ကျေးဇူးစကားနှင့် မြန်မာ့လူ့အဖွဲ့အစည်း

 Royal Hero Media
“ကျေးဇူး”ဆိုသော ဝေါဟာရမှာ တစ်ဖက်သား၏ အချိန်၊ လုပ်အား၊ ကူညီမှုကို အသိအမှတ်ပြုခြင်းဖြစ်ပြီး နိုင်ငံအသီးသီး၊ လူမျိုးအသီးသီး၌ အမျိုးမျိုးသော ဝေါဟာရများဖြင့် အသုံးပြုကြပါသည်။ သို့သော်ငြား တချို့လူ့အဖွဲ့ အစည်း များတွင် “ကျေးဇူး” ဆိုသည်ကို လေးနက်စွာ အသုံးပြုကြပြီး တချို့လူ့ အဖွဲ့ အစည်းများတွင်မူ အပေါ်ယံသာ အသုံးပြုတတ်ကြပါသည်။ တချို့လူ့အဖွဲ့ အစည်းများတွင် “ကျေးဇူး”ကို မ...ကြာခဏအသုံးပြုတတ်ကြပြီး တချို့ကမူ ရံဖန်ရံခါသာ အသုံးပြုကြပါသည်။

စာရေးသူတို့ လူ့အဖွဲ့အစည်းတွင် “ကျေးဇူး” ဟူသောစကားမှာ ဖောဖောသီသီ သုံးစွဲခြင်း မရှိကြပါ။ “ကျေးဇူးတင်ပါတယ်”ဟု ပြောရလျှင်ပင် ကိုယ့်ကိုယ် ကိုယ် အားနည်းအဆင့်နိမ့်သည်ဟု ခံစားကြရသလား မပြောတတ်။ အမှန်တော့ အထက်တွင်ဆိုခဲ့သလို “ကျေးဇူး”ဆိုသည်မှာ တစ်ဖက်သား၏ အချိန်၊ လုပ်အားကို အသိအမှတ်ပြုခြင်းဖြစ်သည်။

စာရေးသူတို့ မြန်မာလူမျိုးများသည် စိတ်ရှည်သည်းခံမှု အားနည်းသူများ ဖြစ်ကြပြီး တစ်ဦးကိုတစ်ဦး အသိအမှတ်ပြုရာတွင်လည်း အားနည်း သူများဖြစ်သည်။ တစ်ဦး၏ကောင်းကွက်ကို တစ်ဦးက ထုတ်ဖော်ချီး ကျူးခဲသော်လည်း အဆင်းတွင် ဘီးတပ်သည့်နေရာတွင်မတော့ လက်သံပြောင်ကြသည်။ စာရေးသူ အစိုးရဌာနများတွင် အလုပ်လုပ်ခဲ့စဉ် တစ်စုံတစ်ဦးအား နောက်ကွယ်တွင် ပြစ်တင်ပြောဆိုခြင်း၊ ၀ိုင်းဖွဲ့စုရုံး ဝေဖန်ခြင်း၊ တစ်ဖက်လူ အကျဘက်ရောက်ချိန်တွင် လူကြီးများ အကြိုက်လိုက်၍ ပိုမိုနစ်နာစေရန် ပြုလုပ်ခြင်းများ ကြုံတွေ့ခဲ့ဖူးပါသည်။ မည်သို့မျှ ပြန်လည်တုံ့ပြန်နိုင်ခြင်းမရှိသည့် သူတစ်ယောက်အား အုပ်စုဖွဲ့ နှုတ်ဖြင့် အနိုင်ကျင့်ကြခြင်းဖြစ်သည်။ ဤသို့သော ဖြစ်ရပ်မျိုး မကြာခဏ ကြုံဖူးပါသည်။ လူတို့၏ သဘာဝပင်လော။ မြန်မာ့လူ့အဖွဲ့အစည်း၏ အားနည်းချက်ပင်လော။ ဒုတိယအချက်က ပို၍ဖြစ်ဖွယ်ရှိသည်ဆိုလျှင် ဗုဒ္ဓဘာသာယဉ်ကျေးမှု လွှမ်းမိုးသော မြန်မာလူမျိုးတို့အတွက် ရှက်ဖွယ်ပင်ဖြစ်သည်။

