ထိုင်းပုစွန်လုပ်ငန်းက မြန်မာကျေးကျွန်များရဲ့ ရင်နင့်ဖွယ်ဘ၀

 Kumudra added 2 new photos.

ထိုင်းပုစွန်လုပ်ငန်းက မြန်မာကျေးကျွန်များရဲ့ ရင်နင့်ဖွယ်ဘ၀
++++++++++
ဒီဇင်ဘာ ၁၄။ ။ မနက် ၂နာရီ ထိုးတိုင်း အခန်းတံခါး ကန်ကျောက်သံ နဲ့ ခြိမ်းခြောက်သံ ကြားရတယ်။ ထရင်ထ၊ မထရင်တော့ အရိုက်ခံရပြီသာမှတ်။ နံပါတ် ၃၁ နဲ့ သူ့ဇနီး တို့ဟာ သူတို့ကိုအပိုင်ဝယ်ထားတဲ့ ဒီစက်ရုံထဲမှာ အေးခဲနေတဲ့လက်တွေနဲ့ နောက် ၁၆နာရီ တိုင်အောင် မတ်တပ်ရပ်ကြရတယ်။
သူတို့ဟာ ပြည်ပဈေးကွက်တွေကိုပို့မယ့် ပုစွန်တွေကို ခေါင်းနဲ့အမြီးတွေ၊ အခွံတွေ ချွတ်၊ အညစ်အ ကြေးတွေ ဖယ်ရတယ်။ အဲဒီ ပုစွန်တွေဟာ အမေရိကန်၊ ဥရောပနဲ့ အာရှ တလွှားက ဈေးဆိုင်တွေ၊ စားသုံးကုန်တွေဆီ ပျံ့နှံ့ရောက်သွား ကြတယ်။
Gig Peeling Factory ဆီ ရောင်းချခံခဲ့ရတဲ့နောက် သူတို့ဟာ တခြား မြန်မာရွှေ့ပြောင်းလုပ်သား ၁၀၀နီးပါးနဲ့အတူ ပြန်လမ်းမရှိပိတ်မိနေပြီး သူတို့ရဲ့ ထိုင်းသူဌေးတွေရဲ့ လက်ထဲမှာ ပြုသမျှ နုကြရတော့တယ်။ သူတို့နဲ့အတူ ကလေးတွေ လည်း အလုပ်လုပ်ကြရပြီး ကလေး တစ်ယောက်ဆိုရင် အကောင်သေးလွန်းလို့ ပုစွန်ခွံချွတ်တဲ့ စားပွဲကိုမှီဖို့ ခွေးခြေပုတစ်လုံး ခုပြီး မတ်တပ်ရပ် အလုပ်လုပ်ရတယ်။ တချို့သူ တွေဆို လပေါင်းများစွာ၊ တချို့ နှစ်နဲ့ချီကြာအောင် အလုပ်လုပ်ကြရပေမယ့် လုပ်ခ မဖြစ်စလောက်သာရကြပြီး၊ တချို့လုံးဝမရကြဘူး။ တစ်ယောက်ယောက်က သူတို့ကို အမြဲတမ်း မျက်စိဒေါက်ထောက် ကြည့်နေတယ်။
သူတို့ကို သူတို့ရဲ့ သူဌေးတွေက နာမည်တောင် တပ်မခေါ်ဘဲ နံပါတ်တွေကိုသာ သုံးတယ်။ တင်ညိုဝင်းက နံပါတ် ၃၁ ပါ။
