Min Yar added 5 new photos.
(ဒီစာကို တင်မယ်ဆိုကတည်း က မမြင်ကပ် အဆဲခံရမယ်ဆိုတာ ကြိုသိနေပါတယ်....သို့သော်..)
'သဘာဝ ပတ်ဝန်းကျင်'
ဂျပန်လူမျိုးတွေက အလှပ အတော်ကြိုက်ကြ တယ်ဗျ...အိမ်ဆို လှမှ၊ စားစရာ ဆို အလှလေး ဆင်ပြီး မှ၊ ပတ်ဝန်းကျင်လေးဆို သန့်နေမှ။
ကိုယ့်ပတ်ဝန်းကျင် ပဲ လှအောင်လုပ်ကြတာ.... တနိုင်ငံလုံး လှသွားတယ်ဆိုရင် ယုံကြမလား မသိ။
တကယ်ဗျ...တကယ်။ ကိုယ့်ပတ်ဝန်းကျင်လေးကိုပဲ လှပအောင်၊ သန့်ရှင်းအာင် လုပ်ကြတယ်။ အဲဒီလို လူတွေများတော့ ရပ်ကွက်လေး လှသွားတယ်...
ရပ်ကွက်လေးတွေ လှတဲ့အခါ မြို့က လှသွားတယ်။ အဲဒီ မြို့တွေ အားလုံးစုလိုက်တဲ့ အခါ တနိုင်ငံလုံး လှသွားတော့တာပါ ပဲ...။
ပြီးတော့ သဘာဝ ပန်းအလှလေးတွေ အတော့်ကို မြတ်နိုးကြတယ်....
ပန်းခြံထဲက ပန်းလေးတွေ အမြတ်တနိုး ရှိကြသလို လမ်းဘေး က ပန်းအရိုင်းလေးတွေလဲ တန်ဖိုးထားတယ်....။
ပန်းကြည့်ပွဲ လုပ်ကြတယ်။ မိသားစုလိုက်၊ သူငယ်ချင်းအစုဖွဲ့လိုက်၊ အလုပ်အနားယူပြီးတော့ကို တမင်တကာ လုပ်ကြတယ်... ဆကုရ ပင်တွေ ကြားမှာ ဖျာခင်း စားစရာ၊ သောက်စရာ အစုံနဲ့ တနေကုန် အရသာခံ ကြည့်၊ စားကြ သောက်ကြတယ်၊ အပန်းဖြေကြတယ်...ပြီးတာနဲ့ ကိုယ့် အမှိုတ် ကိုယ်သိမ်းပြီးပြန် (သဘာဝ အလှကို ခံစားရင်း..ပတ်ဝန်းကျင် ထိန်းသိမ်းမှု)။
ကျွန်တော် ဂျပန် စရောက် ပြီး (၆) လလောက် အကြာ Hitachi ဆိုတဲ့ ဆိပ်ကမ်းမြို့ လေးကို အလုပ်သွားဆင်းရတယ်ဗျ...ကျွန်တော်နေတဲ့ Saitama ကနေ အမြန်လမ်း နှစ်နာရီ ခရီး...
ကမ္ဘာအရပ်ရပ်ကို ကားတွေ ပို့နေတဲ့ ဆိပ်ကမ်းတွေ ရှိတဲ့ မြို့...
လှလိုက်တာ ဗျာ...အတော့ကို လှတာ..လမ်းဘေးမှာ အလေ့ကျ ပွင့်နေတဲ့ ပန်းတွေကကို လှနေတော့တာ......
တရက်တော့ အလုပ်ကလည်း စောပြီးတာနဲ့ မြို့တပတ် ပတ်၊ ပင်လယ်ကမ်းနား တစ်လျှောက် ကားနဲ့ ပတ်ကြတယ်...တနေရာ ရောက်တော့...
'မစုဒစံ ကားခဏရပ်ပေးပါလား....'
