ထင်မှတ်မထားတဲ့ရလဒ်ကောင်း (သို့) စာဖတ်လေ့မရှိသူ

 

Nine Nine Sanay @ နိုင်းနိုင်းစနေ

ထင်မှတ်မထားတဲ့ရလဒ်ကောင်း (သို့) စာဖတ်လေ့မရှိသူ
----------------------------------------
၁၉၄၁ခုနှစ် ဒီဇင်ဘာလမှာ “ပုလဲဆိပ်ကမ်း အလစ်တိုက်ခိုက်ခံရမှု”နဲ့ပတ်သက်ပြီး အမေရိကန်ဟာ စစ်ပွဲမှာပါဝင်ဖို့ တစ်နိုင်ငံလုံးကိုလှုံ့ဆော်ခဲ့ပါတယ်။ အနယ်နယ်အရပ်ရပ် ဌာနဆိုင်ရာ၊ လုပ်ငန်းဆိုင်ရာတွေလည်း ဒီစစ်ပွဲမှာပါဝင်ဖို့ လှုပ်ရှားလာခဲ့ကြတယ်။ Doubleday, Penguin, Random House စတဲ့ အမေရိကန်က နာမည်ကြီးစာအုပ်ထုတ်ဝေရေးတွေကလည်း ပါဝင်လာကြပြီး “စစ်အတွင်းစာအုပ်ကော်မရှင်”ဆိုတဲ့ အဖွဲ့ကိုဖွဲ့စည်းခဲ့တယ်။ အဲဒီအဖွဲ့အစည်းက လျင်လျင်မြန်မြန်ပဲ စစ်ပွဲထဲပါဝင်ကြမယ့် စစ်သည်တွေအတွက် စာအုပ်တစ်မျိုးထုတ်ဝေလိုက်ပါတယ်။ အဲဒီစာအုပ်က အမေရိကန်စစ်သားတို့ရဲ့ဝတ်စုံပေါ်က အိတ်ကပ်အရွယ်အစားနဲ့တိုင်းတာပြီး တည်းဖြတ်ထားတဲ့စာအုပ်လေးဖြစ်တယ်။ အဲဒီစာအုပ်တွေကို အများအပြားပုံနှိပ်ပြီး ရှေ့တန်းသွားရောက်မယ့်စစ်သားတိုင်းကို အခမဲ့ဝေငှခဲ့ပါတယ်။

၁၉၄၁ခုနှစ်ကနေ ဒုတိယကမ္ဘာစစ်ပြီးချိန် ၁၉၄၅ခုနှစ်ထိ ၄နှစ်တာကာလအတွင်းမှာ စစ်သားတွေအတွက် စာအုပ်အမျိုးအစားပေါင်း ၁၃၂၂မျိုးကို အုပ်ရေသန်း ၁၂ဝကျော်ပုံနှိပ်ခဲ့ရတယ်။ စစ်သားတစ်ဦးတိုင်းကို စာအုပ်ဒါဇင်ကျော်ဝေခဲ့တယ်။ စစ်သားတွေဟာ အဲဒီစာအုပ်တွေကို တစ်နေရာကနေတစ်နေရာ ကူးလူးချိန်မှာ ဖတ်ခဲ့တယ်၊ ကုန်းပတ်ပေါ်မှာ ဖတ်ခဲ့တယ်၊ စခန်းချရာနေရာမှာ ဖတ်ခဲ့တယ်၊ ဗုံးခိုကျင်းထဲမှာ ဖတ်ခဲ့တယ်၊ စခန်းက လူနာကုတင်ပေါ်မှာဖတ်ခဲ့တယ်။

စစ်သားအများက စစ်ပွဲကာလအတွင်းမှာပဲ Hemingway ၊ William Faulkner ၊ Joseph Conrad စတဲ့ စာရေးဆရာတွေနဲ့ ရင်းနှီးခဲ့တယ်။ ကျည်ဆံမိုးတွေကြားမှာ “Jane Eyre, Tobacco Road, A Tree Grows in Brooklyn” စတဲ့ ကမ္ဘာကျော်စာပေတွေကို နှစ်သက်ခဲ့မိကြတယ်။ အထူးသဖြင့် “The Great Gatsby” ဆိုတဲ့စာအုပ်ကို အမေရိကန်စစ်သားတွေ ပိုနှစ်သက်ခဲ့ကြတယ်။ ဥရောပစစ်မြေပြင်ဆီ အုပ်ရေ ၁သိန်းခွဲပို့လိုက်တာတောင် မလောက်ဘူးလို့ဆိုပါတယ်။

