သေချာစွန့်ပစ် ပလက်စတစ်

 

Kyaw H Aung with Hlaing Bwa and 31 others

သေချာစွန့်ပစ် ပလက်စတစ်
-------
ဒီတစ်ခေါက် မြန်မာပြည်ပြန်တော့ အလယ်အလတ်စား ဟိုတယ်တစ်ခုပေါ်တည်းမယ်ဆိုပြီး ဘုတ်ကင်းလုပ်လိုက်ပါတယ်။ ဟိုတယ်ဝန်ထမ်းက အခန်းကို လိုက်ပြပြီး ဘေးတံခါးဖွင့်ကြည့်လိုက်တော့ နောက်ဘက်မှာ ဘေးနားတိုက်တာအဆောက်အဦးတွေက ပစ်ချထားတဲ့ အမှိုက်ပုံကို သွားတွေ့ပါတယ်။ အများစုက ပလက်စတစ်တွေဖြစ်နေတာကို တွေ့ရတယ်။

မွေးရပ်ဇာတိစစ်တွေကို ပြန်ပါတယ်။ အင်မတန်သာယာလှတဲ့ ပွိုင့်ကမ်းခြေကို ရောက်ပါတယ်။ စစ်တွေဟိုတယ်နားက စားသောက်ဆိုင်တွေမှာ စားပြီး သောင်ပြင်ပေါ်လမ်းလျှောက်တော့ သောင်ပြင်တစ်လျှောက် ပလက်စတစ်အိတ်တွေက ပျံ့ကြဲနေတယ်။ ကျနော်တို့တွေအတွက် သဘာဝက ဖန်ဆင်းပေးထားတဲ့အလှကို စွန့်ပစ်ထားတဲ့ ပလက်စတစ်အိတ်တွေက ဖျက်ဆီးပစ်လိုက်တယ်။ အကျည်းတန်လှတယ်။
...

ရခိုင့်နောက်ဆုံးထီးနန်းစိုက်ရာ မြို့ရွှေမြောက်ဦးကို ရောက်ပါတယ်။ မြို့ဟောင်းရဲ့ အထင်ရှားဆုံးတစ်ခုလို့ ပြောလို့ရတဲ့ ရှစ်သောင်းနဲ့ ထုက္ကံသိမ်ပုထိုးတော်ကြီးကို ဖူးဖို့ သွားပါတယ်။ မရောက်ခင် ကိုက်တစ်ထောင်ကျော်ကျော်က ဓာတ်ပုံရိုက်မယ်ဆိုပြီး လုပ်ပါတယ်။ ဘေးနားက ချောင်းနားလေးမှာ ပလက်စတစ်ပုံကြီးကို သွားတွေ့ပါတယ်။ ကျနော်တို့ရဲ့ ဂုဏ်ယူစရာကောင်းလှတဲ့ သမိုင်းအမွေကို ပလက်တစ်ပုံကြီးက ကျက်သရေတုံးစေတယ်။ အကျည်းတန်လှတယ်။

အကိုကြီး ကိုစိုးသန့်အောင်ရဲ့ ကျောက်တော်ဆိပ်ကမ်းပျက်စီးနေပုံ ဖေ့ဘုတ်ပေါ်တက်လာတယ်။ သွားကြည့်တော့ ဘေးနားတ၀ိုက်မှာ ပလက်စတစ်ပုံတွေကို သွားတွေ့တယ်။ ကျောက်တော်မြို့မှ လှိုက်လှဲစွာ ကြိုဆိုပါ၏ (ပလက်စတစ်အမှိုက်ပုံကြီးနဲ့) ဆိုသလို ဖြစ်ကုန်တယ်။ မြို့ကျက်သရေကို အ၀င်ဝကတည်းက ညစ်ပတ်စေတယ်။ အကျည်းတန်လှတယ်။

