သူတို့သာနိုင်ခဲ့သော်..

Zaw Myint Aye

သူတို့သာနိုင်ခဲ့သော်..
============

( ၁)

ရုံးကြီးတစ်ရုံးလုံးတွင်...
မီးရောင်စုံများထွန်းညှိထားသည်..

ရုံးရှေ့မြက်ခင်းပြင်တွင်..
စာပွဲဝိုင်း ၁၀၀ ခန့်ပါသော
ညစာစားပွဲကြီးတစ်ခု ကို..
ခမ်းနားစွာတွေ့ရသည်..

စားသောက်ဖွယ်ရာများကလဲ
အစုံအလင်..
ယမကာမျိုးစုံကလဲ.
တော်ရုံလူ မြင်ဖူးအံ့မထင်..

ထိုပွဲကို..
Sky Net နှင့် ရုပ်သံမီဒီယာများမှလဲ
တစ်နိုင်ငံလုံးသို့....
တိုက်ရိုက်လွှင့်လျှက်ရှိသည်..

ယဉ်ကျေးမှုဝန်ကြီးဌာနမှကဇတ်အဖွဲ့နှင့်
မီဒီယာများမှ တီးဝိုင်းများကလဲ...
အပြိုင်အဆိုင်ဖျော်ဖြေလျှက်ရှိသည်..

နောက်ဆုံးပေါ် ဥရောပနိုင်ငံထုတ်ဇိမ်ခံကားကြီးများက
ဥဒဟိုဝင်ထွက်ကာ ကားပါကင်ပြည့်မတတ်ရပ်နားထားသည်..
ကားအစင်းပေါင်း ငါးရာခန့်ရှိမည်...
တော်ရုံကားဝါသနာရှင်များ ရူးသွားနိုင်သည်..

ပြည်သူရဲတပ်ဖွဲ့များ မှလဲ လုံခြုံရေးထူထပ်စွာချထားသည်..

အစိုးရ၀န်ကြီးများ ခရိုနီကြီးများနှင့် ဗိုလ်ချုပ်ကြီးဟောင်း
ပါတီဝင်ကြီးများ ပြုံရွှင်သောမျက်နှာဖြင့်..
စားပွဲဝိုင်းများတွင် နေရာယူထားကြသည်..

ကွမ်းသီးငယ်မျှရှိသောစိန်များ
ပတ္တမြား များကို အပြိုင်အဆိုင်ဆင်မြန်းထားသော
ကတော်ကြီးများနှင့် ခရိုနီမကြီးများ၏ မျက်နှာတွင်
အပြုံးတလက်လက်ဖြင့်တွေ့ရသည်...

အမှောင်ရိပ်ရှိထောင့်စားပွဲများတွင်..
အစိုးရ၀န်ကြီးအချို့၏ သားသမီး
ခရိုနီပေါက်စများကလဲ..
အလယ်စားပွဲများသို့..
အားကျသောအကြည့်ဖြင့်ကြည့်ကြသည်..

တစ်ချို့စားပွဲများတွင်..
မျိုးနှစ်ပါတီများနှင့် ပူးသတ်ပါတီများမှ
ကိုယ်စားလှယ်များကိုလဲ ကျီးကြည့်
ကြောင်ကြည့်ဖြင့် တွေ့ရသည်..

ပြန်ဝန်တစ်ဦးကိုလဲ..
ကင်မရာတစ်ခု၏ရှေ့တွင်...
ပြုံးပျော်နေသောမျက်နှာပေးဖြင့်..
ဂိုက်ပေးနေသည်ကိုတွေ့ရသည်..

အနိုင်ရပါတီ၏ အောင်ပွဲညပင်တည်း..

-------------------

(၂)

မကြာခင် ပါတီဥက္ကဌ ကြီးသည်
ရွေးကောက်ပွဲ ကော်မရှင်ဥက္ကဌနှင့် ပါတီဝင်များ
ခြံရံလျှက်ရောက်ရှိလာပြီး..
နေရာယူကြသည်...

ထို့နောက် အခမ်းအနားမှုးက..

ဂုဏ်ပြုညစာစားပွဲစတင်မည်ဖြစ်ကြောင်း
ကြေငြာသည်..

ခရိုနီကြီးများနှင့် ပါတီရွေးကောက်ခံကိုယ်စားလှယ်များက
အပြိုင်အဆိုင်သူ့ထက်ငါ ကြိုဆိုမျက်နှာချိုသွေးကြသည်..

