ဝန်းကျင်ကို ပြောင်းလဲဖို့ လိုအပ်နေပြီဆိုတာ သဘောပေါက်ဖို့ ဖြစ်ပါတယ်။

၂။ မိမိကိုယ်ကိုရော မိမိရဲ့ ပတ်ဝန်းကျင်ကိုပါ ပြောင်းလဲပါ။
-တခါတလေ သင်ဟာ သင့်ကိုယ်သင်ပဲ ပြောင်းလဲပြီး သင့်ရဲ့ ပတ်ဝန်းကျင်ကို မပြောင်းလဲရင် ကြီးထွားမှုဟာ ခက်ခဲပြီး နှေးနေပါလိမ့်မယ်။
-သင့်ရဲ့ ပတ်ဝန်းကျင်ကိုပဲ ပြောင်းလဲပြီး သင့်ကိုယ်သင် မပြောင်းလဲရင်လည်း ကြီးထွားမှုဟာ ခက်ခဲပြီး နှေးနေပါလိမ့်မယ်။
-သင့်ကိုယ်သင်ရော သင့်ရဲ့ ပတ်ဝန်းကျင်ကိုပါ ပြောင်းလဲနိုင်မှ ကြီးထွားမှုဟာ မြန်ဆန်ပြီး ပိုမိုအောင်မြင်နိုင်မှာ ဖြစ်ပါတယ်။
ဒါဆိုရင် ကိုယ့်ကို ကြီးထွားစေနိုင်တဲ့ ပတ်ဝန်းကျင် ( Growth Environment ) ဆိုတာ ဘယ်လိုပတ်ဝန်းကျင်မျိုးလဲလို့ မေးစရာရှိလာပါတယ်။ ပတ်ဝန်းကျင်တစ်ခုဟာ-
သင့်ကို ဦးဆောင်နိုင်တဲ့သူတွေ သင့်ထက်ထူးချွန်ထက်မြက်တဲ့သူတွေ ရှိတယ်။
-စိန်ခေါ်မှုတွေနဲ့ ပြည့်နှက်နေတယ်။
-ကိုယ်ကအမြဲတမ်း ရှေ့ကို ရှေးရှုကြိုးစားနေရတယ်။ သက်တောင့် သက်တာ နေလို့မရဘူး။
-မနက်မိုးလင်းလာတိုင်း ရင်ခုန်စိတ်လှုပ်ရှားစွာ နိုးထလာရတယ်။
-အရှုံးဆိုတာ ကိုယ့်ရဲ့ ရန်သူမဟုတ်ဘူး။
ဒါဆိုရင် ဒီလိုမျိုး ပတ်ဝန်းကျင်မျိုးဟာ ကိုယ့်ကို ကြီးထွားစေနိုင်တဲ့ ပတ်ဝန်းကျင်မျိုး ဖြစ်ပါတယ်။

၃။ သင် အတူတကွ ပေါင်းသင်းနေတဲ့သူတွေကို ပြောင်းလဲပါ။
သင့်ရဲ့ ဘေးနားမှာ ဘယ်လိုလူမျိုးတွေ ရှိလဲ။ သင်က ဘယ်လို လူမျိုးတွေနဲ့ ပေါင်းသင်းသလဲ ဆိုတာက သင့်ဘဝရဲ့ အောင်မြင်မှုအပေါ် များစွာသက်ရောက်မှု ရှိပါတယ်။

၎။ ပတ်ဝန်းကျင်အသစ်မှာ စိန်ခေါ်မှုတွေကို ရင်ဆိုင်ပါ။
ပတ်ဝန်းကျင်အသစ်ကို ရောက်ပြီ ပြောင်းလဲပြီးပြီ ဆိုရင်လည်း ပတ်ဝန်းကျင်အသစ်မှာ ပြဿနာအသစ် စိန်ခေါ်မှုအသစ်တွေကို ရှာဖွေရင်ဆိုင်ရဲဖို့ ရင်ဆိုင်နိုင်ဖို့ လိုပါတယ်။ ပြဿနာတွေကို ဘယ်တော့မှ မကြောက်ပါနဲ့။ ပြဿနာတွေကို ဘယ်တော့မှ မရှောင်ပါနဲ့။ အလုပ်သေးသေးလုပ်ရင် ပြဿနာသေးသေးတွေ့မယ်။ အလုပ်ကြီးကြီးလုပ်ရင် ပြဿနာကြီးကြီးတွေ့မယ်။ ဘာပြဿနာမှ မတွေ့ချင်ရင် ဘာမှ မလုပ်မှဘဲ ရပါလိမ့်မယ်။

၅။ လက်ရှိအချိန်ကို အာရုံစိုက်ပါ။
မာသာထရီဇာက ပြောပါတယ်။ 'မနေ့ကဆိုတာ ပြီးခဲ့ပြီ။ မနက်ဖြန်ဆိုတာ မရောက်လာသေးဘူး။ ကျွန်ုပ်တို့ ပိုင်ဆိုင်တာဟာ ဒီနေ့ပဲ။ ဒီနေ့ကို အာရုံစိုက်ပါ' တဲ့။ လက်ရှိအချိန်ကို အာရုံစိုက်ပြီး အကောင်းဆုံးဖြစ်အောင် အားထုတ်ကြိုးစားနိုင်ဖို့ လိုအပ်ပါတယ်။

၆။ ဝေဖန်ကဲ့ရဲ့မှုများကို လျစ်လျူရှု၍ ရှေ့ဆက်ပါ။
တခါတလေမှာ သင့်အနေနဲ့ သင့်ရဲ့ ပတ်ဝန်းကျင်ကို ပြောင်းလဲဖို့ အရေးပါတဲ့ ဆုံးဖြတ်ချက် တစ်ခုခုကို ချဖို့ ကြိုးစားတဲ့နေရာမှာ ကိုယ့်ရဲ့ ပတ်ဝန်းကျင် ဆွေမျိုး အသိုင်းအဝိုင်း စတာတွေက အပြစ်တင် တားဆီးတာမျိုးတွေ ကြုံတွေ့နိုင်ပါတယ်။ အဲသလို ကြုံလာရတဲ့အခါ ကိုယ့်ကိုယ်ကို ယုံကြည်မှုကို မပျက်စီးပါစေနဲ့။ သင်သာလျှင် သင့်ဘဝရဲ့ ပဲ့ကိုင်ရှင်ဖြစ်ပြီး ကိုယ့်ဘဝကို ကိုယ်လိုရာ မောင်းနှင်ရမယ်ဆိုတာ သတိပြုပါ။
ဒီကမ္ဘာကြီးမှာ အစဉ်အမြဲ တည်မြဲနေတာဟာ ပြောင်းလဲခြင်း ( Change ) တစ်ခုပဲရှိပါတယ်။ စဉ်ဆက်မပြတ် အောင်မြင်ချင်တယ်ဆိုရင် စဉ်ဆက်မပြတ် ပြောင်းလဲနေဖို့ လိုအပ်တယ်ဆိုတာကို အမြဲသတိရပါ။

See you at the top!
လင်းသိုက်ညွန့် ( မြန်မာ့မြေ )