မနေ့က စစ်တွေမြို့ ဘီလူးမချောင်း (မြို့လည်ချောင်း)ကို ပြုပြင်မယ်လို့ ဖတ်လိုက်ရတယ်။ သေချာတယ်ဆိုရင် အရမ်းပျော်စရာပါ။ ဒီချောင်းလေးဟာ ငယ်ငယ်တုန်းက ကျနော်တို့ ငါးရှာခဲ့တဲ့နေရာ။ အဲဒီတုန်းက sanitation လည်း ဂရုမစိုက်အားပဲ ချောင်းထဲဆင်းပြီး ငါးရှာခဲ့တဲ့ နေရာ။ ဦးဥတ္တမလမ်းပေါ်က တံတားလေးနားမှာ ငယ်ငယ်တုန်းက ငါးရှာရင် ၆ လက်မလောက် အရှည်ရှိတဲ့ “ငါးခလေး” (ဗမာလို ငါးကျည်း လို့ ခေါ်မယ်ထင်တယ်။) တွေကိုတောင် တွေ့ပါတယ်။ ပုဇွန်လေးတွေကိုလည်း တွေ့တယ်။ ဒါပေမယ့် နောက်ပိုင်းတော့ ထိန်းသိမ်းမှုမရှိတော့ ချောင်းက တိမ်ပြီး ဘေးနားက အိမ်တွေမှာ အမြဲတမ်း ရေတက်ခံရတယ်။ ဒီတစ်ခေါက်ပြန်လို့ ဦးဥတ္တမလမ်းတံတားလေးကနေ ဖြတ်တော့ ရေမတွေ့ပဲ ပလက်စတစ်ပုံကြီးကိုသာ တွေ့ပါတော့တယ်။

မလေးရှားနိုင်ငံ မလက္ကာ မြို့ (Malacca, ယခင် ရခိုင်မင်းသား ဒေါင်းမာတင် ပေါ်တူဂီရေတပ်နဲ့အတူ သွားလာနေခဲ့သည့် မြို့) ကို ရောက်ဖြစ်တယ်။ မြို့လည်ချောင်းကို သေချာထိန်းသိမ်းထားပြီး ခရီးသွားဧည့်သည်တွေအတွက် ဘုတ်လေးစီးပြီး လည်လို့ရအောင် လုပ်ထားတယ်။ အမေရိကန်ပြည်ထောင်စုက တချို့မြို့တွေ ဥပမာ - အင်ဒီယားနားပို့လစ် မှာ ဆိုရင် တူးမြောင်းတောင် တူးပြီး အပန်းဖြေနေရာအဖြစ် သွားလာနေလို့ရောက်အောင် လုပ်ပေးထားတယ်။
သဘာဝအလှအပတွေကို ကျနော်တို့နိုင်ငံမှာလည်း သေချာထိန်းသိမ်းနိုင်ရင် ဘယ်လောက်ကောင်းနိုင်မလဲ။ အထူးသဖြင့် ပလက်စတစ်အခြေအနေက အရမ်းဆိုးရွားနေတယ်။

သမုဒ္ဒရာထဲမှာ Gyre လို့ ခေါ်တဲ့ ပတ်လည်စီးဆင်းနေတဲ့ ရေစီးကြောင်းတွေရှိတယ်။ လူတွေက စွန့်ပစ်လိုက်တဲ့ Biodegradable မဖြစ်တဲ့ အရာတွေဟာ decompose မဖြစ်ပဲ ပင်လယ်သမုဒ္ဒရာထဲမှာ ဝေ့လည်မျှော်နေကြတယ်။ တချို့က Plastic Ocean ပလက်စတစ် သမုဒ္ဒရာလို့တောင် ခေါ်လာနေကြတယ်။ ဟာဝိုင်ယီကျွန်းဟာ အရမ်းလှပတယ်။ ဒါပေမယ့် ဟာဝိုင်ယီ ကျွန်းရဲ့ မြောက်ဘက် သမုဒ္ဒရာတစ်နေရာမှာ ရှိတဲ့ Gyre လေးတစ်ခုမှာ ပလက်စတစ် အမှိုက်ပုံကြီးကိုကျတော့ လူတွေက မမြင်ချင်ယောင် ဆောင်နေကြတယ်လို့ သဘာဝပတ်ဝန်းကျင်ထိန်းသိမ်းရေးသမားတွေက ဝေဖန်ကြတယ်။