ကျေးဇူးတင်တတ်သော၊ ကျေးဇူးကို မကြာခဏဖော်ပြသော အပြုအမူ များသည် စိတ်ရောကိုယ်ပါ ကျန်းမာမှုအတွက် အထောက်အကူ ဖြစ်စေ ကြောင်း၊ ထိုသို့ကျေးဇူးကို သိတတ်သောသူများသည် ပိုမိုပျော်ရွှင်ခြင်း၊ စိတ်ကျခံစားရမှုနည်းပါးခြင်း၊ ၎င်းတို့၏ဘ၀ကို ပိုမိုကျေနပ်စေခြင်းစသည့် စိတ်ပိုင်းဆိုင်ရာကြွယ်ဝမှုကို ခံစားကြရကြောင်း လေ့လာမှုတစ်ရပ်တွင် ဖော်ထုတ်ထားပါသည်။ ကျေးဇူးကို အပြန်အလှန် မကြာခဏ ထုတ်ဖော်ပြော ဆိုခြင်းဖြင့် နှစ်ဦးနှစ်ဖက် ယုံကြည်လေးစားမှု တိုးပွားစေနိုင်ပြီး လူ့အဖွဲ့ အစည်းတွင် လူမှုပဋိပက္ခများကို လျော့ကျစေနိုင်ကြောင်း ဆိုပါသည်။

အကောင်းဆုံးသာဓကမှာ ဂျပန်နိုင်ငံ၏ လူ့အဖွဲ့အစည်းဖြစ်သည်။ အပြန်အလှန် လေးစားအသိအမှတ်ပြုကြသည့် နေရာတွင် ဂျပန်လူ့အဖွဲ့ အစည်းမှာ ကမ္ဘာပေါ်တွင် စံပြုရသည်။ ဂျပန်တွင် တစ်ဦးကို တစ်ဦး လေးလေးစားစား ဆက်ဆံမှုသည် ပြင်ပတွင်သာမဟုတ်ဘဲ မိသားစု အတွင်း၌ပါ တွေ့ရသည်။ စာရေးသူသည် ဂျပန်မိသားစုတစ်စုနှင့် ကိုးလကြာမျှ အတူနေထိုင်ခဲ့ဖူးရာ ၎င်းတို့မိသားစုအတွင်း ဆက်ဆံရေးကိုပါ သင်ယူ ခဲ့ရသည်။ ဈေးဝယ်၊ ဈေးပြန် ကားမောင်းပို့ပေးသော ခင်ပွန်းဖြစ်သူအား “ကျေးဇူးတင်ပါတယ်” (Arigatoo/အာရီဂါ့သိုး) ဟူသောစကားကို ဇနီးဖြစ်သူက မပျက်မကွက်ပြောဆိုလေ့ရှိသည်။ ချက်ပြုတ်ကျွေးမွေးသော ဇနီးသည်၏ လုပ်အားကို အသိအမှတ် ပြုသည့်သဘော “ကျွေးမွေး ချက်ပြုတ်ပေးတဲ့အတွက် ကျေးဇူးတင်ပါတယ်” (Gochiso-sama/ ဂေါ့ချီဆိုးဆမ) ဟူသည့်စကားကို အစားအစာစားပြီးသည့် ခင်ပွန်းဖြစ်သူနှင့် သားဖြစ်သူက ပြောဆိုလေ့ရှိသည်။

