"အကျပ်အတည်းနဲ့ Nimitz ရင်ဆိုင်ရချိန်" ( နိုင်းနိုင်းစနေ ဘာသာပြန်သည်။ )

Fireflies

"အကျပ်အတည်းနဲ့ Nimitz ရင်ဆိုင်ရချိန်" ( နိုင်းနိုင်းစနေ ဘာသာပြန်သည်။ )
-----------------------------------------
၁၉၄၁ခုနှစ် ဒီဇင်ဘာလ ၇ရက်နေ့မှာ တေးဂီတဖြေဖျော်ပွဲရောက်နေတဲ့ Chester Nimitzဆီ အရေးပေါ်ဖုန်းဝင်လာခဲ့တယ်။ ဖုန်းဆက်သူက အမေရိကန်သမ္မတ Rooseveltဖြစ်တယ်။ သမ္မတဟာ ဖုန်းတစ်ဘက်ကနေ လေးပင်တည်ကြည်တဲ့အသံနဲ့ “ငါတို့ရဲ့ ပုလဲဆိပ်ကမ်းက ဂျပန်တွေရဲ့ ဗုံးကြဲတိုက်ခိုက်တာကို ခံလိုက်ရပြီ။ ငါတို့ရဲ့ပစ္စဖိတ်ရေတပ်သဘောင်္စုဟာ အသက်အန္တရာယ်နဲ့ ရင်ဆိုင်နေရတယ်။ ခင်ဗျားကို ပစ္စဖိတ်ရေတပ်သဘောင်္ရဲ့အုပ်ချုပ်သူအရာရှိအဖြစ် ကျုပ်ခန့်အပ်လိုက်ပြီ။ ဒီရေတပ်ကို ခင်ဗျားကယ်တင်နိုင်မယ်လို့ ကျုပ်ယုံကြည်ပါတယ်”

ပုလဲဆိပ်ကမ်းက ပျက်စီးဆုံးရှုံးစာရင်းကောက်ယူထားတဲ့စစ်တမ်း Nimitz လက်ထဲရောက်လာခဲ့တယ်။ သူ မဖတ်ရက်ခဲ့ပါဘူး။ သဘောင်္ကြီး ၇စင်းနစ်မြုပ်သွားတယ်။ ၆စင်း ပျက်စီးသွားတယ်။ လေယာဉ်အစင်း ၄၅ဝပျက်စီးသွားတယ်။ သေဆုံးသူပေါင်း ၃၈ဝဝ… ဒါဟာ အဆိုးဝါးဆုံး မဟုတ်ခဲ့ပါဘူး။ အဆိုးဝါးဆုံးက စစ်သားနဲ့ပြည်သူတွေရဲ့ရင်ထဲက မောင်းထုတ်မပစ်နိုင်ခဲ့တဲ့ ကြေကွဲမှုနဲ့ မျှော်လင့်ချက်မဲ့တဲ့ခံစားချက်တွေဖြစ်တယ်။

Nimitz ဟာ သမ္မတဆီဖုန်းဆက်ပြီး “လူအများက ဆိုးဝါးမှုကို ပြင်းပြင်းထန်ထန်ခံစားနေကြတယ်။ ဂျပန်တွေက သိပ်အင်အားကြီးပြီး အမေရိကန်က ဘုရားသခင်ရဲ့စွန့်ပစ်ခြင်းကို ခံလိုက်ရပြီလို့ သူတို့ထင်နေကြတယ်။ ကျွန်တော်လုပ်ရမယ့် အရေးအကြီးဆုံးအချက်က သူတို့အတွက် တိမ်ညိုတွေကြားမှာ ပုန်းအောင်းနေတဲ့ အလင်းရောင်ကိုရှာတွေ့နိုင်အောင် ကူညီဖို့ဖြစ်တယ်”။

ခရစ္စမတ်အကြိုညမှာ သေချာစေ့စပ်စွာပြင်ဆင်ပြီးနောက် Nimitz ဟာ စိတ်ဓာတ်ကျနေတဲ့ စစ်သားတွေကို ခရစ္စမတ်ဟောပြောပွဲတစ်ခု ပြုလုပ်ခဲ့တယ်။

