Facebook အသုံးပြုနည်း။

 

 

Classic Burma News

Facebook အသုံးပြုနည်း။
==============

အလွယ်ဆုံး အတိုဆုံး အမြန်ဆုံး ပြောရရင်တော့
Facebook ဟာ Social Network ပါ။
ဒီတော့ လူမှုဆက်ဆံရေးအတွက် အသုံးချပါ။

အခု ကျနော်တို့ဆီက လူငယ်တော်တော်များများပဲ
အနာဂတ်ပျောက်တဲ့ ပြဿနာနဲ့ ရင်ဆိုင်နေရပါတယ်။
ဆယ်တန်းအောင်ပြီး ဘွဲ့ရပြီးလို့မှ ဘာလုပ်ရမှန်း မသိတဲ့အဖြစ်။
အဲဒီပြဿနာကို FB က တစ်စိတ်တစ်ပိုင်း ဖြေရှင်းပေးနိုင်ပါလိမ့်မယ်။

အခုဆို FB ပေါ်မှာ သေဌေးကြီးတွေလည်း ရှိတယ်။
ဝန်ကြီးအဆင့်လောက်ရှိတဲ့ ဌာနဆိုင်ရာ အရာရှိကြီးတွေလည်း ရှိတယ်။
အခြားသော မျက်နှာအသီးသီးမှာ ထင်ရှားပေါက်ရောက်သူတွေ ရှိကြတယ်။
ဟာ အတော်ပဲ ဒါဆို အဲဒီလူကြီးတွေဆီက အလုပ်တောင်းရမှာလား
... လို့ မတွေးပါနဲ့။

လောကမှာ တောင်းမှရတယ်ဆိုကတည်းက
အရည်အချင်း အစစ်အမှန် မဟုတ်တော့ပါ။
တကယ်လို့ အဲဒီလူကြီးတွေဆီမှာ အလုပ်လိုချင်ရင်တော့
ကိုယ့်အရည်အချင်းကို သူတို့မြင်အောင် တင်ဆက်ပြသရမှာပေါ့လေ။
ဒါပေမဲ့ ပိုကောင်းတာက ... ထင်ရှားပေါက်ရောက်သူတွေနဲ့ မိတ်ဖွဲ့ပါ။

ဒီနေရာမှာ တစ်ခုလေးတော့ သတိပေးချင်တယ်။
အပြင်လောကမှာ တကယ်ထင်ရှားပေါက်ရောက်သူတွေကို ဦးစားပေးမိတ်ဖွဲ့ပါ။
ပြီးတော့ လိုအပ်တဲ့အခါ အကြံစည်တောင်းပါ။
သူတို့ အဲဒီနေရာရောက်တာ အလကားရောက်တာ မဟုတ်ပါ။
သူတို့တွေးသလို တွေးတတ်ရင် သူတို့လုပ်သလို လုပ်တတ်ရင်
သူတို့လိုမဟုတ်တောင် လက်ရှိအခြေအနေကထက်တော့ မြင့်တက်ပါလိမ့်မယ်။

အမှန်တော့ ဒီအကြောင်းကို အကျယ်ခင်းရေးရမှာပါ။
ဒါပေမဲ့ ခပ်တိုတိုပဲ ရေးချင်တာမို့ တစ်ပိုင်းထားခဲ့ပြီး
ဆက်ပြောစရာလေးတွေ တင်ပြပါ့မယ်။

သတင်းတွေ သုံးတဲ့အခါ ...
-------------------------

FB ကိုအများဆုံး သုံးတာတော့ သတင်းပလင်း သိရဖို့လို့ ထင်ပါတယ်။
အကြံပေးချင်တာက သူများပြောတိုင်း မယုံဖို့ပါပဲ။

အပြင်မှာ ထင်ရှားရှိတဲ့ သတင်းဌာနတွေရဲ့ ထုတ်ပြန်မှုတွေကို
အဓိက အားထားပါ။
အနည်းဆုံးတော့ သူတို့က ရုပ်လုံးပြထားတာမို့ လက်လွတ်စပယ်ကြီး
သိပ်လုပ်လို့ မရဘူးပေါ့။

ဒါပေမဲ့ တစ်ချို့ကျတော့လည်း အပြင်က ထင်ရှားရှိတဲ့
သတင်းဌာနတွေရဲ့ ထုတ်ပြန်မှုတွေကို Credit ပေးပြီး Share နေတာရှိပါတယ်။
ဒါလည်း မဆိုးပါဘူး။ မူရင်း သတင်းမြစ်ဖျားခံရာကသာ အရေးကြီးပါတယ်။

ပွင့်ပွင့်လင်းလင်း သတိပေးချင်တာကတော့
ပွဲဆူရုံသက်သက်၊ ၀ါဒဖြန့်ချင်ရုံသက်သက် လုပ်ထားတဲ့
FB Page တွေကို တော်တော်ကြီးသတိကြီးစွာ ထားပြီးမှ ယုံဖို့ပါပဲ။
ငယ်ငယ်တုန်းက ပြောကြတဲ့စကားလိုပေါ့။
ဆယ်ခွက်တစ်ခွက်တင်ကြိုပြီး ကျန်တာ ယုံသင့်မှ ယုံ။

