ရိုက်ကူးခွင့်ပိတ်ပင်ခဲ့သည့် ရန်ကုန်တက္ကသိုလ်တွင် ရုပ်ရှင်ဇာတ်ကားများ ပြန်လည်ရိုက်ကူးခွင့်ရပြီ

မြန်မာ့ရောင်စဉ်

Options for this story

ရိုက်ကူးခွင့်ပိတ်ပင်ခဲ့သည့် ရန်ကုန်တက္ကသိုလ်တွင် ရုပ်ရှင်ဇာတ်ကားများ ပြန်လည်ရိုက်ကူးခွင့်ရပြီ

ပန်းမြတ်ဇော်|ဇန်န၀ါရီ ၂၁ ရက်၊ အင်္ဂါနေ့၊ ၂၀၁၄ ခုနှစ်

ယခင်က ရုပ်ရှင်များ ရိုက်ကူးရန် ပိတ်ထားခြင်းခံရသည့် ရန်ကုန်တက္ကသိုလ်တွင် ယခုအခါ ရုပ်ရှင်၊ ဗီဒီယိုများ ပြန်လည်ရိုက်ခွင့်ရလာပြီဖြစ်ကြောင်း အနုပညာဖန်တီးကြသည့် ဒါရိုက်တာများက ပြောလာကြသည်။

ယင်းကဲ့သို့ အနုပညာရှင်များ၏ ရုပ်ရှင်ဇာတ်ကားများနှင့် တခြားသော အနုပညာလုပ်ကိုင်မှုများအတွက် အနုပညာရှင်များအနေဖြင့် ရရှိလာသည့် အခွင့်အရေးများ ထပ်မံမဆုံးရှုံးကြစေရန် အထူးဂရုစိုက်ရန် လိုအပ် ကြောင်း ဒါရိုက်တာတချို့က မဇ္ဈိမသို့ ပြောဆိုလိုက်သည်။

“ဦးမျိုးတို့တွေ အရင်က တက္ကသိုလ်ကျောင်းနဲ့ ပတ်သက်တာတွေ ရိုက်ချင်ရင် အများကြီး အခက်တွေ့စေခဲ့ ပါတယ်။ ကျောင်းရဲ့ အမှန်တကယ် အရိပ်အငွေ့တွေကလည်း မပါတာဆိုတော့ သိပ်ပြီး အရသာမရှိသလို ခံစားရတယ်။ ရေရှည်ရိုက်ကူးနိုင်အောင် အားလုံးအခွင့်အရေး မဆုံးရှုံးစေဖို့ ကြိုးစားသင့်တယ်လို့ ထင်ပါတယ်” ဟု ဒါရိုက်တာ မောင်မျိုးမင်း(ရင်တွင်းဖြစ်)က ပြောသည်။

ရန်ကုန်တက္ကသိုလ် နယ်မြေအတွင်း၌ဗီဒီယိုအဖြစ် ပထမဆုံးရိုက်ကူးခွင့်ရသည့် ဇာတ်ကားသည် ဒါရိုက်တာ ပြည်ဟိန်းသီဟ၏ “ဂျက်ဆင်ထိပ်က ပြားကိုးဆယ်” ဇာတ်ကားဖြစ်ပြီး ရန်ကုန်တက္ကသိုလ်ရှိ အထင်ကရ နေရာများတွင် ရိုက်ကူးလျက်ရှိသည်။ ယင်းဇာတ်ကားကို ဇန်န၀ါရီ ၁၈ ရက်တွင် မြင့်မြတ်၊ အကယ်ဒမီ အိန္ဒြာကျာ်ဇင်တို့ဖြင့် စတင်ရိုက်ကူးလျက်ရှိသည်။

““အရင်က ရိုက်မယ်ဆိုရင် MICT Park ထဲမှာပဲ ရိုက်ခဲ့ရတယ်။ အခု ဇာတ်ကား ခေါင်းစဉ်နဲ့လဲ ကိုက်သွား တယ်။ ရိုက်ကူး ခွင့်ရပြီဆိုတော့ တက္ကသိုလ်ဇာတ်လမ်းတွေ ပေါ်ထွက်လာမှာပါ။ အဓိက,က ရန်ကုန် တက္ကသိုလ်ရဲ့အလှကို ဖော်ပြပြီး ရိုက်ကူးရပါတယ်” ဟု ဒါရိုက်တာပြည်ဟိန်းသီဟက ပြောသည်။

