နေညိုရင် ( လင်းနစ် )

We Love Music

နေညိုရင် ( လင်းနစ် )
------------------------

‪#‎စတင်ရေးဖြစ်ခဲ့ပုံ‬

ဒီသီချင်းလေး စတင်ရေးဖြစ်ခဲ့တာ ကအသက် ၁၉၊၂၀ လောက်တုန်းက ဖြစ်မယ်ထင်တယ်။ ကျွန်တော်အလုပ်ကိစ္စနဲ့ နယ်ကိုခရီးသွားတဲ့အချိန်မှာ ကောင်မလေးတစ်ယောက်နဲ့ တွေ့ခဲ့ပြီး လူငယ်သဘာဝ အီစီကလီတွေဖြစ်ခဲ့ကြတယ်။ ဒါပေမယ့် ကျွန်တော်က အဝေးပြေးကားနဲ့ ပြန်လာပြီး ညနေကျရင် ခွဲရတော့မယ်။ နောက်ပြန်တွေ့ချင်ရင် ပြန်တွေ့ပြီး မတွေ့ရင် မတွေ့တော့ဘူး။ အဲဒီခံစားမှုလေးကို မမေ့ဘူး။ အဲဒီခံစားမှုလေးကို ရန်ကုန်ပြန်ရောက်တော့ သီချင်းချရေးလိုက်တာ ဒီသီချင်းဖြစ်သွားတာပါ။ တကယ့်ခံစားချက် အစစ်ပေါ့။ တိတိကျကျပြောရရင် ကရင်မလေးတစ်ယောက်ပေါ့။

ဒီသီချင်းရေးတာ (၆)တောင်ကြာခဲ့တယ်…

အဲဒီသီချင်းကို သံစဉ်ရှာခဲ့ပြီးကတည်းက စကားလုံးတိုင်းကို မကြိုက်လို့ ခဏခဏပြန်ထည့်တာ (၆)လောက်နီးပါး ကြာခဲ့တယ်။ Verse ပိုင်းဆိုရင်း နေ့တိုင်းမရေးဖြစ်ခဲ့ဘူး။ တဖြည်းဖြည်းရေးသားခဲ့ရတာ။ ကျွန်တော်ရေးခဲ့တဲ့ သီချင်းထဲမှာ ဒီသီချင်းက အကြာဆုံးပဲ။ သံစဉ်နဲ့ စာသားပိုင်းကို တော်တော်စဉ်းစားပြီး ထည့်ခဲ့ရတယ်။ “အလှဆုံးမျက်ဝန်းက မိုးတွေရွာဦးမလား “ဆိုတာမျိုး သံစဉ်နဲ့စာသားကို ကွက်တိဖြစ်အောင် ရေးခဲ့ရတာ။ ဒီသီချင်းလေးက သံစဉ်အရင်ဆုံးရခဲ့တာ။ Verse သံစဉ်လေးကို အရင်ရှာ Chorus ကိုရှာ ပြီးမှလိုက်ဖတ်မယ့် Pre ပိုဒ်လေး ကိုရှာဖြစ်ခဲ့တာ။ သံစဉ်အားလုံးရပြီးမှ စာသားထည့်ဖြစ်ခဲ့တာပေါ့။ ဒီသီချင်းလေးက ခံစားချက်အစစ်လေးဆိုတော့ သီချင်းပြန်ရေးတဲ့ အချိန်မှာ ရင်ထဲရှိတဲ့ ခံစားချက်လေးကို ပြန်ဆွကြည့်တယ်။ ရင်ထဲမှာ မမေ့နိုင်တဲ့ အစိုင်အခဲကြီးဆိုတော့ မမေ့နိုင်တဲ့မြင်ကွင်းလေး အစစ်အမှန် ၊နေရာလေးကို ပြန်ရောက်ရသလိုမျိုး ပြန်ရေးဖြစ်ခဲ့တာပါ။ ကျွန်တော်ကသီချင်း တစ်ပုဒ်ရေးတော့မယ်ဆိုရင် သံစဉ်အရင်ရှာပြီးမှ သံစဉ်ကတောင်းဆိုတဲ့ စာသားကို ထည့်ဖြစ်တာပါ။ ထွက်လာတဲ့စာသားကို ကောက်ပြီး ဆိုလိုတဲ့အကြောင်းကို သီချင်းထဲမှာ Mood ထည့်ပြီး ရေးခဲ့တာ။ ကျွန်တော်ကသီချင်းတစ်ပုဒ်ကို ရေးနေတဲ့ပုံစံမျိုး မဟုတ်ပဲ သီချင်းက ကျွန်တော့်ကိုရေးနေတဲ့ ပုံစံမျိုး။ ကျွန်တော်ကကြားခံနေတဲ့ ပုံစံမျိုး။ ရှိပြီးသားသီချင်းတစ်ပုဒ်ကို ကောက်ဆွဲချတဲ့ ပုံစံမျိုး၊ မျောထားပြီး တစ်သားတည်းဖြစ်အောင် ရေးတာပါ။ နောက်ပြီးကျွန်တော့်အတွက် သီချင်းရေးလို့ ကောင်းတဲ့ အချိန်က နိုဝင်ဘာ၊ဒီဇင်ဘာ ဆောင်းရာသီ ညပိုင်းလေးတွေ ရေးဖြစ်ခဲ့တာပါ။

