ဝေလငါးတွေ ပင်လယ်ထဲမှာ သားပေါက်တာ မြင်ဖူးတယ်၊ ဒါပေမယ့် ဂီတက အလှဆုံးပဲ – စတီဗင်တိုင်လာ

ရော့ခ်ဘိုးအေကြီး Aerosmith ၀ိုင်းရဲ့ ပင်တိုင်အဆိုတော်၊ တေးရေးနဲ့ ဂီတတူရိယာမျိုးစုံ တီးခတ်နိုင်သူ စတီဗင်တိုင်လာကို နယူးယောက်မြို့အနီး ရွန်ကားအရပ်မှာ ၁၉၄၈ ခု မတ်လ ၂၆ ရက်နေ့မှာ မွေးဖွားခဲ့ပြီး ဖခင်ဖြစ်သူက အီတလီနဲ့ ဂျာမန်သွေးစပ်ပြီး မိခင်က ပိုလန်နဲ့ အင်္ဂလိပ်သွေးစပ်သူ ဖြစ်ပါတယ်။ Aerosmith ၀ိုင်း အဖွဲ့စင်နောက်မှာ Hit ဖြစ်လာမယ့် Dream On သီချင်းကို ရေးဖြစ်ခဲ့ပါတယ်။
သူတို့အရပ်မှာလုပ်တဲ့ ရော့ခ်ဂီတပုံကို သွားကြည့်ရာက ဂစ်တာသမား ဂျိုးပယ်ရီနဲ့ ဘေ့စ်ဂစ်တာ တွမ်ဟယ်မဲလ်တန်တို့နဲ့တွေ့ပြီး တီးဝိုင်းဖွဲ့ဖြစ်သွားပါတယ်။ ငယ်စဉ်က ကျေးလက်အရပ်မှာ ကြီးပြင်းလာရတဲ့ အကြောင်းနဲ့ ပတ်သက်ပြီး “ကျွန်တော်က နယူးဟမ်ရှိုင်းယားမှာ ကြီးပြင်းခဲ့တာပါ။ အနီးဆုံး အိမ်နီးနားချင်းက တစ်မိုင်လောက်ဝေးတယ်။ တောထဲက သမင်နဲ့ တောကြောင်တွေက ကျွန်တော့်ရဲ့ သူငယ်ချင်းတွေပဲ။ ဒါကြောင့် တောထဲမှာလမ်းလျှောက်ပြီး ဆောင်းရာသီမှာ အသက်ရှင်နေထိုင်တဲ့ အကောင်တွေနဲ့ အလှအပဆုံးအရာတွေကို လျှောက်ကြည့်တယ်။ တကယ်တော့ ကျွန်တော်က ကျေးလက်မှာ ကြီးပြင်းခဲ့ရတဲ့ တောသားလေးပါ။ ပင်လယ်တွေထက်စာရင် တောတောင်တွေကို ပိုချစ်တယ်”။

ဂီတနဲ့ ပတ်သက်လို့ သူ့ရဲ့ခံယူချက်က “ဝေလငါးတွေပင်လယ်ထဲမှာ သားပေါက်တာ ကျွန် တော်မြင်ဖူးတယ်။ ကျွန်တော့်ရဲ့ ကလေးတွေကို မွေးတာ ကိုယ်တိုင်ကြည့်ဖူးတယ်။ ဒါပေမယ့် ဂီတကတော့ အလှဆုံးပဲ”။ သူဟာတီးဝိုင်းမှာ တစ်ဦးတည်းသော တေးရေးဖြစ်တာနဲ့ ပတ်သက်လို့ “ကျွန်တော်ဘယ်လောက်ပဲ သီချင်းဆိုတာ ကောင်းပေမယ့် ကျွန်တော့်ရဲ့တီးဝိုင်း မပံ့ပိုးပေးရင် ဘာမှမဟုတ်တော့ဘူး”။ စတီဗင်နှင့် ပယ်ရီတို့ဟာ မူးယစ်ဆေးဝါး အလွန်အကျွံ သုံးစွဲခဲ့ကြတယ်။ မကြာခဏဆိုသလို ရန်ဖြစ်ကြတယ်။ “၁၉၆၉ ခုနှစ်က နယူးယောက်စီးတီးမှာ ကျွန်တော်နဲ့ တီးဝိုင်း လမ်းခွဲခဲ့ရတယ်။ ဂစ်တာသမားတစ်ယောက်နဲ့ စိတ်ဆိုးပြီး ဒရမ်တွေကို ကျွန်တော်အကုန်လုံး ကန်ပစ်တယ်”။ မူးယစ်ဆေးဝါးတွေ ပြတ်သွားတဲ့အကြောင်းကိုတော့ “သမီးလေးကြောင့်ပါ။ ကျွန်တော့်ဘ၀ကို အကြီးအကျယ် ပြောင်းလဲစေတာ သူ့ကြောင့်ပါပဲ။ သူဟာ ကျွန်တော့်ရဲ့ အိပ်မက်ထဲက သမီးပါ။ သူ့ကို သိပ်ချစ်ပါတယ်။ သားအဖနှစ်ယောက်ရဲ့ ဆက်ဆံရေး သိပ်ကောင်းပါတယ်။ ဘယ်အကြောင်းအရာမဆို သူနဲ့ပြောလို့ ရပါတယ်”။

Ref: 8 Days Journal

http://www.delodelo.com/news/voice-of-artist-stevin-tyler/