“စစ်အတွင်းစာအုပ်ကော်မရှင်”က စာဖတ်ကျင့်ရှိလာစေတဲ့ အမေရိကန်စာဖတ်သူခေတ်တစ်ခေတ်ကို မွေးထုတ်ပေးနိုင်ခဲ့ပါတယ်။ ဒါဟာ ထင်မှတ်မထားတဲ့ရလဒ်ကောင်းလို့ နှောင်းလူတွေကဆိုကြတယ်။ ဒီမတိုင်ခင် အမေရိကန်စစ်သားတော်တော်များများဟာ အောက်ခြေလူတန်းစားကနေ လာကြသူတွေဖြစ်တယ်။ သူတို့ စာဖတ်ဖြစ်ဖို့ဆိုတာ ဖြစ်နိုင်ချေနည်းပါတယ်။

ဒုတိယကမ္ဘာစစ်ပြီးဆုံးပြီးနောက် အဲဒီစာဖတ်လေ့မရှိသူတွေဟာ စာဖတ်ခြင်းရဲ့အရသာကို ထိန်းသိမ်းထားနိုင်ခဲ့ပြီး သူတို့ရဲ့ဘဝတစ်သက်တာကို စာဖတ်ခြင်းနဲ့ အကျိုးသက်ရောက်စေခဲ့ကြတယ်။

ကျွန်တော့်လက်ထဲမှာ “The Uncommon Reader (စာဖတ်လေ့မရှိသူ)” ဆိုတဲ့ စာအုပ်တစ်အုပ်ရှိပါတယ်။ အဲဒီစာအုပ်ကို အင်္ဂလန်စာရေးဆရာ Alan Bennett ကရေးသားခဲ့တယ်။ စာအုပ်ထဲမှာပါတဲ့ အဓိကဇာတ်ကောင်က တကယ်ပဲ “စာဖတ်လေ့မရှိသူ” တစ်ဦးဖြစ်တယ်။ ဒါပေမယ့် အဲဒီဇာတ်ကောင်က အမေရိကန်စစ်သားတစ်ဦးမဟုတ်ဘူး။ သူဟာ အင်္ဂလန်ဘုရင်မ Elizabeth II ပဲဖြစ်တယ်။

စာရေးဆရာရဲ့ကလောင်တံအောက်ကနေ အင်္ဂလန်ဘုရင်မ Elizabeth II ဟာ ရုတ်တရက်အကြောင်းရင်းတစ်ခုနဲ့ စာအုပ်ကို အသက်သမျှချစ်တဲ့သူဖြစ်လာခဲ့တယ်လို့ သိရပါတယ်။

တစ်ချိန်တုန်းက ဘုရင်မဟာ ဧည့်သည်တော်တွေကို လက်ခံတွေ့ဆုံတဲ့အခါ သူအမြဲမေးတတ်တဲ့ မေးခွန်းက “အသင် ဘယ်မှာနေသလဲ၊ အဲဒီနေရာမှာ ကားကြပ်သလား” ဆိုတာဖြစ်တယ်။ အခုအခါ ဘုရင်မရဲ့မေးခွန်းက “အခုတလော သင်ဘာစာအုပ်တွေဖတ်နေလဲ” ဆိုပြီး ပြောင်းသွားပြီလို့ဆိုပါတယ်။ ဘုရင်မက ဝန်ကြီးချုပ်ကို စာအုပ်တွေလက်ဆောင်ပေးတတ်ပြီး “အိမ်စာ” တွေမေးတတ်လေ့ရှိတယ်လို့ဆိုတယ်။ ဝန်ကြီးချုပ်ကို စာအုပ်ဖတ်အပြီး ခံစားရတဲ့ခံစားချက်တွေကို မေးမြန်းတာပဲဖြစ်တယ်။ ဘုရင်မဟာ ပြည်ပအကြီးအကဲ ခေါင်းဆောင်တွေနဲ့ တွေ့ဆုံချိန်မှာလည်း စာအုပ်တွေအကြောင်း ဆွေးနွေးတတ်ပါသေးတယ်။

စာရေးဆရာ Alan ရဲ့စာအုပ်ထဲမှာ သူ့အကြောင်းအရေးခံရလို့ဆိုပြီး ဘုရင်မစိတ်မဆိုးခဲ့တဲ့အပြင် စာရေးဆရာကို ဘွဲ့ဂုဏ်ပုဒ်ချီးမြှင့်ဖို့ နှစ်ကြိမ်တိုင်တိုင်ဖိတ်ခေါ်ခဲ့ပါတယ်။ ဒါကို စာရေးဆရာက ငြင်းဆန်ခဲ့ပါတယ်။ သူ့စာအုပ်ထဲ ဘုရင်မအကြောင်းထည့်ရေးတာဟာ ဘုရင်မကိုကျေနပ်စေအောင်၊ ကြိုက်အောင်ရေးတာမဟုတ်ဘူးလို့ စာရေးဆရာကဆိုပါတယ်။

