အာဇာနည်ဆိုတာ

 

နှိုင်းရင့်နွေ

အာဇာနည်ဆိုတာ
----------------------------------------------------------------
နှိုင်းရင့်နွေမှတင်ဆက်သည်...
https://www.facebook.com/hnaingyintnway
----------------------------------------------------------------
ဒီနေ့ ဇူလိုင်လ ၁၉ ရက်နေ့... အာဇာနည်နေ့မှာ အာဇာနည်ဆိုတာနဲ့ ပတ်သက်ပြီး အကြမ်းသဘောလေး ဆွေးနွေးသွားချင်ပါတယ်... အာဇာနည်ကို မြန်မာအဘိဓာန်တွေမှာ "မကြောက်မရွံ့ မတွန့်မဆုတ်ဘဲ ကြောင်းကျိုးဟုတ်မှန်ကို ဝေဖန်တတ်သော ပုဂ္ဂိုလ်သတ္တဝါ..." လို့ ဖွင့်ဆိုထားကြောင်း ဖတ်မှတ်ဖူးပါတယ်... ဒီစကားကိုပြန်စိစစ်ကြည့်မယ်ဆိုရင် ပထမအပိုင်းက မကြောက်မရွံ့တာဖြစ်ပါတယ်... တစ်နည်းအားဖြင့် ရဲဝံ့ခြင်းသဘော... သံသယကင်းခြင်းသဘောတွေကို ဆောင်ပါတယ်... နောက်တစ်ချက်က မတွန့်မဆုတ်တာဖြစ်ပါတယ်... ပြတ်သားတဲ့သဘော... ဆုံးဖြတ်ချက်ခိုင်မာတဲ့သဘောကို ဆောင်ပါတယ်... နောက်တစ်ပိုင်းက ကြောင်းကျိုးဟုတ်မှန်ကို ဝေဖန်တတ်တဲ့အပိုင်းဖြစ်ပါတယ်... ပညာရှိတဲ့သဘော... ကျိုးကြောင်းဆင်ခြင်ဥာဏ်ပြည့်ဝတဲ့ သဘောဖြစ်ပါတယ်... နောက်ဆုံးတစ်ပိုင်းကတော့ ပုဂ္ဂိုလ်သတ္တဝါလို့ဆိုထားပါတယ်....

ဒီဖွင့်ဆိုချက်အရ ကောက်ချက်ချရမယ်ဆိုရင် အာဇာနည်ပုဂ္ဂိုလ်ဟာ ကြောက်ရွံ့ခြင်းကင်းရပါမယ်... တွန့်ဆုတ်ခြင်းကင်းရပါမယ်... အမှားအမှန်နဲ့ အကြောင်းအကျိုးကို ဝေဖန်ပိုင်းခြားသိမြင်နိုင်စွမ်းရှိရပါမယ်... အကြောက်အရွံ့ကတော့မရှိပါဘူး... တွေဝေတွန့်ဆုတ်မှုလည်းမရှိပါဘူး... ဒါပေမဲ့ အမှားနဲ့အမှန်ကို ဝေဖန်ပိုင်းခြားနိုင်စွမ်းမရှိဘူးဆိုရင်တော့ အဲ့ဒီသူကို အာဇာနည်လို့ သတ်မှတ်နိုင်မှာမဟုတ်ပါဘူး... အာဇာနည်ဆိုတဲ့အချက်မှာ အမှားအမှန် အကျိုးအကြောင်း အဆိုးအကောင်းကို ဝေဖန်ပိုင်းခြားနိုင်စွမ်း က အဓိက ကျပါတယ်...

အမှားအမှန် အကျိုးအကြောင်း အဆိုးအကောင်းကိုလည်း သိတယ်... ကြောက်ရွံ့ခြင်းလည်းကင်းတယ်... ဒါပေမဲ့ ကိုယ့်ရပ်တည်ချက်အပေါ် သံသယဖြစ်နေရင်.. တွေဝေတွန့်ဆုတ်နေရင်... တစ်နည်းအားဖြင့် စွန့်ဝံ့စွန့်စားမှုမရှိဘူးဆိုရင်လည်း အာဇာနည်အဖြစ် မသတ်မှတ်နိုင်ပါဘူး... အာဇာနည်ပုဂ္ဂိုလ်ဟာ တွေဝေတွန့်ဆုတ်မှုမရှိဘဲ စွန့်ဝံ့စွန့်စားရဲရပါမယ်... ကိုယ့်ရပ်တည်ချက်အပေါ် သံသယကင်းကင်းနဲ့ ခိုင်ခိုင်မာမာယုံကြည်ရင်ဆိုင်နိုင်ရပါမယ်... ယုံကြည်ချက် ခံယူချက်မြင့်မားရပါမယ်...