ယင်းဇာတ်ကား ရိုက်ကူးရန်အတွက် ရိုက်ကူးခွင့်ကို တစ်လခန့် ကြိုတင်၍တင်ရပြီး ဇာတ်လမ်းအကျဉ်းများ၊ ရိုက်ကူးမည့် နေရာများကို ကြိုတင်တင်ထားရကြောင်း ယင်းက ပြောသည်။ ရုပ်ရှင်ဗီဒီယို ဇာတ်ကားများ ရိုက်ကူးခွင့်ရမည်ဆိုပါက ရိုက်ကူးနိုင်မည့်နေရာများကို ပြန်လည်အကြောင်းကြားပြီး တက္ကသိုလ်တွင် စနောက်ခြင်းများမပါဝင်ပဲ အေးချမ်းစွာ ပညာသင်ကြားရေးဆိုသည့် ပုံစံများဖြင့်သာ ရိုက်ကူးခွင့်ရခြင်း ဖြစ် သည်။

ယခင်က ရန်ကုန်တက္ကသိုလ်ဝင်းရှိ အထင်ကရနေရာများတွင် ရုပ်ရှင်ရိုက်ကူးခွင့်များ မရရှိခဲ့ခြင်းကြောင့် တက္ကသိုလ်ကျောင်း၏ ဇာတ်ဝင်ခန်းများကို ကန်ပေါင်၊ MICT Park၊ ယဉ်ကျေးမှုတက္ကသိုလ်ဝင်းများ၌သာ ရိုက်ကူးခဲ့ကြရသည်က များသည်။ ယင်းကဲ့သို့ တက္ကသိုလ်ကျောင်း၏ အရိပ်ငွေ့များ ပါဝင်ရန်အတွက် ရုပ် ရှင်ရိုက်ကူးခွင့်နေရာ ရှားပါးလာခြင်းကြောင့် ဇာတ်ဝင်ခန်းများနှင့် လိုက်ဖက်သည့်နေရာများကို အနုပညာ ထုတ်လုပ်ကြသည့်သူများအနေဖြင့် ရွေးချယ်ရသည့်အခါတွင် အခက်အခဲ များစွာရှိခဲ့ကြသည်။

ရန်ကုန်တက္ကသိုလ်နယ်မြေများတွင် ရုပ်ရှင်၊ ဗီဒီယိုနှင့် တခြားသောအနုပညာ လှုပ်ရှားမှုများအတွက် ရိုက် ကူးခွင့်များကို လွန်ခဲ့သည့် ၁၅ နှစ်ကတည်းက ပိတ်ပင် တားမြစ်ခဲ့ခြင်းဖြစ်သည်။ ယခုလိုရိုက်ကူးခွင့် ပိတ် ပင်တားမြစ်ခြင်းသည် ကျောင်းသား နှင့် ရုပ်ရှင်ရိုက်ကူးရေးအဖွဲ့တို့ ရန်ဖြစ်ကြခြင်းကြောင့် ရိုက်ကူးရန် တားမြစ်ခဲ့ကြခြင်း ဖြစ်သည်။

ယင်းကဲ့သို့ ရုပ်ရှင်ရိုက်ကူးခွင့်များ ပိတ်ပင်တားမြစ်ခြင်းကြောင့် ဒါရိုက်တာအများစုသည် တက္ကသိုလ်ပုံရိပ် များပေါ်လာစေရန် အတွက် MICT Park တွင် ရိုက်ကူးမှုများသည် အများဆုံး ရှိလာခြင်းဖြစ်ကာ ရိုက်ကူး ရန်အတွက် သွင်းကြရသည့်ဈေးနှုန်းများလည်း ပိုမိုမြင့်မားလာခြင်းကြောင့် ထုတ်လုပ်သူ အများစုသည် ယင်းနေရာများတွင် ရိုက်ကူးမှုများ မလုပ်ကြသည်ကများကြောင်း ပြောသည်။ ၎င်းအပြင် ယဉ်ကျေးမှု တက္ကသိုလ်တွင် ရိုက်ကူးခွင့်ပေးထားသော်လည်း စနေ၊ တနင်္ဂနွေနေ့များ၌သာ ရိုက်ကူးခွင့်ရခြင်းကြောင့် ဒါရိုက်တာများ အဆင်မပြေ ဖြစ်ကြရသည်က များသည်။

လေဆိပ်နေရာများတွင် ရိုက်ကူးခွင့်များ ရရှိလာသော်လည်း အများစုသည် တားမြစ်လိုသည့် အခြေအနေ များရှိနေဆဲဖြစ်ကြောင်း ဒါရိုက်တာအများစုက ပွင့်လင်းစွာပြောသည်။