နေရာတိုင်းပြန့်နေတဲ့ လူကုန်ကူးမှုလုပ်ငန်းက ထိုင်းနိုင်ငံကို ကမ္ဘာ့အကြီးဆုံး ပုစွန်ထုတ်လုပ်ရာနိုင်ငံတစ်နိုင်ငံအဖြစ် တစ်ဖက် တစ်လမ်းကအသွင်ပြောင်းလဲပေးခဲ့တယ်။ အမေရိကန်ဒေါ်လာ ၇ဘီလျံတန်ဖိုးရှိတဲ့ ထိုင်းနိုင်ငံရဲ့ပင်လယ်စာအိတ်စ်ပို့ လုပ်ငန်းကို သန့်စင်ရှင်းလင်းပါ့မယ်လို့ ကုမ္ပဏီတွေနဲ့ အစိုးရက အထပ်ထပ်ကတိပေးထားပေမယ့်လည်း ခေတ်သစ်ကျေးကျွန်တွေ အခွံချွတ်လိုက်တဲ့ ပုစွန်တွေဟာ အမေရိကန်၊ ဥရောပနဲ့ အာရှဒေသ တွေအထိ ခြေဆန့်ရောက်ရှိနေတယ်ဆိုတာကို အေပီသတင်းဌာနရဲ့ စုံစမ်းထောက်လှမ်းမှုတစ်ခုကထုတ်ဖော်တွေ့ရှိခဲ့တယ်။
ဒီလိုပြသနာကို ရဲတပ်ဖွဲ့နဲ့ အာဏာပိုင်တွေကြားက အကျင့်ပျက်ခြစားမှုတွေ၊ ကြံရာပါကျူးလွန်မှုတွေက မီးလောင်ရာလေပင့် ပေးခဲ့တယ်။ အပြစ်ရှိသူတွေကို ဖမ်းဆီးတာ၊တရားစွဲဆိုတာတွေ ရှားပါတယ်။ ၀င်ရောက်စီးနင်းရှာဖွေတယ်ဆိုရာမှာလည်း သက်ဆိုင်ရာစာရွက်စာတမ်း တွေမရှိတဲ့ ရွှေ့ပြောင်းလုပ်သားတွေကို ထောင်သွင်းအကျဉ်းချတာနဲ့ အဆုံးသတ်သွားလေ့ရှိပြီး ပိုင်ရှင်တွေကတော့ ဘာပြစ်ဒဏ်မှပေးခံရ ခြင်းမရှိပါဘူး။
ပုစွန်အခွံချွတ်ရုံ ရာပေါင်းများစွာဟာ ဆမွတ်ဆခွန်ကလူနေရပ်ကွက်တွေမှာ ပုန်းလျှိုးကွယ်လျှိုးရှိနေသလို ဘာအမှတ်အသား ဆိုင်းဘုတ်မှ မရှိတဲ့ လျှို့ဝှက်အခန်းတွေထဲမှာ ရှိနေကြပါတယ်။ ဆမွတ်ဆခွန်ဆိုတာ မြို့တော်ဘန်ကောက် အပြင်ကို တစ်နာရီကြာခရီးနှင်ရင်ရောက်တဲ့ ဆိပ်ကမ်းမြို့လေးတစ်မြို့ပါ။ အေပီက အလုပ်သမားဒါဇင်ပေါင်းများစွာကို ကျွန်အဖြစ် ခိုင်းစေနေတဲ့ စက်ရုံတစ်ရုံကို တွေ့ရှိခဲ့ပါတယ်။ ထွက်ပြေးလာတဲ့ ရွှေ့ပြောင်းအလုပ်သမားတွေကတစ်ဆင့် လူ့အခွင့်အရေး လှုပ်ရှားတဲ့အဖွဲ့တွေဟာ Gig စက်ရုံနဲ့ တတိယစက်ရုံတစ်ရုံကိုရောက်သွားခဲ့တယ်။ အဲဒီ စက်ရုံ၃ရုံစလုံးဟာ တစ်ရုံကို လူ ၅၀ ကနေ ၁၀၀ကြား ထိန်းသိမ်းထားကြပြီး အများစုကို အထဲမှာ သော့ခတ်ပိတ်လှောင်ထားတာဖြစ်တယ်။