ကုန်းတွင်းနေနဲ့ သင်္ဘောတွေပေါ်က စွန့်ပစ်လိုက်တဲ့ ပလက်စတစ်တွေဟာ ရေနေသတ္တ၀ါတွေကို လက်ရှိအခြေအနေမှာ ထိခိုက်နေတယ်။ ပလက်စတစ်အစလေးတွေဟာ နေအထိုးမှာ အရောင်လက်တော့ ငါးတွေက စားမိရာကနေ ဆို့ပြီး သေတဲ့ ငါးတွေအများအပြားရှိတယ်။ တခါ ငါးတွေကို ငှက်တွေက စားပြန်တော့ ငှက်တွေမှာလည်း ပလက်စတစ်ကို အစာမကြေနိုင်ပဲ သေပြန်တယ်။

ဒီဘက်နိုင်ငံတွေမှာ ပလက်စတစ်ကို အစားထိုးဖို့ နည်းလမ်းအချို့ ရှိနေပြီ။ ဥပမာ - ပြောင်း၊ ဂျုံတွေမှာ ပါတဲ့ ကစီဓာတ်တွေကို ဖယ်ယူပြီး အမျှင်ရှည်လေးတွေ လုပ်၊ ပြီးတော့ pellet အရွယ် အစေ့လေးတွေဖြစ်အောင်လုပ်ပြီး၊ ဇွန်းခရင်းတွေ စတဲ့ ပလက်စတစ်အစားထိုးပစ္စည်းတွေကို ဖန်တီးနေကြပြီ။ မြန်မာနိုင်ငံမှာက အဲဒီလိုအစားထိုးနည်းတွေ မရှိလေသေးတော့ သုံးတဲ့ပလက်စတစ်တွေကို တတ်နိုင်သလောက် recycle လုပ်ဖို့ လိုမယ်။ မြို့နိုင်ငံတွေမှာ အကျည်းတန်နေတာတွေကို အစိုးရအပါအ၀င် အားလုံး တက်ညီလက်ညီ ပူးပေါင်းဖြေရှင်းမှ တော်ကာကျမယ်။ အမြဲတမ်းအစိုးရကို အပြစ်တင်နေရုံနဲ့လည်း မပြီးဘူး။ ကိုယ်ကိုယ်တိုင်ကလည်း စည်းကမ်းတကျ စွန့်ပစ်ဖို့ လိုမယ်။ အစိုးရကလည်း အမှိုက်သိမ်းစနစ်ကို ကောင်းကောင်းစီမံပေးဖို့လိုမယ်။ လမ်းပေါ်မပစ်အောင် ပြည်သူပိုင်နေရာတွေမှာ အမှိုက်ပုံတွေ စီစဉ်ပေးထားဖို့ လိုမယ်။

မြန်မာနိုင်ငံသားတွေဟာ ဂရုဏာတရား ပြည့်တဲ့လူတွေပါ။ လူထုအခြေပြုအဖွဲ့အစည်းတွေ များများဖွဲ့ပြီး ပူးပေါင်းပါဝင်ဖို့ လိုလိမ့်မယ်။ အထူးသဖြင့် လူငယ်လေးတွေရဲ့ role က အရေးကြီးတယ်။ ပိုက်ဆံချမ်းသာတဲ့ လူတွေကလည်း ဘုရားဆောက်ဘုန်းကြီးကျောင်းပဲ လှူရုံမဟုတ်ပဲ ကိုယ့်မြို့ရွာအတွက်၊ သဘာဝပတ်ဝန်းကျင်အတွက်လည်း လုပ်ချင်စိတ်ရှိတဲ့ လူတွေကို ကူညီထောက်ပံ့ပေးရလိမ့်မယ်။ အကျည်းတန်မှုတွေကို ၀ိုင်းဝန်းရှင်းလင်းပေးကြရင် ကမ္ဘာလှည့်ခရီးသွားဦးရေ တိုးပွားလာမှု စတဲ့ လူမှု၊ စီးပွားရေးဆိုင်ရာ အကျိုးခံစားခွင့်တွေ ကို ပြန်လည်ခံစားလာကြရမှာပါပဲ။

သန့်ရှင်းတဲ့ လူ့ဘောင်ကို ၀ိုင်းဝန်းတည်ဆောက်ကြပါစို့။ ။
ကျော်ထူးအောင်