နောက်တစ်နည်းဆိုရရင် အမှားအမှန်ကိုလည်းသိတယ်... ကိုယ့်ရပ်တည်ချက်အပေါ်မှာလည်း သံသယမရှိဘူး... တွေဝေတွန့်ဆုတ်မှုမရှိဘူး... ဒါပေမဲ့ ရင်ဆိုင်ရမယ့် ရန်သူအပေါ် ကြောက်နေရင် ရွံ့နေရင်လည်း အာဇာနည်မဖြစ်နိုင်ပါဘူး... ကြုံလာသမျှကို ရဲရဲရင့်ရင့်ရင်ဆိုင်ရပါမယ်... သတ္တိရှိရပါမယ်... ဒီတစ်ချက်ကလည်း အာဇာနည်ပုဂ္ဂိုလ်တွေရဲ့ မရှိမဖြစ်အရည်အချင်းတစ်ရပ်ဖြစ်ပါတယ်...

နောက်ဆုံးတစ်ချက်ဖြစ်တဲ့ အပေါ်ကအရည်အချင်းတွေနဲ့ပြည့်စုံတဲ့ ပုဂ္ဂိုလ်သတ္တဝါ မည်သူမဆို အာဇာနည်ဖြစ်နိုင်ပါတယ်... စစ်သားမှ... နိုင်ငံ့ခေါင်းဆောင်မှ... ဘာသာရေးခေါင်းဆောင်မှ.. လူသားစင်စစ်ဖြစ်မှ အာဇာနည်ဖြစ်တာမဟုတ်ပါဘူး... အဲ့ဒီအချက်နဲ့ပတ်သက်ပြီးတော့ စဉ်းစားဆင်ခြင်စရာ အချက်အနေနဲ့ အာဇာနည် အမျိုးအစား (၆) မျိုးရှိကြောင်း ရှေးကသတ်မှတ်ခဲ့တာကို မှတ်သားဖူးပါတယ်... အဲ့ဒီအာဇာနည် (၆) မျိုးကတော့...
၁) သီဟ >>> ခြင်္သေ့အာဇာနည်
၂) ဟတ္တာဇာနေယျ >>> ဆင်အာဇာနည်
၃) အဿအာဇာနေယျ >>> မြင်းအာဇာနည်
၎) ဥသဘအာဇာနေယျ >>> နွားလားအာဇာနည်
၅) ခိဏသဝ >>> ရဟန္တာပုဂ္ဂိုလ်
၆) ယောက်ျားအာဇာနည် တို့ပဲဖြစ်ပါတယ်... ခြောက်ခုမြောက်မှာ ယောက်ျားအာဇာနည်လို့ဆိုထားပေမဲ့ တကယ့်တကယ်တော့ လူသားအာဇာနည်တွေကိုရည်ညွှန်းတယ်လို့ ယူဆရပါတယ်... ရှေးခေတ်အခါက အမျိုးသမီးတွေရဲ့ အခန်းကဏ္ဍကို သိပ်အရေးမပေးခဲ့သလို အာဇာနည်အဖြစ် သတ်မှတ်ခံရတဲ့ အမျိုးသမီးများလည်း မရှိသလောက်နည်းခဲ့တဲ့ အတွက် ယောက်ျားအာဇာနည်အဖြစ်သာ ရည်ညွှန်းပြောဆိုခဲ့ကြဟန်တူပါတယ်...