“ဘုရားသခင်ဟာ ငါတို့ရဲ့အမေရိကန်နိုင်ငံကို ဒီလိုကောင်းချီးမင်္ဂလာပေး စောင့်ရှောက်ခဲ့ပါတယ်။ ဘုရားသခင်ဟာ အစီစဉ်တကျရေးဆွဲပြီးတိုက်ခိုက်တဲ့ ဂျပန်တို့ရဲ့တိုက်ခိုက်မှုကို အနည်းဆုံး အမှားသုံးခုကျူးလွန်စေခဲ့ပါတယ်။ တကယ်လို့ ဒီအမှားသုံးခုထဲကတစ်ခုကို ဂျပန်တွေသာ မကျူးလွန်ခဲ့မိရင် ပစ္စဖိတ်ရေတပ်သဘောင်္စုဟာ ဆက်လက်တည်ရှိနေတော့မှာ မဟုတ်ပါဘူး။ အခုကြည့်စမ်း.. မင်းတို့.. ငါတို့.. ဒီပစ္စဖိတ်ရေတပ်က ဒီနေရာမှာ ရပ်နေပါသေးတယ်”။

Nimitzရဲ့ စကားအဖွင့်က တက်ရောက်လာသူတွေအားလုံးကို ဖမ်းစားထားပါတယ်။ လူတိုင်းဟာ စကားတစ်လုံးတစ်လေ မကြားလိုက်မှာစိုးတဲ့အလား နားရွက်ကိုထောင်ပြီး စူးစိုက်နားထောင်နေကြတယ်။ Nimitz ဆက်လက်ဟောပြောပါတယ်။

“ပထမအမှားက ဂျပန်တွေဟာ ဗုံးကြဲတိုက်ခိုက်ချိန်ကို တနင်္ဂနွေနေ့မနက်မှာ သတ်မှတ်ခဲ့တယ်။ တိုက်တိုက်ဆိုင်ဆိုင် ဒီနေ့မှာပဲ.. ရက်သတ္တပတ်မှာ ဒီနေ့မှာပဲ စစ်သား၁ဝယောက်မှာ ၉ယောက်လောက်က သဘောင်္ပေါ်မှာရှိမနေခဲ့ပါဘူး။ ဟာဝိုင်ရီရဲ့တစ်နေရာရာမှာ သူတို့အပန်းဖြေအနားယူနေကြပါတယ်။ တကယ်လို့ ဒီနေ့သာမဟုတ်ခဲ့ရင် လူအသေအပျောက်ဟာ (၃၈ဝဝ)ယောက်မဟုတ်ဘဲ (၃၈ဝဝဝ)ယောက်ဖြစ်သွားနိုင်ပါတယ်”။

လူတွေအားလုံး ခေါင်းညိတ်ထောက်ခံကြတယ်။ Nimitz ဆက်ပြောပါတယ်။

“ဒုတိယအမှားက ဂျပန်တွေဟာ သဘောင်္ကိုပဲဗုံးကြဲဖျက်ဆီးခဲ့တယ်။ သဘောင်္ကျင်းကို မဖျက်ဆီးခဲ့ပါဘူး။ တကယ်လို့ သဘောင်္ကျင်းသာဖျက်ဆီးခံခဲ့ရရင် ငါတို့ရဲ့ကျန်ရှိနေတဲ့သဘောင်္တွေ ကမ်းကပ်ရပ်နားလို့ရမှာမဟုတ်ဘူး။ ပျက်စီးသွားတဲ့သဘောင်္အများကိုလည်း ပြင်ဆင်ဖို့နေရာရှိမှာမဟုတ်ဘူး။ ဒီသဘောင်္ကျင်းသာမရှိရင် ဒီသဘောင်္တွေကို မိုင်ပေါင်းထောင်ကျော်ကနေရပ်ဆီ ဆွဲပြီးသွားပြင်မလား။ ဂျပန်တွေဟာ ငါတို့ကို ဒီလောက်ကြာတဲ့အချိန်တွေ ပေးမှာမို့လား”။

လူအုပ်ကြားမှာ လက်ခုပ်သံတွေ လွှင့်ပြန့်လာခဲ့တယ်။ Nimitz က အားတက်သရောနဲ့ ဆက်ပြောပါတယ်။

“တတိယအမှားက ဂျပန်တွေဟာ ငါတို့အတွက် ကိုယ့်ကိုယ်ကိုကာကွယ်ဖို့နဲ့ ကလဲ့စားချေဖို့ အဓိကလိုအပ်တဲ့ “သွေး”ကိုထားခဲ့ပါတယ်။ အဲဒီသွေးက လောင်စာဆီပဲဖြစ်ပါတယ်။ လောင်စာဆီလှောင်ကန်ဟာ သဘောင်္ကျင်းနဲ့ငါးမိုင်အကွာ တောင်ထိပ်မှာရှိပါတယ်။ အဲဒီတုန်းကအခြေအနေအရ ဂျပန်လေယာဉ်တစ်စီးလေးနဲ့တင် အဲဒီလှောင်ကန်ကို ဆီတစ်စက်မှမကျန်အောင် ဗုံးကြဲဖျက်ဆီးပစ်နိုင်ပါတယ်။ ဒီလိုဆိုရင် ငါတို့ရဲ့သဘောင်္နဲ့လေယာဉ်တွေဟာ ဘာမှလုပ်လို့မရတဲ့ အသုံးမဝင်တဲ့သံပုံကြီး ဖြစ်သွားပါလိမ့်မယ်”။