သိပ်မကြာခင်မှာပဲ တင်ညိုဝင်းဟာ သူ ဘယ်ကိုရောက်နေပြီဆိုတာ ရိပ်မိခဲ့ပေမယ့် ဒီမှာ လွယ်လွယ်ကူကူလွတ်မြောက်မယ့် လမ်းတော့ မရှိပါဘူး။ အမျိုးသမီးတစ်ယောက်ဆိုရင် Gig စက်ရုံမှာ အလုပ်လုပ်လာတာ ၈နှစ်ရှိသွားပါပြီ။ နောက်အမျိုးသား တစ်ယောက်ကတော့ အလားတူရက်စက်ကြမ်းကြုတ်တဲ့စက်ရုံတစ်ခုကနေ လွတ်မြောက်လာခဲ့ပေမယ့် ပုစွန်အခွံချွတ် လုပ်ငန်းနဲ့ပဲ ပြန်နှစ်ပါးသွားခဲ့ရပါတယ်။
` အဲဒီစက်ရုံမှာ ခဏလောက်အလုပ်လုပ်ကြည့်ရုံနဲ့ ကျနော်တော်တော်လေး လန့်ဖြန့်သွားတယ်။ ဒီမှာပြန်လမ်းမရှိဘူးလို့လည်း ကျနော် ရိပ်မိလိုက်တယ်။ ´ လို့ သွားတွေမှာ ကွမ်းချေးတွေပေကျံနေတဲ့ ကလေးမျက်နှာနဲ့ တင်ညိုဝင်း (၂၂နှစ်) က ပြောတယ်။ သူနဲ့ သူ့မိန်းမဟာ တစ်နေ့ကို ပုစွန် ၁၇၅ ပေါင် အခွံချွတ်ရပြီး ၄ဒေါ်လာသာရပါတယ်။
`ကျနော် မိန်းမကိုပြောတယ်. . ဟေ့ တို့တော့ ဒုက္ခလှလှတွေ့ပြီ။ တစ်ခုခု အမှားအယွင်းဖြစ်တာနဲ့ တို့ သေမှာပဲ လို့ ´
ပြီးခဲ့တဲ့လမှာ ဂျာနယ်လစ်တွေဟာ Gig စက်ရုံကနေ ထိုင်းအိတ်စပို့ကုမ္ပဏီကြီးတွေဆီ လတ်လတ်ဆတ်ဆတ် အခွံချွတ်ပုစွန်တွေအပြည့်နဲ့ သွားပို့နေတဲ့ ကုန်ကားကြီးတွေနောက်လိုက်ပြီး ရုပ်သံမှတ်တမ်းယူခဲ့ကြတယ်။ နောက်တော့ အမေရိကန်ရဲ့ အကောက်ခွန်မှတ်တမ်းတွေ နဲ့ ထိုင်းလုပ်ငန်းတွေရဲ့အစီရင်ခံစာတွေကို အသုံးပြုပြီး တစ်ကမ္ဘာလုံးအနှံ့ ခြေရာခံလိုက်ခဲ့တယ်။ သူတို့တတွေဟာ အရင် ၆လလောက် က ၀င်ရောက်စီးနင်းခံထားရတဲ့ နောက်ထပ်စက်ရုံတစ်ရုံ ကနေလည်း အလားတူ အဆက်အသွယ်တွေ ရခဲ့ပြီး အဲဒီနှစ်နေရာစလုံးက အလုပ်သမား နှစ်ဒါဇင်ကျော်ကို တွေ့ဆုံ မေးမြန်းခဲ့ကြတယ်။
အမေရိကန်အကောက်ခွန်မှတ်တမ်းမှတ်ရာတွေအရ အဆိုပါပုစွန်တွေဟာ Wal-Mart ၊ Kroger ၊ Whole Foods ၊ Dollar General နဲ့ Petco တို့လို အမေရိကန်ရဲ့ နာမည်ကြီး စားသောက်ကုန်ဆိုင်ကြီးတွေနဲ့ လက်လီအရောင်းဆိုင်တွေ၊ Red Lobster နဲ့ Olive Garden တို့လို စားသောက်ဆိုင်ကြီးတွေဆီ ရောက်ရှိသွားကြတာ တွေ့ရတယ်။