ဂျပန်လူမျိုးများသည် မိမိဆိုင်ထဲဝင်လာသူများကို လှိုက်လှဲပျူငှာစွာ ကြိုဆိုတတ်သလို မှားယွင်းပါက တောင်းပန်ရန်လည်း ၀န်မလေးလှချေ။ ဆိုင်တွင်းဆိုင်ပြင် ပြသထားသည့် အစားအစာနမူနာများ၊ ဓာတ်ပုံနမူနာ များသည် တကယ်ချက်ပြုတ် ဧည့်ခံသည့် အစားအစာများနှင့် ကွဲပြားနေပါက စားသုံးသူသည် ဆိုင်ရှင်များကို ပြဿနာရှာ၍ရသည်။ စားသုံးသူက ဆာလောင်စွာဖြင့် တပ်မက်စွာကြည့်ပြီး မှာလိုက်သည့် အစားအစာအတွက် ဆိုင်ရှင်များဘက်မှ အသိအမှတ်ပြုပြီး လုပ်အားဖြင့် တုံ့ပြန်ကြခြင်းဖြစ်သည်။ ဆိုင်ရှင်များက ကောင်းမွန်စွာ ချက်ပြုတ်ကျွေးမွေးသည့် အစားအစာကို စားသုံးရသည့်အတွက် စားသုံးသူများက “ကျေးဇူး”ဟု နှုတ်ဖြင့် အပိုဆောင်း တုံ့ပြန်ကြသည်။ အပြန်အလှန် အသိအမှတ်ပြုခြင်းသည် ပဋိပက္ခများကိုလည်း လျော့ပါးစေသည်။

စာရေးသူသည် ပြည်ပနှင့် အဆက်အသွယ်များစွာ လုပ်ခဲ့ဖူးသည့် အတွေ့ အကြုံရှိရာ တစ်ဖက်ကျောင်းများနှင့် ဆက်သွယ်သည့် အခါတွင် သော်လည်းကောင်း၊ အလုပ်အဖွဲ့အစည်းများနှင့် ဆက်ဆံရာတွင် လည်းကောင်း ဆက်ဆံပြီးစီးပါက အဆင်ပြေသည်ဖြစ်စေ၊ အဆင်မပြေသည်ဖြစ်စေ “Thank You” Email ကို အမြဲပို့ဖြစ်ပါသည်။ ထိုသို့ပို့ရာတွင်လည်း အလွန်တိုတောင်းသော message မဖြစ်စေဘဲ ၎င်းတို့ကိုယ့်အပေါ် ပေးခဲ့သည့်အချိန်၊ လုပ်အားများကို အသိအမှတ်ပြုသည့် စာကြောင်းတစ်ကြောင်း၊ နှစ်ကြောင်း အမြဲထည့်သွင်း ဖော်ပြလေ့ရှိပါသည်။ ရလဒ်အနေဖြင့် တစ်ဖက်မှ ထိုသို့ “Than you” email အား ပေးပို့သည့်အတွက် ကျေးဇူးတင်ကြောင်း email ပြန်စာများရရှိခဲ့ပြီး ၎င်းပြန်စာများတွင် အဆင်မပြေခဲ့ပါက အဆင်မပြေသည့်အတွက် ၀မ်းနည်းကြောင်း၊ သို့သော် နောင်တွင် မည်သို့မည်ပုံ ဆောင်ရွက်နိုင်ကြောင်း အလွန်အဖိုးတန်သည့် သတင်းအချက်အလက်များ ဖော်ပြတတ်ကြပါသည်။ ဆိုလိုသည်မှာ Communication ကောင်းဖို့ ဖြစ်သည်။ ထိုသို့ တစ်ဖက်သားတွင် မိမိအပေါ် အမှတ်တရဖြစ်သွားစေပါက တစ်နှစ်ကြာသည့်တိုင်၊ နှစ်နှစ်ကြာသည့်တိုင် မိမိက မလျှောက်ထား မတောင်းဆိုပါလျက် အခွင့်အရေးပေါ်ပေါက်လာပါက တစ်ဖက်မှ အကြောင်းကြားလာတတ်ပါသည်။ ဤတွင် နားလည်ရမည်မှာ တစ်ဖက်နှင့် အဆက်အသွယ်မပြတ်အောင် ပြုလုပ်ခြင်းသည် အောက်ကျို့ခြင်း၊ ဖားခြင်းမျိုးမဟုတ်ဘဲ စိတ်ဝင်စားသည့်သဘော၊ တစ်ဖက်သားကို လေးစားသည့်သဘော ပြသခြင်းဖြစ်သည်။