အတွေးတွေ ပြောတဲ့အခါ ...
---------------------------

အချစ်ဆိုတာ ဘယ်လို
ယောက်ျားဆိုတာ ဘယ်လို
မိန်းမဆိုတာ ဘယ်လို
စသဖြင့် ကိုယ့်အတွေးကိုယ် ထုတ်ပြောသူတွေလည်း
FB ပေါ်မှာရှိပါတယ်။ တစ်ချို့လည်း လူကြိုက်များကြတယ်။

ဒါပေမဲ့ သူက ဘာလဲ ဆိုတာက အရေးကြီးပါတယ်။
ဒဿနပညာရှင်မဟုတ်ပဲ အတွေးအခေါ်တွေကို ပြောတာ
စိတ်ပညာရှင်မဟုတ်ပဲ ယောက်ျား မိန်းမ သဘာဝတွေ၊ အချစ်ရဲ့ အဓိပ္ပါယ်တွေကို
ခွဲခြမ်းစိတ်ဖြာပြနေတာ အပြည့်အ၀တော့ မမှန်နိုင်ပါ။

ဒီနေရာမှာ ဘုရားရှင်ဟောတဲ့
ကာလာမသုတ်ကိုသာ သတိရပါလို့ ပြောချင်တော့တာပါပဲ။

အခြားသော ပညာရှင်တွေနဲ့ ဆုံဆည်းတဲ့အခါ ...
----------------------------------------------

တန်ဘိုးထားပါ။
အပြင်မှာ တစ်ချို့ပညာရှင်တွေဟာ မျက်နှာချင်းဆိုင် ကြုံဖို့လွယ်တာ မဟုတ်ပါ။
ကြုံရင်လည်း သူတို့က အချိန်ပေးနိုင်ဦးမှ။
ဒီ FB သုံးချိန်ကတော့ သူတို့ရဲ့ အားလပ်ချိန်သဘော၊
စိတ်အကြောလျှော့ချိန် ဖြစ်နေတတ်တော့ အကူညီတောင်းလို့ အဆင်ပြေစရာရှိတယ်။

သင်ဝါသနာပါတဲ့ နယ်ပယ်တစ်ခုခုမှာ ပေါက်ရောက်အောင်မြင်နေသူတွေကို
ချဉ်းကပ်ပါ သင့်ဝါသနာရဲ့ အတတ်ပညာပိုင်းနဲ့ ပတ်သက်ပြီး
လိုအပ်တာတွေ မေးမြန်းပါ။

အတတ်ပညာတစ်ခုခု တတ်သူတိုင်းဟာ ကိုယ့်တတ်သိမှုကို
ပြန်ဝေငှချင်တတ်ကြပါတယ်။
ချဉ်းကပ်ပုံတော့လည်း လိုတာပေါ့နော်။
တကယ် ပညာလိုချင်နေတဲ့သူကိုဆို လှိုက်လှဲဝမ်းသာ ပေးကြမှာပါ။

မိတ်ဆွေ သူငယ်ချင်းတွေနဲ့ ဆုံဆည်းဖို့ရာ ...
-----------------------------------------

FB ဟာ အထီးကျန်မှုကိုတော့ အတော်အတန် ကုစားနိုင်ပါလိမ့်မယ်။
အသည်းကွဲနေတဲ့အခါမှာ ဖြစ်စေ။
အထီးကျန်လွန်းတဲ့အခါမှာ ဖြစ်စေ။
တစ်ယောက်တည်းနေတာ မကောင်းပါ။
အပြင်ထွက် လူစုလူဝေးထဲ သွားဖို့လည်း အဆင်မပြေရင်တော့
FB ပေါ်တက်တာက မဆိုးလှတဲ့ ဖြေရှင်းမှုဖြစ်လိမ့်မယ်။

Group တွေထဲ ၀င်ပြောတာမျိုး။
Comment များနေတဲ့ဆီ ၀င်ပါပြောတာမျိုးပေါ့။
ဘာပဲဖြစ်ဖြစ် အတင်းသာ ဇွတ်ဝင်ပြောပါတော့။ ဟဲ ဟဲ
အနည်းဆုံးတော့ အထီးကျန်နေခြင်းက သက်သာစေတာပေါ့။

ပညာရှာစရာ Facebook မှာ
---------------------------

ရှားပါးစာအုပ်တွေကို တင်ပေးထားတဲ့ Page တွေ
နည်းပညာတင်ဆက်နေတဲ့ နေရာတွေ
ဆေးပညာ၊ ဗေဒင်ပညာ၊ လောကီပညာတွေ တင်ဆက်မှုတွေ ရှိပါတယ်။

အင်္ဂလိပ်ဘာသာနဲ့ FB Page တွေကတော့ ပိုစုံလင်ပါတယ်။
ဒါပေမဲ့ စာအုပ်တင်တာတော့ ကျနော်တို့က ပိုများမလားပါပဲ။

ဆော့ဖ်ဝဲတွေ မိုဘိုင်းနည်းပညာတွေ ဝေငှရာ
Page တွေ Group တွေကလည်း
သင့်အတွက် အထောက်အကူအများကြီး ပြုနိုင်ပါလိမ့်မယ်။

သွန်းနေ စိုး

(ဆက်လက်ရေးသားပါဦးမယ်)