ဒီနေရာအရောက်မှာ Nimitzဟာ အသံကိုမြှင့်ပြီး နှိုးဆွတဲ့လေသံနဲ့ “ဂျပန်တွေဟာ ဘာကြောင့် ဒီလောက်အမှားတွေ ကျူးလွန်ခဲ့သလဲ။ တစ်ခွန်းပဲ ရှင်းပြရရင်… ဘုရားသခင်ဟာ ငါတို့ကို ကူညီနေတာပါပဲ။ ဒါကြောင့် ဘုရားသခင်က ငါတို့ကို မစွန့်ပစ်သေးဘူး။ ငါတို့နဲ့ အတူတူရှိနေပါတယ်”

လူအုပ်ကြားက လက်ခုပ်သံတွေ မိုးခြိမ်းသံအလား
မြည်ဟိန်းထွက်လာခဲ့တယ်.. အချိန်တော်တော်ကြာကြာ စဲမသွားခဲ့ဘူး။

တစ်လအကြာ Nimitzရဲ့စီမံကွပ်ကဲမှုအောက်မှာ အမေရိကန်ရေတပ်ဟာ ဂျပန်တွေထိန်းချုပ်ထားတဲ့ Marshall နဲ့ Gilbert ကျွန်းကို ရုတ်တရက် ဝင်ရောက်တိုက်ခိုက်ခဲ့တယ်။ ဂျပန်သဘောင်္(၈)စင်းကို နစ်မြှုပ်ပစ်နိုင်ခဲ့တယ်။ ဒါဟာ ဒုတိယကမ္ဘာစစ်အတွင်း အမေရိကန်ရေတပ်ရဲ့ ပထမဆုံးအောင်ပွဲဖြစ်ပါတယ်။ အဲဒီကစ အမေရိကန်စစ်တပ်ရဲ့ ကျရှုံးနေတဲ့စိတ်ဓာတ်ဟာ တစ်ဖန်တက်ကြွနိုးကြားလာခဲ့တော့တယ်။

သမ္မတ Rooseveltဟာ ကပ်ဘေးကျရောက်ချိန်မှာ Nimitzကိုသုံးဖို့ ပြတ်ပြတ်သားသားရွေးချယ်ခဲ့တယ်။ ဒါကို နောက်ပိုင်းမှာ လူတွေက ဒီလိုဝေဖန်တန်ဖိုးဖြတ်ခဲ့ပါတယ်။

“Nimitzဟာ အကောင်းမြင်ဝါဒီတစ်ဦးဆိုတာကို သမ္မတသိထားလို့.. အကောင်းမြင်ဝါဒီဆိုတာကလည်း စုံလုံးကန်း အကောင်းမြင်ဝါဒီသမားမဟုတ်ဘူး။ တကယ်တမ်းမှာ Nimitzရဲ့အကောင်းမြင်ဟာ မျှော်လင့်ချက်နဲ့ စူးရှထက်မြက်တဲ့ ထိုးထွင်းသိမြင်ဉာဏ်ပေါ်မှာ တည်ဆောက်ထားတာပါ။ ဒါကြောင့် လူတွေအပေါ် ပိုလွှမ်းမိုးနိုင်၊ ပိုလှုံ့ဆော်နိုင်ခဲ့တာဖြစ်တယ်။ သမ္မတ Rooseveltဟာ သင့်တော်တဲ့အချိန်မှာ သင့်တော်တဲ့လူတစ်ယောက်ကို
ရွေးချယ်အသုံးပြုခဲ့တယ်ဆိုတာ သမိုင်းက သက်သေပဲဖြစ်ပါတယ်”။

(Chester William Nimitz，၁၈၈၅ခုနှစ် ဖေဖော်ဝါရီလ ၂၄ရက်--၁၉၆၆ခုနှစ် ဖေဖော်ဝရီလ ၂ဝရက်) အမေရိကန်ရေတပ် ကြယ်ငါးပွင့်ရ စစ်သေနာပတိ)

မူရင်း တည်းဖြတ်ရေးသားသူ-- Yin Yu Sheng

မူရင်းလင့်-- http://wenku.baidu.com/view/92f00727ccbff121dd36835f.html

နိုင်းနိုင်းစနေ (Nov.1.2013)
------------------
creditး မူရင်းစာရေးသူ Yin Yu Sheng နှင့် ဘာသာပြန်သူ ဆရာမ နိုင်းနိုင်းစနေ
ပုံကို Google Images မှကူးယူပါသည်။ ( Fireflies )