စာရေးသူသည် ဂျာနယ်အချို့၌ မိမိ၏ email ကို ဖော်ပြခဲ့သဖြင့် မကြာခဏဆိုသလို အမည်မသိသူများထံမှ email များ လက်ခံရရှိတတ်ပါသည်။ email မှတစ်ဆင့် အထူးသဖြင့် ပညာရေးနှင့်ပတ်သက်၍ ဆွေးနွေးသည်များနှင့် ကြုံရပါသည်။ သို့သော် များစွာသောသူများသည် ၎င်းတို့ သိလိုသည်များ သိရှိပြီးပါက ကျေးဇူးတင်ကြောင်း message များ ပြန်လည်ပေးပို့ခြင်း မရှိကြပေ။ ၎င်းတို့၏ Communication အားနည်းပုံများနှင့် ပတ်သက်၍ စိတ်မကောင်းရုံမှလွဲ၍ တခြားစိတ်မရှိပါ။ သို့သော် ခင်မင်သည့်သူများဖြစ်ပါက ၎င်းတို့ထံ ပြန်လည်ဆက်သွယ်၍ “ကျေးဇူး” အကြောင်း ဆွေးနွေးဖြစ်ပါသည်။ အဲဒီလိုဆွေးနွေးမှ ကျေးဇူးတင်ကြောင်းပြောလို့၊ email ပို့လို့ကတော့ မကောင်းလှဘူးပေါ့။ စာရေးသူ အမေရိကတွင်ရှိစဉ် မြန်မာပြည်မှ အမေရိကားသို့ ရောက်လာသူ မြန်မာတစ်ဦးရှိပါသည်။ စာရေးသူတို့ သူ့အား တစ်ကြိမ်မျှ မမြင်ခဲ့ဖူးပါ။ သို့သော် email များမှတစ်ဆင့်၊ ဖုန်းမှတစ်ဆင့် လိုအပ်သော သတင်းအချက်အလက်များ ကူညီခဲ့ဖူးပါသည်။ ထိုသူသည် စာရေးသူအား အကြိမ်ကြိမ်ဖုန်းဖြင့် အဆက်အသွယ်ပြုသည့်တိုင် စာရေးသူ ကူညီခဲ့သည်များအား ပြန်ပြောင်းပြောဆိုခြင်း၊ ကျေးဇူးတင်ခြင်း အလျဉ်းမပြုခဲ့ပေ။ တစ်ကြိမ်တွင် စာရေးသူက ထိုသူအား မည်သည့် အတွက်ကြောင့် ကျေးဇူးတင်ကြောင်း မဖော်ပြသနည်းဟု ဖုန်းဖြင့် တိုက်ရိုက်မေးမြန်းခဲ့ရာ ထိုသူ့ထံမှ တိုးလျသောအသံဖြင့် “ဒါကျွန်တော်တို့ ယဉ်ကျေးမှုမှ မဟုတ်တာ”ဟု ဖြေခဲ့ပါသည်။ ထိုအချိန်မှစ၍ နှစ်ဦးကြား မည်သည့်အဆက်အသွယ်မှ မရှိတော့ဘဲ အဓိပ္ပာယ်မရှိ အဆုံးသတ်ခဲ့ကြရသည်။

မြန်မာပြည်မှာ တစ်ဦးနှင့်တစ်ဦး နားလည်မှုတွေ တိုးစေဖို့၊ တစ်ဦးလုပ်တာ လေးတွေ တစ်ဦးက အသိအမှတ်ပြုကြဖို့ “ကျေးဇူး” ဆိုတဲ့ စကားကို ယခင်က ထက်ပိုပြီး အဓိပ္ပာယ်ရှိရှိ အသုံးပြုလာကြပါစေ လို့သာ မျှော်လင့်ဆုတောင်း မိပါသည်။


ရေးသားသူ- အောင်အောင်(IR)

7Day News Journal