ဒီစာအုပ်ရေးဖြစ်တဲ့အကြောင်းက ၁၉၉၇ခုနှစ်မှာ စာရေးဆရာဟာ ကင်ဆာရောဂါခံစားနေရကြောင်းကို ဆေးစစ်ချက်အရသိခဲ့ရတယ်။ အဲဒီနောက် ရှေ့ဆက်မယ့်နေ့ရက်တိုင်းမှာ ဒီရောဂါဝေဒနာကိုခုခံအန်တုဖို့ စာဖတ်ခြင်းနဲ့ပဲ သူအင်အားယူခဲ့ပါတယ်။ စာဖတ်ခြင်းထဲကနေ ခွန်အားနဲ့စိတ်ဓာတ်အသစ်တွေကို သူရခဲ့ပါတယ်။ ကျန်းမာရေးတည်ငြိမ်လာချိန်မှာ “စာဖတ်လေ့မရှိသူ” ဆိုတဲ့စာအုပ်ကို သူရေးသားခဲ့တာဖြစ်ပြီး စာဖတ်ခြင်းဟာ လူကိုဘယ်လိုကောင်းကျိုးပြုကြောင်း၊ စာဖတ်ခြင်းကြောင့် စာအုပ်ထဲကနေရတဲ့ ခွန်အား၊ ကူညီမှုတွေကို ဒီ့ထက်ပိုများတဲ့လူတွေကို ရရှိစေချင်ကြောင်း ပြောခဲ့ပါတယ်။

တိုက်ဆိုင်တဲ့အဖြစ်အပျက်ပါပဲ… ကနေဒါ စာရေးဆရာမ Alice Monroe ကလည်း ကင်ဆာရောဂါခံစားနေရကြောင်းကို ၂ဝဝ၉ခုနှစ်မှာ ဆေးစစ်ချက်အရသိခဲ့ရပါတယ်။ အဲဒီနောက်မှာ သူရိုးရိုးရှင်းရှင်းနေထိုင်ခဲ့ပြီး စာရေးချိန်ကိုလျော့ချခဲ့တယ်။ အချိန်တော်တော်များများကို စာဖတ်ခြင်းနဲ့ပဲ ကုန်လွန်ခဲ့တယ်။ ၂ဝ၁၃ခုနှစ် သူစာပေနိုဘယ်လ်ဆုရခဲ့ပါတယ်။ ဒါပေမယ့် ကျန်းမာရေးအခြေအနေကြောင့် ဆွီဒင်ရဲ့မြို့တော် Stockholm ကိုသွားပြီး သူဆုမသွားယူခဲ့ပါဘူး။ ဒါပေမယ့် နောက်ပိုင်း သူရဲ့ပြောဆိုဆွေးနွေးတဲ့စကားတွေထဲမှာ စာဖတ်ခြင်းက ခန္ဓာကိုယ်အတွက်ကောင်းမွန်ကြောင်း၊ အခြားအစားအစာ၊ ဆေးဝါးတွေထက်ကောင်းကြောင်းကိုတော့ သူပြောခဲ့ပါတယ်။

သိပ္ပံပညာရှင်တွေရဲ့ လေ့လာဆန်းစစ်ချက်မှာ ၆မိနစ်လောက်ဆိတ်ဆိတ်ငြိမ်ငြိမ်စာဖတ်ခြင်းက လူရဲ့ဖိအားအဆင့်ကို ၂/၃ လျော့ကျစေတယ်လို့ ဆိုပါတယ်။ ဒါဟာ သီချင်းနားထောင်၊ အပြင်လမ်းထွက်လျှောက်တာထက် ကောင်းတယ်လို့ဆိုပါတယ်။ သတင်းတွေပေါက်ကွဲတဲ့ခေတ်မှာ စာဖတ်ခြင်းအတွက်လိုအပ်တဲ့ အာရုံစူးစိုက်မှုက ဦးနှောက်ကိုဖြည်လျော့စေနိုင်ပါတယ်။ အာရုံကြောကြွက်သားတွေကို ဖြည်လျော့စေနိုင်ပြီး နှလုံးခုန်နှုန်းကို လျော့ချစေပါတယ်။

ဒုတိယကမ္ဘာစစ်အတွင်းမှာ အမေရိကန်စစ်သားတွေဟာ ကျောင်းတံခါးဝကနေထွက်ခဲ့ပြီးနောက် ဒါဟာ သူတို့ရဲ့ပထမဆုံးအကြိမ်စာဖတ်ခြင်းဖြစ်ခဲ့ပါတယ်။ စစချင်းမှာ စစ်သားတော်တော်များများက ပျင်းလို့၊ တခြားလုပ်စရာမရှိလို့ အဲဒီစာအုပ်တွေကို ကောက်ဖတ်လိုက်တာပဲဖြစ်ပါတယ်။ စစ်ပွဲက ကမ္ဘာကြီးရဲ့ပုံစံကို ပြောင်းလဲစေခဲ့ပါတယ်။ စာဖတ်ခြင်းက ဒီလူတွေရဲ့ ဘဝတစ်သက်တာကို ပြောင်းလဲစေခဲ့ပါတယ်။

------------

မူရင်းလင့် -- http://www.85nian.net/shiye/38289.html

နိုင်းနိုင်းစနေ (Nov. 19. 2015)