'ဘာလုပ်မလို့လဲ မင်းစံက'
'ဟိုနားမှာ ကျန်ခဲ့တဲ့ လမ်းဘေးက ပန်းလေးတွေ တအားလှတယ် ...ကျွန်တော် အိမ်ယူသွားချင်တယ်..' လို့ပြောလိုက်တယ်..
'ခူးလို့ မရဘူးလေ...'
'ဘာလို့လဲ ဗျ၊ လမ်းဘေးမှာ ပေါက်နေတာလေ....အိမ်က ပန်းအိုးမှာ ထိုးထားရင် လှနေမှာ...'
' မင်းစံ.... ကိုယ့်အိမ်က ပန်းအိုးမှာ အလှထားချင်ရင် ကိုယ့်ဘာသာ ဈေးဆိုင်က ဝယ်လေ...အခုဒီပန်းလေးတွေ မင်းစံက ယူသွားခဲ့ရင် မင်းစံတစ်ယောက်ပဲ ကြည့်လို့ရမယ်... နောက်လူတွေ ဒီပန်းအလှ ကို ဘယ်ကြည့်လို့ ရတော့မလဲ...(ဘယ်ခံစားလို့ ရတော့မလဲ)' တဲ့
အလေ့ကျ ပေါက်နေတဲ့ ပန်းအပေါ်မှာတောင် သူတို့လူမျိုး တွေ တန်ဖိုးထား တဲ့ စိတ်ဓါတ်။
အပြန်လမ်းမှာ ကျွန်တော် အတွေးစတွေပါလာတယ်...ဪ ...တန်ဖိုးထား ခံစားကြပုံချင်း မတူကြပါလား...ဥပမာ တစ်ခု....
ကျွန်တော်တို့ ဗမာလူမျိုးတို့ရဲ့ ကျက်သရေဆောင် ပိတောက်ပန်း...
ပန်းပွင့်လို့ တမနက် မကြာပါဘူး တပင်လုံး ကျိုးကြေသွားပြီ...ဦးရာလူက ချိုးကြတယ်...ပန်းကလေးတွေ ပန်လိုက်ရမှ လှတယ်ထင်တဲ့ ယဉ်ကျေးမှုကို အပြစ်မဆိုသာပေမယ့်...ငါဦးပြီးရော ချိုး...အိမ်ထရံ ခြံစည်းရိုးပါမကျန် ဟိုထိုးဒီထိုး လုပ်လိုက်ကြတော့တယ်...ကိုယ်ဆီမှာ ရှိမှ လှတယ်ထင်ကြတယ်...
အဲ့ဒီ သဘာဝကို ဖျက်ဆီးပြီး ရလာတဲ့ အလှတရားက ဘယ်လောက်များ ခံပါသလဲ...
တနေကုန် များ လှလိုက်ပါသလား...
လူဘယ်နှယောက်ကများ အဲဒီ အလှကို ခံစားလိုက်ရပါသလဲ....
တကယ်လို့များ အပင်မှာ သူ့သဘာဝအတိုင်း လှခွင့်ရခဲ့ရင် .....။
ဆရာမတွေ မြင်လိုက်ရလို့ စိတ်ကြည်သွားခဲ့ ရင်...ကျောင်းက ကလေးတွေ.....
ဆရာဝန်ကြီး ခံစားလိုက်ရလို့ စိတ်ပျော်ရွှင်ခဲ့ရင်...
လူနာတွေ...
စစ်ဗိုလ်ချုပ်ကြီး မြင်လိုက်ရလို့ စိတ်ချမ်းသာ သွားခဲ့ရင်...သူ့ရဲဘော် လေးတွေ...
မန်နေဂျာကြီး မြင်လိုက်ရလို့ စိတ်ကြည်သွားခဲ့ရင်....သူ့တပည့်တွေ......
'မင်္ဂလာပါ'
မင်းယျာ
ဓါတ်ပုံများမှာ အင်တာနက်မှ ဒေါင်းထားခြင်းသာ ဖြစ်သည်။
No comments:
Post a Comment
မိတ်ဆွေ...အချိန်လေးရရင် blogg မှာစာလာဖတ်ပါနော်
ဗဟုသုတ ရနိုင်တယ်။