ဒီမိုကရေစီနည်းဖြင့် ပြဿနာများကို ဖြေရှင်းခြင်း

The Voice Weekly · 85,422 like this

30 minutes ago ·

• ‎[ Editorial ]
  
  ဒီမိုကရေစီနည်းဖြင့် ပြဿနာများကို ဖြေရှင်းခြင်း
  
  မြန်မာနိုင်ငံတွင် ယနေ့ဖြစ်ပေါ်နေသော ဆန္ဒပြ တောင်းဆိုမှုများနှင့် ပတ်သက်၍ အွန်လိုင်း စာမျက်နှာများ ပေါ်တွင် လည်းကောင်း၊ ပြင်ပတွင် လည်းကောင်း မတူညီသော ဆန့်ကျင်ဘက် အမြင်နှစ်ခုဖြင့် ငြင်းခုံလျက် ရှိသည်ကို တွေ့ရ ပါသည်။ ပထမအမြင်မှာ ဆန္ဒပြသူများကြောင့် သွားနေသော ဒီမိုကရေစီ အသွင်ကူးပြောင်းမှု နောက်ပြန် လှည့်သွားမည်ကို စိုးရိမ်ကြောင့်ကြ နေသော ရိုးရိုးရှင်းရှင်း အမြင် ဖြစ်ပါသည်။ ထိုအမြင်တွင် ဆန္ဒပြသူများကို အပြစ်တင်သည့် ရှုထောင့်မှ ကြည့်ကာ နောက်ပြန် လှည့်သွားမည်ဟု စိုးရိမ်သံ တစ်ဝက်၊ ခြိမ်းခြောက်သံ တစ်ဝက်ဖြင့် မရိုးမသား ပြောဆိုနေသူများလည်း ပါဝင်ပါသည်။
  
ုတိယအမြင်မှာ ပြည်သူလူထု နှစ်များစွာ နစ်နာခဲ့သည်များကို ငြိမ်းချမ်းစွာ ဖွင့်ထုတ် ဆန္ဒပြခြင်းသည် ဒီမိုကရေစီ အခွင့်အရေးလည်းဖြစ်သည်ဟု ရိုးရှင်းစွာ ရှုမြင်ကြပါသည်။ ထိုအမြင်တွင်လည်း အစိုးရကို အမြဲအတိုက်အခံ ပြုနေသူများက အစိုးရ၏ လုပ်ရပ်ကို ပြင်းပြင်းထန်ထန် ဝေဖန်ပြစ်တင်သံများ၊ ခံစားချက်များ ရောစွက်လျက် ရှိပါသည်။
  
  ရာစုနှစ်ဝက်ခန့် အာဏာရှင် စနစ်အောက်တွင် နေလာခဲ့ရသော မြန်မာနိုင်ငံ တွင် လွတ်လပ်ခွင့် ဆိုသော ဝေါဟာရနှင့် ထိတွေ့ခွင့် ရလာသည်မှာ ယနေ့ ဒီမိုကရေစီ အသွင်ပြောင်း ကာလ အရပ်သား အစိုးရလက်ထက် ၂ နှစ်ခန့်သာ ရှိသေးပါသည်။ နှစ်ငါးဆယ်ခန့် အာဏာရှင်စနစ် ကျင့်သုံးလာခဲ့သော အုပ်ချုပ်သူများရော ယင်းစနစ်ဒဏ်ကို ခါးစည်း ခံလာခဲ့ကြ ရသည့် အအုပ်ချုပ်ခံ ပြည်သူလူထုတွင်ရော ဒီမိုကရေစီ အလေ့အကျင့်များနှင့် များစွာ ယဉ်ပါးမှု မရှိသေးပေ။ ဤနေရာတွင် သတိပြုရမည့် အချက်မှာ ဒီမိုကရေစီ အသွင်ပြောင်း နိုင်ငံတိုင်းတွင် ဒီမိုကရေစီ စနစ်နှင့် မဆီမလျော် တုံ့ပြန်မှုများ၊ အခုအခံများ၊ အတားအဆီး၊ အခက်အခဲများ တွေ့ကြုံရတတ်သည့် အချက် ဖြစ်ပါသည်။
  