တကယ့်တကယ်တော့ အာဇာနည်ဆိုတာ ဘယ်လိုလူပုဂ္ဂိုလ်အမျိုးအစားမဆို ဖြစ်နိုင်သလို လူသားမဟုတ်တဲ့ အဟိတ်တိရိစ္ဆာန်အာဇာနည်များပါရှိခဲ့ပါတယ်... အာဇာနည်ဆိုတဲ့ သတ်မှတ်ချက်စံနှုန်းဟာ ဘာဖြစ်တယ်ဆိုတာထက် ဘာလုပ်တယ်ဆိုတာနဲ့ တိုင်းတာသတ်မှတ်ခဲ့ကြတာဖြစ်ပါတယ်... အဲ့ဒီတော့ အပေါ်က အကြောင်းအချက်တွေနဲ့ ကိုက်ညီတဲ့ ဘယ်လူပုဂ္ဂိုလ်သတ္တဝါမဆို အာဇာနည်ဖြစ်နိုင်ပါတယ်... ဘယ်လိုဝန်းကျင် ဘယ်လိုအခြေအနေမျိုးမှာပဲရှိရှိ အာဇာနည်တွေရဲ့ အရည်အချင်းနဲ့ အတွေးအခေါ်ခံယူချက် လုပ်ဆောင်မှုတွေရှိတဲ့သူဟာ အာဇာနည်အဖြစ် သတ်မှတ်ခံရမှာပဲဖြစ်ပါတယ်... တိုင်းတာသတ်မှတ်မှုတွေကတော့ ဝန်းကျင်အခြေအနေအသီးသီးရဲ့ စံနှုန်းတွေအပေါ်မူတည်ပြီး ကွာခြားနိုင်ပါတယ်...

အာဇာနည်ကို အင်္ဂလိပ်လို martyr လို့ခေါ်ပါတယ်... မူရင်းဂရိဝေါဟာရ martys/martus ကနေဆင်းသက်လာပြီး သိမြင်ယုံကြည်သူ/အသိသက်သေ (witness) လို့အဓိပ္ပာယ်ရပါတယ်... ဒီအသုံးအနှုန်းဟာ ဘာသာရေးခံယူချက်ကို အသက်နဲ့ရင်းပြီးလက်ခံယုံကြည်သွားတဲ့ သူတွေအတွက် အစောပိုင်းမှာ အသုံးပြုခဲ့ကြပါတယ်... သူတို့သေဆုံးသွားမှ အာဇာနည်အဖြစ်သတ်မှတ်တာမဟုတ်ပါဘူး.. ဒီလိုယုံကြည်လက်ခံသူတိုင်းကို အာဇာနည်ရယ်လို့ သတ်မှတ်ကြတာဖြစ်ပါတယ်... နောက်ပိုင်းမှာတော့ မိမိယုံကြည်ချက် ခံယူချက်အတွက် မိမိအသက်.. မိမိဘဝရပ်တည်မှု.. ဒါမှမဟုတ် တခြားသော ကိုယ်ပိုင်အခြေအနေတွေကို ရင်းနှီးပေးဆပ်ပြီး စွန့်လွှတ်ဝံ့တဲ့သူတွေကို ရည်ညွှန်းပြောဆိုလာခဲ့ပါတယ်...

အာဇာနည် (martyr) ဆိုတဲ့အသုံးအနှုန်းနဲ့ စတင်သတ်မှတ်ခံခဲ့ရသူကတော့ ယေရှု (Jesus) ဖြစ်ပါတယ်... လူသားတွေအတွက် သူ့ရဲ့စွန့်လွှတ်စွန့်စားမှုကို အသိအမှတ်ပြု ကျေးဇူးတင်တဲ့အနေနဲ့ အကြီးမြတ်ဆုံးအာဇာနည်အဖြစ် ခရစ်ယာန်တွေက ယုံကြည်လက်ခံထားကြပါတယ်... အာဇာနည်ဆိုတဲ့ ဝေါဟာရဟာ အလွန်ကျယ်ပြောတဲ့ အနက်အဓိပ္ပာယ်ကိုဆောင်ပါတယ်... ခြုံငုံကြည့်မယ်ဆိုရင်တော့ အာဇာနည်တစ်ယောက်မှာ ဒီအကြောင်းအချက်တွေနဲ့ ပြည့်စုံနေပါလိမ့်မယ်...

၁) သူရဲကောင်းဖြစ်ခြင်း
လူအများစုလုပ်နိုင်ခဲတဲ့အလုပ်ကို လုပ်ခဲ့ပြီး လူတွေအတွက် စံနမူနာပြစရာ သူရဲကောင်းတစ်ယောက်အဖြစ် ယုံကြည်လက်ခံထားတဲ့ ကျော်ကြားတဲ့သူမျိုးဖြစ်ပါတယ်...