အမေရိက ရဲ့ လူသိအများဆုံး ပင်လယ်စာတံဆိပ်တွေ နဲ့ တိရစ္ဆာန်အစာတွေရောင်းချတဲ့ Chicken of the Sea နဲ့ Fancy Feast တို့ဆီ လည်း ၀င်ရောက်သွားကြတာတွေ့ရတယ်။ အေပီသတင်းထောက်တွေဟာ အမေရိကန်ပြည်နယ် ၅၀ စလုံးရှိ စူပါမတ်ကတ်တွေဆီ သွားရောက်ကြပြီး အဓမ္မခိုင်းစေခံရတဲ့လုပ်အားတွေနဲ့ ထုတ်လုပ်ထားတဲ့ပစ္စည်းတွေကို သွင်းနေတဲ့ လုပ်ငန်းတွေဆီက ပုစွန်ထွက်ကုန် ပစ္စည်းတွေကို ရှာတွေ့ခဲ့ကြတယ်။
ဥရောပနဲ့ အာရှက သွင်းကုန်ပို့ကုန်မှတ်တမ်းတွေဟာ တောင်းယူကြည့်ရှုလို့မရပေမယ့် အေပီကခြေရာခံလိုက်ခဲ့တဲ့ ပုစွန်တွေကို လက်ခံရယူတဲ့ ထိုင်းကုမ္ပဏီတွေအားလုံးကတော့ ဥရောပနဲ့အာရှနိုင်ငံတွေဆီ တင်ပို့တာလို့ ထုတ်ပြော ကြပါတယ်။
တုန့်ပြန်ဖြေဆိုကြတဲ့ အဲဒီကုမ္ပဏီတွေက ဒီလို အပြုအမူလုပ်ရပ်တွေကို ပြစ်တင်ရှုတ်ချခဲ့ကြတယ်။ Gig စက်ရုံလို ပုစွန်အခွံချွတ်ရုံတွေမှာ မိမိဆန္ဒမပါဘဲ ထိန်းသိမ်းခံထားရသူတွေနဲ့ ဆက်နွယ်နေတဲ့ ပစ္စည်းသွင်းတဲ့လုပ်ငန်းတွေကို စုံစမ်းစစ်ဆေးမှုတွေ လုပ်ဆောင်နေတယ်လို့ ကုမ္ပဏီအတော်များများက ပြောကြတယ်။ Gig စက်ရုံဟာ ရထားသံလမ်း နဲ့ မြစ်တစ်ခုကြား လူသွားလူလာရှုပ်ထွေးတဲ့ လမ်းငယ်တစ်ခုဘေး ဂိတ်တံခါး တစ်ခုရဲ့ အနောက်မှာ တည်ရှိနေတယ်။
ကြီးမားတဲ့ကုန်လှောင်ရုံကြီးအတွင်းဘက်မှာတော့ အိမ်သာတွေက အညစ်အကြေးတွေပြည့်လျှံနေတယ်၊ လုပ်ငန်းခွင် အပြင်ဘက်က အဖုံးအကာမရှိတဲ့ အညစ်အကြေးစွန့်မြောင်းတစ်ခုမှာ ပုပ်ဟောင်နေတဲ့ ရေဆိုးတွေ တစ်ဆို့နေတယ်။ အသက်ရှူကျပ်မတတ် အဆောင်ခန်းထဲမှာ ကလေးငယ်တွေ ခြေဗလာနဲ့ ပြေးနေကြတယ်။ ပုစွန်တွေတောင်ပုံရာပုံ ပြည့်မောက်နေတဲ့ စတီးစားပွဲခုံတန်းရှည်တွေမှာ မိသားစုလိုက် ဘေးချင်းကပ် အလုပ်ကြမ်းလုပ်နေကြတယ်။