  မြန်မာနိုင်ငံတွင် ပြီးခဲ့သော ၂ နှစ်တာ ကာလအတွင်း ဖြစ်ပျက်ခဲ့သော ဆန္ဒပြမှုများနှင့် ထိုဆန္ဒပြမှု အချို့အပေါ် အစိုးရ၏ ကိုင်တွယ် ဖြေရှင်းပုံမှာ ထင်ရှားသော သာဓကများ ဖြစ်ပါသည်။
  
  ၂၀၀၈ ခုနှစ် ဖွဲ့စည်းပုံအခြေခံဥပဒေ အတည်ပြုထွက်ပေါ်လာပြီးနောက် ၂၀၁၀ ရွေးကောက်ပွဲ မတိုင်ခင် ကာလများ အတွင်းThe Voice Weekly က ကြိမ်ဖန်များစွာ ခန့်မှန်း သုံးသပ် ရေးသားခဲ့သည့် အတိုင်း လက်ရှိမြန်မာနိုင်ငံသည် စနစ်ပြောင်း အုပ်ချုပ်သူမပြောင်း ပုံစံသာ ရှိနေပါသေးသည်။
  
  ထို့ကြောင့် အစိုးရအဖွဲ့နှင့် ဥပဒေပြု လွှတ်တော် အတွင်းတွင် ယခင် အစိုးရ အဖွဲ့ဝင်ဟောင်း အများစုနှင့် ၄င်းတို့ သူကောင်းပြုထားသော စီးပွားရေး လုပ်ငန်းရှင်ကြီးများ ပါဝင် နေပါ သည်။ အကျိုးဆက် အနေနှင့် ၄င်းတို့ ကိုယ်ကျိုးစီးပွားကို ထိခိုက် လာနိုင်စရာ ရှိသည်ဟု ယူဆသော အရေးကိစ္စများတွင် ပြင်းပြင်းထန်ထန် တုံ့ပြန်ခြင်းနှင့် ဥပဒေပြုရန် တွန့်ဆုတ်ခြင်းများ (ဥပမာ-လက်ပံတောင်းကြေးနီ စီမံကိန်း ဆန္ဒပြသူ များကို အကြမ်းဖက် နှိမ်နင်းခြင်းနှင့် အစိုးရအဖွဲ့ ဝန်ကြီးများ ပိုင်ဆိုင်မှုတို့ကို အများပြည်သူအား ထုတ်ပြန် ကြေညာရန် အဆို လွှတ်တော်တွင် ရှုံးနိမ့်ခြင်း) တွေ့မြင်ရခြင်းဖြစ်ပါသည်။
  
  စနစ်ဆိုးကြောင့် အုပ်ချုပ်သူနှင့် အအုပ်ချုပ်ခံ ပြည်သူလူထုအကြား ယုံကြည်မှု ပျောက်ဆုံး သွားခဲ့သည်ကို လွယ်လွယ် ကူကူနှင့် ပြန်လည် တည်ဆောက်၍ မရနိုင်ပေ။ ထိုစနစ်ဆိုးနှင့်အတူ အရပ်ဘက်ဆိုင်ရာ အုပ်ချုပ်ရေးနှင့် ပညာရပ်ဆိုင်ရာ နယ်ပယ်များ အပေါ် နားလည်မှု မရှိသော အစိုးရ တစ်ရပ်ကို ကိုယ်ကျိုးစီးပွား ရှေ့တန်းတင်သူ ခရိုနီ လုပ်ငန်းရှင်များက ၄င်းတို့ အကျိုးစီးပွားအတွက် စီမံကိန်းအလွဲများ၊ အခြေခံ အဆောက်အဦ အလွဲများ အကောင်အထည် ဖော်စေခဲ့ခြင်းကြောင့် ပြည်သူလူထု အများစု ဆိုးဆိုးရွားရွား နစ်နာခဲ့ရသည့် သာဓကများလည်း (ဥပမာ-လယ်ယာမြေ သိမ်းဆည်းမှု ပြဿနာများ) ဒုနှင့်ဒေး ရှိနေပါသည်။
  