၂) အတိုက်အခံရှိခြင်း
သူရဲ့ယုံကြည်လက်ခံလုပ်ဆောင်မှုကို အတိုက်အခံပြုတဲ့ အကြောင်းအချက်တွေ လူပုဂ္ဂိုလ်တွေရှိနေတဲ့ အခြေအနေမျိုးရှိကြပါတယ်...

၃) စွန့်လွှတ်စွန့်စားမှုရှိခြင်း
သူယုံကြည်လက်ခံထားတဲ့အတိုင်း လုပ်ဆောင်ရာမှာ ဖြစ်လာနိုင်တဲ့ အခြေအနေကို ကြိုတင်သိမြင်ထားပြီး ဖြစ်လာသမျှကိုခံယူရဲတဲ့ စွန့်လွှတ်ရဲ စွန့်စားရဲတဲ့လုပ်ဆောင်ချက်မျိုးရှိကြပါတယ်...

၎) သတ္တိရှိရှိလုပ်ဆောင်ခြင်း
စွန့်လွှတ်ရမယ့်အခြေအနေကိုသိလျက်နဲ့ မိမိယုံကြည်လက်ခံထားတဲ့အတိုင်း သတ္တိရှိရှိ ဆက်လက်လုပ်ဆောင်သွားတဲ့သူမျိုးလည်းဖြစ်ပါတယ်...

၅) သေဆုံးခြင်း
သူ့ရဲ့ယုံကြည်ချက်အတိုင်း ဆက်လက်လုပ်ဆောင်မှုကြောင့် အတိုက်အခံတွေရဲ့ သတ်ဖြတ်မှုကိုခံကြရပါတယ်...

၆) လူထုပရိတ်သတ်၏တုံ့ပြန်မှု
ဒီသူရဲကောင်းရဲ့ သေဆုံးမှုဟာ တခြားသူတွေအတွက် အမှတ်တရဖြစ်စေပါတယ်... လူတွေဟာ ဒီသူရဲကောင်းရဲ့စွန့်လွှတ်စွန့်စားမှုကြောင့် အာဇာနည်အဖြစ် သတ်မှတ်ကြပါလိမ့်မယ်... တခြားသူတွေကလည်း သူစွန့်လွှတ်အနစ်နာခံပြီး လုပ်ဆောင်သွားခဲ့တဲ့လမ်းစဉ်အတိုင်း ဆက်လက်လုပ်ဆောင်သွားကြပါလိမ့်မယ်...

အပေါ်ကအချက်တွေကို ခြုံငုံသုံးသပ်ပြီး ပြန်ကောက်ချက်ချကြည့်မယ်ဆိုရင် အာဇာနည်ပုဂ္ဂိုလ်ဟာ အမှားအမှန်ကိုဝေဖန်ပိုင်းခြားနိုင်စွမ်းရှိပြီး ခိုင်မာပြတ်သားတဲ့ ရပ်တည်မှုရှိရပါလိမ့်မယ်... မိမိရပ်တည်မှုအပေါ်မူတည်ပြီး ဖြစ်ပေါ်လာနိုင်တဲ့အကျိုးဆက်တွေကိုလည်း ပြတ်ပြတ်သားသား သိမြင်ထားရပါမယ်... ဖြစ်လာမယ့်အကျိုးဆက်ကို လက်ခံပြီး အသက်နဲ့ရင်းရမယ်ဆိုရင်တောင် ရဲရဲဝံ့ရင်ဆိုင်ရပါမယ်... ဒီအချက်တွေနဲ့ပြည့်စုံပြီဆိုရင်တော့ အာဇာနည်ပုဂ္ဂိုလ်တစ်ယောက်ရဲ့ အရည်အချင်းတွေနဲ့ ကိုက်ညီနေပါပြီ...