“အခုလို ရန်ကုန်တက္ကသိုလ်ရဲ့ အထင်ကရနေရာတွေမှာ ရိုက်ခွင့်ရတာ ရက်ပိုင်းလောက်ပဲ ဖြစ်မယ်။ ရိုက် ခွင့်ရပြီဆိုတော့ ဒါဟာ အရမ်းကောင်းပါတယ်” ဟု ဒါရိုက်တာညွန့်မြန်မာ ညီညီအောင်က ပြောသည်။

ယင်းသည် “အက်တိုးပစ်အပျိုစင်” ဇာတ်ကား ရိုက်ကူးရန်အတွက် ရန်ကုန်တက္ကသိုလ်တွင် ခွင့်တောင်းခဲ့ သော်လည်း ရိုက်ကူးခွင့် မရရှိခဲ့ကြောင်း ဆိုသည်။ ရုပ်ရှင်အနုပညာ သမားများအနေဖြင့် ယခုလိုရိုက်ကူး ခွင့်ရသည့်အချိန်တွင် စည်းကမ်းရှိရန် လိုအပ်ပြီး ရရှိလာသည့် အခွင့်အရေးများ ဆုံးရှုံးမှုမရှိစေရန် သတိ ထားသင့်ကြောင်း ယင်းက ပြောသည်။

အဆိုပါတက္ကသိုလ်နောက်ခံ အနုပညာဇာတ်ကားများ ရိုက်ခွင့်ရခြင်းကို အလွဲသုံးစား မလုပ်ကြရန်အတွက် ဒါရိုက်တာအများစု နှင့် ထုတ်လုပ်သူအများစုက သုံးသပ်ပြောကြားလျက် ရှိသည်။ ယခုလို တက္ကသိုလ် နယ်မြေများတွင် ရုပ်ရှင်ဇာတ်ကားများနှင့် တခြားသော အနုပညာလှုပ်ရှားမှုများ ပြန်လည် ရိုက်ကူးခွင့် ရခြင်းထက် တက္ကသိုလ်ပုံရိပ်များကို လက်ရှိအပြင်၌ ကျောင်းတက်နေကြသည့် ကျောင်းသားများသည် လည်း ယင်းတက္ကသိုလ်နယ်မြေတွင် တက်ရောက်ခွင့်ရပါက အပြင်တွင် ကိုယ်တိုင်ခံစားခွင့် ရရှိကြမည် ဖြစ်ကြောင်း ဒါရိုက်တာများက ဆိုသည်။

ယင်းသို့ပြန်လည် ရိုက်ကူးခွင့်ရခြင်းသည် မြန်မာ့ရုပ်ရှင်နှင့် ဗီဒီယိုဈေးကွက် အလားအလာ ပြန်လည် ကောင်းမွန်လာမည့် အခြေအနေရှိကြောင်း သုံးသပ်ပြော ဆိုကြသည်။

မြန်မာ့ရုပ်ရှင် အနုပညာများကို ဖန်တီးခဲ့ကြရာတွင် ရန်ကုန်တက္ကသိုလ်နောက်ခံ ရုပ်ရှင်ဇာတ်ကားများစွာ သည်လည်း အများအပြား ထွက်ပေါ်လာခဲ့ပြီး ပရိသတ်များ လက်ခံအားပေးခဲ့ကြသည့် ဇာတ်ကားပေါင်း အများအပြား ထွက်ပေါ်ခဲ့သည်ကို တွေ့ခဲ့ရသည်။ ယင်းရုပ်ရှင်များတွင် “ ကောလိပ်ဂျင်” ဇာတ်ကားသည် အဖြူနှင့်အမည်း ရုပ်ရှင်အဖြစ်ထွက်ရှိခဲ့ပြီး အောင်မြင်ခဲ့သည့်အပြင် ယခုနောက်ပိုင်း ဆေးရောင်စုံ ရုပ်ရှင် ဇာတ်ကားများ ဖန်တီးရာတွင် “ပန်းတွေနဲ့ဝေ”၊ “သခွတ်ပန်း” စသည့်ဇာတ်ကားများ၌ ရန်ကုန်တက္ကသိုလ် ၏ ပုံရိပ်များကို နောက်ခံဇာတ်လမ်းပြုလုပ်ကာ တင်ဆက်ခဲ့ခြင်းကြောင့် ပရိသတ်များ၏ လက်ခံအားပေး အောင်မြင်မှုရရှိခဲ့ကြသည်။
Mizzima