  ထို့ကြောင့် ဒီမိုကရေစီ အသွင်ပြောင်း ကာလကို ရောက်ရှိနေကြောင်း၊ ဒီမိုကရေစီ နိုင်ငံတော်သစ် တည်ဆောက်နေ ကြောင်း လူသိရှင်ကြား ထုတ်ဖော် ကြေညာထားသည့် အပြင် လက်တွေ့လည်း ထိုအတိုင်း ဆောင်ရွက်နေသော အရပ်သား အစိုးရလက်ထက် တွင် ပြည်သူအများစု မိမိတို့နစ်နာနေသည်များကို ငြိမ်းချမ်းစွာ ဆန္ဒဖော်ထုတ်ကြခြင်းကို အပြစ်တင် စရာအကြောင်းမရှိပေ။
  
  သို့သော် ဆန္ဒပြသူများဘက်မှလည်း လွှတ်တော်က အတည်ပြုထုတ်ပြန်ထားသော ဆန္ဒ ထုတ်ဖော်ခွင့်ဆိုင်ရာ ဥပဒေကို လေးစားလိုက်နာရန် အထူးလိုအပ်ပါသည်။ ထိုဥပဒေအရ ငြိမ်းချမ်းစွာ ဆန္ဒထုတ်ဖော် လိုသူများ၏ တရားဝင် အသိပေးလျှောက်ထား သည်ကိုလည်း ခိုင်လုံသောအကြောင်းပြချက်မရှိဘဲ တာဝန်ရှိသူ ရဲတပ်ဖွဲ့ အနေနှင့် ငြင်းပယ်ခွင့်မရှိပေ။ ထို့အပြင် ဆန္ဒပြထုတ်ဖော်သူများအား လက်ခံ၊ ငြင်းပယ်ခွင့်ကိုလည်း နှစ်ပေါင်းများစွာ အုပ်ချုပ်သူအစိုးရ၏ အမိန့်ကိုသာ တောက်လျှောက်နာခံခဲ့ရသည့်အတွက် တာဝန်သိ၊ တာဝန်ယူ၊ တာဝန်ခံမှု အားနည်း နေသော ရဲတပ်ဖွဲ့ထံ အလုံးစုံ အပ်နှင်း ထားခြင်းမှာလည်း သင့်တော်မှုရှိ၊ မရှိ ပြန်စဉ်းစားသုံးသပ်ရန် လိုပါသည်။
  
  ဒီမိုကရေစီစနစ်၏ အခြေခံစရိုက်လက္ခဏာတစ်ခုဖြစ်သည့်၊ ဆန္ဒပြမှုနှင့် ဆန္ဒပြသူများကို အလွန်အကျွံ အပြစ်တင် နေခြင်းသည်လည်းကောင်း၊ အစိုးရအပေါ် အလွန်အကျွံ ဖိအားပေးနေခြင်းသည် လည်းကောင်း နုနယ်သေး သည့် ဒီမို ကရေစီ အသွင်ကူးပြောင်းရေးကို အနုတ်လက္ခဏာသက်ရောက်မှုများ ဖြစ်ပေါ်စေနိုင်ပါသည်။
  
  များစွာသတိထားရမည့် အချက်မှာ နှစ်ဖက်စလုံးကို အပြစ်တင်ဖိအားပေးကာ အခြေအနေပိုဆိုးသွားစေရန် ဖန်တီးနေသော ကိုယ်ကျိုးစီးပွား သက်သက် ကာကွယ်လိုသူများ၏အန္တရာယ် ဖြစ်ပါသည်။
  
  ဒီမိုကရေစီအသွင်ပြောင်းနိုင်ငံတိုင်းတွင် ကြုံတတ်သည့် အခက်အခဲ အခုအခံများကို ဒီမိုကရေစီနည်းကျကျ ငြိမ်းချမ်းစွာဖြေရှင်းခြင်းဖြင့် ဒီမိုကရေစီနှင့် ထိုက်တန်သော အသိဉာဏ်ကြီး ပြည်သူ့ အစိုးရနှင့် နိုင်ငံကြီးသားများ အဖြစ် ပြသကြပါမည့် အကြောင်း အထူး သတိပေးလိုပါသည်။
  
  အယ်ဒီတာ (၁၃.၁၂.၂၀၁၂)
  The Voice Weekly Vol.8/No.50 ပါ အယ်ဒီတာအာဘော်