သမိုင်းတွင်တဲ့အာဇာနည်ဖြစ်ဖို့ကတော့ မိမိရဲ့စွန့်လွှတ်စွန့်စားမှုအကျိုးဆက်ကို နှောင်းလူတွေဘယ်လောက်ထိ ခံစားရသလဲ... မိမိယုံကြည်လုပ်ဆောင်ခဲ့တဲ့ လမ်းစဉ်ကို နှောင်းလူတွေဘယ်လောက်အထိ ဆက်လက်အကောင်အထည်ဖော်လုပ်ဆောင်သွားမလဲ... မိမိအသက်နဲ့ရင်းပြီး လုပ်ဆောင်ခဲ့မှုအပေါ် နှောင်းလူတွေ ဘယ်လောက်အထိ အသိအမှတ်ပြုလက်ခံကြသလဲဆိုတဲ့ အချက်တွေအပေါ်မှာ မူတည်နေပါလိမ့်မယ်...

ဒီကမ္ဘာလောကကြီးမှာ အာဇာနည်တစ်ယောက်ရဲ့ အရည်အချင်းတွေနဲ့ ပြည့်စုံတဲ့သူတွေ အများကြီးပေါ်ပေါက်ခဲ့... ပေါ်ပေါက်ဆဲဖြစ်ပါတယ်... အဲ့ဒီအထဲက အနည်းငယ်ကသာ အာဇာနည်အဖြစ် သမိုင်းမှာ မော်ကွန်းထိုးခံခဲ့ရပါတယ်... အာဇာနည်တစ်ယောက်ဖြစ်ဖို့အတွက် အကြီးမားဆုံးအရင်းအနှီးကတော့ လူတိုင်းတွယ်တာမက်မောတဲ့ မိမိရဲ့အသက်ဖြစ်ပါတယ်... အစောပိုင်းကာလတွေမှာ အာဇာနည်အဖြစ်တိုင်းတာဖို့ အသက်ကိုစွန့်လွှတ်ဝံ့တာနဲ့တင် အသိအမှတ်ပြုခဲ့ပေမဲ့ နောက်ပိုင်းမှာတော့ အာဇာနည်တွေရဲ့ ကြီးမြတ်မှုကို ပိုပြီးအမွှမ်းတင်လိုတဲ့အတွက် အမှန်တကယ် အသက်စွန့်လွှတ်သူတွေကိုသာ အာဇာနည်အဖြစ် အသိအမှတ်ပြု သတ်မှတ်လာကြပါတယ်...

အာဇာနည်တစ်ယောက်ရဲ့ အရည်အချင်းမျိုး.. စွန့်လွှတ်စွန့်စားမှုမျိုးပြုခဲ့သူတွေဟာ သမိုင်းတစ်ကွေ့မှာ တစ်ခါတစ်ရံမေ့လျော့ခံရတတ်ပါတယ်... ဒါပေမဲ့ အချိန်တန်တဲ့အခါ သမိုင်းစာမျက်နှာမှာ ဘွားခနဲပေါ်လာဦးမှာဖြစ်ပါတယ်... အဲ့ဒီအချိန်ကျရင်တော့ လူတွေရဲ့စိတ်ထဲမှာ လေးစား အားကျခြင်းတွေနဲ့ ကျေးဇူးတင်တာကို ခံယူရမှာ အသေအချာပါပဲ... ကမ္ဘာ့သမိုင်းအဆက်ဆက်မှာ အသက်နဲ့ရင်းပြီး စွန့်လွှတ်စွန့်စားဝံ့တဲ့ သူရဲကောင်းတွေအများကြီးပေါ်ခဲ့ဖူးပါတယ်... သူရဲကောင်းတိုင်းက အာဇာနည်မဖြစ်ခဲ့ပေမဲ့ အာဇာနည်တိုင်းကတော့ သူရဲကောင်းတွေဖြစ်ပါတယ်...

မြန်မာနိုင်ငံရဲ့ အာဇာနည်နေ့မှာ အာဇာနည်ဆိုတာ ဘာလဲဆိုတဲ့အသိအမြင်လေးနဲ့အတူ ချိန်ထိုးသုံးသပ်ရင်း သမိုင်းတွင်ခဲ့တဲ့ မြန်မာ့အာဇာနည်ပုဂ္ဂိုလ်များ... သမိုင်းမဝင်သေးတဲ့ မြန်မာ့အာဇာနည်ပုဂ္ဂိုလ်များအားလုံးကို ဦးညွှတ်ဂါရဝပြုလိုက်ပါတယ်...