‪#‎နေညိုချိန်မှာ‬ ဒီလိုဆိုခဲ့ရတယ်လေ…

နေညိုချိန်သီချင်းလေးက ကျွန်တော့်ရဲ့ပထမဦးဆုံး Solo Album ထဲမှာသီဆိုခဲ့တာပါ။ အဲဒီတုန်းက အဆိုနဲ့ပတ်သက်ပြီး သိပ်ပြီးမပိုင်နိုင်သေးတော့၊ mood ကိုအာရုံစိုက်လိုက်ရင် pitch လေးတွေ နည်းနည်းယိုင်ယိုင်သွားတတ်တယ်။ pich ကိုဂရုစိုက်လိုက်ရင် mood နည်းနည်းလျော့သွားပြန်ရော။ အဲနှစ်ခုကြားထဲမှာ ဗျာများခဲ့ရတယ်။ ဒီသီချင်းနဲ့ပတ်သက်ပြီး ကျွန်တော်က mood ပိုင်းမလျော့ချင်တော့ pitch ပိုင်းတွေယိုင်သွားတော့ studio ခန်းထဲမှာ studio enigener ကရေလည်မောင်းခဲ့တယ်။ မျိုးစုံခဏခဏ သွင်းခဲ့တာ ၊ ရချင်တော့ သီချင်းအစအဆုံးဆိုတဲ့ အချိန်ကျမှ တစ်ခါတည်းရသွားခဲ့တယ်။ နှစ်ချက်စလုံးအဆင်ပြေသွားခဲ့တာပေါ့။ အခက်ဆုံးနေရာတွေက overlap ပိုင်းတွေ high pitch တွေကို အော်နိုင်မယ်ထင်လို့ အော်ခိုင်းတာ။ Notes ရောက်အောင် မိုက်နားအထိရောက်အောင် အော်ခဲ့ရတာတွေရှိတယ်။ အကြိုက်ဆုံးစာသားဆိုရင် “ဆုံစည်းခွင့်ခဏလေးသာ အတိတ်မှာ အိပ်မောကျနေ” ဆိုတဲ့အပိုင်းလေး၊ လူမသိသူမသိ အဖြစ်အပျက်လေးက အတိတ်မှာပဲ အိပ်မောကျသွားခဲ့တာမျိုးပေါ့။ အဲဒီစာသားလေးကို အကြိုက်ဆုံးပဲ။

‪#‎အနုပညာဝမ်းစာဖြည့်ခဲ့ရတာတွေဆိုရင်‬

အဆိုပိုင်းနဲ့ ယခုလက်တလောလေ့ကျင့်ဖြစ်တာက Youtube ကနေ download ဆွဲထားတဲ့ Vocal lesson လေးတွေရှိတယ်။ အဲဒါတွေကို အမြဲလေ့ကျင့်ဖြစ်သလို၊ Recording ရှိတဲ့နေ့ဆိုရင် ညပိုင်းကျရင် စောစောအိပ်၊ မနက်စောစောထ၊ ညနေပိုင်းလောက်မှာ လေ့ကျင့်ခန်းလုပ်ပြီး လုံးဝသီချင်းမဆိုတော့ပဲ နားလိုက်တာ၊ ညပိုင်းကျမှ အသံသွင်းဖြစ်တာ များပါတယ်။

#နေညိုချိန်မှာ ကာရာအိုကေ ဟဲလို့ရပါပြီ

နေညိုချိန်က… ပရိတ်သက်တော်တော်များများက ရင်ဘက်ထဲက အိပ်မက်ဟောင်း စီးရီးထဲမှာတော်တော်များများ ကြိုက်ခဲ့ပေမယ့် ဗီစီဒီမထွက်ခဲ့ဘူး။ ဒါပေမယ့် နာရီလက်တံထဲမှာ အရုပ်ရော အသံပါ ထွက်ရှိခဲ့တော့ Bonus အနေနဲ့ ထွက်ရှိလာပြီး ကာရာအိုကေ ဆိုချင်တဲ့သူတွေအတွက် အဆင်ပြေသွားတာပေါ့။

8 Days 17-8-2012