တင်ညိုဝင်း နဲ့ သူ့မိန်းမ မိဆန်းတို့ကတော့ အခွံချွတ်တာ မမြန်လို့ နင်ပဲငဆကျိန်ဆဲခံကြရပြီး ကျွဲတွေနွားတွေနဲ့ အနှိုင်းခံကြရတယ်။ ထွက်မပြေးရအောင်လို့ သူတို့ထဲက တစ်ယောက်ယောက် အထဲမှာနေရစ်ခဲ့မှသာ မုန့်ထွက်စားဖို့ အပြင်ကိုထွက်ခွင့်ရတယ်။
ဒါပေမယ့် သူတို့အတွေးထဲမှာတော့ လွတ်မြောက်ရေးကလွဲလို့ တခြားမရှိဘူး။
အဲဒီနောက် တင်ညိုဝင်း လွတ်မြောက်လာခဲ့ပြီး အလုပ်သမားအခွင့်အရေးကာကွယ်ရေးအဖွဲ့တစ်ခုအကူအညီနဲ့ အာဏာပိုင်တွေကို ဖိအားပေးခဲ့တာကြောင့် နိုဝင်ဘာ ၉ မှာ တာဝန်ရှိသူတွေနဲ့ စစ်သား ဒါဇင်ပေါင်းများစွာဟာ အဆိုပါ စက်ရုံထဲ ၀င်ရောက်စီးနင်းခဲ့ကြတယ်။
ဒါပေမယ့် အဲဒီစက်ရုံက ဘယ်သူတစ်ဦးတစ်ယောက်မှ လူကုန်ကူးမှုနဲ့ ဖမ်းဆီးခံရခြင်းမရှိဘဲ ကလေး ၇ဦးအပါအ၀င် စာရွက်စာတမ်းပြည့်စုံတဲ့ ရွှေ့ပြောင်းလုပ်သားတွေသာ လုပ်ငန်းခွင်ပြန်ပို့ခြင်းခံခဲ့ရတယ်။ စာရွက်စာတမ်းမရှိတဲ့ ကလေး၁၀ဦးကို မိဘတွေဆီကနေခေါ်ယူပြီး ဂေဟာတစ်ခုကို ပို့ဆောင်ခဲ့တယ်။ အခြားတရားမ၀င်လုပ်သား ၂၁ဦးကိုတော့ ဖမ်းဆီးထိန်းသိမ်းခဲ့တယ်။ ဒီထဲမှာ တင်ညိုဝင်းနဲ့ သူ့ဇနီး လည်း ပါဝင်ခဲ့တယ်။ ဒါပေမယ့် အဲဒီနောက်ပိုင်းမှာတော့ သူတို့အားလုံးဟာ လူကုန်ကူးမှုသားကောင်တွေအတွက်ထားတဲ့ အစိုးရရဲ့ ခိုလှုံရေးဂေဟာတွေဆီ ရွှေ့ပြောင်းခံခဲ့ကြရ ပါတယ်။
ဒေသအာဏာပိုင်တွေဟာ ယင်းစက်ရုံကို ပြန်လည်စုံစမ်းစစ်ဆေးဖို့ အမိန့်ပေးခြင်းခံခဲ့ရပြီး အဲဒီစက်ရုံကိုတော့ အခု ပိတ်လိုက်ပါပြီ။ အဲဒီက လုပ်သားတွေကိုတော့ ပိုင်ရှင်အတူတူပဲဖြစ်တဲ့ တခြားအလုပ်ရုံဆီ ရွှေ့ပြောင်းလိုက်ပြီလို့ ရဲကပြောတယ်။ Gig စက်ရုံပိုင်ရှင်ကို အေပီက ဖုန်းနဲ့ဆက်သွယ်မေးမြန်းခဲ့ပေမယ့် မှတ်ချက်ပေးဖို့ ငြင်းဆိုခဲ့ပါတယ်။
( အေပီသတင်းဌာနက ဒီဇင်ဘာ ၁၄၊ ၂၀၁၅ ရက်စွဲနဲ့ရေးသားတဲ့ ` Shrimp peeled by slaves in Thailand ´ သတင်းဆောင်းပါးကို ဆီလျော်အောင် ပြန်ဆိုပါတယ်။ )
ကိုမိုးထက်