အစိုးရသစ်လက်ထက်တွင်..
ဝန်ကြီးမည်သူဖြစ်ကြမည်နည်းဟူသော..
အတွေးများဖြင့် ပါတီကိုယ်စားလှယ်လောင်းများအချင်းချင်း
သာမက..မိန်းမများအချင်းချင်းကပါ စမန်ခုတ်ကာ..
အပြုံးများနောက်ကွယ်မှမျက်စောင်းတစ်ခဲခဲဖြင့် တွေ့ရသည်..

ညစာစားနေစဉ်မှာပင်..

တစ်ယောက်နှင့်တစ်ယောက်..
တီးတိုးတီးတိုးသဖန်းပိုးလုပ်နေကြသည်..

ခရိုနီငယ်များကလဲ ၀န်ကြီးဖြစ်ရန်..
တစ်ပေးခံထားရသောကိုယ်စားလှယ်များ
အနီးသို့ရစ်ဝဲရစ်ဝဲလုပ်ကြသည်..
အကြောင်းမရှိအကြောင်းရှာ အရောဝင်ကြသည်..

---------------------

(၃)

ထို့နောက် ဘာမဆိုင်ညာမဆိုင်..
ခရိုနီတစ်ဦးမှ ထကြေငြာသည်...

ပါတီအနိုင်ရသည့်အတွက်...
ဂုဏ်ပြုငွေ သိန်းတစ်သောင်းချီးမြှင့်ကြောင်း..

ထို့နောက် အားကျမခံ တခြားခရိုနီတစ်ဦးကလဲ
ထကြေငြာသည်...

ပါတီအနိုင်ရသည့်အတွက်...
သိန်းတစ်သောင်း ချီးမြှင့်ကြောင်း..

တခြားခရိုနီများကလဲ...
အပြိုင်အဆိုင် ထပြောကြသည်..

တစ်သောင်း...
နှစ်သောင်း...
သုံးသောင်း..စသဖြင့်...

လက်ခုတ်သံများ ဆူညံသွားကြသည်..

ခရိုနီမီဒီယာများကလဲ..
ဂုဏ်ယူဝင့်ကြွားဖွယ်အပြေးအလွှား..
ရိုက်ကူးထုတ်လွှင့်ကြသည်...

----------------------

(၄)

ထိုစဉ်.....

စစ်ယူနီဖေါင်းဝတ်ထားသော..
လုံခြုံရေးအဖွဲ့များ ရုံးကြီးကိုဝိုင်းလိုက်ကြသည်..

ခမ်းနားလှပသော..
ကားနက်ကြီးတစ်စင်းက...
ညစာစားပွဲကျင်းပနေရာကွင်းပြင်ဆီသို့
မောင်းဝင်လာသည်...
မည်သူမှ မတားရဲကြ.....

ထို့နောက် ပါတီဥက္ကဌကြီးထိုင်နေသော
စားပွဲဘေးတွင် ထိုးရပ်လိုက်သည်..

ဥက္ကဌကြီးနှင့် ၀ါစဉ်ကြီးဆရာကြီးများက..
တစ်စုံတစ်ခုကို စိုးရိမ်သည့်များနှာများနှင့်...
အပြေးအလွှား ထကြိုဆိုကြသည်..
ကားနှင့်ဝေးနေသူများ.
ကမြောသောပါးဖြစ်ကုန်ကြသည်
ခရိုနီအချို့ ခလုတ်တိုက်လဲကြသည်..
ကတော်အချိုက ထဘီစတက်နင်းမိကြသည်..

"ချပ်..."
ကားတံခါးပွင့်သွားသည်..

ကားပေါ်မှ ကောင်လေးတစ်ယောက်
အရင်ဆင်းလာသည်...

ထို့နောက် အဘိုးကြီးတစ်ယောက်
ဆင်းလာပြီး ပါတီဥက္ကဌကြီး၏ထိုင်ခုံတွင်...
အခန့်သားဝင်ထိုင်လိုက်သည်
ဥက္ကဌကြီးမှာ မျက်လွှာပင်ပင့်မကြည့်ရဲချေ...

ကောင်လေးက..ပြောလိုက်သည်..

"ဘိုးဘိုးက ပြောတယ်..
သူ နောက်ကျသွားလို့..
အစီစဉ်အစက ပြန်စ ပါတဲ့.."

အားလုံးက..

တိုင်ပင်ထားသလို..
အသံကြီးတစ်ခုဟိန်း
ထွက်လာသည်..

" ဟုတ်ကဲ့ခညာ "

tongue emoticon

( Pa Yit)